Yì hosọ lẹ ji

Yì hosọ flinflin lẹ ji

Yì todowhinnu hosọ lẹ tọn ji

Kunnudetọ Jehovah Tọn Lẹ

Gungbe

Biblu Intẹnẹt Ji Tọn | OWE WIWE LẸ—LẸDOGBEDEVOMẸ AIHỌN YỌYỌ TỌN

2 Ahọlu lẹ 15:1-38

NUHE E BẸHẸN LẸ

  • Azalia, ahọlu Juda tọn (1-7)

  • Ahọlu he gbọngodo to Islaeli lẹ: Zekalia (8-12), Ṣalumi (13-16), Menahẹmi (17-22), Pekahia (23-26), Peka (27-31)

  • Jotami, ahọlu Juda tọn (32-38)

15  To owhe 27tọ Ahọlu Jeloboami* Islaeli tọn mẹ, Azalia*+ visunnu Ahọlu Amazia+ Juda tọn lẹzun ahọlu.+  Owhe 16 wẹ e tindo to whenue e duahọlu, e sọ dugán to Jelusalẹm na owhe 52. Oyín onọ̀ etọn tọn wẹ Jekolia Jelusalẹm tọn.  E sọ zindonukọn nado to nuhe sọgbe to nukun Jehovah tọn mẹ lẹ wà, kẹdẹdile otọ́ etọn Amazia ko wà do.+  Ṣigba, ofi yiaga lẹ ma yin didesẹ,+ podọ gbẹtọ lẹ gbẹsọ to avọ́sinsan po avọ́sinsan mimẹ̀ lẹ po basi to ofi yiaga lẹ.+  Jehovah sayana ahọlu lọ bọ ewọ lẹzun pòtọnọ+ kakajẹ okú zangbe etọn; e sọ nọ nọ̀ ohọ̀ he yin kinklandovo de mẹ,+ bọ Jotami+ visunnu ahọlu tọn wẹ nọ penukundo owhé* lọ go bo nọ dawhẹna mẹhe to aigba lọ ji lẹ.+  Na nuhe dù otàn Azalia tọn he pò,+ yèdọ nuhe e wà lẹpo, be e ma yin kinkan do owe whenuho ahọlu Juda tọn lẹ tọn mẹ ya?  Azalia sọ yin hinhẹn nado mlọnai hẹ tọgbo etọn lẹ,+ yé sọ dì i dopọ hẹ tọgbo etọn lẹ do Tòdaho Davidi tọn mẹ; visunnu etọn Jotami sọ lẹzun ahọlu do otẹn etọn mẹ.  To owhe 38tọ Ahọlu Azalia+ Juda tọn mẹ, Zekalia+ visunnu Jeloboami tọn duahọlu do Islaeli ji to Samalia, e sọ dugán na osun ṣidopo.  E wà nuhe ylan to nukun Jehovah tọn mẹ lẹ, kẹdẹdile tọgbo etọn lẹ ko wà do. E ma lẹkọ sọn ylando he Jeloboami visunnu Nebati tọn ko hẹn Islaeli nado wà lẹ mẹ.+ 10  Ṣalumi visunnu Jabẹṣi tọn sọ blasé do e go bo hù i+ to Ibleami.+ To whenue e ko hù i godo, e lẹzun ahọlu do otẹn etọn mẹ. 11  Na nuhe dù otàn Zekalia tọn he pò, e yin kinkan do owe whenuho ahọlu Islaeli tọn lẹ tọn mẹ. 12  Enẹ hẹn ohó he Jehovah dọna Jehu di dọmọ: “Whẹndo debọdo-dego ẹnẹ visunnu towe lẹ tọn+ na sinai do ofìn Islaeli tọn ji.”+ Podọ lehe e jọ do niyẹn. 13  Ṣalumi visunnu Jabẹṣi tọn duahọlu to owhe 39tọ Ahọlu Uzia+ Juda tọn mẹ, e sọ dugán to Samalia na osun dopo blebu. 14  Enẹgodo, Menahẹmi visunnu Gadi tọn hẹji sọn Tilza+ wá Samalia bo hù Ṣalumi+ visunnu Jabẹṣi tọn to Samalia. To whenue e ko hù i godo, e lẹzun ahọlu do otẹn etọn mẹ. 15  Na nuhe dù otàn Ṣalumi tọn he pò po sébibla he e wleawuna po, e yin kinkan do owe whenuho ahọlu Islaeli tọn lẹ tọn mẹ. 16  Ojlẹ enẹ mẹ wẹ Menahẹmi wá sọn Tilza bo gbawhàn Tifsa po mẹhe nọ nọ̀ e mẹ lẹpo po tọn gọna aigba etọn, na yé ma hùn họngbo tòdaho lọ tọn lẹ na ẹn wutu. E gbawhàn etọn bosọ zẹ̀ adọ̀ na yọnnu hohonọ etọn lẹ. 17  To owhe 39tọ Ahọlu Azalia Juda tọn mẹ, Menahẹmi visunnu Gadi tọn duahọlu do Islaeli ji, e sọ dugán to Samalia na owhe ao. 18  E zindonukọn nado to nuhe ylan to nukun Jehovah tọn mẹ lẹ wà. To gbẹzan etọn lẹpo mẹ, e ma lẹkọ sọn ylando he Jeloboami visunnu Nebati tọn ko hẹn Islaeli nado wà lẹpo mẹ.+ 19  Ahọlu Puli+ Asilia tọn wá aigba lọ ji, bọ Menahẹmi na Puli talẹnti* fataka tọn 1 000, na ewọ ko gọalọna ẹn nado hẹn ahọluduta lọ lodo to alọ etọn mẹ wutu.