Accessibility setting

De ogbè dopo

Yì hosọ flinflin lẹ ji

Yì todowhinnu hosọ lẹ tọn ji

Yì hosọ lẹ ji

Kunnudetọ Jehovah Tọn Lẹ

Gungbe

Biblu Intẹnẹt Ji Tọn

OWE WIWE LẸ—LẸDOGBEDEVOMẸ AIHỌN YỌYỌ TỌN

2 Ahọlu lẹ 17:1-41

NUHE E BẸHẸN LẸ

  • Hoṣea, ahọlu Islaeli tọn (1-4)

  • Aijijẹ Islaeli tọn (5, 6)

  • Islaeli yì kanlinmọgbenu (7-23)

  • Yè hẹn jonọ lẹ wá tòdaho Samalia tọn lẹ mẹ (24-26)

  • Sinsẹ̀n flusọ́ Samalianu lẹ tọn (27-41)

17  To owhe 12tọ Ahọlu Ahazi Juda tọn mẹ, Hoṣea+ visunnu Elahi tọn duahọlu do Islaeli ji to Samalia; e sọ dugán na owhe ṣinẹnẹ.  E zindonukọn nado to nuhe ylan to nukun Jehovah tọn mẹ lẹ wà, ṣigba e ma yì jẹ obá ahọlu Islaeli tọn he jẹnukọnna ẹn lẹ tọn mẹ.  Ahọlu Ṣalmanẹseli Asilia tọn hẹji wá tọ́nawhàn ẹn,+ Hoṣea sọ lẹzun devi etọn bo jẹ takuẹ sú na ẹn ji.+  Ṣigba, ahọlu Asilia tọn sè dọ Hoṣea doalọ to sébibla de mẹ, na e ko do wẹnsagun lẹ hlan Ahọlu So Egipti tọn+ bo ma hẹji wá ahọlu Asilia tọn dè nado sú takuẹ dile e ko nọ basi do to owhe he wayi lẹ mẹ. Enẹwutu, ahọlu Asilia tọn wle e sú do gànmẹ bo do gẹdẹ ẹ.  Ahọlu Asilia tọn tọ́nawhàn otò lọ blebu, e sọ wá Samalia bo dosla lẹdo e na owhe atọ̀n.  To owhe ṣinẹnẹtọ Hoṣea tọn mẹ, ahọlu Asilia tọn gbawhàn Samalia tọn.+ E sọ bẹ omẹ Islaeli tọn lẹ yì kanlinmọgbenu+ to Asilia bo hẹn yé nado nọ nọ̀ Halahi po Habọli po to tọ̀sisa Gozani+ pá podọ to tòdaho Medianu lẹ tọn lẹ mẹ.+  Ehe jọ, na omẹ Islaeli tọn lẹ ko waylando do Jehovah Jiwheyẹwhe yetọn he plan yé jẹgbonu sọn aigba Egipti tọn ji, yèdọ sọn alọ Falo ahọlu Egipti tọn tọn mẹ.+ Yé sẹ̀n* yẹwhe devo lẹ,+  yé hodo aṣa akọta he Jehovah ko yàn sẹ̀ sọn Islaelivi lẹ nukọn lẹ tọn bosọ hodo aṣa he ahọlu Islaeli tọn lẹ ko zedai.   Islaelivi lẹ to afọdona nuhe ma sọgbe to nukun Jehovah Jiwheyẹwhe yetọn tọn mẹ lẹ. Yé to ofi yiaga lẹ gbá mapote do tòdaho yetọn lẹpo mẹ,+ yèdọ sọn atọ̀họ̀-nuhihọ́ tọn ji yì tòdaho gángán* ji. 10  Yé sọ to dòtin wiwe zannu tọn lẹ po dòtin wiwe*+ lẹ po tùnte mapote to okọ́ta he yiaga lẹpo ji podọ to atin he vùn ganji lẹpo sá;+ 11  humọ, yé nọ basi avọ́sinsan mimẹ̀ lẹ to ofi yiaga lọ lẹpo kẹdẹdile akọta he Jehovah ko yàn sẹ̀ bo dohlan kanlinmọgbenu sọn nukọn yetọn lẹ ko nọ wà do.