Yì hosọ lẹ ji

Yì hosọ flinflin lẹ ji

Yì todowhinnu hosọ lẹ tọn ji

Kunnudetọ Jehovah Tọn Lẹ

Gungbe

Biblu Intẹnẹt Ji Tọn | OWE WIWE LẸ—LẸDOGBEDEVOMẸ AIHỌN YỌYỌ TỌN

1 Samuẹli 8:1-22

NUHE E BẸHẸN LẸ

  • Islaeli biọ ahọlu de (1-9)

  • Samuẹli na avase gbẹtọ lọ lẹ (10-18)

  • Jehovah na yé ahọlu de (19-22)

8  To whenue Samuẹli poyọnho, e de visunnu etọn lẹ taidi whẹdatọ lẹ na Islaeli.  Oyín visunnu plọnji etọn tọn wẹ Joẹli podọ oyín awetọ tọn wẹ Abija;+ yewlẹ wẹ yin whẹdatọ to Beẹli-ṣeba.  Ṣigba, visunnu etọn lẹ ma zinzọnlin gbọn aliho etọn lẹ ji; yé nọ doafọna ale mawadodo tọn,+ bo nọ kẹalọyi alọgodo-kuẹ+ bosọ nọ gada whẹdida.+  To nukọn mẹ, mẹho Islaeli tọn lẹpo pli dopọ bo wá Samuẹli dè to Lama.  Yé sọ dọna ẹn dọmọ: “Pọ́n! Hiẹ ko poyọnho, amọ́ visunnu towe lẹ ma to zọnlinzin gbọn aliho towe lẹ ji. Todin, de ahọlu de na mí he na nọ dawhẹna mí kẹdẹdi akọta he pò lẹpo.”+  Ṣigba, homẹ Samuẹli tọn ma hùn* to whenue yé dọ dọ: “Na mí ahọlu de he na nọ dawhẹna mí.” To whenẹnu, Samuẹli hodẹ̀ hlan Jehovah,  bọ Jehovah dọna Samuẹli dọmọ: “Nuhe gbẹtọ lọ lẹ dọna we lẹpo wẹ a ni dotoaina; na e ma yin hiẹ wẹ yé gbẹdai gba, ṣigba yẹn wẹ yé gbẹdai taidi ahọlu yetọn.+  Yé to nuyiwa kẹdẹdile yé ko nọ wà do sọn gbeegbe n’plan yé tọ́njẹgbonu sọn Egipti kakajẹ egbé; gbọzangbọzan wẹ yé nọ jo mi do+ bo nọ to yẹwhe devo lẹ sẹ̀n,+ podọ nudopolọ wà na we wẹ yé te.  Todin, dotoaina yé. Etomọṣo, hiẹ dona na yé avase sinsinyẹn; slẹ nuhe ahọlu he na dugán do yé ji na tindo jlọjẹ nado nọ biọ to yé si lẹ na yé.” 10  Enẹwutu, Samuẹli dọ ohó Jehovah tọn lọ lẹpo na gbẹtọ lọ lẹ he to ahọlu de biọ sọn e si. 11  E dọmọ: “Nuhe ahọlu he na dugán do mì ji na tindo jlọjẹ nado nọ biọ lẹ die:+ Ewọ na nọ yí visunnu mìtọn lẹ+ bo na de yé do osọ́-kẹkẹ etọn lẹ mẹ+ bo nasọ yí yé do basi osọ́nọ etọn lẹ,+ bọ delẹ to yé mẹ na to dandannu glọ nado nọ họ̀nwezun to osọ́-kẹkẹ etọn lẹ nukọn. 12  Ewọ nasọ nọ de ogán lẹ do pipli omẹ fọtọ́n tọn lẹ ji+ podọ do pipli omẹ kandeao tọn lẹ ji,+ bọ mẹdelẹ na nọ pọ̀gle na ẹn,+ gbẹ̀n ojijẹ etọn+ bosọ wleawuna awhànfunnu etọn lẹ po núzinzan osọ́-kẹkẹ etọn lẹ tọn po.+ 13  E na nọ yí viyọnnu mìtọn lẹ do basi mẹhe nọ wleawuna amì owán gblingblinnọ lẹ, podọ nudàtọ po akladatọ lẹ po.+ 14  E na nọ yí adà dagbe hugan ogle, vẹngle po olivie-gle mìtọn lẹ tọn po+ bo na yí yé na devizọnwatọ etọn lẹ. 15  Ewọ na nọ yí mado-ao likun-gle po vẹngle mìtọn lẹ tọn po bo na yí yé na ahọluzọnwatọ họ̀nmẹ tọn etọn lẹ po devizọnwatọ etọn lẹ po. 16  Podọ e na nọ yí devisunnu po deviyọnnu mìtọn lẹ po, kanlinpa mìtọn dagbe hugan lẹ po kẹtẹkẹtẹ mìtọn lẹ po, bo na nọ yí yé zan nado wazọ́n etọn titi.+ 17  E na nọ yí mado-ao lẹngbọpa mìtọn lẹ tọn+ bọ mì na lẹzun devizọnwatọ etọn lẹ. 18  Azán lọ na wá pé bọ mìwlẹ na dawhá jẹgbonu, na ahọlu he mì ko de nado dugán do mì ji lọ wutu,+ amọ́ Jehovah ma na siọ mì to azán enẹ gbè.” 19  Ṣigba, gbẹtọ lọ lẹ gbẹ́ nado dotoaina nuhe dọna yé Samuẹli te, yé sọ dọmọ: “Lala, míwlẹ ko magbe nado tindo ahọlu de he na dugán do mí ji. 20  Gbọnmọ dali, mí na taidi akọta he pò lẹpo, bọ ahọlu mítọn na nọ dawhẹna mí bo na nọ deanana mí bo nasọ nọ hoavùn hẹ kẹntọ mítọn lẹ.” 21  To whenue Samuẹli ko sè ohó gbẹtọ lọ lẹ tọn lẹpo fó, e vọ́ yé dọna Jehovah. 22  Jehovah sọ dọna Samuẹli dọmọ: “Dotoaina yé bo de ahọlu de nado dugán do yé ji.”+ Enẹgodo, Samuẹli dọna sunnu Islaeli tọn lọ lẹ dọmọ: “Dopodopo mìtọn ni lẹkọyi tòdaho etọn mẹ.”

Nudọnamẹ Odò Tọn

To paa mẹ, “e ylan to nukun Samuẹli tọn mẹ.”