Yì hosọ lẹ ji

Yì hosọ flinflin lẹ ji

Yì todowhinnu hosọ lẹ tọn ji

Kunnudetọ Jehovah Tọn Lẹ

Gungbe

Biblu Intẹnẹt Ji Tọn | OWE WIWE LẸ—LẸDOGBEDEVOMẸ AIHỌN YỌYỌ TỌN

2 Ahọlu lẹ 21:1-26

NUHE E BẸHẸN LẸ

  • Manasse, ahọlu Juda tọn; hùnsọndai etọn (1-18)

    • Jelusalẹm na yin vivasudo (12-15)

  • Amọni, ahọlu Juda tọn (19-26)

21  Owhe 12 wẹ Manasse+ tindo to whenue e duahọlu, e sọ dugán to Jelusalẹm na owhe 55.+ Oyín onọ̀ etọn tọn wẹ Hẹfziba.  E wà nuhe ylan to nukun Jehovah tọn mẹ lẹ bo doalọ to osùnú he nkọ akọta+ he Jehovah ko yàn sẹ̀ sọn omẹ Islaeli tọn lẹ nukọn lẹ nọ wà lẹ mẹ.+  E vọ́ ofi yiaga he otọ́ etọn Hẹzekia ko gbakija lẹ gbá+ bo do agbà lẹ ai na Baali bosọ basi dòtin wiwe* de,+ kẹdẹdile Ahabi ahọlu Islaeli tọn ko wà do.+ Podọ e nọ dẹ́ do odò na awhànpa olọn tọn lẹpo bo nọ sẹ̀n yé.+  Humọ, e do agbà lẹ ai do ohọ̀ Jehovah tọn mẹ,+ fie Jehovah ko dọ gandego dọ: “Jelusalẹm ji wẹ yẹn na ze oyín ṣie do.”+  E sọ do agbà lẹ ai na awhànpa olọn tọn lẹpo+ do awánu ohọ̀ Jehovah tọn awe mẹ.+  Podọ e hẹn visunnu etọn titi jugbọn miyọ́n mẹ; e doalọ to bojijlẹ po fákinkan po mẹ+ bo de mẹdelẹ taidi afinyọnnọ podọ dọṣẹdọtọ lẹ.+ E wà nuhe ylan to nukun Jehovah tọn mẹ lẹ to obá he yiaga taun mẹ nado hẹn homẹgble e.  E ze boṣiọ pipà dòtin wiwe*+ lọ tọn he e ko basi lọ do ohọ̀ lọ mẹ, yèdọ ohọ̀ he Jehovah ko dọho gandego na Davidi po Sọlomọni visunnu etọn po dọ: “Ohọ̀ ehe podọ Jelusalẹm he yẹn ko de to hẹnnu Islaeli tọn lẹpo mẹ ji wẹ yẹn na ze oyín ṣie do kakadoi.+  Yẹn ma nasọ hẹn Islaelivi lẹ sàlele sọn aigba lọ he yẹn ko na tọgbo yetọn lẹ ji gbede ba,+ eyin yewlẹ saa nọ yí sọwhiwhe do yìn gbedide he yẹn ko na yé lẹpo,+ yèdọ Osẹ́n lọ blebu he Mose devizọnwatọ ṣie ko degbena yé nado hodo.”  Amọ́, yé ma setonu, bọ Manasse to yé hẹn danbú mapote bosọ hẹn yé nado wà nuhe ylan hugan akọta he Jehovah ko sukúndona sọn Islaelivi lẹ nukọn lẹ.+ 10  Jehovah zindonukọn nado to hodọ gbọn devizọnwatọ etọn yẹwhegán lẹ gblamẹ+ dọmọ: 11  “Manasse ahọlu Juda tọn ko wà osùnú ehe lẹpo; e ko yinuwa po kanyinylan po hugan Amolinu+ he nọgbẹ̀ jẹnukọnna ẹn lẹpo,+ podọ e yí boṣiọ hiọawu* etọn lẹ do hẹn Juda waylando. 12  Enẹwutu, nuhe Jehovah Jiwheyẹwhe Islaeli tọn dọ die: ‘Yẹn na hẹn nugbajẹmẹji wá Jelusalẹm+ po Juda po ji sọmọ bọ eyin mẹdepope sè, e na jọsi.