+ Yé to nuylankan lẹ wà mapote nado hẹn homẹgble Jehovah. 12  Yé zindonukọn nado to boṣiọ hiọawu* lẹ sẹ̀n,+ ehe Jehovah ko dọhona yé gandego dọ: “Mì ma dona wàmọ!”+ 13  Jehovah to avase na Islaeli po Juda po mapote gbọn yẹwhegán etọn lẹpo po numọtọ lẹpo po gblamẹ+ dọmọ: “Mì lẹ́ sọn aliho ylankan mìtọn lẹ ji!+ Mì yìn gbedide ṣie lẹ po osẹ́ndoai ṣie lẹ po to kọndopọ mẹ hẹ osẹ́n lọ lẹpo he yẹn ko degbe etọn na tọgbo mìtọn lẹ bo ko sọ dohlan mì gbọn devizọnwatọ ṣie yẹwhegán lẹ gblamẹ.” 14  Ṣigba, yé ma dotoai, yé nọ to tasinyẹn* dile tọgbo yetọn he ma do yise hia to Jehovah Jiwheyẹwhe yetọn mẹ lẹ ko wà do.+ 15  Yé zindonukọn nado to aṣẹdai etọn lẹ gbẹdai gọna alẹnu+ etọn he e ko basi hẹ tọgbo yetọn lẹ po nuflinmẹ etọn lẹ po he e ko na yé taidi avase,+ podọ yé to boṣiọ ovọ́ lẹ hodo mapote+ bo gbọnmọ dali hẹn yede zun nuvọ́+ bosọ to apajlẹ akọta he lẹdo yé lẹ tọn hodo, yèdọ akọta he Jehovah ko degbe dọ yé ma dona hodo apajlẹ yetọn lẹ.+ 16  Yé sọ nọ gbẹkọ gbedide Jehovah Jiwheyẹwhe yetọn tọn lẹpo go bo basi boṣiọ kinkọ̀n oyìnvu tọn awe+ po dòtin wiwe* de po+ bo nọ dẹ́ do odò na awhànpa olọn tọn lẹpo+ bosọ nọ sẹ̀n Baali.+ 17  Humọ, yé nọ hẹn visunnu po viyọnnu yetọn lẹ po jugbọn miyọ́n mẹ,+ yé nọ doalọ to dọṣẹdidọ+ po fákinkan po mẹ, yé jo* yede na nuhe ylan to nukun Jehovah tọn mẹ lẹ wiwà nado hẹn homẹgble e. 18  Enẹwutu, Jehovah gblehomẹ do Islaeli go sinsinyẹn sọmọ bọ e de yé sẹ̀ sọn nukọn etọn.+ E ma pò depope to yé mẹ dai, adavo hẹnnu Juda tọn kẹdẹ. 19  Omẹ Juda tọn lẹ lọsu ma yìn gbedide Jehovah Jiwheyẹwhe yetọn tọn lẹ;+ yelọsu yinuwa sọgbe hẹ aṣa he Islaeli hodo.+ 20  Jehovah sọ gbẹkọ kúnkan Islaeli tọn lẹpo go bo dowinyan yé bosọ jo yé do alọ mẹhe na bẹ nutindo yetọn yì lẹ tọn mẹ, kaka bo tùn yé dlan sọn nukọn etọn. 21  E tlẹ́n Islaeli sọn whédo Davidi tọn go, bọ yé yí Jeloboami visunnu Nebati tọn do doahọlu.