Accessibility setting

De ogbè dopo

Yì hosọ flinflin lẹ ji

Yì todowhinnu hosọ lẹ tọn ji

Yì hosọ lẹ ji

Kunnudetọ Jehovah Tọn Lẹ

Gungbe

Biblu Intẹnẹt Ji Tọn

OWE WIWE LẸ—LẸDOGBEDEVOMẸ AIHỌN YỌYỌ TỌN

1 Timoti 6:1-21

NUHE E BẸHẸN LẸ

  • Afanumẹ ni gbògbéna ogán (1, 2)

  • Mẹplọntọ lalo lẹ po wanyina akuẹ po (3-10)

  • Anademẹ na omẹ Jiwheyẹwhe tọn (11-16)

  • Nọ sudeji to azọ́n dagbe lẹ mẹ (17-19)

  • Họ́ nuhe yin zizedo alọmẹ na we (20, 21)

6  Gbọ mẹhe tin to zẹgẹ afanumẹ-yinyin tọn glọ lẹpo ni nọ pọ́n klunọ yetọn lẹ hlan di mẹhe jẹna gbégbò mlẹnmlẹn,+ na ohó ylankan ni ma do yin didọ do oyín Jiwheyẹwhe tọn po nuplọnmẹ lọ po go gbede blo.+  Humọ, gbọ mẹhe tindo klunọ he yin yisenọ lẹ ni ma nọ yinuwa hẹ yé po mẹmasi po, na yé yin mẹmẹsunnu lẹ wutu blo. Kakatimọ, yé dona nọ yí ojlo vẹkuvẹku do sẹ̀n, na mẹhe yé to devizọn dagbe wà na lẹ yin yisenọ lẹ po mẹyiwanna lẹ po wutu. Nọ to onú ehelẹ plọnmẹ bo nọ to tudohomẹnamẹ ehelẹ namẹ.  Eyin mẹdepope nọ plọnmẹ nuplọnmẹ devo bo ma kọngbedopọ hẹ anademẹ he sọgbe* lọ,+ he wá sọn Oklunọ mítọn Jesu Klisti dè, kavi hẹ nuplọnmẹ he to kọndopọ mẹ hẹ mẹdezejo na Jiwheyẹwhe,+  ewọ ko gbọn kikla dali yigo bo ma mọnukunnujẹ nudepope mẹ.+ Ewọ nọ na ayidonugo* nudindọn po whẹwhinwhẹ́n dindin po zẹjlẹgo.+ Onú ehelẹ wẹ nọ fọ́n nuvẹun, avùn, mẹhẹngble* po nuvẹdomẹ ylankan lẹ po dote,  gọna nudindọn whẹwhẹ gando numadinu lẹ go gbọn mẹhe ko gblezọn to ayiha mẹ+ bo ko gbọagba nugbo lọ tọn lẹ dali, he nọ to linlẹn dọ mẹdezejo na Jiwheyẹwhe nọ hẹn ale mẹdetiti tọn wá.+  Na nugbo tọn, mẹdezejo na Jiwheyẹwhe+ po pekọ po nọ hẹn ale daho wá.  Na mí ma hẹn nudepope wá aihọn mẹ, mọjanwẹ mí ma sọgan sọ ze nudepope tọ́nyi do niyẹn.+  Enẹwutu, eyin mí tindo núdùdù po avọ̀* po, onú ehelẹ ni pekọna mí.+  Ṣigba, mẹhe magbe nado yin adọkunnọ lẹ jai jẹ whlepọn po omọ̀+ po gọna ojlo gúgú tọn po ojlo ylankan susu po mẹ, ehe nọ tlọ omẹ do vasudo po dindọn po mẹ.+ 10  Na wanyina akuẹ wẹ yin adọ̀ nuylankan wunmẹ lẹpo tọn, podọ gbọn afọdidona owanyi ehe dali, mẹdelẹ ko yin hinhẹn buali sọn yise lọ mẹ bo ko yí awufiẹsa susu do sọnú yede gbọn filẹpo.