Accessibility setting

De ogbè dopo

Yì hosọ flinflin lẹ ji

Yì todowhinnu hosọ lẹ tọn ji

Yì hosọ lẹ ji

Kunnudetọ Jehovah Tọn Lẹ

Gungbe

Biblu Intẹnẹt Ji Tọn

OWE WIWE LẸ—LẸDOGBEDEVOMẸ AIHỌN YỌYỌ TỌN

2 Ahọlu lẹ 7:1-20

NUHE E BẸHẸN LẸ

  • Eliṣa dọ dọdai opodo huvẹ lọ tọn (1, 2)

  • Yè mọ núdùdù to osla Silianu lẹ tọn mẹ (3-15)

  • Dọdai Eliṣa tọn mọ hẹndi (16-20)

7  Todin Eliṣa dọmọ, “Mì dotó ohó Jehovah tọn. Nuhe Jehovah dọ die: ‘To ojlẹ ehe nkọ mẹ to osọ, linfin dagbedagbe ojlẹnu sea tọn dopo* na họ̀ ṣekẹli* dopo bọ balekun ojlẹnu sea tọn awe na họ̀ ṣekẹli dopo to họngbo* Samalia tọn ji.’”+  Ahọluzọnwatọ alọgọtọ he go ahọlu nọ ganjẹ sọ dọna omẹ Jiwheyẹwhe nugbo lọ tọn dọmọ: “Eyin Jehovah tlẹ hùn dogbó osin olọn tọn lẹ tọn, be ehe* sọgan jọ ya?”+ Whenẹnu wẹ ewọ dọmọ: “Hiẹ na yí nukun towe titi do mọ,+ ṣigba a ma na dù sọn e mẹ.”+  Pòtọnọ ẹnẹ delẹ tin to họngbo tòdaho lọ tọn ji,+ yé sọ dọna ode awetọ dọmọ: “Naegbọn mí nado sinai dofi kaka bo kú?  Eyin mí dọ dọ, ‘Mì gbọ mí ni biọ tòdaho lọ mẹ,’ to whenuena e yindọ huvẹ wẹ to tòdaho lọ mẹ,+ be okú wẹ to tepọn mí to finẹ. Eyin mí ka sọ sinai dofi, mí na kú janwẹ. Enẹwutu, mì gbọ mí ni yì osla Silianu lẹ tọn mẹ. Eyin yé pò mí dogbẹ̀, be mí na nọgbẹ̀, ṣigba eyin yé hù mí, mí na kú.”  Yé sọ fọ́n to whèjai bo biọ zinvlu lọ mẹ yì osla Silianu lẹ tọn mẹ. Whenue yé jẹ gblagbla osla Silianu lẹ tọn mẹ, mẹdepope ma to finẹ.  Na Jehovah ko hẹn osla Silianu lẹ tọn nado sè nudidọ osọ́-kẹkẹ awhàn tọn lẹ po osọ́ lẹ po tọn, yèdọ awhágbe awhànpa daho de tọn.+ Enẹwutu, yé dọna ode awetọ dọmọ: “Mì pọ́n! Ahọlu Islaeli tọn ko dà ahọlu Hetinu lẹ tọn lẹ po ahọlu Egipti tọn lẹ po nado wá tọ́nawhàn mí!”  Yé sọ fọ́n to afọdopolọji bo họnyi to zinvlu whèjai tọn mẹ bosọ jo gòhọ, osọ́ po kẹtẹkẹtẹ yetọn lẹ po do gọna osla yetọn pete dole e ko te dai, yé sọ họnyi nado whlẹn ogbẹ̀* yede tọn.  Whenue pòtọnọ ehelẹ jẹ gblagbla osla lọ tọn mẹ, yé biọ gòhọ dopo mẹ bo jẹ dùdù ji bosọ jẹ nùnù ji. Yé sọ bẹ fataka, sika po awù lẹ po sọn finẹ bo yì bẹ yé whlá. Enẹgodo, yé lẹkọwa bo biọ gòhọ devo mẹ bosọ bẹ nutindo lẹ sọn finẹ bo yì bẹ yé whlá.  