+ 13  Okàn nujijlẹ tọn+ he ko yin yiyizan na Samalia+ wẹ yẹn na tá do Jelusalẹm ji, gọna nuyizan aigba-jijlo tọn he yin yiyizan na whédo Ahabi tọn,+ yẹn nasọ súnsún Jelusalẹm mlẹnmlẹn kẹdẹdile mẹde nọ súnsún agbán de mlẹnmlẹn bosọ nọ ṣinyọ́n-nukunmẹdò na ẹn do.+ 14  Yẹn na gbẹkọ pipotọ ogú ṣie tọn go+ bo na jo yé do alọ kẹntọ yetọn lẹ tọn mẹ, bọ yé na lẹzun ogblànnu na kẹntọ yetọn lẹpo,+ 15  na yé ko wà nuhe ylan to nukun ṣie mẹ lẹ wutu bo zindonukọn nado to homẹhẹngblena mi sọn azán he gbè tọgbo yetọn lẹ ko tọ́n sọn Egipti kakajẹ egbé.’”+ 16  Manasse sọ sọ̀n ohùn homẹvọnọ susugege tọn dai kaka bo hẹn Jelusalẹm gọ́ pete,+ gbọnvona ylando etọn he yin nado hẹn Juda waylando gbọn nuhe ylan to nukun Jehovah tọn mẹ lẹ wiwà dali. 17  Na nuhe dù otàn Manasse tọn he pò po nuhe e wà lẹpo po gọna ylando he e ko wà lẹ, be yé ma yin kinkan do owe whenuho ahọlu Juda tọn lẹ tọn mẹ ya? 18  Manasse sọ yin hinhẹn nado mlọnai hẹ tọgbo etọn lẹ bo yin dìdì do jipa he to owhé etọn gbè mẹ, yèdọ do jipa Uzza tọn mẹ;+ visunnu etọn Amọni sọ lẹzun ahọlu do otẹn etọn mẹ. 19  Owhe 22 wẹ Amọni+ tindo to whenue e duahọlu, e sọ dugán to Jelusalẹm na owhe awe.+ Oyín onọ̀ etọn tọn wẹ Meṣulemẹti viyọnnu Haluzi tọn sọn Jọtba. 20  Ewọ sọ zindonukọn nado to nuhe ylan to nukun Jehovah tọn mẹ lẹ wà, kẹdẹdile otọ́ etọn Manasse ko wà do.+ 21  E to zọnlinzin gbọn aliho otọ́ etọn tọn lẹpo ji mapote bo zindonukọn nado to yẹwhe hiọawu he otọ́ etọn ko sẹ̀n lẹ sẹ̀n bosọ nọ dẹ́ do odò na yé.+ 22  Gbọnmọ dali, e jo Jehovah Jiwheyẹwhe tọgbo etọn lẹ tọn do bo ma zinzọnlin gbọn aliho Jehovah tọn ji.+ 23  To godo mẹ, devizọnwatọ Ahọlu Amọni tọn lẹ blasé do e go bo hù i to owhé etọn titi gbè. 24  Ṣigba, mẹhe to aigba lọ ji lẹ hù mẹhe blasé do Ahọlu Amọni go lẹpo bosọ yí visunnu etọn Josia do doahọlu do otẹn etọn mẹ.+ 25  Na nuhe dù otàn Amọni tọn he pò, yèdọ nuhe e wà lẹ, be e ma yin kinkan do owe whenuho ahọlu Juda tọn lẹ tọn mẹ ya? 26  Yé sọ dì i do yọdò etọn mẹ to jipa Uzza tọn mẹ,+ visunnu etọn Josia+ sọ lẹzun ahọlu do otẹn etọn mẹ.

Nudọnamẹ Odò Tọn

Pọ́n Zẹm.
Pọ́n Zẹm.
Hogbe Heblugbe tọn lọ sọgan tindo kanṣiṣa hẹ hogbe he nọ dlẹnalọdo “omí” podọ e nọ yin yiyizan taidi hogbe vlẹko tọn.