+ Ṣigba, Jeloboami hẹn Islaeli nado danbú sọn Jehovah godo, podọ e hẹn yé nado waylando sinsinyẹn de. 22  Omẹ Islaeli tọn lẹ sọ to zọnlinzin mapote to ylando he Jeloboami ko wà lẹpo mẹ.+ Yé ma lẹkọ sọn yé mẹ 23  kaka bọ Jehovah wá de Islaeli sẹ̀ sọn nukọn etọn, kẹdẹdile e ko dọ gbọn devizọnwatọ etọn yẹwhegán lẹpo gblamẹ do.+ Enẹwutu, omẹ Islaeli tọn lẹ yin bibẹ sọn aigba yetọn ji yì kanlinmọgbenu to Asilia,+ fie yé gbẹ́ pò te kakajẹ egbé. 24  Enẹgodo, ahọlu Asilia tọn bẹ gbẹtọ lẹ sọn Babilọni, Kuta, Ava, Hamati po Sefalivaimi po+ bo bẹ yé do tòdaho Samalia tọn lẹ mẹ to otẹn Islaelivi lẹ tọn mẹ; yé sọ yí Samalia bo nọ nọ̀ tòdaho etọn lẹ mẹ. 25  Tlolo he yé jẹ finẹ nọ ji, yé ma dibusi* Jehovah. Enẹwutu, Jehovah do kinnikinni lẹ hlan yé,+ bọ yé hù delẹ to gbẹtọ lọ lẹ mẹ. 26  Linlin etọn sọ yin nina ahọlu Asilia tọn dọmọ: “Akọta he hiẹ bẹ wá kanlinmọgbenu bo natẹn do tòdaho Samalia tọn lẹ mẹ lẹ ma yọ́n lehe yè nọ sẹ̀n* Jiwheyẹwhe aigba lọ tọn do. Enẹwutu, ewọ to kinnikinni lẹ dohlan yé mapote, he nọ to hùhù sọn gbẹtọ lọ lẹ mẹ, na depope to yé mẹ ma yọ́n lehe yè nọ sẹ̀n Jiwheyẹwhe aigba lọ tọn do.” 27  Whenẹnu wẹ ahọlu Asilia tọn degbe dọmọ: “Mì gbọ dopo to yẹwhenọ he mì plan sọn finẹ yì kanlinmọgbenu lẹ mẹ ni lẹkọyi dọ́n bo plọn yé lehe yè nọ sẹ̀n Jiwheyẹwhe aigba lọ tọn do.” 28  Enẹwutu, dopo to yẹwhenọ he ko yin pinplan sọn Samalia yì kanlinmọgbenu lọ lẹ mẹ lẹkọyi Bẹtẹli,+ e sọ jẹ lehe yé dona nọ dibusi* Jehovah do plọn yé ji.+ 29  Etomọṣo, dopodopo akọta lọ lẹ tọn basi yẹwhe yetọn titi* bo nọ ze yé do ohọ̀ sinsẹ̀n-bibasi tọn lẹ mẹ to ofi yiaga he Samalianu lẹ ko basi lẹ; dopodopo akọta lọ lẹ tọn wàmọ to tòdaho he mẹ yé nọ nọ̀ lẹ mẹ. 30  Omẹ Babilọni tọn lẹ sọ basi Sukoti-bẹnọti, omẹ Kuti tọn lẹ basi Nẹlgali, omẹ Hamati+ tọn lẹ basi Aṣima, 31  podọ Avanu lẹ basi Nibhazi po Taltaki po. Sefalivaiminu lẹ nọ mẹ̀ visunnu yetọn lẹ to miyọ́n mẹ na Adlamelẹki po Anamelẹki po, yèdọ yẹwhe Sefalivaimi tọn lẹ.+ 32  Mahopọnna dọ yé nọ dibusi Jehovah, yé de gbẹtọ lẹ sọn omẹ paa lẹ mẹ nado lẹzun yẹwhenọ lẹ na ofi yiaga lọ lẹ, bọ omẹ ehelẹ nọ basi sinsẹ̀n do ota yetọn mẹ to ohọ̀ sinsẹ̀n-bibasi tọn lẹ mẹ to ofi yiaga lọ lẹ.