Yì hosọ lẹ ji

Yì hosọ flinflin lẹ ji

Yì todowhinnu hosọ lẹ tọn ji

Kunnudetọ Jehovah Tọn Lẹ

Gungbe

Biblu Intẹnẹt Ji Tọn

OWE WIWE LẸ—LẸDOGBEDEVOMẸ AIHỌN YỌYỌ TỌN

2 Ahọlu lẹ 20:1-21

NUHE E BẸHẸN LẸ

  • Hẹzekia jẹazọ̀n bo jẹgangan (1-11)

  • Wẹnsagun lẹ sọn Babilọni (12-19)

  • Hẹzekia kú (20, 21)

20  To azán enẹlẹ gbè, Hẹzekia jẹazọ̀n kakajẹ kúdonu.+ Yẹwhegán Isaia, visunnu Amọzi tọn sọ wá e dè bo dọna ẹn dọ, “Nuhe Jehovah dọ die: ‘Na anademẹ lẹ whédo towe, na hiẹ na kú; a ma na jẹgangan.’”+  To whenẹnu, Hẹzekia lilẹ́ nukunmẹ etọn pannukọn adó bo jẹ dẹ̀ho hlan Jehovah ji dọmọ:  “N’vẹ̀ we, Jehovah E, jaale flin lehe n’ko yí nugbonọ-yinyin do zinzọnlin to nukọn towe po ahun pipé de po do, podọ n’ko wà nuhe yin dagbe to nukun towe mẹ lẹ.”+ Hẹzekia sọ jẹ avivi ji badabada.  Isaia ma tlẹ ko tọ́n jẹ ṣẹnṣẹn awánu lọ tọn whẹpo ohó Jehovah tọn do wá e dè dọmọ:+  “Lẹkọyi bo dọna Hẹzekia he yin nukọntọ omẹ ṣie lẹ tọn dọ, ‘Nuhe Jehovah, Jiwheyẹwhe Davidi tọgbo towe tọn dọ die: “N’ko sè odẹ̀ towe. N’ko sọ mọ dasin towe lẹ.+ Todin, yẹn na hẹnazọ̀ngbọna we.+ To azán atọ̀n godo, hiẹ na hẹji yì ohọ̀ Jehovah tọn mẹ.+  Yẹn na yí owhe 15 dogọ gbẹzan* towe, podọ yẹn na whlẹn hiẹ po tòdaho ehe po sọn alọ ahọlu Asilia tọn mẹ,+ yẹn nasọ yiavùnlọna tòdaho ehe, na oyín ṣie wutu podọ na Davidi devizọnwatọ ṣie wutu.”’”+  Whenẹnu wẹ Isaia dọmọ: “Mì hẹn akla hìhì ovò sinsẹ́n húhú he yin finfinyọ́n dopọ tọn de wá.” Yé sọ hẹn ẹn wá bo sá ẹ do nutitẹ̀ lọ mẹ, ewọ sọ jẹgangan vudevude.+  Hẹzekia ko kanse Isaia dai dọ: “Etẹwẹ na yin ohia+ lọ dọ Jehovah na hẹnazọ̀ngbọna mi bọ n’na hẹji yì ohọ̀ Jehovah tọn mẹ to azán atọ̀n godo?”  Isaia gblọn dọmọ: “Ohia de die sọn Jehovah dè nado dohia we dọ Jehovah na hẹn ohó he e ko dọ lọ di: Be hiẹ jlo dọ oyẹ̀ he to pèkán* lọ go ni yinukọn na afọdide ao ya, kavi ni yigodo na afọdide ao?”+ 10  Hẹzekia sọ dọmọ: “E bọawu dọ oyẹ̀ lọ ni yinukọn na afọdide ao hú dọ e ni yigodo na afọdide ao.” 11  Enẹwutu, Isaia yẹwhegán lọ dawhá ylọ Jehovah bọ Ewọ hẹn oyẹ̀ he to pèkán Ahazi tọn go lọ yigodo na afọdide ao sọn fihe e ko sẹ̀ yìdo jẹ dai.