Accessibility setting

De ogbè dopo

Yì hosọ flinflin lẹ ji

Yì todowhinnu hosọ lẹ tọn ji

Yì hosọ lẹ ji

Kunnudetọ Jehovah Tọn Lẹ

Gungbe

Biblu Intẹnẹt Ji Tọn

OWE WIWE LẸ—LẸDOGBEDEVOMẸ AIHỌN YỌYỌ TỌN

1 Samuẹli 30:1-31

NUHE E BẸHẸN LẸ

  • Amalẹkinu lẹ tọ́nawhàn Ziklagi (1-6)

    • Jiwheyẹwhe na huhlọn Davidi (6)

  • Davidi duto Amalẹkinu lẹ ji (7-31)

    • Davidi yì bẹ kanlinmọ lọ lẹ gọwá (18, 19)

    • Anademẹ Davidi tọn gando ogblànnu mimá go (23, 24)

30  Whenue Davidi po sunnu etọn lẹ po lẹkọwa Ziklagi+ to azán atọ̀ntọ gbè, Amalẹkinu+ lẹ ko doawhàn wá hùwaji* po Ziklagi po, bo ko sọ tọ́nawhàn Ziklagi bo yí miyọ́n do mẹ̀ ẹn.  Yé ko bẹ yọnnu lẹ po mẹhe to finẹ lẹpo po yì di kanlinmọ,+ yèdọ sọn yọpọ pete ji jẹ mẹho hugan ji. Yé ma hù mẹdepope, amọ́ yé ko bẹ yé yì.  Whenue Davidi po sunnu etọn lẹ po wá tòdaho lọ mẹ, yé mọdọ e ko yin mimẹ̀, bọ asi yetọn lẹ, visunnu yetọn lẹ po viyọnnu yetọn lẹ po ko yin bibẹ yì di kanlinmọ.  Enẹwutu, Davidi po sunnu he to e dè lẹ po jẹ avivi ji po ogbè lélé po kaka bọ huhlọn vọ̀ do yé nado viavi.  Asi Davidi tọn awe lẹ lọsu yin bibẹ yì di kanlinmọ, yèdọ Ahinoami he wá sọn Jezleẹli po Abigaili asuṣiọsi Nabali Kalmẹlinu+ lọ tọn po.  Davidi sọ biọ ayimajai sinsinyẹn mẹ, na sunnu lọ lẹ to didọ dọ yé na dlan zannu do e hù, na sunnu lọ lẹpo* wẹ to adi ji sinsinyẹn, to whenuena e yindọ visunnu po viyọnnu yetọn lẹ po ko yin bibẹ yì. Ṣigba, Davidi na huhlọn ede to Jehovah Jiwheyẹwhe etọn mẹ.+  Davidi sọ dọna Abiatali+ yẹwhenọ lọ, he yin visunnu Ahimelẹki tọn dọmọ: “Jaale, hẹn efọdi* lọ wáfi.”+ Enẹwutu, Abiatali hẹn efọdi lọ wá Davidi dè.  Davidi sọ kanhose Jehovah+ dọmọ: “Ma dómọna ogbẹ́ jaguda tọn ehe ya? Be n’na plá yé ya?” To whenẹnu, E dọna ẹn dọmọ: “Dómọna yé, na ayihaawe ma tin dọ a na plá yé bo gọ̀ nuhe ko yin bibẹ yì lọ lẹpo yí.”+  To afọdopolọji, Davidi po sunnu 600+ he to e dè lẹ po dedo bo yì kakajẹ Agbàdo Tọ̀sisa tọn* Besoli tọn kọ̀n, bọ delẹ to sunnu lọ lẹ mẹ gbọṣi finẹ. 10  Davidi sọ zindonukọn to mẹgbeyinyan lọ mẹ po sunnu 400 po, amọ́ sunnu 200 he agbọ́ ko pé gbau nado dasá Agbàdo Tọ̀sisa tọn Besoli tọn lọ lẹ gbọṣi finẹ.+ 11  Yé mọ dawe Egiptinu de to danji bo plan ẹn wá Davidi dè. Yé sọ na ẹn núdùdù nado dù podọ osin nado nù, 12  gọna akla hìhì ovò sinsẹ́n he yin finfinyọ́n dopọ tọn dopo po akla hìhì ovẹn sinsẹ́n tọn awe po. To whenue e ko dùnú fó godo, e gọ̀ huhlọn mọyi,* na e ma ko dù nudepope kavi do osin onù na okle atọ̀n ozán atọ̀n. 13  Todin, Davidi kanse e dọmọ: “Mẹnu tọn wẹ hiẹ, podọ fie wẹ a wá sọn?” ewọ gblọn dọmọ: “Devizọnwatọ Egiptinu de wẹ yẹn, yèdọ afanumẹ dawe Amalẹkinu de tọn, amọ́ ogán ṣie wẹ jo mi do to azán atọ̀n die, na n’bẹ azọ̀n wutu. 14  Mí doawhàn yì hùwaji* aigba Kelẹtinu+ lẹ tọn, podọ yì aigba Juda tọn po hùwaji* aigba Kalẹbi+ tọn po ji, bosọ yí miyọ́n do mẹ̀ Ziklagi.” 