Yì hosọ lẹ ji

Yì hosọ flinflin lẹ ji

Yì todowhinnu hosọ lẹ tọn ji

Kunnudetọ Jehovah Tọn Lẹ

Gungbe

Biblu Intẹnẹt Ji Tọn | OWE WIWE LẸ—LẸDOGBEDEVOMẸ AIHỌN YỌYỌ TỌN

2 Kọlintinu lẹ 8:1-24

NUHE E BẸHẸN LẸ

  • Akuẹjọ na Klistiani Jude tọn lẹ (1-15)

  • Titu na yin didohlan Kọlinti (16-24)

8  Todin, mẹmẹsunnu lẹ emi, mí jlo dọ mì ni yọnẹn gando nukundagbe majẹhẹ Jiwheyẹwhe tọn he ko yin nina agun Makedonia tọn lẹ lọ go.+  To whenue yé to yaji to whlepọn daho de glọ, ayajẹ yetọn he gọfla po hẹ́njijẹ sinsinyẹn yetọn po hẹn alọtútlú susugege yetọn yin daho tlala.*  Na yé wà ehe sọgbe hẹ nugopipe yetọn,+ mọwẹ, yẹn dekunnu dọ e tlẹ zẹ̀ nugopipe yetọn go,+  dile yelọsu lẹ na yede to mí vẹ̀ vẹkuvẹku mapote nado mọ lẹblanulọkẹyi lọ yí nado yí homẹdagbe do na nunina, nado tindo mahẹ to lizọnyizọn* kọgbọ tọn lọ mẹ do omẹ wiwe lẹ tamẹ.+  Podọ e ma yin kẹdẹdile míwlẹ lẹn do poun gba, ṣigba jẹnukọn whẹ́, yé ze yede jo na Oklunọ podọ na míwlẹ gbọn ojlo Jiwheyẹwhe tọn gblamẹ.  Ehe wutu wẹ mí na tuli Titu+ dọ, kẹdẹdile e ko yindọ ewọ wẹ bẹ azọ́n ehe jẹeji to ṣẹnṣẹn mìtọn, ewọ wẹ nisọ dotana nunina homẹdagbe tọn mìtọn ehe dopolọ.  Etomọṣo, kẹdẹdile mì sudeji to nulẹpo mẹ do, yèdọ to yise mẹ, to ohó mẹ, to oyọnẹn mẹ, to vivẹnudido lẹpo mẹ, podọ to owanyi he mí tindo na mì mẹ, na mì nisọ sudeji to nunina homẹdagbe tọn ehe mẹ ga.+  E ma yin gbedide de wẹ yẹn to nina mì gba, ṣigba vivẹnudido mẹdevo lẹ tọn wẹ yẹn jlo na hẹn zun yinyọnẹn na mì podọ nado tẹ́n nugbo-yinyin owanyi mìtọn tọn pọ́n.  Na mìwlẹ yọ́n nukundagbe majẹhẹ Oklunọ mítọn Jesu Klisti tọn, dọ dile ewọ tlẹ yin adọkunnọ, e lẹzun wamọnọ na mìtọn wutu,+ na mì nido sọgan lẹzun adọkunnọ gbọn hẹ́njijẹ etọn gblamẹ. 10  Podọ pọndohlan ṣie dọ wẹ yẹn te gando ehe go:+ Na ale mìtọn wutu wẹ, na yẹn mọdọ sọn owhe dopo die wẹ mìwlẹ ko bẹjẹeji e ma yin nado wà kẹdẹ gba ṣigba mì sọ do ojlo lọ nado wà hia ga. 11  To whelọnu lo, mì dotana nuhe mì bẹjẹeji, na ojlo vẹkuvẹku mìtọn nado yinuwa nido sọgan yin hinhẹndi sọgbe hẹ nuhe mì tindo to aimẹ lẹ. 12  Na eyin ojlo lọ tin to finẹ jẹnukọn, na taun tọn e nọ yin alọkẹyi sọgbe hẹ nuhe mẹlọ tindo,+ e ma yin sọgbe hẹ nuhe mẹlọ ma tindo gba. 13  Na yẹn ma jlo na hẹn ẹn bọawuna mẹdevo lẹ, ṣigba bo hẹn ẹn vẹawuna mìwlẹ gba; 14  ṣigba dọ gbọn hinhẹn sọzẹn dali, lánkan he mì tindo todin nido sọgan súdo nuhudo yetọn tọn, na lánkan yetọn nido sọgan súdo nuhe whèdo mìwlẹ tọn ga, na zẹ́nsisọ nido sọgan tin. 15  Kẹdẹdile e ko yin kinkandai do dọmọ: “Mẹhe tindo susu ma tindo hugan, podọ mẹhe tindo vude ma tindo whè hugan.”+ 16  Todin, opẹ́ wẹ na Jiwheyẹwhe dọ ewọ ze mẹtọnhopọn ahundopo tọn dopolọ he míwlẹ tindo na mì do ahun Titu tọn mẹ,+ 17  na e ko yigbe na tulinamẹ lọ nugbonugbo, ṣigba na e to jejeji tlala wutu, sọn ojlo etọn titi mẹ wẹ e ja mì dè. 18  Ṣigba, mí sọ to mẹmẹsunnu he pipà etọn gando wẹndagbe lọ go ko gbayipe gbọn agun lẹpo mẹ lọ dohlan po e po. 19  E ma yin enẹ kẹdẹ, ṣigba ewọ sọ yin dide gbọn agun lẹ dali nado yin tomẹyitọ hatọ mítọn dile mí to nukunpedo nunina homẹdagbe tọn ehe go na gigo Oklunọ tọn podọ nado dohia dọ mí ko wleawufo nado gọalọ. 20  Enẹwutu, mí ma jlo dọ mẹdepope ni mọhodọdo mí go gando nunina alọtútlú tọn he go mí to nukunpedo lọ go gba.+ 21  Na míwlẹ ‘yí ahundopo do penukundo nulẹpo go, e ma yin to nukun Jehovah* tọn kẹdẹ mẹ gba, ṣigba to nukun gbẹtọ lẹ tọn mẹ ga.’+ 22  Humọ, mí sọ to mẹmẹsunnu mítọn he mí ko tẹnpọn whlasusu to whẹho susu mẹ bo mọdọ e yin vivẹnunọ lọ dohlan po yé po, ṣigba ewọ sọ yin vivẹnunọ tlala todin na jidide mlẹnmlẹn etọn to mì mẹ wutu. 23  Nalete, eyin kanbiọ depope tin gando Titu go, gbẹdohẹmẹtọ* ṣie wẹ ewọ yin podọ azọ́nwatọ hatọ de na ale mìtọn; kavi eyin kanbiọ lẹ gando mẹmẹsunnu mítọn lẹ go wẹ, apọsteli agun lẹ tọn podọ gigo Klisti tọn wẹ yé yin. 24  Enẹwutu, mì do nugbo-yinyin owanyi mìtọn tọn hia yé+ bo do nuhewutu mí ko doawagun gando mì go hia agun lẹ.

Nudọnamẹ Odò Tọn

Kavi “gọfla.”
Kavi “alọgọ.”
Pọ́n Nud. A5.
To paa mẹ, “mahẹtọ.”