+ 12  To ojlẹ enẹ mẹ, ahọlu Babilọni tọn, Belodaki-baladani he yin visunnu Baladani tọn, do wekanhlanmẹ lẹ po nunina po hlan Hẹzekia, na e sè dọ Hẹzekia jẹazọ̀n wutu.+ 13  Hẹzekia yí* yé bo do ohọ̀ adọkunnu tọn etọn pete hia yé+—yèdọ fataka, sika, amì balsami* tọn po amì họakuẹ devo lẹ po, gọna awhànfunnu bẹdotẹn etọn po nuhe tin to adọkunnu sẹdotẹn etọn lẹpo po. Nudepope ma pò he Hẹzekia ma dohia yé to owhé* etọn titi gbè podọ to fidugando etọn lẹpo. 14  Enẹgodo, Isaia yẹwhegán lọ wá Ahọlu Hẹzekia dè bo kanse e dọmọ: “Etẹwẹ sunnu ehelẹ dọ podọ fie wẹ yé wá sọn?” Hẹzekia sọ dọmọ: “Aigba dindẹn de ji wẹ yé wá sọn, yèdọ sọn Babilọni.”+ 15  Whenẹnu, e kanse dọmọ: “Etẹlẹ wẹ yé mọ to owhé* towe gbè?” Hẹzekia sọ gblọn dọmọ: “Nuhe to owhé* ṣie gbè lẹpo wẹ yé mọ. Nudepope ma pò he n’ma dohia yé to nuhe to adọkunnu sẹdotẹn ṣie lẹ mẹ.” 16  Todin, Isaia dọna Hẹzekia dọmọ: “Sè nuhe Jehovah dọ,+ 17  ‘Pọ́n! Azán lẹ ja bọ nuhe tin to owhé* towe gbè lẹpo gọna nuhe tọgbo towe lẹ ko bẹpli kakajẹ egbehe lẹpo na yin bibẹ yì Babilọni.+ Nudepope ma na pò,’ wẹ Jehovah dọ. 18  ‘Podọ delẹ to visunnu towe titi he hiẹ na wá ji lẹ mẹ na yin bibẹ sọyi+ bọ yé na lẹzun ahọluzọnwatọ lẹ to họ̀nmẹ ahọlu Babilọni tọn.’”+ 19  To whenẹnu, Hẹzekia dọna Isaia dọmọ: “Ohó Jehovah tọn he a dọ lọ sọgbe.”+ Enẹgodo, e yidogọ dọmọ: “Eyin jijọho po hihọ́* po ko gbẹ́ tin to gbẹwhenu ṣie,* be e yọ́n.”+ 20  Na nuhe dù otàn Hẹzekia tọn he pò, yèdọ huhlọn he e dohia gọna lehe e kùn osindò+ po osinwhín lọ po bo hẹn osin wá tòdaho lọ mẹ do,+ be e ma yin kinkan do owe whenuho ahọlu Juda tọn lẹ tọn mẹ ya? 21  Hẹzekia sọ yin hinhẹn nado mlọnai hẹ tọgbo etọn lẹ;+ visunnu etọn Manasse+ sọ lẹzun ahọlu do otẹn etọn mẹ.+

Nudọnamẹ Odò Tọn

To paa mẹ, “azán.”
Vlavo pèkán ehelẹ nọ yin yiyizan nado hia gànmẹ, taidi to owhè-gàn de ji.
Kavi “dotoaina.”
Pọ́n Zẹm.
Kavi “họ̀nmẹ.”
Kavi “họ̀nmẹ.”
Kavi “họ̀nmẹ.”
Kavi “họ̀nmẹ.”
Kavi “nugbo.”
To paa mẹ, “to azán ṣie lẹ gbè.”