Accessibility setting

De ogbè dopo

Yì hosọ flinflin lẹ ji

Yì todowhinnu hosọ lẹ tọn ji

Yì hosọ lẹ ji

Kunnudetọ Jehovah Tọn Lẹ

Gungbe

Biblu Intẹnẹt Ji Tọn

OWE WIWE LẸ—LẸDOGBEDEVOMẸ AIHỌN YỌYỌ TỌN

2 Otànnugbo lẹ 1:1-17

NUHE E BẸHẸN LẸ

  • Sọlomọni biọ nuyọnẹn (1-12)

  • Adọkun Sọlomọni tọn (13-17)

1  Sọlomọni visunnu Davidi tọn fọ́n bo to huhlọn tindo dogọ to gandudu etọn mẹ, Jehovah Jiwheyẹwhe etọn sọ tin hẹ ẹ bo hẹn ẹn klo tlala.+  Sọlomọni dowẹn hlan Islaeli pete, yèdọ ogán omẹ fọtọ́n lẹ tọn lẹ po omẹ kanweko lẹ tọn lẹ po, whẹdatọ lẹ, gọna ahọvi Islaeli tọn lẹpo, enẹ wẹ nukọntọ whédo otọ́ yetọn lẹ tọn lẹ.  Enẹgodo, Sọlomọni po agun lọ blebu po yì ofi yiaga he to Gibeọni lọ,+ na finẹ wẹ gòhọ opli tọn Jiwheyẹwhe nugbo lọ tọn te, yèdọ gòhọ he Mose devizọnwatọ Jehovah tọn ko basi to danfafa ji lọ.  Ṣigba, Davidi ko hẹn Apotin Jiwheyẹwhe nugbo lọ tọn hẹji sọn Kiliati-jealimi+ wá nọtẹn he Davidi ko wleawudaina ẹn lọ; ewọ ko pẹ́n gòhọ de dai na ẹn do Jelusalẹm.+  Podọ agbà gànvẹẹ tọn+ he Bezalẹli+ visunnu Uli he yin visunnu Huuli tọn wleawuna lọ ko yin zizedo gòhọtúntún Jehovah tọn nukọn; Sọlomọni po agun lọ po sọ nọ hodẹ̀ to nukọn etọn.*  Todin, Sọlomọni basi avọ́nunina lẹ to finẹ to Jehovah nukọn, e sọ yí kanlin 1 000 do basi avọ́nunina mimẹ̀ lẹ to agbà gànvẹẹ tọn+ gòhọ opli tọn lọ tọn ji.  To ozán enẹ mẹ, Jiwheyẹwhe sọawuhia Sọlomọni bo dọna ẹn dọmọ: “Biọ nuhe hiẹ jlo dọ yẹn ni na we.”+  To whenẹnu, Sọlomọni dọna Jiwheyẹwhe dọmọ: “Hiẹ ko do owanyi nugbo daho hia Davidi+ otọ́ ṣie, hiẹ ko sọ hẹn mi zun ahọlu do otẹn etọn mẹ.+  Todin, Jehovah Jiwheyẹwhe E, gbọ opagbe he a do na Davidi otọ́ ṣie ni mọ hẹndi,+ na hiẹ ko yí mi do doahọlu do akọta de ji he sù taidi kọ́gudu aigba tọn.+ 10  Jaale, na mi nuyọnẹn po oyọnẹn po+ nado deanana omẹ ehelẹ,* na mẹnu wẹ sọgan penugo nado dawhẹ to omẹ towe susugege ehelẹ ṣẹnṣẹn?”+ 11  Jiwheyẹwhe sọ dọna Sọlomọni dọmọ: “Na ehe wẹ jlo we sọn ahun mẹ wá wutu, bọ hiẹ ma biọ adọkun, nutindo agbasa tọn lẹ po gbégbò po, kavi okú* mẹhe gbẹwanna we lẹ tọn, mọ a masọ biọ gbẹ̀gaa,* ṣigba a biọ nuyọnẹn po oyọnẹn po nado sọgan dawhẹ to omẹ ṣie he ji yẹn ko yí we do doahọlu do lẹ ṣẹnṣẹn,+ 12  nuyọnẹn po oyọnẹn po na yin nina we; ṣigba yẹn nasọ na we adọkun po nutindo agbasa tọn lẹ po, gọna gbégbò he nkọ ahọlu he jẹnukọnna we depope ma ko tindo pọ́n podọ depope ma na wá tindo to godo towe.”+ 13  Whenẹnu, Sọlomọni jẹte sọn ofi yiaga he to Gibeọni lọ,+ yèdọ sọn gòhọ opli tọn lọ kọ̀n wá Jelusalẹm; e sọ dugán do Islaeli ji. 14  Sọlomọni to osọ́-kẹkẹ lẹ po osọ́* lẹ po bẹpli mapote; e tindo osọ́-kẹkẹ 1 400 po osọ́* 12 000+ po, e sọ bẹ yé do tòdaho osọ́-kẹkẹ lẹ tọn+ mẹ sẹpọ fie ahọlu te to Jelusalẹm.+ 15  Ahọlu hẹn fataka po sika po sù tlala to Jelusalẹm taidi zannu,+ bọ atin kedali tọn sù tlala taidi atin sikomoli tọn to Ṣefela.+ 16  Osọ́ Sọlomọni tọn lẹ nọ yin hinhẹnwa sọn Egipti,+ podọ ogbẹ́ ajọwatọ ahọlu tọn lẹ tọn nọ họ̀ osọ́ susu dopọ ji* yin akuẹ tangan de.+ 17  Dopodopo osọ́-kẹkẹ he yin hinhẹnwa sọn Egipti lẹ tọn nọ họ̀ fataka-kuẹ 600, bọ osọ́ dopo nọ họ̀ fataka-kuẹ 150; yelọsu nọ sà yé na ahọlu Hetinu lẹ tọn lẹpo po ahọlu Silia tọn lẹ po.

Nudọnamẹ Odò Tọn

Kavi “nọ kanhose E to finẹ.”
To paa mẹ, “nado nọ tọ́nyi to omẹ ehelẹ nukọn podọ nado nọ lẹkọwa.”
Kavi “alindọn.”
To paa mẹ, “azán susu.”
Kavi “osọ́nọ.”
Kavi “osọ́nọ.”
Kavi vlavo, “sọn Egipti podọ sọn Kue; ajọwatọ ahọlu tọn lẹ nọ họ̀ yé sọn Kue,” ehe sọgan ko to alọdlẹndo Silisia.