Yì hosọ lẹ ji

Yì hosọ flinflin lẹ ji

Yì todowhinnu hosọ lẹ tọn ji

Kunnudetọ Jehovah Tọn Lẹ

Gungbe

Biblu Intẹnẹt Ji Tọn | OWE WIWE LẸ—LẸDOGBEDEVOMẸ AIHỌN YỌYỌ TỌN

2 Ahọlu lẹ 18:1-37

NUHE E BẸHẸN LẸ

  • Hẹzekia, ahọlu Juda tọn (1-8)

  • Lehe Islaeli jai gbọn (9-12)

  • Sẹnnakelibi tọ́nawhàn Juda (13-18)

  • Labṣake lọ vlẹ Jehovah kò (19-37)

18  To owhe atọ̀ntọ Hoṣea+ visunnu Elahi ahọlu Islaeli tọn mẹ, Hẹzekia+ visunnu Ahọlu Ahazi+ Juda tọn lẹzun ahọlu.  Owhe 25 wẹ e tindo to whenue e duahọlu, e sọ dugán to Jelusalẹm na owhe 29. Oyín onọ̀ etọn tọn wẹ Abi* viyọnnu Zekalia tọn.+  Ewọ sọ to nuhe sọgbe to nukun Jehovah tọn mẹ lẹ wà,+ kẹdẹdile Davidi tọgbo etọn ko wà do.+  Ewọ wẹ de ofi yiaga lẹ sẹ̀+ bo gbà dòtin wiwe zannu tọn lẹ hányán bosọ sán dòtin wiwe* lọ liai.+ E sọ gídí odàn gànvẹẹ tọn he Mose ko basi lọ;+ na kakajẹ whenẹnu, omẹ Islaeli tọn lẹ nọ basi avọ́sinsan mimẹ̀ lẹ hlan odàn enẹ bọ e nọ yin yiylọdọ boṣiọ odàn gànvẹẹ tọn.*  Ewọ dejido Jehovah Jiwheyẹwhe Islaeli tọn go;+ mẹdepope ma tin di ewọ to ahọlu Juda tọn he bọdego lẹpo mẹ kavi to mẹhe ko jẹnukọnna ẹn lẹ mẹ.  E sọ tẹdo Jehovah go gligli.+ E ma lẹkọ sọn hihodo e mẹ; e zindonukọn nado to gbedide he Jehovah ko na Mose lẹ yìn.  Jehovah sọ tin po e po. E nọ yinuwa po nuyọnẹn po to fidepope he e yì. E fọngu do ahọlu Asilia tọn ji bo gbẹ́ ma nado wadevizọn na ẹn.+  E sọ gbawhàn Filistinu lẹ tọn+ kaka yì Gaza podọ yì aigba etọn lẹ ji, yèdọ sọn atọ̀họ̀-nuhihọ́ tọn ji yì tòdaho gángán* ji.  To owhe ẹnẹtọ Ahọlu Hẹzekia tọn mẹ, enẹ wẹ to owhe ṣinawetọ Hoṣea+ visunnu Elahi ahọlu Islaeli tọn mẹ, Ahọlu Ṣalmanẹseli Asilia tọn hẹji wá nado tọ́nawhàn Samalia bosọ jẹ osla do lẹdo tòdaho lọ ji.+ 10  Yé sọ gbawhàn tòdaho lọ tọn+ to owhe atọ̀n godo; owhe ṣidopotọ Hẹzekia tọn he nọtena owhe ṣinẹnẹtọ Ahọlu Hoṣea Islaeli tọn mẹ wẹ yè gbawhàn Samalia tọn te. 11  Whenẹnu wẹ ahọlu Asilia tọn bẹ omẹ Islaeli tọn lẹ yì kanlinmọgbenu+ to Asilia bo natẹn yé do Halahi po Habọli po to tọ̀sisa Gozani pá podọ to tòdaho Medianu lẹ tọn lẹ mẹ.+ 12  Ehe yinmọ, na yé ma dotoaina ogbè Jehovah Jiwheyẹwhe yetọn tọn wutu, ṣigba yé to alẹnu etọn gbà mapote, yèdọ nuhe Mose devizọnwatọ Jehovah tọn ko degbe etọn lẹpo.+ Yé ma dotoai, mọ yé masọ setonu. 13  To owhe 14tọ Ahọlu Hẹzekia tọn mẹ, Sẹnnakelibi ahọlu Asilia tọn+ hẹji wá nado funawhàn sọta tòdaho gángán Juda tọn lẹpo bo yí yé.