Accessibility setting

De ogbè dopo

Yì hosọ flinflin lẹ ji

Yì todowhinnu hosọ lẹ tọn ji

Yì hosọ lẹ ji

Kunnudetọ Jehovah Tọn Lẹ

Gungbe

Biblu Intẹnẹt Ji Tọn

OWE WIWE LẸ—LẸDOGBEDEVOMẸ AIHỌN YỌYỌ TỌN

2 Kọlintinu lẹ 9:1-15

NUHE E BẸHẸN LẸ

  • Mẹwhinwhàn lọ nado basi nunina (1-15)

    • Jiwheyẹwhe yiwanna nunamẹtọ homẹhunnọ (7)

9  Todin, gando lizọnyizọn* he tin na omẹ wiwe lẹ lọ go,+ e ma yin dandan na mi nado kanwehlan mì gba,  na yẹn yọ́n ojlo mìtọn, ehe mẹ yẹn to awagundo te to Makedonianu lẹ dè, dọ Akaia ko wleawufo todin sọn owhe dopo die, podọ zohunhun mìtọn ko dozolanmẹna suhugan yetọn.  Ṣigba, yẹn to mẹmẹsunnu lẹ dohlan, na awagundido mítọn gando mì go nikaa sọawuhia nado yin ovọ́ to whẹho ehe mẹ, podọ na mì nido sọgan wleawudai nugbonugbo, kẹdẹdile yẹn ko dọ do dọ mìwlẹ na wà do.  Eyin e ma yinmọ, eyin e wá jọ bọ Makedonianu lẹ hodo mi wá bo mọdọ mì ma wleawudai, mìwlẹ po mí po wẹ na duwinyan to pọmẹ na jide he mí tindo do mì go wutu.  Enẹwutu, yẹn lẹndọ dandannu wẹ e yin nado na tuli mẹmẹsunnu lọ lẹ nado wá mì dè jẹnukọn podọ nado ṣinyan nunina homẹdagbe tọn mìtọn he mì ko dopagbe etọn lọ pli dai, na ehe nido sọgan yin awuwlena dote taidi nunina alọtútlú tọn de bọ e ma na yin nuhe yin yíyí gbọn alọslonamẹ dali.  Ṣigba, gando ehe go, mẹdepope he tẹalọpò do dó nasọ tẹalọpò do gbẹ̀n, podọ mẹdepope he do susugege nasọ gbẹ̀n susugege.+  Mì gbọ mẹdopodopo ni basi kẹdẹdile e ko magbe etọn to ahun etọn mẹ do, e ma yin po awuwhiwhle po kavi po huhlọn yí do hẹnmẹ po gba,+ na Jiwheyẹwhe nọ yiwanna nunamẹtọ homẹhunnọ.+  Humọ, Jiwheyẹwhe penugo nado hẹn nukundagbe majẹhẹ etọn lẹpo sudeji dohlan mì, na mì nido nọ tindo pekọ mlẹnmlẹn to whepoponu to nulẹpo mẹ, podọ na mì nido sọgan tindo susugege nuhe mì tindo nuhudo etọn lẹ tọn nado wà azọ́n dagbe lẹpo.+  (Kẹdẹdile e ko yin kinkandai do dọmọ: “Ewọ ko má namẹ lẹdo pé;* e ko nanú wamọnọ lẹ. Dodowiwa etọn na zindonukọn kakadoi.”+ 10  Todin, Mẹlọ he nọ na okún susugege nudotọ podọ núdùdù na dùdù na na mì okún bo na hẹn ẹn sudeji nado do bo nasọ hẹn sinsẹ́n dodowiwa mìtọn tọn jideji.) 11  Mì to yinyin hinhẹn zun adọkunnọ to nulẹpo mẹ, na mì nido sọgan nọ yí alọtútlú do na to aliho lẹpo mẹ, podọ gbọn vivẹnudido mítọn lẹ gblamẹ, alọtútlú mọnkọtọn nọ whàn gbẹtọ lẹ nado dopẹna Jiwheyẹwhe; 12  na lizọnyizọn* sinsẹ̀nzọn gbangba tọn ehe ma yin nado wleawuna onú susugege na nuhudo omẹ wiwe lẹ tọn poun gba,+ ṣigba nado sudeji ga to pẹdido na Jiwheyẹwhe mẹ. 13  Gbọn kunnudenu he lizọnyizọn* kọgbọ tọn ehe nọ na lọ gblamẹ, yé pagigona Jiwheyẹwhe, na mìwlẹ litaina wẹndagbe he gando Klisti go lọ, dile mì yigbe etọn to gbangba do, podọ na mì yin alọtlútọ to nunina he mì basi hlan yé podọ hlan mẹlẹpo lọ mẹ wutu.+ 14  Podọ gbọn ovẹvivẹ do ota mìtọn mẹ dali, yé do owanyi sisosiso hia mì, na nukundagbe majẹhẹ mayọnjlẹ Jiwheyẹwhe tọn do mì ji wutu. 15  Opẹ́ wẹ na Jiwheyẹwhe na nunina vọnu mayọnjlẹ etọn.

Nudọnamẹ Odò Tọn

Kavi “alọgọ.”
Kavi “namẹ po alọtútlú po.”
Kavi “alọgọ.”
Kavi “alọgọ.”