+ 11  Ṣigba, hiẹ omẹ Jiwheyẹwhe tọn E, nọ họ̀nna onú ehe lẹpo. Nọ doafọna dodowiwa, mẹdezejo na Jiwheyẹwhe, yise, owanyi, akọndonanu po walọmimiọn po.+ 12  Nọ hoavùn dagbe yise tọn; tẹdo ogbẹ̀ madopodo lọ go gligli, ehe hiẹ yin yiylọ na podọ ehe hiẹ ko basi gbeyiyi gbangba tọn etọn to kunnudetọ susu nukọn. 13  To Jiwheyẹwhe nukọn, mẹhe nọ hẹn nulẹpo dogbẹ̀, podọ to Klisti Jesu nukọn, yèdọ mẹhe dekunnu dagbe to gbangba to Pọntiu Pilati nukọn+ taidi kunnudetọ de, yẹn degbena we 14  nado nọ payi gbedide lọ go to aliho mado mọdọ podọ matin ovlẹ tọn de mẹ kakajẹ awusọhia Oklunọ mítọn Jesu Klisti tọn whenu,+ 15  ehe omẹ ayajẹnọ podọ Huhlọnnọ dopo kẹdẹ lọ na hẹn sọawuhia to ojlẹ dide etọn titi mẹ. Ewọ wẹ Ahọlu mẹhe to gandu taidi ahọlu lẹ tọn podọ Oklunọ mẹhe to gandu taidi oklunọ lẹ tọn,+ 16  mẹlọ he ewọ kẹdẹ wẹ tindo jọmaku,+ mẹhe nọ nọ̀ hinhọ́n he ma yọ́n dọnsẹpọ mẹ,+ mẹhe gbẹtọ depope ma ko mọ pọ́n kavi ma sọgan mọ.+ Gbégbò po huhlọn madopodo po ni tin hlan ewọ. Niṣẹ.* 17  Nọ na ayinamẹ* mẹhe yin adọkunnọ to titonu* ehe mẹ lẹ ma nado nọ yigo,* podọ ma nado ze todido yetọn sinai do adọkun he ma tindo jidide lẹ ji,+ ṣigba do Jiwheyẹwhe ji, mẹhe nọ na mí nuhe mí nọ duvivi etọn lẹpo susugege.+ 18  Nọ dọna yé nado nọ wà dagbe, nado nọ sudeji to azọ́n dagbe lẹ mẹ, nado yin alọtlútọ bo wleawu nado mánamẹ+ 19  bosọ nọ gbọnmọ dali bẹ adọkunnu whlá na yede, yèdọ dodonu dagbe de he ji yé na do dó to sọgodo,+ na yé nido sọgan tẹdo ogbẹ̀ nujọnu tọn lọ go gligli.+ 20  Timoti E, basi hihọ́na nuhe yin zizedo alọmẹ na we lọ,+ bo nọ dapana ohó ovọ́ lẹ he nọ kọnmasin do onú wiwe go podọ na ohó agọjẹdomẹ tọn he yè nọ yí lalo do ylọdọ “oyọnẹn”+ lẹ. 21  Gbọn oyọnẹn mọnkọtọn lẹ jijlá dali, mẹdelẹ ko jo yise lọ do. Na nukundagbe majẹhẹ ni tin hẹ mì.

Nudọnamẹ Odò Tọn

Kavi “he pegan; he nọ hẹn ale wá.”
Kavi “nọ yin ahunmẹduna gando.”
Kavi “mẹzunzun.”
Kavi “adọtẹn.” To paa mẹ, “nuhe yè nọ ṣinyọ́n.”
Kavi “Amẹn” to Glẹkigbe mẹ.
Kavi “Degbena.”
Kavi “ojlẹ.” Pọ́n Zẹm.
Kavi “nọ ze yede daga.”