Accessibility setting

De ogbè dopo

Yì hosọ flinflin lẹ ji

Yì todowhinnu hosọ lẹ tọn ji

Yì hosọ lẹ ji

Kunnudetọ Jehovah Tọn Lẹ

Gungbe

Biblu Intẹnẹt Ji Tọn

OWE WIWE LẸ—LẸDOGBEDEVOMẸ AIHỌN YỌYỌ TỌN

2 Ahọlu lẹ 10:1-36

NUHE E BẸHẸN LẸ

  • Jehu hù whédo Ahabi tọn (1-17)

    • Jehonadabi hodo Jehu (15-17)

  • Jehu hù Baali sẹ̀ntọ lẹ (18-27)

  • Otàn gandudu Jehu tọn (28-36)

10  Todin, Ahabi+ tindo visunnu 70 to Samalia. Enẹwutu, Jehu wlan wekanhlanmẹ lẹ bo do yé hlan Samalia, yèdọ hlan ahọvi Jezleẹli tọn lẹ, mẹho+ lẹ po mẹgopọntọ ovi Ahabi tọn lẹ tọn* po dọmọ:  “Whenue wekanhlanmẹ ehe na jẹ mì dè, visunnu oklunọ mìtọn tọn lẹ na ko to mì dè, gọna osọ́-kẹkẹ awhàn tọn lẹ, osọ́ lẹ, tòdaho gángán de po awhànfunnu lẹ po.  Mì de visunnu oklunọ mìtọn tọn dagbe hugan he pegan* taun lọ bo ze e do ofìn otọ́ etọn tọn ji. Enẹgodo, mì hoavùn na owhé oklunọ mìtọn tọn.”  Ṣigba, obu jẹ yé ji bọ yé dọmọ: “Pọ́n! Eyin ahọlu awe ma penugo nado nọte to nukọn etọn,+ nawẹ míwlẹ sọgan penugo do?”  Enẹwutu, nukunpedonugotọ họ̀nmẹ* lọ tọn, ayimatẹn-gán tòdaho lọ tọn, mẹho lẹ po mẹgopọntọ lọ lẹ po dowẹn hlan Jehu dọmọ: “Devizọnwatọ towe wẹ míwlẹ, podọ nuhe a dọna mí lẹpo wẹ mí na wà. Mí ma na yí mẹdepope do doahọlu. Wà nudepope he yọ́n to nukun towe mẹ.”  E sọ wlan wekanhlanmẹ awetọ hlan yé dọmọ: “Eyin mìwlẹ yin ṣie bo jlo na setonuna mi, mì bo hẹn ota visunnu oklunọ mìtọn tọn lẹ tọn wá na mi to osọ to ojlẹ ehe nkọ mẹ to Jezleẹli.” Todin, visunnu ahọlu tọn 70 lọ lẹ tin to sunnu nukundeji tòdaho lọ tọn lẹ dè bọ yé to pinpọn yé go whẹ́n.  Tlolo he wekanhlanmẹ lọ jẹ yé dè, yé bẹ visunnu ahọlu tọn lọ lẹ bo hù yé, yèdọ sunnu 70+ bosọ bẹ ota yetọn lẹ do ohà lẹ mẹ bo do yé hlan ẹn to Jezleẹli.  Wẹnsagun lọ wá bo dọna ẹn dọmọ: “Yé ko hẹn ota visunnu ahọlu tọn lọ lẹ tọn wá.” Enẹwutu Jehu dọmọ: “Mì bẹ yé pli do ogbẹ́ awe ji to họngbo tòdaho lọ tọn ji kakajẹ afọnnu.”  Whenue ewọ tọ́njẹgbonu to afọnnu, e nọte to gbẹtọ lọ lẹpo nukọn bo dọmọ: “Mìwlẹ yin homẹvọnọ.* Mọwẹ, yẹn wẹ blasé do oklunọ ṣie go bo hù i,+ amọ́ mẹnu wẹ hù omẹ ehe lẹpo? 10  Enẹwutu, e ni họnwun na mì dọ dopo tata to ohó Jehovah tọn he Jehovah ko dọ sọta whédo Ahabi tọn lẹ mẹ ma na nọma mọ hẹndi,*+ Jehovah ko sọ wà nuhe e dọ gbọn Elija devizọnwatọ etọn gblamẹ.”+ 11  Humọ, Jehu hù mẹhe pò to whédo Ahabi tọn mẹ to Jezleẹli lẹpo, gọna sunnu nukundeji etọn lẹ, mẹyinyọnẹn etọn lẹ po yẹwhenọ etọn lẹ po+ sọmọ bọ e ma pò omẹ etọn depope dogbẹ̀.