15  To whenẹnu, Davidi dọna ẹn dọmọ: “A gán plan mi jẹte yì ogbẹ́ jaguda tọn ehe dè ya?” Ewọ sọ gblọn dọmọ: “Eyin a yí Jiwheyẹwhe do whlé na mi dọ a ma na hù mi, mọ a ma na jo mi do alọ ogán ṣie tọn mẹ, n’na plan we yì ogbẹ́ jaguda tọn ehe dè.” 16  Enẹwutu, e plan ẹn jẹte yì fihe yé gbàpe do to aigba lọ pete ji, fie yé to dùdù bo to nùnù bosọ to agọ́ dù te, na ogblànnu susu he yé ko bẹ sọn aigba Filistinu lẹ tọn po aigba Juda tọn po ji lẹpo wutu. 17  Whenẹnu, Davidi jẹ yé hù ji sọn afọnnu fliflimẹ kakajẹ whèjai; sunnu depope ma họ̀ngán+ adavo sunnu 400 he họnyi to kanklosọ́ lẹ ji. 18  Nuhe Amalẹkinu lọ lẹ bẹ yì lẹpo wẹ Davidi gọ̀ yí,+ Davidi sọ whlẹn asi etọn awe lẹ. 19  Onú yetọn depope ma whè, sọn pẹvi pete ji jẹ daho hugan ji. Yé gọ̀ visunnu po viyọnnu yetọn lẹ po bẹ gọna ogblànnu lọ lẹ;+ nuhe yé ko bẹ yì lọ lẹpo wẹ Davidi gọ̀ yí. 20  Gbọnmọ dali, Davidi bẹ lẹngbọpa po kanlinpa lọ lẹpo po, yé sọ de ehelẹ do kanlin-yìnyìn yetọn titi lẹ nukọn. Yé sọ dọmọ: “Ogblànnu Davidi tọn die.” 21  Enẹgodo, Davidi wá sunnu 200 he agbọ́ ko pé gbau nado hodo Davidi yì bọ yé gbọṣi ai to Agbàdo Tọ̀sisa tọn Besoli tọn+ kọ̀n lọ lẹ dè, yé sọ tọ́n wá pé Davidi po mẹhe zọnhẹ ẹ lẹ po. Whenue Davidi wá sunnu lọ lẹ dè, e kàn lehe yé te do sè yé. 22  Ṣigba, sunnu ylankan podọ nuvọ́nọ he tin to mẹhe hodo Davidi yì lẹ mẹ lẹpo dọmọ: “Na yewlẹ ma hodo mí yì wutu, mí ma na na yé nudepope to ogblànnu he mí gọ̀ bẹ lọ lẹ mẹ, adavo dọ dopodopo yetọn na plan asi etọn po visunnu etọn lẹ po yì.” 23  Ṣigba, Davidi dọmọ: “Mẹmẹsunnu ṣie lẹ emi, mì ma dona wàmọ po nuhe Jehovah ko na mí po. E ko basi hihọ́na mí bo ko jo ogbẹ́ jaguda tọn he tọ́navùn mí lọ do alọ mítọn mẹ.+ 24  Mẹnu wẹ na kọngbedopọ hẹ mì to ehe mẹ? Mimá mẹhe jẹte yì awhàngbenu tọn na yin nudopolọ po mimá mẹhe sinai to agbàn kọ̀n tọn po.+ Mẹlẹpo wẹ na mọ mimá de yí.”+ 25  Sọn azán enẹ gbè sọyi, e hẹn ẹn zun aṣẹdai de po nunọwhinnusẹ́n de po na Islaeli kakajẹ egbehe. 26  Whenue Davidi lẹkọwa Ziklagi, e do delẹ to ogblànnu lọ lẹ mẹ hlan mẹho Juda tọn he yin họntọn etọn lẹ bo dọmọ: “Nunina* de die na mìwlẹ sọn ogblànnu kẹntọ Jehovah tọn lẹ tọn mẹ.” 27  E do e hlan mẹhe to Bẹtẹli lẹ,+ mẹhe to Lamọti Negẹb* tọn lẹ, mẹhe to Jatili lẹ,+ 28  mẹhe to Aloeli lẹ, mẹhe to Sifimoti lẹ, mẹhe to Eṣitemoa lẹ,+ 29  mẹhe to Lakali lẹ, mẹhe to tòdaho Jelameẹlinu+ lẹ tọn lẹ mẹ, mẹhe to tòdaho Keninu+ lẹ tọn lẹ mẹ, 30  mẹhe to Họlma+ lẹ, mẹhe to Bolaṣani lẹ, mẹhe to Ataki lẹ, 31  mẹhe to Heblọni+ lẹ gọna mẹhe to fie Davidi po sunnu etọn lẹ po ko gbọn pọ́n lẹpo.

Nudọnamẹ Odò Tọn

Kavi “Negẹb.”
Kavi “na alindọn mẹlọ lẹpo tọn.”
Pọ́n Zẹm.
Pọ́n Zẹm.
To paa mẹ, “gbigbọ etọn gọwá e dè.”
Kavi “Negẹb.”
Kavi “Negẹb.”
To paa mẹ, “Dona.”
Kavi “hùwaji.”