+ 33  Gbọnmọ dali, yé nọ dibusi Jehovah, amọ́ yé sọ nọ sẹ̀n yẹwhe yetọn titi lẹ sọgbe hẹ sinsẹ̀n* akọta he mẹ yé ko yin bibẹ sọn lẹ tọn.+ 34  Aliho* sinsẹ̀n-bibasi tọn yetọn hoho lẹ wẹ yé gbẹ́ to hihodo kakajẹ egbé. Depope to yé mẹ ma nọ basi sinsẹ̀n hlan* Jehovah, podọ depope to yé mẹ ma nọ hodo osẹ́ndoai etọn lẹ, whẹdida etọn lẹ, Osẹ́n lọ po gbedide he Jehovah ko na visunnu Jakọbu tọn lẹ po, mẹhe ewọ ko diọ oyín etọn zun Islaeli.+ 35  Whenue Jehovah basi alẹnu de hẹ yé,+ e degbena yé dọmọ: “Mìwlẹ ma dona nọ dibusi yẹwhe devo lẹ, podọ mì ma dona nọ dẹ́ do odò na yé, sẹ̀n yé kavi basi avọ́sinsan hlan yé.+ 36  Ṣigba Jehovah, yèdọ mẹhe yí huhlọn daho po awà dindlẹn etọn po do plan mì jẹgbonu sọn aigba Egipti tọn ji,+ ewọ wẹ Mẹlọ he mìwlẹ dona nọ dibusi,+ ewọ wẹ mì dona nọ dẹ́ do odò na, podọ ewọ wẹ mì dona nọ basi avọ́sinsan hlan. 37  Humọ, mìwlẹ dona nọ yí sọwhiwhe do hodo aṣẹdai lẹ, whẹdida lẹ, Osẹ́n lọ po gbedide he e ko kandai na mì+ lọ po to whepoponu bo ma dona nọ dibusi yẹwhe devo lẹ. 38  Mìwlẹ masọ dona wọn alẹnu he yẹn ko basi hẹ mì,+ podọ mì ma dona nọ dibusi yẹwhe devo lẹ. 39  Amọ́, Jehovah Jiwheyẹwhe mìtọn wẹ mì dona nọ dibusi, na ewọ wẹ mẹlọ he na whlẹn mì sọn alọ kẹntọ mìtọn lẹpo tọn mẹ.” 40  Ṣigba, yé ma setonu bo to aliho* sinsẹ̀n-bibasi tọn yetọn hoho lọ hodo.+ 41  Gbọnmọ dali, akọta ehelẹ dibusi Jehovah nugbo,+ amọ́ yé sọ to boṣiọ pipà yetọn titi lẹ sẹ̀n ga. Visunnu yetọn lẹ po ovivi yetọn lẹ po sọ wà kẹdẹdile tọgbo yetọn lẹ ko wà do, kakajẹ egbé.

Nudọnamẹ Odò Tọn

To paa mẹ, “dibusi.”
Enẹ wẹ, yèdọ to filẹpo, vlavo fie gbẹtọ ma sù te kavi fie gbẹtọ sù te.
Pọ́n Zẹm.
Hogbe Heblugbe tọn lọ sọgan tindo kanṣiṣa hẹ hogbe he nọ dlẹnalọdo “omí” podọ e nọ yin yiyizan taidi hogbe vlẹko tọn.
To paa mẹ, “nọ hẹn okọ̀ yetọn sinyẹn.”
Pọ́n Zẹm.
To paa mẹ, “sà.”
Kavi “sẹ̀n.”
Kavi “yọ́n aṣa sinsẹ̀n-bibasi tọn.”
Kavi “sẹ̀n.”
Kavi “yẹwhe yetọn titi lẹ.”
Kavi “aṣa sinsẹ̀n-bibasi tọn.”
Kavi “Aṣa.”
To paa mẹ, “nọ dibusi.”
Kavi “aṣa.”