Yì hosọ lẹ ji

Yì hosọ flinflin lẹ ji

Yì todowhinnu hosọ lẹ tọn ji

Kunnudetọ Jehovah Tọn Lẹ

Gungbe

Biblu Intẹnẹt Ji Tọn | OWE WIWE LẸ—LẸDOGBEDEVOMẸ AIHỌN YỌYỌ TỌN

1 Samuẹli 7:1-17

NUHE E BẸHẸN LẸ

  • Apotin lọ to Kiliati-jealimi (1)

  • Samuẹli dotuhomẹnamẹ dọ: ‘Mì sẹ̀n Jehovah kẹdẹ’ (2-6)

  • Awhàngbigba Islaeli tọn to Mizpa (7-14)

  • Samuẹli dawhẹna Islaeli (15-17)

7  Enẹwutu, sunnu Kiliati-jealimi tọn lẹ wá bo ze Apotin Jehovah tọn hẹji yì owhé Abinadabi+ tọn gbè to okọ́ta lọ ji, bosọ klan visunnu etọn Eleazali do wiwe nado nọ basi hihọ́na Apotin Jehovah tọn.  Ojlẹ dindẹn de juwayi, yèdọ owhe 20 to lẹndopọ mẹ, sọn gbeegbe Apotin lọ wá Kiliati-jealimi, bọ whédo Islaeli tọn pete jẹ Jehovah dín ji.+  Samuẹli sọ dọna whédo Islaeli tọn pete dọmọ: “Eyin lilẹhlan Jehovah dè wẹ mì te po ahun mìtọn lẹpo po,+ mì bo de yẹwhe jonọ lẹ+ po boṣiọ Aṣitolẹti tọn+ lẹ po sẹ̀ sọn ṣẹnṣẹn mìtọn, bo lẹ́ ahun mìtọn hlan Jehovah dè mlẹnmlẹn bosọ nọ sẹ̀n ewọ kẹdẹ,+ e nasọ whlẹn mì sọn alọ Filistinu lẹ tọn mẹ.”+  Enẹwutu, Islaelivi lẹ de Baali lẹ po boṣiọ Aṣitolẹti tọn lẹ po sẹ̀ bo nọ sẹ̀n Jehovah kẹdẹ.+  To whenẹnu, Samuẹli dọmọ: “Mì bẹ omẹ Islaeli tọn lẹpo pli dopọ to Mizpa,+ yẹn nasọ hodẹ̀ hlan Jehovah do ota mìtọn mẹ.”+  Enẹwutu, yé pli dopọ to Mizpa, podọ yé dà osin bo kọ̀n ẹn do Jehovah nukọn bosọ blanù to gbenẹgbe.+ Yé sọ dọ to finẹ dọmọ: “Míwlẹ ko waylando do Jehovah.”+ Samuẹli sọ jẹ devizọnwa ji taidi whẹdatọ+ do Islaelivi lẹ ji to Mizpa.  To whenue Filistinu lẹ sè dọ Islaelivi lẹ ko pli dopọ to Mizpa, ogán Filistinu lẹ tọn+ lẹ hẹji yì nado tọ́nawhàn Islaeli. Whenue Islaelivi lẹ sè ehe, yé dibu, na Filistinu lẹ wutu.  Enẹwutu, Islaelivi lẹ dọna Samuẹli dọmọ: “A doalọtena Jehovah Jiwheyẹwhe mítọn yiylọ blo, na e nido gọalọna mí+ bo whlẹn mí sọn alọ Filistinu lẹ tọn mẹ.”  To whenẹnu, Samuẹli ze lẹngbọvu he to anọ́nù de bo yí i do sanvọ́ taidi avọ́nunina mimẹ̀ blebu+ de hlan Jehovah; Samuẹli sọ dawhá ylọ Jehovah na alọgọ do ota Islaeli tọn mẹ bọ Jehovah sè etọn.+ 10  Dile Samuẹli to avọ́nunina mimẹ̀ lọ basi, Filistinu lẹ dọnsẹpọ nado funawhàn hẹ Islaeli. Todin, Jehovah hẹn hẹviosò yẹnwan gángán+ to gbenẹgbe do Filistinu lẹ ji, Ewọ sọ hẹn bẹwlu biọ yé mẹ+ bọ yé ṣíawhàn to Islaeli nukọn.+ 11  To whenẹnu, sunnu Islaeli tọn lẹ tọ́nyi sọn Mizpa bo dómọna Filistinu lẹ bosọ to yé hù kaka yì hùwaji Bẹti-kali tọn. 12   Samuẹli sọ ze zannu+ de tùnte to Mizpa po Jeṣana po ṣẹnṣẹn bo ylọ oyín etọn dọ Ebenezeli,* na e dọ dọ: “Jehovah ko gọalọna mí kakajẹ din.”+ 13  Gbọnmọ dali, Filistinu lẹ yin dududeji, bọ yé masọ wá aigba Islaeli tọn ji ba;+ alọ Jehovah tọn sọ zindonukọn nado to nuyiwa jẹagọdo Filistinu lẹ to azán Samuẹli tọn lẹpo gbè.+ 14  Humọ, tòdaho he Filistinu lẹ ko yí sọn Islaeli si lẹ yin gigọjo na Islaeli, yèdọ sọn Eklọni jẹ Gati, bọ Islaeli gọ̀ aigba etọn yí sọn alọ Filistinu lẹ tọn mẹ. Jijọho sọ tin to Islaeli po Amolinu+ lẹ po ṣẹnṣẹn. 15  Samuẹli zindonukọn nado to whẹda to Islaeli to gbẹzan etọn lẹpo mẹ.+ 16  To whemẹwhemẹ, e nọ zingbejizọnlin yì Bẹtẹli,+ Gilgali+ po Mizpa+ po lẹdo pé bo nọ dawhẹ to Islaeli to ofi ehe lẹpo. 17  Ṣigba, e nọ lẹkọwa Lama,+ na finẹ wẹ owhé etọn te, e sọ nọ nọ̀ finẹ ga do dawhẹ to Islaeli. E sọ do agbà de do finẹ na Jehovah.+

Nudọnamẹ Odò Tọn

Zẹẹmẹdo “Zannu Alọgọ Tọn.”