+ 12  Enẹgodo, e fọ́n bo wleali dedo Samalia. Owhé* he gbè lẹngbọhọtọ lẹ nọ sìn lẹngbọ lẹ do tin to aliho lọ ji. 13  Jehu pé nọvisunnu Ahọlu Ahazia+ Juda tọn lẹ to finẹ bo dọna yé dọ, “Mẹnu wẹ mìwlẹ?” Yé sọ dọmọ: “Nọvisunnu Ahazia tọn lẹ wẹ mí, mí sọ jlo na jẹte nado yì kàn dagbemẹninọ visunnu ahọlu tọn lẹ po visunnu ahọsi daho tọn lẹ po tọn biọ.” 14  To afọdopolọji, e dọmọ: “Mì wle yé gbẹ̀te!” Yé sọ wle yé gbẹ̀te bo hù yé to osindò he to owhé he gbè lẹngbọ lẹ nọ yin sìnsìn do lọ kọ̀n, yèdọ sunnu 42. E ma pò depope to yé mẹ dogbẹ̀.+ 15  Dile e tọ́n sọn finẹ, e pé Jehonadabi+ visunnu Lekabi+ tọn he tọ́n ja nado pé e. Whenue e dọnudo e* godo, e dọna ẹn dọmọ: “Be hiẹ tin hẹ mi po ahun towe lẹpo po, kẹdẹdile ahun ṣie tin po ahun towe po do ya?” Jehonadabi gblọn dọmọ: “Mọwẹ.” “Eyin mọwẹ, na mi alọ towe.” E sọ na ẹn alọ, bọ Jehu dọ̀n ẹn biọ osọ́-kẹkẹ lọ mẹ po e po. 16  Enẹgodo, e dọmọ: “Hodo mi, bo pọ́n lehe n’ma nọ kẹalọyi agbàwhinwhlẹn hẹ Jehovah to aliho depope mẹ do.”*+ Mọ wẹ Jehonadabi yin hinhẹn nado hẹ osọ́-kẹkẹ awhàn tọn etọn mẹ hẹ ẹ do niyẹn. 17  E sọ wá Samalia bo hù mẹhe pò to whédo Ahabi tọn mẹ to Samalia lẹpo kaka bo sukúndona yé,+ sọgbe hẹ ohó he Jehovah ko dọna Elija.+ 18  Humọ, Jehu bẹ gbẹtọ lọ lẹpo pli dopọ bo dọna yé dọmọ: “Ahabi sẹ̀n Baali vude,+ ṣigba Jehu na sẹ̀n ẹn hugan mọ. 19  Enẹwutu, mì ylọ yẹwhegán Baali tọn lẹpo,+ sinsẹ̀n-basitọ etọn lẹpo po yẹwhenọ etọn lẹpo+ po na mi. Mì dike dopo tata to yé mẹ gọ̀n blo, na n’tindo avọ́sinsan daho de na Baali. Mẹdepope he gọ̀n ma na nọgbẹ̀.” Ṣigba, ayiha kàn wẹ Jehu te nado sọgan và Baali sẹ̀ntọ lẹ sudo. 20  Jehu zindonukọn dọmọ: “Mì lá dọ opli vonọtaun de tin* na Baali.” Yé sọ basi nulila lọ. 21  Enẹgodo, Jehu dowẹn hlan gbọn Islaeli pete, bọ Baali sẹ̀ntọ lẹpo wá. Dopo tata to yé mẹ ma gọ̀n. Yé biọ ohọ̀ Baali tọn mẹ,+ ohọ̀* Baali tọn lọ sọ gọ́ pete. 22  E sọ dọna mẹhe nọ penukundo fie avọ̀ lẹ nọ yin bibẹ do go lọ dọmọ: “Bẹ awù lẹ wá na Baali sẹ̀ntọ lẹpo.” Ewọ sọ bẹ awù lọ lẹ wá na yé. 23  Enẹgodo, Jehu po Jehonadabi+ visunnu Lekabi tọn po biọ ohọ̀ Baali tọn mẹ. Todin, e dọna Baali sẹ̀ntọ lẹ dọmọ: “Mì yí sọwhiwhe do dindona bo hẹn ẹn diun dọ mẹhe nọ sẹ̀n Jehovah depope ma tofi, adavo Baali sẹ̀ntọ lẹ kẹdẹ.” 24  To godo mẹ, yé biọ họmẹ nado basi avọ́sinsan lẹ po avọ́nunina mimẹ̀ lẹ po. Jehu ko bẹ omẹ 80 sọn sunnu etọn lẹ mẹ do gbonu bo dọmọ: “Eyin ode to sunnu he yẹn to jijodo alọ mìtọn mẹ lẹ mẹ họ̀ngán, ogbẹ̀ mìtọn wẹ na yin yíyí do otẹn etọn mẹ.”