Yì hosọ lẹ ji

Yì hosọ flinflin lẹ ji

Yì todowhinnu hosọ lẹ tọn ji

Kunnudetọ Jehovah Tọn Lẹ

Gungbe

Biblu Intẹnẹt Ji Tọn | OWE WIWE LẸ—LẸDOGBEDEVOMẸ AIHỌN YỌYỌ TỌN

1 Samuẹli 28:1-25

NUHE E BẸHẸN LẸ

  • Sauli yì afinyọnnọ de dè to Ẹn-dọli (1-25)

28  To azán enẹlẹ gbè, Filistinu lẹ bẹ awhànpa yetọn lẹ pli nado funawhàn hẹ Islaeli.+ Enẹwutu, Akiṣi dọna Davidi dọmọ: “Na nugbo tọn, a yọnẹn dọ hiẹ po sunnu towe lẹ po na hodo mi yì awhàn.”+  Whenẹnu, Davidi dọna Akiṣi dọmọ: “Matin ayihaawe, hiẹ lọsu ko yọ́n nuhe devizọnwatọ towe na wà.” Akiṣi sọ dọna Davidi dọmọ: “Enẹwutu wẹ yẹn na de we taidi hihọ́tọ tẹgbẹ tọn ṣie.”*+  Todin, Samuẹli ko kú bọ Islaeli pete ko nọ aluẹmẹ na ẹn bo ko sọ dì i do tòdaho etọn titi mẹ, yèdọ to Lama.+ Sauli ko sọ de afinyọnnọ lẹ po dọṣẹdọtọ lẹ po sẹ̀ sọn aigba lọ ji.+  Filistinu lẹ sọ pli dopọ bo yì dosla do Ṣunẹmi.+ Enẹwutu, Sauli bẹ Islaeli pete pli bo dosla do Gilboa.+  To whenue Sauli mọ osla Filistinu lẹ tọn, e dibu bọ ahun etọn gbàdo pete.+  Dile etlẹ yindọ Sauli nọ kanhose Jehovah,+ Jehovah masọ siọ ẹ gbede ba, vlavo to odlọ mẹ wẹo kavi gbọn Ulimi+ kavi yẹwhegán lẹ gblamẹ.  To godo mẹ, Sauli dọna devizọnwatọ etọn lẹ dọmọ: “Mì dín yọnnu he yin afinyọnnọ+ de na mi, na yẹn nido yì kannubiọ to e dè.” Devizọnwatọ etọn lẹ gblọn dọmọ: “Pọ́n! Yọnnu de tin to Ẹn-dọli+ he yin afinyọnnọ.”  Whenẹnu, Sauli diọ awusọhia ede tọn bo do awù devo lẹ bosọ yì nawe lọ dè to zánmẹ po awe to sunnu etọn lẹ mẹ po. E sọ dọmọ: “Jaale, mọnú na mi gbọn afinyọnnuwiwa+ yiyizan dali bo hẹn mẹhe yẹn dọna we lọ sọawuhia mi.”  Ṣigba, nawe lọ dọna ẹn dọmọ: “Hiẹ yọ́n nuhe Sauli wà, lehe e de afinyọnnọ lẹ po dọṣẹdọtọ lẹ po sẹ̀ sọn aigba lọ ji do.+ Enẹwutu, naegbọn hiẹ do to tintẹnpọn nado domọwle mi,* na yẹn nido yin hùhù?”+ 10  Whenẹnu, Sauli yí Jehovah do whlé na ẹn dọmọ: “Dile Jehovah togbẹ̀, hiẹ ma na hùwhẹ depope to whẹho ehe mẹ!” 11  Todin, nawe lọ dọna ẹn dọmọ: “Mẹnu wẹ hiẹ jlo dọ ma hẹn sọawuhia we?” Ewọ sọ gblọn dọmọ: “Hẹn Samuẹli nado sọawuhia mi.” 12  To whenue nawe lọ mọ “Samuẹli,”*+ e yí ogbè lélé do dawhá bo dọna Sauli dọmọ: “Naegbọn a do klọ mi? Hiẹ ka wẹ Sauli maa!” 13  Ahọlu dọna nawe lọ dọmọ: “A dibu blo, amọ́ etẹ mọ a te?” Nawe lọ gblọnna Sauli dọmọ: “N’mọ mẹde he taidi yẹwhe de bọ e tọ́n ja sọn aigba mẹ.” 14  To afọdopolọji, e kanse nawe lọ dọmọ: “Nawẹ awusọhia etọn te?” bọ nawe lọ gblọn dọmọ: “Dawe yọnhonọ de wẹ tọ́n ja bo do awù he ma tindo awà.”