Yì hosọ lẹ ji

Yì hosọ flinflin lẹ ji

Yì todowhinnu hosọ lẹ tọn ji

Kunnudetọ Jehovah Tọn Lẹ

Gungbe

Biblu Intẹnẹt Ji Tọn | OWE WIWE LẸ—LẸDOGBEDEVOMẸ AIHỌN YỌYỌ TỌN

2 Kọlintinu lẹ 13:1-14

NUHE E BẸHẸN LẸ

  • Avase po tuli godo tọn lẹ po (1-14)

    • “Mì nọ tẹ́n mìde pọ́n eyin mì to yise mẹ” (5)

    • Mì nọ basi vọjlado; mì nọ lẹn nudopolọ (11)

13  Whla atọ̀ntọ die he yẹn ja mì dè. “To dodonu kunnudide* kunnudetọ awe kavi atọ̀n tọn ji wẹ whẹho lẹpo dona yin hinhẹn lodo te.”+  Dile etlẹ yindọ yẹn ma tin to finẹ todin, e taidi dọ yẹn tin to mì dè whla awetọ wẹ nkọ, yẹn sọ to avase ṣie vọ́ flin mẹhe ko waylando dai lẹ podọ hlan mẹhe pò lẹpo, dọ eyin yẹn lẹkọwa gbede, yẹn ma na hlá yé dote,  to whenuena e yindọ mìwlẹ to kunnudenu dín dọ Klisti, mẹhe ma yin madogánnọ dohlan mì ṣigba yin huhlọnnọ to ṣẹnṣẹn mìtọn wẹ to hodọ gbọn yẹn gblamẹ na nugbo tọn.  Na taun tọn, nugbo wẹ dọ ewọ yin hùhù do pòtin ji na madogán wutu, ṣigba e to ogbẹ̀ na huhlọn Jiwheyẹwhe tọn wutu.+ Na nugbo tọn, mílọsu yin madogánnọ hẹ ẹ, ṣigba mí nasọ nọgbẹ̀ dopọ hẹ ẹ,+ na huhlọn Jiwheyẹwhe tọn he to mì ji wutu.+  Mì nọ tẹ́n mìde pọ́n eyin mì to yise mẹ; mì nọ dindona mìde nado yọ́n mẹhe nkọ mìwlẹ yin.+ Kavi be mì ma yọnẹn dọ Jesu Klisti tin to kọndopọ mẹ hẹ mì wẹ ya? Eyin e ma yinmọ be mìwlẹ ma yin alọkẹyi.  Na nugbo tọn, todido ṣie wẹ yindọ mìwlẹ na wá yọnẹn dọ míwlẹ ma yin mẹhe yè ma kẹalọyi gba.  Todin, odẹ̀ mítọn hlan Jiwheyẹwhe wẹ yindọ mìwlẹ ni ma wà nuhe ylan depope blo, e ma yin na míwlẹ nido sọgan sọawuhia nado yin alọkẹyi wẹ gba, ṣigba dọ mìwlẹ nido sọgan wà nuhe yin dagbe, eyin míwlẹ tlẹ sọawuhia nado yin mẹhe yè ma kẹalọyi lẹ.  Na mí ma sọgan wà nudepope jẹagọdo nugbo lọ, adavo na nugbo lọ.  E họnwun dọ míwlẹ nọ jaya to whedepopenu he mí yin madogánnọ ṣigba bọ mìwlẹ yin huhlọnnọ. Podọ odẹ̀ he hò mí te wẹ yindọ mìwlẹ ni to vọjlado basi. 10  Enẹ wẹ zọ́n bọ yẹn to onú ehelẹ kàn hlan mì dile yẹn ma tin to finẹ, na to whenue yẹn na wá, yẹn ma nado to dandannu glọ nado yinuwa to aliho sinsinyẹn mẹ to whenue yẹn na to aṣẹ he Oklunọ na mi+ nado jlọ mì dote, bọ e ma yin nado zìn mì dai lọ yizan. 11  To popolẹpo mẹ, mẹmẹsunnu lẹ emi, mì zindonukọn nado nọ jaya, nado nọ basi vọjlado, nado nọ yin homẹmiọnna,+ nado nọ lẹn nudopolọ,+ nado nọ nọ̀ jijọho mẹ;+ Jiwheyẹwhe owanyi tọn po jijọho tọn po+ nasọ nọhẹ mì. 12  Mì yí nùdonùgo wiwe do dọnudo ode awetọ. 13  Omẹ wiwe lẹpo yí nudọdomẹ yetọn hlan mì. 14  Nukundagbe majẹhẹ Oklunọ Jesu Klisti tọn po owanyi Jiwheyẹwhe tọn po gọna gbigbọ wiwe he mẹ mí to mahẹ tindo te ni tin hẹ mìmẹpo.

Nudọnamẹ Odò Tọn

To paa mẹ, “onù.”