+ 14  Enẹwutu, Ahọlu Hẹzekia Juda tọn dowẹn hlan ahọlu Asilia tọn to Lakiṣi dọmọ: “Yẹn wẹ hùwhẹ. Joagọyi sọn dè e, yẹn nasọ na we nudepope he a na biọ.” Ahọlu Asilia tọn sọ gbò akuẹ talẹnti* fataka tọn 300 po talẹnti sika tọn 30 po na Ahọlu Hẹzekia Juda tọn. 15  Hẹzekia sọ bẹ fataka he tin to ohọ̀ Jehovah tọn mẹ podọ to adọkunnu sẹdotẹn owhé* ahọlu tọn gbè lẹpo jo.+ 16  To ojlẹ enẹ mẹ wẹ Hẹzekia de* ohọ̀n tẹmpli Jehovah tọn lọ tọn lẹ+ sẹ̀ gọna dòtin ohọ̀n tọn he Ahọlu Hẹzekia Juda tọn lọsu ko và sika na lẹ,+ bo bẹ yé jo na ahọlu Asilia tọn. 17  Enẹgodo, ahọlu Asilia tọn do Taltani,* Labsalisi* po Labṣake* lọ po hlan po awhànpa daho de po sọn Lakiṣi+ nado yì Ahọlu Hẹzekia dè to Jelusalẹm.+ Yé hẹji yì Jelusalẹm bo nọte to osinwhín osindò agawaji tọn lọ tọn kọ̀n, sẹpọ alihogbó he yì ogle dawe avọ̀yantọ lọ tọn mẹ.+ 18  Whenue yé dawhá ylọ ahọlu lọ dọ e ni tọ́njẹgbonu wá, Eliakimi+ visunnu Hilkia tọn he nọ penukundo whédo* ahọlu tọn go, Ṣẹbina+ he yin wekantọ lọ gọna Joa, kandai-basitọ lọ he yin visunnu Asafi tọn wẹ tọ́njẹgbonu yì yé dè. 19  Enẹwutu, Labṣake lọ dọna yé dọmọ: “Mì jaale bo dọna Hẹzekia dọ, ‘Nuhe ahọlu daho lọ, yèdọ ahọlu Asilia tọn dọ die: “Etẹ go wẹ a to adọgbo do?+ 20  Hiẹ to didọ dọ, ‘N’yọ́n ayiha kàn bosọ tindo huhlọn nado funawhàn,’ ṣigba nùmẹ yozò poun wẹ. Mẹnu go wẹ a dejido, bọ a do gboadọ bo fọngu do ji e?+ 21  Pọ́n! Hiẹ to jidedo alọgọ ofán winwẹ́n* ehe, yèdọ Egipti tọn go,+ mẹhe eyin mẹde ganjẹ e go, e na sọ́ alọpahomẹ na ẹn luntọ́n. Lehe Falo, ahọlu Egipti tọn te na mẹhe dejido e go lẹpo niyẹn. 22  Podọ eyin hiẹ dọna mi dọ, ‘Jehovah Jiwheyẹwhe mítọn go wẹ mí dejido,’+ be e ma yin ofi yiaga etọn lẹ po agbà etọn lẹ po wẹ Hẹzekia ko desẹ,+ bosọ dọna Juda po Jelusalẹm po dọ, ‘Agbà ehe nukọn wẹ mìwlẹ dona nọ dẹ́ do odò te to Jelusalẹm’ ya?”’+ 23  Enẹwutu todin, jaale bo wá kẹ́n hẹ oklunọ ṣie ahọlu Asilia tọn: Yẹn na na we osọ́ 2 000 bọ mí na pọ́n eyin hiẹ na penugo nado mọ osọ́-kùntọ he pé sọha enẹ.+ 24  To whelọnu lo, nawẹ hiẹ na wagbọn do duto ayimatẹn-gán dopo ji etlẹ yin dehe whè hugan to devizọnwatọ oklunọ ṣie tọn lẹ mẹ, to whenuena e yindọ Egipti go wẹ hiẹ dejido na osọ́-kẹkẹ lẹ po osọ́nọ lẹ po? 25  Todin, be a lẹndọ yẹn hẹji wá nado và aigba ehe sudo matin aṣẹ yíyí sọn Jehovah dè wẹ ya? Jehovah lọsu wẹ dọna mi dọ, ‘Hẹji yì funawhàn hẹ aigba ehe bo và ẹ sudo.’” 26  To whenẹnu, Eliakimi visunnu Hilkia tọn, gọna Ṣẹbina+ po Joa po dọna Labṣake+ lọ dọmọ: “Jaale, yí Alamaikigbe*+ do dọhona devizọnwatọ towe lẹ, na mí sè ogbè enẹ; a yí ogbè Ju lẹ tọn do dọhona mí blo, na mẹhe to adó lọ ji lẹ nikaa sè.”