Yì hosọ lẹ ji

Yì hosọ flinflin lẹ ji

Yì todowhinnu hosọ lẹ tọn ji

Kunnudetọ Jehovah Tọn Lẹ

Gungbe

Biblu Intẹnẹt Ji Tọn

OWE WIWE LẸ—LẸDOGBEDEVOMẸ AIHỌN YỌYỌ TỌN

1 Samuẹli 31:1-13

NUHE E BẸHẸN LẸ

  • Sauli po visunnu etọn 3 po kú (1-13)

31  Todin, Filistinu lẹ to avùnho hẹ Islaeli.+ Sunnu Islaeli tọn lẹ sọ họ̀n sọn Filistinu lẹ nukọn, bọ mẹsusu yin hùhù to Osó Gilboa+ ji.  Filistinu lẹ dowezun plá Sauli po visunnu etọn lẹ po, Filistinu lẹ sọ hù visunnu Sauli tọn lẹ, yèdọ Jonatani,+ Abinadabi po Malki-ṣua po.+  Awhàn lọ sọ sinyẹn do Sauli ji, bọ ogádetọ lẹ de ogá do e, ewọ sọ yin awugblena sinsinyẹn gbọn ogádetọ lọ lẹ dali.+  Whenẹnu, Sauli dọna gbaja hẹntọ etọn dọmọ: “Dọ̀n ohí towe sún bo sọ́ mi luntọ́n, na sunnu he ma gboadà+ ehelẹ nikaa wá bo sọ́ ohí mi luntọ́n bosọ yinuwa hẹ mi po kanyinylan* po.” Ṣigba, gbaja hẹntọ etọn ma jlo, na e to budi tlala wutu. Enẹwutu, Sauli yí ohí lọ bo họ́ jẹ e ji.+  To whenue gbaja hẹntọ etọn mọdọ Sauli ko kú,+ ewọ lọsu họ́ jẹ ohí etọn titi ji bo kú po e po.  Gbọnmọ dali, Sauli, visunnu etọn atọ̀n lẹ, gbaja hẹntọ etọn po sunnu etọn lẹpo po kú dopọ to azán enẹ gbè.+  To whenue omẹ Islaeli tọn he tin to agbegbe agbàdo lọ tọn mẹ lẹ po agbegbe Jọdani tọn mẹ lẹ po mọdọ sunnu Islaeli tọn lẹ ko họnyi bọ Sauli po visunnu etọn lẹ po ko sọ kú, yé jẹ hinhọnyi sọn tòdaho lọ lẹ mẹ ji;+ enẹgodo Filistinu lẹ wá bo nọ nọ̀ tòdaho lọ lẹ mẹ.  To wunkẹngbe, whenue Filistinu lẹ wá nado de nuhe tin to mẹhe ko yin hùhù lọ lẹ go, yé mọ oṣiọ Sauli po visunnu etọn atọ̀n lẹ po tọn to Osó Gilboa ji.+  Enẹwutu, yé gbòta na ẹn bo de gbaja etọn bosọ dowẹn hlan aigba Filistinu lẹ tọn lẹpo ji nado lá linlin lọ pé+ to ohọ̀* boṣiọ+ yetọn lẹ tọn lẹ mẹ podọ to gbẹtọ lẹ ṣẹnṣẹn. 10  Enẹgodo, yé ze gbaja etọn do ohọ̀ boṣiọ Aṣitolẹti tọn lẹ tọn mẹ bo ze oṣiọ etọn plá do adó Bẹti-ṣani+ tọn go. 11  Whenue mẹhe nọ nọ̀ Jabẹṣi-giliadi+ lẹ sè nuhe Filistinu lẹ ko wà na Sauli, 12  yé mẹhe yin awhànfuntọ lẹpo fọ́n bo zingbejizọnlin to ozán lọ pete mẹ bosọ yì de oṣiọ Sauli po visunnu etọn lẹ po tọn sọn adó Bẹti-ṣani tọn go. Yé sọ lẹkọwa Jabẹṣi bo fiọ yé to finẹ. 13  Enẹgodo, yé bẹ ohú yetọn lẹ+ bo dì yé do atin tamaliski tọn lọ sá to Jabẹṣi,+ bosọ blanù na azán ṣinawe.

Nudọnamẹ Odò Tọn

Kavi “vlẹko.”
Kavi “tẹmpli.”