Yì hosọ lẹ ji

Yì hosọ flinflin lẹ ji

Yì todowhinnu hosọ lẹ tọn ji

Kunnudetọ Jehovah Tọn Lẹ

Gungbe

Biblu Intẹnẹt Ji Tọn | OWE WIWE LẸ—LẸDOGBEDEVOMẸ AIHỌN YỌYỌ TỌN

1 Tẹsalonikanu lẹ 1:1-10

NUHE E BẸHẸN LẸ

  • Nudọdomẹ lẹ (1)

  • Pẹdido, na yise Tẹsalonikanu lẹ tọn (2-10)

1  Paulu, Silvanu*+ po Timoti+ po to wekanhlan agun Tẹsalonikanu lẹ tọn he to kọndopọ mẹ hẹ Jiwheyẹwhe Otọ́ podọ Oklunọ Jesu Klisti: Na mì ni tindo nukundagbe majẹhẹ po jijọho po.  Whepoponu wẹ mí nọ dopẹna Jiwheyẹwhe to whenue mí donù mìmẹpo go to odẹ̀ mítọn lẹ mẹ,+  na whepoponu wẹ mí nọ flin azọ́n nugbonọ-yinyin tọn mìtọn, tuklajijẹ owanyinọ mìtọn po akọndonanu mìtọn po, na todido mìtọn+ to Oklunọ mítọn Jesu Klisti mẹ wutu to Jiwheyẹwhe mítọn podọ Otọ́ mítọn nukọn.  Mì mẹmẹsunnu mẹyiwanna Jiwheyẹwhe tọn lẹ emi, na mí yọnẹn dọ ewọ wẹ de mì,  na wẹndagbe he mí dọyẹwheho etọn ma yin lilá na mì po hodidọ po kẹdẹ gba, ṣigba po huhlọn po podọ po gbigbọ wiwe po gọna nujikudo sinsinyẹn, kẹdẹdile mì yọ́n mẹhe nkọ míwlẹ lẹzun to ṣẹnṣẹn mìtọn na ale mìtọn wutu.  Mìwlẹ sọ nọ hodo apajlẹ míwlẹ+ po Oklunọ+ po tọn, na mì kẹalọyi ohó lọ to nukunbibia susu+ mẹ po ayajẹ he gbigbọ wiwe nọ namẹ po,  sọmọ bọ mìwlẹ lẹzun apajlẹ de na yisenọ lẹpo to Makedonia podọ to Akaia.  Nugbo lọ wẹ yindọ, e ma yindọ ohó Jehovah* tọn yin lilá jẹgbonu sọn mì dè to Makedonia po Akaia po kẹdẹ wẹ gba, ṣigba yise mìtọn to Jiwheyẹwhe mẹ ko gbayipe to filẹpo,+ sọmọ bọ míwlẹ ma tindo nuhudo nado dọ nudepope ba.  Na yelọsu lẹ to linlin na mapote gando whla tintan he mí wá mì dè go podọ lehe mìwlẹ lẹhlan Jiwheyẹwhe dè sọn boṣiọ mìtọn+ lẹ kọ̀n nado yin afanumẹ na Jiwheyẹwhe ogbẹ̀nọ podọ nugbo lọ do, 10  podọ nado nọtepọn Visunnu etọn sọn olọn mẹ,+ mẹhe ewọ fọ́n sọn oṣiọ lẹ mẹ, yèdọ Jesu, mẹhe whlẹn mí sọn homẹgble he ja lọ mẹ.+

Nudọnamẹ Odò Tọn

Sọ nọ yin yiylọdọ Sila.
Pọ́n Nud. A5.