* 25  Tlolo he e dotana avọ́nunina mimẹ̀ lọ, Jehu dọna nuhọ́tọ* lẹ po ahọluzọnwatọ alọgọtọ lẹ po dọmọ: “Mì biọ họmẹ bo hù yé! Mì dike dopo tata to yé mẹ họ̀ngán blo!”+ Nuhọ́tọ lọ lẹ po ahọluzọnwatọ alọgọtọ lọ lẹ po sọ yí ohí do hù yé bo bẹ yé dlan gbonu, yé sọ zindonukọn kaka biọ fiwiwe* homẹ tọn ohọ̀ Baali tọn lọ tọn mẹ. 26  Yé sọ bẹ dòtin wiwe zannu tọn+ ohọ̀ Baali tọn lẹ tọ́njẹgbonu bo mẹ̀ dopodopo yetọn.+ 27  Yé họ́ dòtin wiwe zannu tọn Baali tọn lọ liai,+ yé sọ họ́ ohọ̀ Baali tọn liai+ bo yí i do basi adàdo, bọ e pò to finẹ kakajẹ egbé. 28  Gbọnmọ dali, Jehu sukúndona Baali sọn Islaeli. 29  Etomọṣo, Jehu ma lẹ́ sọn ylando he Jeloboami visunnu Nebati tọn ko hẹn Islaeli nado wà lẹ kọ̀n, yèdọ na nuhe dù oyìnvu sika tọn he to Bẹtẹli po Dani po lẹ.+ 30  Enẹwutu, Jehovah dọna Jehu dọmọ: “Na hiẹ ko wà dagbe bo ko wà nuhe sọgbe to nukun ṣie mẹ gbọn nuhe to ahun ṣie mẹ nado wà na whédo Ahabi tọn lẹpo hinhẹndi dali,+ whẹndo debọdo-dego ẹnẹ visunnu towe lẹ tọn na sinai do ofìn Islaeli tọn ji.”+ 31  Ṣigba, Jehu ma payi nado nọ yí ahun etọn lẹpo do zinzọnlin to Osẹ́n Jehovah Jiwheyẹwhe Islaeli tọn mẹ.+ E ma lẹ́ sọn ylando he Jeloboami ko hẹn Islaeli nado wà lẹ kọ̀n.+ 32  Azán enẹlẹ gbè wẹ Jehovah jẹ aigba Islaeli tọn má* ji vudevude. Hazaẹli sọ to awhàn tọ́n yé mapote to aigba Islaeli tọn lẹpo ji,+ 33  sọn Jọdani yì whèzẹtẹn-waji, aigba Giliadi tọn lẹpo—he yin Gadinu, Leubẹninu po Manassenu lẹ po tọn+—sọn Aloeli, ehe tin to Agbàdo* Alnọni tọn pá jẹ Giliadi po Baṣani po.+ 34  Podọ na nuhe dù otàn Jehu tọn he pò, yèdọ nuhe e wà lẹpo po huhlọn he e dohia po, be e ma yin kinkan do owe whenuho ahọlu Islaeli tọn lẹ tọn mẹ ya? 35  Jehu sọ yin hinhẹn nado mlọnai hẹ tọgbo etọn lẹ, yé sọ dì i do Samalia; visunnu etọn Jehoahazi+ sọ lẹzun ahọlu do otẹn etọn mẹ. 36  Owhe 28 wẹ Jehu do dugán do Islaeli ji to Samalia.

Nudọnamẹ Odò Tọn

To paa mẹ, “mẹgopọntọ Ahabi tọn lẹ.”
Kavi “he yin nugbonọ.”
To paa mẹ, “owhé.”
Kavi “dodonọ.”
To paa mẹ, “ma na flẹ jẹ kọmẹ.”
Ehe na ko to alọdlẹndo fihe lẹngbọ lẹ nọ yin sìnsìn do, na yè nido pà ofún na yé.
Kavi “dona ẹn.”
Kavi “bo pọ́n zohunhun ṣie na Jehovah.”
To paa mẹ, “Mì klan opli vonọtaun de do wiwe.”
Kavi “tẹmpli.”
Kavi “alindọn mìtọn wẹ na yin yíyí do alindọn etọn tẹnmẹ.”
To paa mẹ, “wezundotọ.”
To paa mẹ, “tòdaho,” vlavo ohọ̀ he taidi figángán de.
Kavi “depò.”
Kavi “Agbàdo Tọ̀sisa tọn.” Pọ́n Zẹm.