Accessibility setting

De ogbè dopo

Yì hosọ flinflin lẹ ji

Yì todowhinnu hosọ lẹ tọn ji

Yì hosọ lẹ ji

Kunnudetọ Jehovah Tọn Lẹ

Gungbe

Biblu Intẹnẹt Ji Tọn

OWE WIWE LẸ—LẸDOGBEDEVOMẸ AIHỌN YỌYỌ TỌN

1 Tẹsalonikanu lẹ 3:1-13

3  Enẹwutu, to whenuena mí ma sọgan doakọnna ẹn ba, mí mọdọ e yọ́n nado gbọṣi Atẹni míde ṣo;+  podọ mí do Timoti,+ mẹmẹsunnu mítọn podọ lizọnyizọnwatọ Jiwheyẹwhe tọn* to wẹndagbe he gando Klisti go lọ mẹ hlan mì, na ewọ nido hẹn mì lodo* bo miọnhomẹna mì to yise mẹ,  na nukunbibia ehelẹ nikaa hẹn mẹdepope whàngo.* Na mìlọsu lẹ yọnẹn dọ mí ma sọgan dapana yajiji mọnkọtọn lẹ.*+  Na whenue mí tin to mì dè, mí ko nọ dọna mì jẹnukọn dọ mí na jiya nukunbibia tọn, podọ nuhe ko jọ lọ niyẹn, kẹdẹdile mì yọnẹn do.+  Enẹ wẹ zọ́n bọ to whenuena yẹn ma sọgan doakọnna ẹn ba, yẹn domẹhlan mì nado sè gando nugbonọ-yinyin mìtọn go,+ na vlavo to aliho de mẹ, Mẹwhlepọntọ+ lọ sọgan ko whlé mì pọ́n, bọ tuklajẹ mítọn sọgan ko lẹzun ovọ́.  Ṣigba todin, Timoti ko ṣẹṣẹ lẹkọwa mí dè sọn mì dè+ bo hẹn wẹndagbe wá gando nugbonọ-yinyin po owanyi mìtọn po go, dọ mìwlẹ zindonukọn nado to mí flin to aliho dagbe mẹ to whepoponu bo to jijlo vẹkuvẹku nado mọ mí, dile mílọsu lẹ to jijlo nado mọ mì do.  Mẹmẹsunnu lẹ emi, enẹ wẹ zọ́n bọ míwlẹ ko yin homẹmiọnna to ayimajai* mítọn po nukunbibia mítọn lẹpo po mẹ, na mìtọn wutu podọ na nugbonọ-yinyin he mì nọ dohia wutu.+  Na míwlẹ nọ gọ̀ huhlọn mọyi,* na mìwlẹ nọte gligli to Oklunọ mẹ wutu.  Na nawẹ mí sọgan dopẹna Jiwheyẹwhe na mìtọn wutu, na ayajẹ daho he mìwlẹ nọ hẹn mí tindo to Jiwheyẹwhe mítọn nukọn gbọn? 10  Ozán po okle po wẹ mí nọ to vẹvẹ vẹkuvẹku dile e yọnbasi do nado mọ mì nukun sọ nukun* podọ nado hẹn nuhe jẹdò to yise mìtọn mẹ lẹ sọgbe.+ 11  Todin, na Jiwheyẹwhe podọ Otọ́ mítọn lọsu gọna Oklunọ mítọn Jesu ni deali na mí nado wá mì dè. 12  Humọ, na Oklunọ ni hẹn mì jideji, mọwẹ, ni hẹn mì sudeji to owanyi mẹ na ode awetọ+ podọ na mẹlẹpo, kẹdẹdile mílọsu nọ wà na mì do ga, 13  na ewọ nido sọgan hẹn ahun mìtọn lodo, madoblọ to wiwe-yinyin mẹ to Jiwheyẹwhe+ podọ Otọ́ mítọn nukọn to tintin tofi Oklunọ mítọn Jesu+ tọn hẹ omẹ wiwe etọn lẹpo whenu.

Nudọnamẹ Odò Tọn

Kavi vlavo, “azọ́nwatọ hatọ Jiwheyẹwhe tọn.”
Kavi “nido na mì huhlọn.”
To paa mẹ, “nikaa do yigọyigọ na mẹdepope.”
Kavi “mí ko yin dide na ehe.”
To paa mẹ, “dandannu.”
To paa mẹ, “míwlẹ togbẹ̀.”
To paa mẹ, “mọ nukunmẹ mìtọn.”