Yì hosọ lẹ ji

Yì hosọ flinflin lẹ ji

Yì todowhinnu hosọ lẹ tọn ji

Kunnudetọ Jehovah Tọn Lẹ

Gungbe

Biblu Intẹnẹt Ji Tọn | OWE WIWE LẸ—LẸDOGBEDEVOMẸ AIHỌN YỌYỌ TỌN

1 Samuẹli 3:1-21

NUHE E BẸHẸN LẸ

  • Samuẹli yin dide di yẹwhegán (1-21)

3  To ojlẹ enẹ mẹ, yọpọ sunnu lọ Samuẹli to lizọnyina+ Jehovah to Eli nukọn, ṣigba ohó he wá sọn Jehovah dè masọ nọ yin sisè sọmọ to azán enẹlẹ gbè ba; numimọ+ lẹ mimọ masọ gbayipe ba.  To gbèdopo, Eli to aimimlọn to fihe e nọ saba mlọn, podọ nukun etọn lẹ ko dózin; e masọ nọ mọnú ba.+  Miyọ́ngbán Jiwheyẹwhe tọn+ ma ko yin ṣíṣí, podọ Samuẹli to aimimlọn to tẹmpli* Jehovah tọn mẹ,+ yèdọ fihe Apotin Jiwheyẹwhe tọn te.  Jehovah sọ ylọ Samuẹli. Ewọ sọ gblọn dọmọ: “Yẹn die.”  E sọ họ̀nwezun yì Eli dè bo dọmọ: “Yẹn die, na hiẹ ylọ mi.” Ṣigba, Eli dọna ẹn dọmọ: “N’ma ylọ we. Yì gọ̀ aimlọn.” Ewọ sọ yì bo mlọnai.  Jehovah sọ vọ́ ylọ ẹ dọmọ: “Samuẹli!” Enẹwutu, Samuẹli sọ vọ́ fọ́n bo yì Eli dè bosọ dọmọ: “Yẹn die, na hiẹ ylọ mi.” Ṣigba, e dọmọ: “N’ma ylọ we nẹ, visunnu ṣie. Yì gọ̀ aimlọn.”  (Todin, Samuẹli ma ko wá yọ́n Jehovah ganji, podọ ohó Jehovah tọn ma ko yin didehia ẹ pọ́n.)+  Enẹwutu, Jehovah sọ vọ́ ylọ ẹ whla atọ̀ntọ dọmọ: “Samuẹli!” Ewọ sọ fọ́n bo yì Eli dè bosọ dọmọ: “Yẹn die, na hiẹ ylọ mi.” Whenẹnu wẹ Eli wá doayi e go dọ Jehovah wẹ to yọpọ sunnu lọ ylọ.  Enẹwutu, Eli dọna Samuẹli dọmọ: “Yì mlọnai, amọ́ eyin e sọ vọ́ ylọ we, dọna ẹn dọ, ‘Dọho, Jehovah, na devizọnwatọ towe to todoai.’” Samuẹli sọ lẹkọyi bo mlọnai do otẹn etọn mẹ. 10  Jehovah sọ wá bo ṣite to finẹ bosọ vọ́ ylọ ẹ di dai tọn lẹ dọmọ: “Samuẹli, Samuẹli!” Whenẹnu, Samuẹli dọmọ: “Dọho, na devizọnwatọ towe to todoai.” 11  Jehovah dọna Samuẹli dọmọ: “Pọ́n! Yẹn jlo na basi nude to Islaeli, bọ eyin mẹdepope sè, e na jọsi.*+ 12  To azán enẹ gbè, yẹn na hẹn nuhe yẹn ko dọ gando owhé Eli tọn go lẹpo ṣẹ do ewọ ji, yèdọ sọn bẹjẹeji kakajẹ vivọnu.+ 13  Hiẹ dona dọna ẹn dọ yẹn na hẹn whẹdida dẹn-to-aimẹ de wá owhé etọn ji, na nuṣiwa he ewọ ko yọnẹn lọ wutu,+ na visunnu etọn lẹ to nùzan do Jiwheyẹwhe go,+ ṣigba ewọ ma gbẹnuna yé.+ 14  Enẹwutu wẹ yẹn ko whlé na owhé Eli tọn dọ ovẹsè ma na yin bibasi na nuṣiwa owhé Eli tọn gbede gbọn avọ́sinsan kavi avọ́nunina lẹ dali.”+ 15  Samuẹli mlọnai kakajẹ afọnnu; enẹgodo e hùn ohọ̀n ohọ̀ Jehovah tọn lẹ. Samuẹli sọ to budi nado dọ numimọ he e mọ lọ na Eli. 16  Ṣigba, Eli ylọ Samuẹli dọmọ: “Samuẹli, visunnu ṣie!” Ewọ sọ gblọn dọmọ: “Yẹn die.” 17  E sọ kanbiọ ẹ dọmọ: “Owẹ̀n tẹwẹ e do we? Jaale, a whlá ẹ do mi blo. Na Jiwheyẹwhe ni sayana we sinsinyẹn* eyin hiẹ whlá onú dopo tata do mi to nuhe e dọna we lẹpo mẹ.” 18  Enẹwutu, Samuẹli dọ nulẹpo na ẹn, bo masọ whlá nudepope do e. Eli sọ dọmọ: “Jehovah wẹ. Gbọ ewọ ni wà nuhe sọgbe to nukun etọn mẹ.” 19  Samuẹli to whinwhẹ́n deji, Jehovah sọ tin hẹ ẹ+ bo ma dike depope to ohó etọn lẹpo mẹ ni nọma mọ hẹndi.* 20  E sọ wá họnwun na Islaeli pete, yèdọ sọn Dani kaka yì Beẹli-ṣeba, dọ Samuẹli ko yin dide taidi yẹwhegán Jehovah tọn. 21  Jehovah sọ zindonukọn nado to awusọhia to Ṣilo, na Jehovah do ede hia Samuẹli to Ṣilo gbọn ohó Jehovah tọn dali.+

Nudọnamẹ Odò Tọn

Enẹ wẹ, gòhọtúntún.
To paa mẹ, “otó etọn lẹ na suhọ̀n.”
To Heblugbe mẹ, “Na Jiwheyẹwhe ni wàmọ na we bosọ yidogọ.”
To paa mẹ, “ni flẹ jẹ kọmẹ.”