+ 27  Ṣigba, Labṣake lọ dọna yé dọmọ: “Be oklunọ mìtọn po mìwlẹ kẹdẹ po wẹ oklunọ ṣie do mi hlan nado wá dọ ohó ehelẹ na ya? Be e ma yin na mẹhe sinai to adó lọ ji lẹ lọsu ga, yèdọ yé mẹhe na dù afọdai yetọn titi bosọ nù adọ́ yetọn titi po mì po lẹ wẹ ya?” 28  Todin, Labṣake lọ fọnṣite bo yí ogbè lélé do dọ to ogbè Ju lẹ tọn mẹ dọmọ: “Mì sè owẹ̀n ahọlu daho lọ, yèdọ ahọlu Asilia tọn.+ 29  Nuhe ahọlu lọ dọ die, ‘Mì dike Hẹzekia klọ mì blo, na ewọ ma sọgan whlẹn mì sọn alọ ṣie mẹ.+ 30  Mì sọ dike Hẹzekia hẹn mì dejido Jehovah go blo, to whenue e dọ dọ: “E họnwun dọ Jehovah na whlẹn mí, bọ tòdaho ehe ma na yin jijodo alọ ahọlu Asilia tọn mẹ.”+ 31  Mì dotoaina Hẹzekia blo, na nuhe ahọlu Asilia tọn dọ die: “Mì basi jijọho hẹ mi bo jogbe poun,* na dopodopo mìtọn nido nọ dù sọn vẹntin etọn titi mẹ podọ sọn ovòtin etọn titi mẹ bosọ nọ nù osin sọn osindò etọn titi mẹ, 32  kakajẹ whenue yẹn na wá nado bẹ mì yì aigba de he taidi aigba mìtọn titi ji,+ yèdọ aigba he gọ́ na jinukun po ovẹn yọyọ po, aigba he gọ́ na akla po vẹngle lẹ po, podọ aigba he gọ́ na atin olivie tọn lẹ po owín po. Mìwlẹ nasọ nọgbẹ̀ bo ma na kú. Mì dotoaina Hẹzekia blo, na ewọ to mì hẹn buali dọmọ, ‘Jehovah na whlẹn mí.’ 33  Be yẹwhe akọta lẹ tọn depope ko whlẹn otò yetọn sọn alọ ahọlu Asilia tọn mẹ pọ́n ya? 34  Fie wẹ yẹwhe Hamati+ po Alpadi po tọn lẹ te? Fie wẹ yẹwhe Sefalivaimi,+ Hena po Iva po tọn lẹ te? Be yé ko whlẹn Samalia sọn alọ ṣie mẹ wẹ?+ 35  Detẹ to yẹwhe otò lọ lẹ tọn lẹpo mẹ wẹ ko whlẹn otò etọn sọn alọ ṣie mẹ bọ Jehovah nado wá whlẹn Jelusalẹm sọn alọ ṣie mẹ?”’”+ 36  Ṣigba, gbẹtọ lọ lẹ gbọṣi abọẹ bo ma gblọn nudepope na ẹn, na gbedide ahọlu tọn wẹ yindọ, “Mì ma dona gblọn nudepope na ẹn.”+ 37  Amọ́, Eliakimi visunnu Hilkia tọn, he nọ penukundo whédo* ahọlu tọn go, Ṣẹbina he yin wekantọ lọ gọna Joa, kandai-basitọ lọ he yin visunnu Asafi tọn, lẹkọwa Hẹzekia dè po awù tintlẹ́n po to okọ̀ bo dọ nuhe Labṣake lọ ko dọ lẹ na ẹn.

Nudọnamẹ Odò Tọn

Sándogli Abija tọn.
Pọ́n Zẹm.
Kavi “nọ yin yiylọdọ Nehuṣitani.”
Enẹ wẹ, yèdọ to filẹpo, vlavo fie gbẹtọ ma sù te kavi fie gbẹtọ sù te.
Talẹnti dopo sọzẹn hẹ kg 34,2. Pọ́n Nud. B14.
Kavi “họ̀nmẹ.”
To paa mẹ, “sán.”
Kavi “awhàngán daho.”
Kavi “ahọluzọnwatọ-gán họ̀nmẹ tọn.”
Kavi “ogán ahànjinọtọ lẹ tọn.”
Kavi “họ̀nmẹ.”
Kavi “gbigbà.”
Kavi “Silia-gbè.”
To paa mẹ, “Mì basi dona de hẹ mi bo tọ́n wá dè e.”
Kavi “họ̀nmẹ.”