Accessibility setting

De ogbè dopo

Yì hosọ flinflin lẹ ji

Yì todowhinnu hosọ lẹ tọn ji

Yì hosọ lẹ ji

Kunnudetọ Jehovah Tọn Lẹ

Gungbe

Biblu Intẹnẹt Ji Tọn

OWE WIWE LẸ—LẸDOGBEDEVOMẸ AIHỌN YỌYỌ TỌN

2 Otànnugbo lẹ 13:1-22

NUHE E BẸHẸN LẸ

  • Abija, ahọlu Juda tọn (1-22)

    • Abija gbawhàn Jeloboami tọn (3-20)

13  To owhe 18tọ Ahọlu Jeloboami tọn mẹ, Abija lẹzun ahọlu Juda tọn.+  E dugán to Jelusalẹm na owhe atọ̀n. Oyín onọ̀ etọn tọn wẹ Mikaia,+ yèdọ viyọnnu Uliẹli he wá sọn Gibea+ lọ tọn. Awhàn sọ tin to Abija po Jeloboami po ṣẹnṣẹn.+  Abija sọ yì awhàngbenu po awhànpa de po he bẹ awhànfuntọ huhlọnnọ 400 000 he yin azọ́nplọn* lẹ hẹn.+ Jeloboami sọ to awhànpa etọn kannukannu nado hoavùn sọta ẹ po awhànfuntọ huhlọnnọ 800 000 he yin azọ́nplọn* lẹ po.  Todin, Abija ṣite to Osó Zemalaimi ji, ehe to lẹdo osó tọn Eflaimi tọn mẹ, bo dọmọ: “Jeloboami po Islaeli pete po emi, mì dotó.  Be mì ma yọnẹn dọ Jehovah Jiwheyẹwhe Islaeli tọn ko gbọn alẹnu ojẹ̀ tọn*+ de dali na ahọluduta de Davidi do Islaeli ji kakadoi,+ yèdọ na ewọ po visunnu etọn lẹ+ po wẹ ya?  Ṣigba, Jeloboami+ visunnu Nebati tọn, yèdọ devizọnwatọ Sọlomọni visunnu Davidi tọn ko fọ́n bo ṣiatẹ sọta oklunọ etọn.+  Podọ sunnu nuvọ́nọ he ma tindo azọ́n de nado wà lẹ fọ́n bo to yede bẹpli dopọ hẹ ẹ. Yé sọ duto Lehoboami visunnu Sọlomọni tọn ji to whenue Lehoboami gbẹ́ yin jọja bo ma tindo adọgbigbo, bọ ewọ ma penugo nado jlẹ́te hẹ yé.  “Todin, mìwlẹ lẹndọ mì sọgan jlẹ́te hẹ ahọluduta Jehovah tọn he yin zizedo alọmẹ na visunnu Davidi tọn lẹ, na mì yin gbẹtọgun daho de bọ oyìnvu sika tọn he Jeloboami ko yí do basi yẹwhe na mì lẹ sọ to mì si wutu.+  Be mì ma ko yàn yẹwhenọ Jehovah tọn+ lẹ, yèdọ kúnkan Aalọn tọn lẹ po Levinu lẹ po sẹ̀ ya, podọ be mì ma ko de yẹwhenọ mìtọn titi lẹ kẹdẹdile omẹ otò devo lẹ tọn lẹ nọ wà do ya?+ Mẹdepope he hẹn oyìnsú winyanwinyan de po agbò ṣinawe po wá* wẹ sọgan lẹzun yẹwhenọ na nuhe ma tlẹ yin yẹwhe lẹ. 10  Na míwlẹ tọn, Jehovah wẹ Jiwheyẹwhe mítọn,+ podọ mí ma ko gbẹ́ ẹ dai; yẹwhenọ mítọn lẹ, yèdọ kúnkan Aalọn tọn lẹ nọ yilizọn na Jehovah bọ Levinu lẹ nọ gọalọna yé to azọ́n yetọn mẹ. 11  Yé nọ basi avọ́nunina mimẹ̀ lẹ bo nọ mẹ̀ nuyọnwan owán gblingblinnọ+ lẹ hlan