Yì hosọ lẹ ji

Yì hosọ flinflin lẹ ji

Yì todowhinnu hosọ lẹ tọn ji

Kunnudetọ Jehovah Tọn Lẹ

Gungbe

Biblu Intẹnẹt Ji Tọn | OWE WIWE LẸ—LẸDOGBEDEVOMẸ AIHỌN YỌYỌ TỌN

2 Ahọlu lẹ 1:1-18

NUHE E BẸHẸN LẸ

  • Elija dọ dọdai okú Ahazia tọn (1-18)

1  To okú Ahabi tọn godo, Moabi+ fọngu do Islaeli ji.  Whenẹnu wẹ Ahazia jai gbọn baṣẹ́ he yin titẹ́ do nùvo de nù sọn ohọ̀ aga tọn etọn mẹ to Samalia bo gbleawu. E sọ do wẹnsagun lẹ hlan bo dọna yé dọmọ: “Mì yì bo dindona sọn Baali-zebuli yẹwhe Eklọni+ tọn dè nado yọnẹn eyin yẹn na jẹgangan sọn awugble ehe mẹ.”+  Ṣigba, angẹli Jehovah tọn dọna Elija*+ Tiṣbinu lọ dọmọ: “Fọ́n bo yì pé wẹnsagun he ahọlu Samalia tọn dohlan lẹ bosọ dọna yé dọ, ‘Be Jiwheyẹwhe de ma tin to Islaeli wutu wẹ mìwlẹ do jei dodinnanu gbé sọn Baali-zebuli yẹwhe Eklọni tọn dè ya?+  Enẹwutu, nuhe Jehovah dọ die: “Hiẹ ma na fọ́n sọn adọzan he ji a ko mlọn lọ, na a na kú dandan.”’” Elija sọ wleali etọn dedo.  Whenue wẹnsagun lọ lẹ lẹkọwa e dè, e dọna yé to afọdopolọji dọmọ: “Naegbọn mìwlẹ do lẹkọ?”  Yé sọ gblọnna ẹn dọmọ: “Dawe de wẹ hẹji wá pé mí bo dọna mí dọ, ‘Mì lẹkọyi ahọlu he do mì hlan lọ dè bo dọna ẹn dọ, “Nuhe Jehovah dọ die: ‘Be Jiwheyẹwhe de ma tin to Islaeli wutu wẹ hiẹ do domẹhlan nado yì dindonanu sọn Baali-zebuli yẹwhe Eklọni tọn dè ya? Enẹwutu, hiẹ ma na fọ́n sọn adọzan he ji a ko mlọn lọ, na a na kú dandan.’”’”+  Whenẹnu wẹ ewọ kanse yé dọmọ: “Awusọhia nankọ wẹ dawe he hẹji wá pé mì bo dọ ohó ehelẹ na mì lọ tindo?”  Yé sọ dọna ẹn dọmọ: “Dawe lọ do awù ofúnnọ de+ bo sìn gbànnú ayú tọn de do alinkàn.”+ To afọdopolọji, ewọ dọmọ: “Elija Tiṣbinu lọ wẹ.”  Ahọlu sọ do ogán omẹ 50 tọn de hlan e dè po awhànfuntọ 50 etọn lẹ po. Whenue ewọ hẹji yì e dè, e to aisinsin to osó ji aga. Ewọ sọ dọna ẹn dọmọ: “Omẹ Jiwheyẹwhe nugbo lọ tọn E,+ ahọlu dọmọ: ‘Jẹte wá.’” 10  Ṣigba, Elija gblọnna ogán omẹ 50 tọn lọ dọmọ: “Eyọn, eyin omẹ Jiwheyẹwhe tọn de wẹ yẹn yin nugbo, miyọ́n ni flẹ sọn olọn mẹ+ bo fiọ hiẹ po awhànfuntọ 50 towe lẹ po.” Miyọ́n sọ flẹ sọn olọn mẹ bo fiọ ewọ po awhànfuntọ 50 etọn lẹ po. 11  Ahọlu sọ vọ́ do ogán omẹ 50 tọn devo hlan e dè po awhànfuntọ 50 etọn lẹ po. Ewọ yì bo dọna ẹn dọmọ: “Omẹ Jiwheyẹwhe nugbo lọ tọn E, nuhe ahọlu dọ die, ‘Jẹte wá din tlolo.’” 12  Ṣigba, Elija gblọnna yé dọmọ: “Eyin omẹ Jiwheyẹwhe nugbo lọ tọn de wẹ yẹn yin nugbo, miyọ́n ni flẹ sọn olọn mẹ bo fiọ hiẹ po awhànfuntọ 50 towe lẹ po.” Miyọ́n Jiwheyẹwhe tọn sọ flẹ sọn olọn mẹ bo fiọ ewọ po awhànfuntọ 50 etọn lẹ po. 13  Enẹgodo, ahọlu sọ vọ́ do ogán omẹ 50 tọn atọ̀ntọ devo hlan po awhànfuntọ 50 etọn lẹ po. Ṣigba, ogán omẹ 50 tọn atọ̀ntọ lọ hẹji yì bo jẹklo to Elija nukọn bosọ jẹ nukundagbe etọn biọ ji dọmọ: “Omẹ Jiwheyẹwhe nugbo lọ tọn E, jaale gbọ ogbẹ̀ ṣie po ogbẹ̀* devizọnwatọ towe 50 ehelẹ tọn po ni họakuẹ to nukun towe mẹ. 14  Miyọ́n ko flẹ sọn olọn mẹ bo fiọ ogán omẹ 50 tọn awe he jẹnukọn lọ lẹ po pipli omẹ 50 tọn yetọn lẹ po, ṣigba todin gbọ ogbẹ̀* ṣie ni họakuẹ to nukun towe mẹ.” 15  Whenẹnu, angẹli Jehovah tọn dọna Elija dọmọ: “Jẹte hodo e yì. A dibuna ẹn blo.” Enẹwutu, ewọ fọ́n bo jẹte hodo e yì ahọlu dè. 16  Elija sọ dọna ahọlu dọ, “Nuhe Jehovah dọ die: ‘Hiẹ do wẹnsagun lẹ hlan nado yì dindonanu sọn Baali-zebuli yẹwhe Eklọni tọn dè.+ Be Jiwheyẹwhe de ma tin to Islaeli wutu wẹ ya?+ Naegbọn hiẹ ma do dindona ohó etọn? Enẹwutu, hiẹ ma na fọ́n sọn adọzan he ji a ko mlọn lọ, na a na kú dandan.’” 17  Ewọ sọ kú sọgbe hẹ ohó Jehovah tọn he Elija ko dọ; podọ na e ma tindo visunnu de wutu, Jeholami*+ wẹ lẹzun ahọlu do otẹn etọn mẹ to owhe awetọ Jeholami+ visunnu Jehoṣafati ahọlu Juda tọn mẹ. 18  Na nuhe dù otàn Ahazia+ tọn he pò, yèdọ nuhe e wà lẹ, be e ma yin kinkan do owe whenuho ahọlu Islaeli tọn lẹ tọn mẹ ya?

Nudọnamẹ Odò Tọn

Zẹẹmẹdo “Jehovah Wẹ Jiwheyẹwhe Ṣie.”
Kavi “gbọ alindọn ṣie po alindọn.”
Kavi “alindọn.”
Enẹ wẹ, nọvisunnu Ahazia tọn.