Accessibility setting

De ogbè dopo

Yì hosọ flinflin lẹ ji

Yì todowhinnu hosọ lẹ tọn ji

Yì hosọ lẹ ji

Kunnudetọ Jehovah Tọn Lẹ

Gungbe

Biblu Intẹnẹt Ji Tọn

OWE WIWE LẸ—LẸDOGBEDEVOMẸ AIHỌN YỌYỌ TỌN

2 Otànnugbo lẹ 16:1-14

NUHE E BẸHẸN LẸ

  • Gbekọndopọ Asa tọn hẹ Silia (1-6)

  • Hanani wọhẹ Asa (7-10)

  • Asa kú (11-14)

16  To owhe 36tọ gandudu Asa tọn mẹ, Ahọlu Baaṣa+ Islaeli tọn hẹji wá nado hoavùn hẹ Juda bo jẹ Lama+ gbá ji* nado glọnalina mẹdepope he jlo na tọ́nyi kavi wá* Ahọlu Asa Juda tọn dè.+  Enẹwutu, Asa bẹ fataka po sika po sọn adọkunnu sẹdotẹn he to ohọ̀ Jehovah tọn+ mẹ podọ to owhé* ahọlu tọn gbè bo do yé hlan Ahọlu Bẹni-hadadi Silia+ tọn he nọ nọ̀ Damasku bosọ dọmọ:  “Gbekọndopọ* de tin to yẹn po hiẹ po ṣẹnṣẹn podọ to otọ́ ṣie po otọ́ towe po ṣẹnṣẹn. Yẹn to fataka po sika po dohlan we. Wá, sánkanna gbekọndopọ* he to hiẹ po Ahọlu Baaṣa Islaeli tọn po ṣẹnṣẹn, na ewọ nido joagọ sọn dè e.”  Bẹni-hadadi sọ dotoaina nuhe Ahọlu Asa dọ bo do awhàngán etọn lẹ hlan sọta tòdaho Islaeli tọn lẹ, yé sọ gbawhàn Ijọni,+ Dani,+ Abẹli-maimi po agbànhọ he to tòdaho Naftali+ tọn lẹ mẹ lẹpo po tọn.  Whenue Baaṣa sè ehe, e jo Lama gbigbá do* to afọdopolọji bo doalọtena azọ́n he wà e te to finẹ.  Ahọlu Asa sọ pli Juda pete, bọ yé bẹ zannu po owhlẹ he Baaṣa ko yí do to azọ́nwa+ to Lama+ lẹ po sẹ̀, e sọ yí yé do dó Geba*+ po Mizpa+ po.  Whenẹnu wẹ Hanani+ numọtọ lọ wá Ahọlu Asa Juda tọn dè bo dọna ẹn dọmọ: “Na hiẹ ganjẹ ahọlu Silia tọn go bo ma ganjẹ Jehovah Jiwheyẹwhe towe go wutu, awhànpa ahọlu Silia tọn ko họ̀ngán sọn alọ towe mẹ.+  Be e ma yin awhànpa daho tlala he tindo osọ́-kẹkẹ po osọ́nọ susu po wẹ Etiopianu lẹ po Libianu lẹ po yin ya? Ṣogan, na hiẹ ko ganjẹ Jehovah go wutu, ewọ jo yé do alọ towe mẹ.+  Na nukun Jehovah tọn nọ to yìyì pé gbọn aigba lẹpo ji+ nado do huhlọn* etọn hia do mẹhe nọ yí ahun pipé de do sẹ̀n* ẹn lẹ tamẹ.+ Hiẹ ko yinuwa po nulú po to whẹho ehe mẹ; sọn din sọyi, awhàn na nọ tin sọta we.”+ 10  Ṣigba, Asa gblehomẹ do numọtọ lọ go bo sù i do gànpamẹ,* na adi etọn do e taun to whẹho ehe mẹ wutu. To ojlẹ dopolọ mẹ, Asa sọ jẹ hùnylan do mẹdevo lẹ go ji to gbẹtọ lọ lẹ mẹ. 11  Todin, otàn Asa tọn, sọn bẹjẹeji kakajẹ vivọnu yin kinkan do Owe Ahọlu Juda po Islaeli po tọn lẹ tọn mẹ.+ 12  To owhe 39tọ gandudu etọn tọn mẹ, Asa bẹ afọ-zọ̀n de kaka bọ e wá lẹzun awutu sinsinyẹn; etlẹ yin to azọ̀njijẹ etọn whenu, e ma lẹhlan Jehovah, adavo azọ̀nhẹngbọtọ lẹ. 13  To godo mẹ, Asa yin hinhẹn nado mlọnai hẹ tọgbo etọn lẹ;+ e kú to owhe 41tọ gandudu etọn tọn mẹ. 14  Yé sọ dì i do yọdò daho he e ko kùn na ede lọ mẹ to Tòdaho Davidi tọn+ mẹ, podọ yé tẹ́ ẹ do apotinjan de ji, ehe ko yin hinhẹn gọ́ na amì balsami* tọn po nuwhẹ́nkun wunmẹ voovo lẹ po he yin ṣiṣakadopọ nado wleawuna nuyọnwan vonọtaun de.+ Humọ, yé hẹn miyọ́n ṣiọdidi tọn daho tlala de ji do ota etọn mẹ.*

Nudọnamẹ Odò Tọn

Kavi “jẹ adó gángán do lẹdo Lama ji; jẹ Lama vọ́ gbá ji.”
Kavi “na tọ́n sọn kavi wá aigba.”
Kavi “họ̀nmẹ.”
Kavi “Alẹnu.”
Kavi “alẹnu.”
Kavi “jo adó gángán dido lẹdo Lama do; Lama vivọgbá do.”
Kavi “dó adó gángán lẹdo Geba; vọ́ Geba gbá.”
Kavi “godonọnamẹ.”
Kavi “nọ ze yede jo pete na.”
To paa mẹ, “do ohọ̀ osópò lẹ tọn mẹ.”
Pọ́n Zẹm.
E họnwun dọ, e ma yin oṣiọ Asa tọn wẹ yin fifiọ, ṣigba nuwhẹ́nkun lẹ wẹ.