Accessibility setting

De ogbè dopo

Yì hosọ flinflin lẹ ji

Yì todowhinnu hosọ lẹ tọn ji

Yì hosọ lẹ ji

Kunnudetọ Jehovah Tọn Lẹ

Gungbe

Biblu Intẹnẹt Ji Tọn

OWE WIWE LẸ—LẸDOGBEDEVOMẸ AIHỌN YỌYỌ TỌN

1 Samuẹli 29:1-11

NUHE E BẸHẸN LẸ

  • Filistinu lẹ ma dejido Davidi go (1-11)

29  Filistinu+ lẹ bẹ awhànpa yetọn lẹpo pli do Afẹki, to whenue Islaelivi lẹ dosla do asisa Jezleẹli+ tọn tó.  Ogán Filistinu lẹ tọn lẹ sọ juwajei to pọmẹ hẹ pipli omẹ kanweko tọn po pipli omẹ fọtọ́n tọn yetọn lẹ po, bọ Davidi po sunnu etọn lẹ po to zọnlinzin to godo po Akiṣi+ po.  Ṣigba, ahọvi Filistinu lẹ tọn lẹ dọmọ: “Naegbọn Heblu ehelẹ do tofi?” Akiṣi gblọnna ahọvi Filistinu lẹ tọn lẹ dọmọ: “Davidi die, yèdọ devizọnwatọ Ahọlu Sauli Islaeli tọn, he ko tin to dè e na owhe dopo kavi humọ.+ N’ma ka sọ mọ nuṣiwa etọn depope sọn azán he gbè e ko họ̀n wá dè e kakajẹ egbé.”  Amọ́, ahọvi Filistinu lẹ tọn lẹ gblehomẹ do e go bo dọna ẹn dọmọ: “Lẹkọna dawe lọ.+ Gbọ e ni lẹkọyi fie a dena ẹn. A dike e jẹte hẹ mí yì awhàngbenu blo, e nikaa lẹ́ pannukọn mí to awhàn lọ whenu.+ Na nudevo tẹwẹ sọgan hẹn nukundagbe wá na ẹn to oklunọ etọn dè hú ota sunnu mítọn lẹ tọn?  Be e ma yin Davidi ehe go wẹ yé jihàn gando dile yé to wedu bo dọ dọ: ‘Sauli ko hù fọtọ́n etọn lẹ, Davidi ko sọ hù fọtọ́n donu ao etọn lẹ’ ya?”+  Enẹwutu, Akiṣi+ ylọ Davidi bo dọna ẹn dọmọ: “Dile e họnwun dọ Jehovah togbẹ̀, dodonọ wẹ hiẹ, podọ e na ko jlo mi nado plan we yì awhàngbenu hẹ awhànpa ṣie,+ na n’ma ko mọ nuṣiwa towe depope sọn azán he gbè a wá dè e kakajẹ egbé.+ Amọ́, ogán lọ lẹ ma dejido gowe.+  Enẹwutu, lẹkọyi whé to jijọho mẹ, a sọ wà nudepope he na hẹn homẹgble ogán Filistinu lẹ tọn lẹ blo.”  Ṣigba, Davidi dọna Akiṣi dọmọ: “Ṣo, etẹ n’ka wà? Etẹwẹ devizọnwatọ towe ko ṣiwà sọn azán he gbè n’wá dè we kakajẹ egbé? Naegbọn n’ma gán hodo we bo hoavùn sọta kẹntọ oklunọ ṣie ahọlu tọn lẹ?”  Akiṣi sọ gblọnna Davidi dọmọ: “Na yẹn tọn, mẹdagbe de wẹ hiẹ, kẹdẹdi angẹli Jiwheyẹwhe tọn de.+ Amọ́, ahọvi Filistinu lẹ tọn lẹ wẹ dọ dọ, ‘A dike e hẹji yì awhàngbenu hẹ mí blo.’ 10  Todin, fọ́n to afọnnu fuu, hiẹ po devizọnwatọ oklunọ towe tọn he zọnhẹ we lẹ po; mì fọ́n bo dedo to afọnnu fuu tlolo he ai na ko họ́n.” 11  Enẹwutu, Davidi po sunnu etọn lẹ po fọ́n to afọnnu fuu nado lẹkọyi aigba Filistinu lẹ tọn ji, bọ Filistinu lẹ hẹji dedo Jezleẹli.+

Nudọnamẹ Odò Tọn