Accessibility setting

De ogbè dopo

Yì hosọ flinflin lẹ ji

Yì todowhinnu hosọ lẹ tọn ji

Yì hosọ lẹ ji

Kunnudetọ Jehovah Tọn Lẹ

Gungbe

Biblu Intẹnẹt Ji Tọn

OWE WIWE LẸ—LẸDOGBEDEVOMẸ AIHỌN YỌYỌ TỌN

2 Ahọlu lẹ 6:1-33

NUHE E BẸHẸN LẸ

  • Eliṣa hẹn asiọvi fò to osin nukunmẹ (1-7)

  • Eliṣa po Silianu lẹ po (8-23)

    • Nukun devi Eliṣa tọn tọn hùn (16, 17)

    • Silianu lẹ tọ́nnukun to ayiha mẹ (18, 19)

  • Huvẹ to Samalia he yè dosla lẹdo (24-33)

6  Visunnu yẹwhegán lẹ tọn+ lẹ dọna Eliṣa dọmọ: “Pọ́n! Fie míwlẹ po hiẹ po nọ nọ̀ lọ ko whè gbau na mí.  Jaale, gbọ mí ni yì Jọdani. Gbọ dopodopo mítọn ni yì dín atin to finẹ bo wleawu fie mí sọgan nọ de tọn do finẹ.” Ewọ sọ dọmọ: “Mì yì.”  Dopo to yé mẹ dọmọ: “Be hiẹ na jaale bo hodo devizọnwatọ towe lẹ yì ya?” E sọ gblọn dọmọ: “N’na hodo mì.”  E sọ zọnhẹ yé bọ yé wá Jọdani bo jẹ atin lẹ gbò ji.  Dile dopo to yé mẹ to atin gbò, ogàn asiọvi lọ tọn flẹ biọ otọ̀ mẹ bọ e dawhá dọmọ: “Ṣo, klunọ ṣie, mẹdevo si wẹ e yin whiwhé te!”  Omẹ Jiwheyẹwhe nugbo lọ tọn dọmọ: “Fie wẹ e flẹ jẹ?” E sọ do filọ hia ẹ. Ewọ sọ sán atin kleun de bo yìn in dlan finẹ bosọ hẹn ogàn asiọvi lọ tọn fò to osin nukunmẹ.  E sọ dọmọ: “De e tọ́n.” Ewọ sọ dlẹnalọ etọn bo ze e.  Todin, ahọlu Silia tọn yì funawhàn hẹ Islaeli.+ E dewé hẹ devizọnwatọ etọn lẹ dọmọ: “Yẹn po mì po na dosla do ofi le po le po.”  Omẹ Jiwheyẹwhe nugbo lọ+ tọn sọ dowẹn hlan ahọlu Islaeli tọn dọmọ: “Họ́ dewe ma nado gbọn ofi ehe, na finẹ wẹ Silianu lẹ jẹte ja.” 10  Enẹwutu, ahọlu Islaeli tọn dowẹn hlan fihe omẹ Jiwheyẹwhe nugbo lọ tọn ko na ẹn avase gandego lọ. Eliṣa nọ to avase na ẹn mapote, e sọ dapana finẹ yìyì whlasusu.*+ 11  Ehe doadi na ahọlu Silia tọn* bọ e ylọ devizọnwatọ etọn lẹ pli bo dọna yé dọmọ: “Mì dọna mi! Mẹnu to mí mẹ wẹ tin to adà ahọlu Islaeli tọn mẹ?” 12  Dopo to devizọnwatọ etọn lẹ mẹ sọ dọmọ: “Oklunọ ṣie ahọlu E, depope to mí mẹ ma to adà etọn mẹ! Eliṣa yẹwhegán he to Islaeli lọ wẹ nọ de nuhe hiẹ dọ to abò towe titi mẹ lẹ hia+ ahọlu Islaeli tọn.” 13  Ewọ sọ dọmọ: “Mì yì dindona fihe e te, na yẹn nido do sunnu lẹ hlan nado yì wle e.” To godo mẹ, linlin yin nina ẹn dọmọ: “Dotani wẹ e te.”+ 14  To afọdopolọji, e do osọ́ po osọ́-kẹkẹ awhàn tọn lẹ po hlan finẹ gọna awhànpa daho de; yé sọ wá finẹ to zánmẹ bo lẹdo tòdaho lọ pé. 15  Whenue devizọnwatọ* omẹ Jiwheyẹwhe nugbo lọ tọn fọ́n to afọnnu fuu bo tọ́njẹgbonu, e mọdọ awhànpa de, gọna osọ́ lẹ po osọ́-kẹkẹ awhàn tọn lẹ po ko lẹdo tòdaho lọ pé. To afọdopolọji, devizọnwatọ lọ dọna ẹn dọmọ: “Ṣo, klunọ ṣie! Etẹ mí na wà?” 16  Ṣigba, ewọ dọmọ: “A dibu blo!+ Na mẹhe to adà mítọn mẹ lẹ sù hú mẹhe to adà yetọn mẹ lẹ.”+ 17  Whenẹnu wẹ Eliṣa jẹ dẹ̀ho ji dọmọ: “Jehovah E, jaale hùn nukun etọn lẹ, na ewọ nido sọgan mọ.”+ To afọdopolọji, Jehovah hùn nukun devizọnwatọ lọ tọn lẹ bọ e mọ, podọ pọ́n! lẹdo osó tọn lọ gọ́ na osọ́ lẹ po osọ́-kẹkẹ awhàn tọn miyọ́nnọ+ lẹ po he lẹdo Eliṣa pé.