Accessibility setting

De ogbè dopo

Yì hosọ flinflin lẹ ji

Yì todowhinnu hosọ lẹ tọn ji

Yì hosọ lẹ ji

Kunnudetọ Jehovah Tọn Lẹ

Gungbe

Biblu Intẹnẹt Ji Tọn

OWE WIWE LẸ—LẸDOGBEDEVOMẸ AIHỌN YỌYỌ TỌN

1 Samuẹli 4:1-22

NUHE E BẸHẸN LẸ

  • Filistinu lẹ yí Apotin lọ (1-11)

  • Eli po visunnu etọn lẹ po kú (12-22)

4  Ohó Samuẹli tọn sọ tọ́nyi omẹ Islaeli tọn lẹpo dè. To whenẹnu, Islaeli tọ́nyi nado yì funawhàn hẹ Filistinu lẹ; yé dosla do Ebenezeli pá, bọ Filistinu lẹ dosla do Afẹki.  Filistinu lẹ to yede kannukannu nado funawhàn hẹ Islaeli, ṣigba awhàn lọ ma pà Islaeli bọ Filistinu lẹ gbawhàn yetọn, bo hù nudi sunnu 4000 sọn awhànfuntọ lẹ mẹ to danji.  Whenue gbẹtọ lọ lẹ lẹkọyi osla lọ mẹ, mẹho Islaeli tọn lẹ dọmọ: “Naegbọn Jehovah do dike bọ Filistinu lẹ gbawhàn mítọn* to egbé?+ Mì gbọ mí ni hẹn apotin alẹnu Jehovah tọn wá sọn Ṣilo,+ na e nido tin hẹ mí bo whlẹn mí sọn alọ kẹntọ mítọn lẹ tọn mẹ.”  Enẹwutu, gbẹtọ lọ lẹ domẹhlan Ṣilo, bọ yé hẹn apotin lọ wá sọn dọ́n, yèdọ apotin alẹnu Jehovah awhànpa lẹ tọn, mẹhe sinai to ofìn ji to aga* kelubimi lẹ tọn.+ Visunnu Eli tọn awe lẹ, yèdọ Họfini po Finehasi po+ sọ to finẹ po apotin alẹnu Jiwheyẹwhe nugbo lọ tọn po.  Tlolo he apotin alẹnu Jehovah tọn lọ wá osla lọ mẹ, Islaelivi lẹpo wẹ dabobo sọmọ bọ aigba sisọ.  Whenue Filistinu lẹ sè abobo he yin dido lọ, yé dọmọ: “Naegbọn yè do to abobo do to osla Heblu lẹ tọn mẹ sọmọ?” To godo mẹ, yé wá sè dọ Apotin Jehovah tọn wẹ wá osla lọ mẹ.  Filistinu lẹ sọ dibu, na yé dọmọ: “Jiwheyẹwhe ko wá osla lọ mẹ!”+ Enẹwutu, yé dọmọ: “Dindọn wẹ na mí, na onú ehe nkọ de ma ko jọ pọ́n!  Dindọn wẹ na mí! Mẹnu wẹ na whlẹn mí sọn alọ Jiwheyẹwhe gigonọ ehe tọn mẹ? Jiwheyẹwhe ehe wẹ gbọn aliho mẹhuhu tọn voovo dali hù omẹ Egipti tọn lẹ to danfafa ji.+  Mì Filistinu lẹ emi, mì gboadọ bo yinuwa di sunnu, na mì nikaa sẹ̀n Heblu lẹ kẹdẹdile yewlẹ ko sẹ̀n mì do.+ Mì yinuwa di sunnu bo hoavùn!” 10  Enẹwutu, Filistinu lẹ hoavùn bo gbawhàn Islaeli tọn,+ mẹdopodopo sọ họnyi gòhọ etọn mẹ. Mẹhe kú lẹ sù taun; to adà Islaeli tọn mẹ, awhànfuntọ he nọ zọ̀n afọ 30 000 wẹ kú. 11  Humọ, Apotin Jiwheyẹwhe tọn yin hihò yí, bọ visunnu Eli tọn awe lẹ, yèdọ Họfini po Finehasi po sọ kú.