+ 20  Menahẹmi penugo nado bẹ fataka lọ pli to Islaeli gbọn yíyí i sọn sunnu nukundeji adọkunnọ lẹ si dali.+ E nọ bẹ ṣekẹli* fataka tọn 50 na ahọlu Asilia tọn do sunnu dopodopo tamẹ. Ahọlu Asilia tọn sọ lẹkọ bo ma gbọṣi aigba lọ ji ba. 21  Na nuhe dù otàn Menahẹmi+ tọn he pò, yèdọ nuhe e wà lẹpo, be e ma yin kinkan do owe whenuho ahọlu Islaeli tọn lẹ tọn mẹ ya? 22  Menahẹmi sọ yin hinhẹn nado mlọnai hẹ tọgbo etọn lẹ; visunnu etọn Pekahia sọ lẹzun ahọlu do otẹn etọn mẹ. 23  To owhe 50tọ Ahọlu Azalia Juda tọn mẹ, Pekahia visunnu Menahẹmi tọn duahọlu do Islaeli ji to Samalia, e sọ dugán na owhe awe. 24  E zindonukọn nado to nuhe ylan to nukun Jehovah tọn mẹ lẹ wà. E ma lẹkọ sọn ylando he Jeloboami visunnu Nebati tọn ko hẹn Islaeli nado wà lẹ mẹ.+ 25  Alọgọtọ etọn, yèdọ Peka+ visunnu Lemalia tọn blasé do e go bo hù i to Samalia to atọ̀họ̀ gángán owhé* ahọlu tọn lọ tọn mẹ, to pọmẹ hẹ Algobi po Aliẹ po. Sunnu Giliadi tọn 50 wẹ topọ hẹ ẹ; to whenue e ko hù i godo, e lẹzun ahọlu do otẹn etọn mẹ. 26  Na nuhe dù otàn Pekahia tọn he pò, yèdọ nuhe e wà lẹpo, e yin kinkan do owe whenuho ahọlu Islaeli tọn lẹ tọn mẹ. 27  To owhe 52tọ Ahọlu Azalia Juda tọn mẹ, Peka+ visunnu Lemalia tọn duahọlu do Islaeli ji to Samalia, e sọ dugán na owhe 20. 28  E zindonukọn nado to nuhe ylan to nukun Jehovah tọn mẹ lẹ wà, podọ e ma lẹkọ sọn ylando he Jeloboami visunnu Nebati tọn ko hẹn Islaeli nado wà lẹ mẹ.+ 29  To azán Ahọlu Peka Islaeli tọn lẹ gbè, Ahọlu Tiglati-pilesẹli+ Asilia tọn tọ́nawhàn Ijọni, Abẹli-bẹti-maaka,+ Janoa, Kedẹṣi,+ Hazọli, Giliadi+ po Galili po—yèdọ aigba Naftali tọn lẹpo+—bo yí yé, e sọ bẹ mẹhe to finẹ lẹpo yì kanlinmọgbenu to Asilia.+ 30  Enẹgodo, Hoṣea+ visunnu Elahi tọn wleawuna sébibla de sọta Peka visunnu Lemalia tọn bo linú in hù; e sọ lẹzun ahọlu do otẹn etọn mẹ to owhe 20tọ Jotami+ visunnu Uzia tọn mẹ. 31  Na nuhe dù otàn Peka tọn he pò, yèdọ nuhe e wà lẹpo, e yin kinkan do owe whenuho ahọlu Islaeli tọn lẹ tọn mẹ. 32  To owhe awetọ Peka visunnu Lemalia ahọlu Islaeli tọn mẹ, Jotami+ visunnu Ahọlu Uzia+ Juda tọn lẹzun ahọlu. 33  Owhe 25 wẹ e tindo to whenue e duahọlu, e sọ dugán to Jelusalẹm na owhe 16. Oyín onọ̀ etọn tọn wẹ Jeluṣa viyọnnu Zadọki tọn.+ 34  Ewọ sọ to nuhe sọgbe to nukun Jehovah tọn mẹ lẹ wà, kẹdẹdile otọ́ etọn Uzia ko wà do.+ 35  Ṣigba, ofi yiaga lẹ ma yin didesẹ, podọ gbẹtọ lẹ gbẹsọ to avọ́sinsan po avọ́sinsan mimẹ̀ lẹ po basi to ofi yiaga lẹ.+ Ewọ wẹ basi họngbo aga tọn ohọ̀ Jehovah tọn.+ 36  Na nuhe dù otàn Jotami tọn he pò, yèdọ nuhe e wà lẹ, be e ma yin kinkan do owe whenuho ahọlu Juda tọn lẹ tọn mẹ ya? 37  Azán enẹlẹ gblamẹ wẹ Jehovah jẹ Lezini ahọlu Silia tọn po Peka+ visunnu Lemalia tọn po dohlan ji sọta Juda.+ 38  Jotami sọ yin hinhẹn nado mlọnai hẹ tọgbo etọn lẹ bo yin dìdì dopọ hẹ tọgbo etọn lẹ do Tòdaho Davidi tọgbo etọn tọn mẹ. Visunnu etọn Ahazi sọ lẹzun ahọlu do otẹn etọn mẹ.

Nudọnamẹ Odò Tọn

Enẹ wẹ, Jeloboami 2tọ.
Zẹẹmẹdo “Jehovah Ko Gọalọ.” E sọ yin yiylọdọ Uzia to 2Ah 15:13; 2Ot 26:1-23; Isa 6:1; po Zek 14:5 po mẹ.
Kavi “họ̀nmẹ.”
Talẹnti dopo sọzẹn hẹ kg 34,2. Pọ́n Nud. B14.
Ṣekẹli dopo sọzẹn hẹ g 11,4. Pọ́n Nud. B14.
Kavi “họ̀nmẹ.”