+ 18  Whenue Silianu lẹ jẹte wá e dè, Eliṣa hodẹ̀ hlan Jehovah dọmọ: “Jaale, yí nukuntintọ́n do hò akọta ehe.”+ Ewọ sọ yí nukuntintọ́n do hò yé, kẹdẹdile Eliṣa ko biọ do. 19  Todin, Eliṣa dọna yé dọmọ: “E ma yin aliho lọ die, mọ e masọ yin tòdaho lọ die. Mì hodo mi bo gbọ ma plan mì yì dawe he dín mì te lọ dè.” Ṣigba, Samalia+ wẹ e plan yé yì. 20  Whenue yé jẹ Samalia, Eliṣa dọmọ: “Jehovah E, hùn nukun yetọn lẹ, na yé nido sọgan mọnú.” Jehovah sọ hùn nukun yetọn lẹ bọ yé mọdọ Samalia ṣẹnṣẹn wẹ yé te. 21  Whenue ahọlu Islaeli tọn mọ yé, e dọna Eliṣa dọmọ: “Yẹn ni hù yé wẹ ya, otọ́ ṣie, yẹn ni hù yé ya?” 22  Ṣigba, ewọ dọmọ: “Hiẹ ma dona hù yé. Be hù wẹ a nọ hù mẹhe a ko yí ohí towe po ogá towe po do wle di kanlinmọ lẹ ya? Na núdùdù po osin po yé, na yé nido dù bo nù+ bosọ lẹkọyi oklunọ yetọn dè.” 23  Enẹwutu, e basi hùnwhẹ daho de na yé bọ yé dù bo nù, e sọ do yé hlan nado lẹkọyi oklunọ yetọn dè. Enẹgodo, ogbẹ́ jaguda Silianu lẹ tọn lẹ+ masọ lẹkọwa aigba Islaeli tọn ji pọ́n gbede ba. 24  Bẹni-hadadi ahọlu Silia tọn sọ bẹ awhànpa* etọn lẹpo pli bo hẹji yì dosla lẹdo Samalia.+ 25  Enẹwutu, huvẹ daho de tọ́n+ to Samalia, yé sọ dosla lẹdo tòdaho lọ kaka bọ ota kẹtẹkẹtẹ tọn+ dopo wá họ̀ fataka-kuẹ 80, bọ omí apoe tọn mado-ẹnẹ ojlẹnu kabi* tọn họ̀ fataka-kuẹ 5. 26  Dile ahọlu Islaeli tọn gbọn adó lọ ji wá jei, yọnnu de dawhá ylọ ẹ dọmọ: “Oklunọ ṣie ahọlu E, gọalọna mí!” 27  Ewọ sọ gblọn dọmọ: “Eyin Jehovah ma gọalọna we, fie wẹ yẹn na hẹn alọgọ wá na we sọn? Sọn likun-flétẹn wẹ ya? Kavi sọn ovẹn-finyọ́ndo kavi amì-finyọ́ndo mẹ?” 28  Ahọlu sọ kanse yọnnu lọ dọmọ: “Etẹwẹ yin nuhahun towe?” Ewọ sọ gblọn dọmọ: “Nawe ehe wẹ dọna mi dọ, ‘Ze visunnu towe wá, na mí ni dù i to egbé, bọ eyin e jẹ osọ mí na dù visunnu ṣie.’+ 29  Mí sọ dà visunnu ṣie bo dù i.+ To wunkẹngbe, n’dọna nawe lọ dọ, ‘Ze visunnu towe wá, na mí ni dù i.’ Amọ́, ewọ ze visunnu etọn whlá.” 30  Tlolo he ahọlu sè nuhe yọnnu lọ dọ lẹ, e tlẹ́n awù edetiti tọn lẹ.+ Whenue e gbọn adó lọ ji wá jei, gbẹtọ lẹ mọdọ e do odẹ́vọ̀ do odò na awù etọn lẹ. 31  E sọ dọmọ: “Jiwheyẹwhe ni sayana mi sinsinyẹn eyin ota Eliṣa visunnu Ṣafati tọn lọ tọn gbọṣi kọnu na ẹn to egbé!”+ 32  Eliṣa to aisinsin to owhé etọn gbè bọ mẹho lẹ sọ to aisinsin hẹ ẹ to finẹ. Ahọlu do sunnu de hlan jẹnukọnna ede, ṣigba whẹpo wẹnsagun lọ nado wá, Eliṣa dọna mẹho lọ lẹ dọmọ: “Be mì mọ lehe visunnu hlọnhutọ tọn ehe+ domẹhlan nado wá gbòtana mi do ya? Mì to aṣeji to whenue wẹnsagun lọ na wá, na mì ni sú ohọ̀n lọ bo hẹn ẹn do súsú gbanun-gbanun nado glọnalina ẹn. Be afọgbè oklunọ etọn tọn ma to núdọ to godona ẹn ya?” 33  Dile ewọ gbẹ́ to hodọ hẹ yé, wẹnsagun lọ wá e dè bọ ahọlu dọmọ: “Jehovah dè wẹ nugbajẹmẹji ehe wá sọn. Naegbọn n’nasọ to tenọpọn Jehovah?”

Nudọnamẹ Odò Tọn

Kavi “hugan whladopo kavi awe.”
To paa mẹ, “na ahun ahọlu Silia tọn.”
Kavi “lizọnyitọ.”
To paa mẹ, “osla.”
Kabi dopo sọzẹn hẹ L 1,22. Pọ́n Nud. B14.