+ Whenẹnu, Sauli yọnẹn dọ “Samuẹli” wẹ, bọ e dẹ́ do odò pete bosọ ṣinyọ́n nukunmẹ ai. 15  Whenẹnu, “Samuẹli” dọna Sauli dọmọ: “Naegbọn hiẹ do dotukla mi bo biọ dọ yè ni hẹn mi sọawuhia?” Sauli sọ gblọn dọmọ: “Nuhahun sinsinyẹn mẹ wẹ n’te. Filistinu lẹ to avùnho hẹ mi bọ Jiwheyẹwhe ko jo mi do bo masọ nọ siọ mi ba, vlavo gbọn yẹwhegán lẹ gblamẹ kavi to odlọ mẹ;+ enẹ wẹ zọ́n bọ n’do to awhádo ylọ we nado yọ́n nuhe n’dona wà.”+ 16  “Samuẹli” sọ dọna ẹn dọmọ: “Naegbọn a do to hokanse mi todin he Jehovah ko jo we do+ bo ko lẹzun kẹntọ towe? 17  Jehovah na wà nuhe ewọ ko dọ dọdai etọn gbọn yẹn gblamẹ lọ dọ: Jehovah na tlẹ́n ahọluduta lọ sọn alọ towe mẹ bo na yí i na dopo to hatọ towe lẹ mẹ, yèdọ Davidi.+ 18  Na hiẹ ma setonuna ogbè Jehovah tọn bo masọ hẹn homẹgble sinsinyẹn etọn ṣẹ do Amalẹkinu lẹ ji+ wutu wẹ Jehovah do to nuyiwa hẹ we dole to egbé. 19  Jehovah nasọ jo hiẹ po Islaeli po do alọ Filistinu lẹ tọn mẹ,+ bọ hiẹ+ po visunnu towe lẹ po+ na wá gọna mi to osọ he ja. Humọ, Jehovah na jo awhànpa Islaeli tọn do alọ Filistinu lẹ tọn mẹ.”+ 20  To afọdopolọji, Sauli họ́ sú kọmẹ bo gọ́ na obu, na ohó “Samuẹli” tọn lẹ wutu. Podọ e masọ tindo huhlọn depope ba, na e ma ko dù nudepope to azán lọ pete ji podọ to ozán lọ pete mẹ. 21  To whenue nawe lọ wá Sauli dè bo mọdọ e tin to bẹwlu sinsinyẹn mẹ, nawe lọ dọna ẹn dọmọ: “Devizọnwatọ towe ko setonuna nuhe a dọ, podọ n’ko ze ogbẹ̀ ṣie do owù mẹ*+ bo wà nuhe a dọna mi nado wà lọ. 22  Todin, jaale dotoaina nuhe devizọnwatọ towe jlo na dọ. Gbọ ma na we akla nùdo dopo de; hiẹ nasọ dù, na hiẹ nido sọgan gọ̀ huhlọn vude mọyi nado wleali.” 23  Ṣigba, e gbẹ́ bo dọmọ: “Yẹn ma na dùnú.” Amọ́, devizọnwatọ etọn lẹ po nawe lọ po to vivẹ̀ ẹ mapote. To godo mẹ, e dotoaina yé bo fọ́n sọn kọmẹ bosọ sinai do adọzan ji. 24  Nawe lọ tindo oyìnvu dojó de to whégbè, enẹwutu e yawu hù i* bo yí linfin po linfin yinyan po bosọ yí yé do basi akla madotọ́n. 25  E sọ ze yé donukọnna Sauli po devizọnwatọ etọn lẹ po bọ yé dù. Enẹgodo, yé fọ́n bo dedo to ozán lọ mẹ.+

Nudọnamẹ Odò Tọn

To paa mẹ, “taidi hihọ́tọ ota ṣie tọn to azán lẹpo gbè.”
Kavi “alindọn ṣie.”
Kavi “mọ nude he sọawuhia di Samuẹli.”
Kavi “ze alindọn ṣie do alọmẹ.”
Kavi “yí i do sanvọ́.”