Accessibility setting

De ogbè dopo

Yì hosọ flinflin lẹ ji

Yì todowhinnu hosọ lẹ tọn ji

Yì hosọ lẹ ji

Kunnudetọ Jehovah Tọn Lẹ

Gungbe

Biblu Intẹnẹt Ji Tọn

OWE WIWE LẸ—LẸDOGBEDEVOMẸ AIHỌN YỌYỌ TỌN

2 Otànnugbo lẹ 12:1-16

NUHE E BẸHẸN LẸ

  • Ṣiṣaki tọ́nawhàn Jelusalẹm (1-12)

  • Gandudu Lehoboami tọn fó (13-16)

12  Tlolo he gandudu Lehoboami tọn ko yin hinhẹn lodo gligli+ bọ e ko lẹzun huhlọnnọ godo, e gbẹkọ Osẹ́n Jehovah tọn go,+ Islaeli pete sọ hopódona ẹn.  To owhe atọ́ntọ Ahọlu Lehoboami tọn mẹ, Ahọlu Ṣiṣaki+ Egipti tọn hẹji wá nado hoavùn hẹ Jelusalẹm, na yé ko yinuwa hẹ Jehovah po nugbonọ-mayin po wutu.  Ewọ tindo osọ́-kẹkẹ 1200, osọ́nọ 60 000 gọna awhànfuntọ madosọha lẹ he hodo e wá sọn Egipti—yèdọ Libianu lẹ, Sukimi lẹ po Etiopianu+ lẹ po.  E sọ yí tòdaho gángán Juda tọn lẹ bo wá jẹ Jelusalẹm to godo mẹ.  Ṣemaia+ yẹwhegán lọ wá Lehoboami po ahọvi Juda tọn he ko bẹ yede pli do Jelusalẹm na Ṣiṣaki wutu lẹ po dè bo dọna yé dọmọ: “Nuhe Jehovah dọ die, ‘Mìwlẹ ko jo mi do, enẹwutu wẹ yẹnlọsu do jo mì do+ alọ Ṣiṣaki tọn mẹ.’”  Whenẹnu wẹ ahọvi Islaeli tọn lẹ po ahọlu lọ po whiwhẹ yede+ bo dọmọ: “Dodonọ wẹ Jehovah.”  Whenue Jehovah mọdọ yé ko whiwhẹ yede, ohó Jehovah tọn wá Ṣemaia dè dọmọ: “Yé ko whiwhẹ yede. Yẹn ma na và yé sudo,+ podọ to madẹnmẹ din yẹn na whlẹn yé. Yẹn ma na kọ̀n homẹgble ṣie jẹgbonu do Jelusalẹm ji gbọn Ṣiṣaki gblamẹ.  Ṣigba, yé na lẹzun devizọnwatọ etọn lẹ, na yé nido yọ́n vogbingbọn he tin to devizọnwiwa na mi po devizọnwiwa na ahọlu* otò devo lẹ tọn lẹ po ṣẹnṣẹn.”  To whenẹnu, Ahọlu Ṣiṣaki Egipti tọn hẹji wá nado hoavùn hẹ Jelusalẹm. E bẹ adọkunnu he to ohọ̀ Jehovah tọn+ mẹ lẹ po adọkunnu he to owhé* ahọlu tọn gbè lẹ po. Nulẹpo wẹ e bẹ yì, kakajẹ awọ̀yinu sika tọn he Sọlomọni ko basi lẹ ji.+ 10  Enẹwutu, Ahọlu Lehoboami basi awọ̀yinu gànvẹẹ tọn lẹ do otẹn yetọn mẹ bo bẹ yé do alọmẹ na ogán nuhọ́tọ* lẹ tọn lẹ he nọ ṣọ́ họntonu owhé ahọlu tọn. 11  Nuhọ́tọ lọ lẹ nọ hẹn yé wá to whedepopenu he ahọlu wá ohọ̀ Jehovah tọn mẹ, bosọ nọ gọ̀ yé do abò nuhọ́tọ lẹ tọn mẹ to enẹgodo. 12  Na ahọlu lọ whiwhẹ ede wutu, homẹgble Jehovah tọn lilẹ́ sọn e ji,+ bọ ewọ ma và yé sudo mlẹnmlẹn.+ Humọ, nudagbe delẹ sọ yin mimọ to Juda.+ 13  Ahọlu Lehoboami hẹn otẹn etọn lodo to Jelusalẹm bo zindonukọn nado to gandu; owhe 41 wẹ Lehoboami tindo to whenue e lẹzun ahọlu, e sọ dugán na owhe 17 to Jelusalẹm, yèdọ tòdaho he Jehovah ko de to hẹnnu Islaeli tọn lẹpo mẹ nado ze oyín etọn do e ji. Oyín onọ̀ ahọlu lọ tọn wẹ Naama Amọninu+ lọ. 14  Ṣigba, e wà nuylankan lẹ, na e ma magbe to ahun etọn mẹ nado dín Jehovah wutu.+ 15  Na nuhe dù otàn Lehoboami tọn, sọn bẹjẹeji kakajẹ vivọnu, be e ma yin kinkan do kandai Ṣemaia+ yẹwhegán lọ po Ido+ numọtọ lọ po tọn lẹ mẹ to todohukanji kúnkan lẹ tọn mẹ ya? Awhàn sọ gbọṣi aimẹ to Lehoboami po Jeloboami po ṣẹnṣẹn.+ 16  Enẹgodo, Lehoboami yin hinhẹn nado mlọnai hẹ tọgbo etọn lẹ bo yin dìdì do Tòdaho Davidi tọn+ mẹ; visunnu etọn Abija+ sọ lẹzun ahọlu do otẹn etọn mẹ.

Nudọnamẹ Odò Tọn

To paa mẹ, “ahọluduta.”
Kavi “họ̀nmẹ.”
To paa mẹ, “wezundotọ.”