+ 12  Dawe Bẹnjamininu de họ̀nwezun sọn awhànfuntẹn lọ bo wá Ṣilo to gbenẹgbe po awù tintlẹ́n po to okọ̀ bọ kọ́gudu to ota na ẹn.+ 13  Whenue dawe lọ wá, Eli to aisinsin to azinpo ji to alitó bo to alihọ́, na ahun etọn to hihò na Apotin Jiwheyẹwhe nugbo lọ tọn wutu.+ Dawe lọ biọ tòdaho lọ mẹ bo na linlin, tòdaho lọ pete sọ jẹ awhádo ji. 14  To whenue Eli sè awhágbe lọ, e kanse dọmọ: “Etẹwẹ zingidi he sè n’te ehe zẹẹmẹdo?” Dawe dopolọ sọ họ̀nwezun wá bo na linlin lọ Eli. 15  (Todin, Eli ko tindo owhe 98, bọ nukun etọn lẹ to nukọn pọ́n dín in, amọ́ e ma sọgan mọnú.)+ 16  To whenẹnu, dawe lọ dọna Eli dọmọ: “Yẹn wẹ wá sọn awhànfuntẹn! Egbé janwẹ n’họ̀n sọn awhànfuntẹn lọ.” Enẹwutu, Eli kanse dọmọ: “Etẹwẹ jọ, visunnu ṣie?” 17  Mẹhe hẹn linlin wá lọ sọ dọmọ: “Islaeli ko họ̀n to Filistinu lẹ nukọn, bọ mẹsusu kú to gbẹtọ lọ lẹ mẹ;+ humọ visunnu towe titi awe lẹ, yèdọ Họfini po Finehasi po kú,+ bọ Apotin Jiwheyẹwhe nugbo lọ tọn sọ yin hihò yí.”+ 18  To whenue ewọ donù Apotin Jiwheyẹwhe nugbo lọ tọn go, Eli jai sọn azinpo etọn ji hlan godo to họngbo lọ pá, okọ̀ etọn sọ wẹ́n bọ e kú, na e ko poyọnho bosọ pẹ̀n wutu. Owhe 40 wẹ e ko yí do dawhẹ to Islaeli. 19  Ovisi etọn, yèdọ asi Finehasi tọn to ohò bo ko pọ́ viji. Whenue e sè linlin lọ dọ Apotin Jiwheyẹwhe nugbo lọ tọn ko yin hihò yí bọ asu-tọ́ etọn po asu etọn po ko kú, e dẹ́ hlan nukọn bọ vinú jẹ wiwà ẹ ji to ajiji mẹ bọ e sọ jivi. 20  Dile e to kúdonu, yọnnu he to ote to e dè lẹ dọmọ: “A dibu blo, na hiẹ ko ji visunnu de.” Amọ́, e ma gblọn, mọ e masọ na ayidonugo.* 21  Ṣigba, e ylọ oyín visunnu lọ tọn dọ Ikabọdi*+ bo dọmọ: “Gigo ko tọ́n sọn Islaeli yì kanlinmọgbenu,”+ na e to alọdlẹndo Apotin Jiwheyẹwhe nugbo lọ tọn he yin hihò yí podọ nuhe jọ do asu-tọ́ etọn po asu etọn po go.+ 22  E dọmọ: “Gigo ko tọ́n sọn Islaeli yì kanlinmọgbenu, na Apotin Jiwheyẹwhe nugbo lọ tọn ko yin hihò yí.”+

Nudọnamẹ Odò Tọn

To paa mẹ, “Naegbọn Jehovah do gbawhàn mítọn gbọn Filistinu lẹ gblamẹ.”
Kavi vlavo, “ṣẹnṣẹn.”
Kavi “masọ ze ahun etọn do e ji.”
Zẹẹmẹdo “Fie Wẹ Gigo lọ Te?”