To godo mẹ, yé dọna ode awetọ dọmọ: “Nuhe wà mí te ma yọ́n. Azán wẹndagbe tọn de wẹ azán ehe yin! Eyin mí dọngbàn bo nọte kaka bọ ai họ́n, mí na jẹna yasanamẹ. Todin, mì gbọ mí ni hẹn linlin ehe yì na owhé ahọlu tọn.” 10  Enẹwutu, yé yì bo dawhá ylọ họ̀njinọtọ tòdaho lọ tọn lẹ bo na yé linlin dọmọ: “Mí yì osla Silianu lẹ tọn mẹ, ṣigba mẹdepope ma to finẹ—mí ma sè nuwiwa mẹdepope tọn. Osọ́ lẹ po kẹtẹkẹtẹ lẹ po kẹdẹ wẹ to sìnsìn to finẹ bọ gòhọ lọ lẹ yin jijodo dole yé ko te dai.” 11  To afọdopolọji, họ̀njinọtọ lọ lẹ dawhá hlan bọ linlin lọ jẹ owhé ahọlu tọn gbè. 12  Ahọlu sọ fọ́n hadopo to zánmẹ bo dọna devizọnwatọ etọn lẹ dọmọ: “Mì gbọ ma dọ ayiha he kàn Silianu lẹ te do mí go lọ na mì. Yé yọnẹn dọ huvẹ to mí hù,+ enẹwutu yé jo osla yetọn do nado yì họ̀n whlá do danji po linlẹn lọ po dọ, ‘Yé na tọ́njẹgbonu sọn tòdaho lọ mẹ bọ mí na wle yé gbẹ̀te bo na biọ tòdaho lọ mẹ.’”+ 13  Whenẹnu wẹ dopo to devizọnwatọ etọn lẹ mẹ dọmọ: “Jaale, gbọ sunnu delẹ ni yí osọ́ atọ́n he pò to tòdaho lọ mẹ lẹ. Pọ́n! Nuhe na jọ do yé go wẹ na jọ do gbẹtọgun Islaeli tọn he gbọṣi fi lẹpo go. Pọ́n! Nuhe na jọ do yé go wẹ na jọ do gbẹtọgun Islaeli tọn he ko dọ̀n lẹpo go. Enẹwutu, gbọ mí ni do yé hlan bo pọ́n.” 14  Yé sọ hẹn osọ́-kẹkẹ awe po osọ́ lẹ po bọ ahọlu do yé hlan osla Silianu lẹ tọn mẹ dọmọ: “Mì yì pọ́n.” 15  Yé sọ hodo yé kakajẹ Jọdani bọ awù po núzinzan lẹ po he Silianu lẹ ko bẹ dlan dile yé họ̀n jei po obu po sọ gọ́ aliho lọ ji. Wẹnsagun lọ lẹ sọ lẹkọwa bo na linlin ehe ahọlu. 16  Whenẹnu wẹ gbẹtọ lẹ tọ́nyi bo bẹ ogblànnu sọn osla Silianu lẹ tọn mẹ sọmọ bọ linfin dagbedagbe ojlẹnu sea tọn dopo wá họ̀ ṣekẹli dopo bọ balekun ojlẹnu sea tọn awe wá họ̀ ṣekẹli dopo, kẹdẹdile Jehovah ko dọ do.+ 17  Ahọlu ko de ahọluzọnwatọ alọgọtọ he go e nọ ganjẹ lọ nado ṣọ́ họngbo lọ, ṣigba gbẹtọ lẹ to afọtùn ewọ ji kaka bọ e kú to họngbo lọ ji, kẹdẹdile omẹ Jiwheyẹwhe nugbo lọ tọn ko dọna ahọlu do to whenue e jẹte wá e dè. 18  E jọ pẹpẹ dile omẹ Jiwheyẹwhe nugbo lọ tọn ko dọna ahọlu do dọmọ: “Balekun ojlẹnu sea tọn awe na họ̀ ṣekẹli dopo bọ linfin dagbedagbe ojlẹnu sea tọn dopo na họ̀ ṣekẹli dopo to họngbo Samalia tọn ji to ojlẹ ehe nkọ mẹ to osọ.”+ 19  Ṣigba, ahọluzọnwatọ alọgọtọ lọ dọna omẹ Jiwheyẹwhe nugbo lọ tọn dọmọ: “Eyin Jehovah tlẹ hùn dogbó osin olọn tọn lẹ tọn, be onú mọnkọtọn* sọgan jọ ya?” Whenẹnu wẹ Eliṣa dọmọ: “Hiẹ na yí nukun towe titi do mọ, ṣigba a ma na dù sọn e mẹ.” 20  Nuhe jọ do e go lọ pẹpẹ niyẹn, na gbẹtọ lẹ to afọtùn ewọ ji kaka bọ e kú to họngbo lọ ji.

Nudọnamẹ Odò Tọn

Ojlẹnu sea tọn dopo sọzẹn hẹ L 7,33. Pọ́n Nud. B14.
Ṣekẹli dopo sọzẹn hẹ g 11,4. Pọ́n Nud. B14.
Kavi “to ahi lẹ mẹ to.”
To paa mẹ, “ohó ehe.”
Kavi “alindọn.”
To paa mẹ, “be ohó ehe nkọtọn.”