Jehovah to afọnnu lẹpo podọ to whèjai lẹpo,+ akla he nọ yin tito do gọnu-gọnu*+ sọ to tafo sika akú tọn lọ ji, yé sọ nọ tá miyọ́ngbán-tin sika tọn+ lọ po miyọ́ngbán etọn lẹ po to whèjai lẹpo,+ na mí to azọngban mítọn hẹndi hlan Jehovah Jiwheyẹwhe mítọn wutu; ṣigba mìwlẹ ko gbẹ́ ẹ dai. 12  Todin, mì pọ́n! Jiwheyẹwhe nugbo lọ tin hẹ mí bo to anadena mí, gọna yẹwhenọ etọn lẹ he hẹn opẹ̀n nulila tọn lẹ nado kún yé do ylọ gbẹtọ lẹ pli na awhàn sọta mì. Sunnu Islaeli tọn lẹ emi, mì hoavùn sọta Jehovah Jiwheyẹwhe tọgbo mìtọn lẹ tọn blo, na e ma na pà mì.”+ 13  Ṣigba, Jeloboami do gbẹtọ lẹ hlan nado tọ̀wu dai bo tọ́n do yé ji sọn godo, bọ ewọ po awhànpa etọn po pannukọn omẹ Juda tọn lẹ dile mẹhe tọ̀wu dai lọ lẹ to godo yetọn. 14  Whenue omẹ Juda tọn lẹ lilẹ́, yé mọdọ yé dona funawhàn to nukọn po godo po. Enẹwutu, yé jẹ awhádo ylọ Jehovah ji,+ dile yẹwhenọ lẹ to opẹ̀n kún gángán. 15  Omẹ Juda tọn lẹ sọ yí ogbè lélé do dawhá awhàn tọn, bọ whenue omẹ Juda tọn lẹ dawhá awhàn tọn lọ, Jiwheyẹwhe nugbo lọ gbawhàn Jeloboami po Islaeli pete po tọn to Abija po Juda po nukọn. 16  Islaelivi lẹ họnyi sọn Juda nukọn, Jiwheyẹwhe sọ jo yé do alọ yetọn mẹ. 17  Abija po omẹ etọn lẹ po hù yé badabada, bọ omẹ Islaeli tọn lẹ to yinyin hùhù mapote, yèdọ sunnu 500 000 he ko yin azọ́nplọn.* 18  Gbọnmọ dali, omẹ Islaeli tọn lẹ duwinyan to ojlẹ enẹ mẹ, ṣigba omẹ Juda tọn lẹ duto yé ji, na yé ganjẹ Jehovah Jiwheyẹwhe tọgbo yetọn lẹ tọn go wutu.+ 19  Abija dómọna Jeloboami klinkán-klinkán bo yí tòdaho lẹ sọn e si, yèdọ Bẹtẹli+ po tòpẹvi he to oglọ na ẹn* lẹ po, Jeṣana po tòpẹvi he to oglọ na ẹn lẹ po, podọ Eflaini+ po tòpẹvi he to oglọ na ẹn lẹ po. 20  Jeloboami masọ gọ̀ huhlọn etọn dai tọn mọyi gbede ba to ojlẹ Abija tọn mẹ; enẹgodo Jehovah linú in bọ e kú.+ 21  Ṣigba, huhlọn Abija tọn jideji. To nukọn mẹ, e dà asi 14+ bo ji visunnu 22 podọ viyọnnu 16. 22  Otàn Abija tọn he pò, yèdọ nuhe e wà lẹ po ohó he e dọ lẹ po yin kinkan do kandai* yẹwhegán Ido tọn lẹ mẹ.+

Nudọnamẹ Odò Tọn

To paa mẹ, “dide.”
To paa mẹ, “dide.”
Enẹ wẹ, alẹnu tẹgbẹ tọn he ma sọgan yin didiọ.
To paa mẹ, “wá nado hẹn alọ etọn gọ́.”
Enẹ wẹ, akla sọhia tọn.
To paa mẹ, “dide.”
Kavi “he lẹdo e pé.”
Kavi “zẹẹmẹ.”