Yì hosọ lẹ ji

Yì hosọ flinflin lẹ ji

Yì todowhinnu hosọ lẹ tọn ji

Kunnudetọ Jehovah Tọn Lẹ

Gungbe

Biblu Intẹnẹt Ji Tọn | OWE WIWE LẸ—LẸDOGBEDEVOMẸ AIHỌN YỌYỌ TỌN

1 Samuẹli 26:1-25

NUHE E BẸHẸN LẸ

  • Davidi sọ vọ́ jo Sauli dogbẹ̀ (1-25)

    • Davidi na sisi mẹyiamisisadode Jehovah tọn (11)

26  To godo mẹ, sunnu Zifi+ tọn lẹ wá Sauli dè to Gibea+ bo dọmọ: “Be Davidi ma whlá ede do okọ́ta Hakila tọn ji pannukọn Jeṣimọni* ya?”+  Enẹwutu, Sauli fọ́n bo jẹte yì danfafa Zifi tọn ji, yèdọ ewọ po sunnu Islaeli tọn 3 000 he yin dide lẹ po nado yì dín Davidi to danfafa Zifi tọn ji.+  Sauli sọ dosla do okọ́ta Hakila tọn ji, ehe pannukọn Jeṣimọni, to aliho lọ tó. To whenẹnu, Davidi tin to danfafa lọ ji, bo sè dọ Sauli ko tọ́ngbé etọn wá danfafa lọ ji.  Enẹwutu, Davidi do amẹ́ lẹ hlan nado yì dindona eyin Sauli ko wá nugbonugbo.  To godo mẹ, Davidi yì fie Sauli ko dosla do, bọ Davidi mọ fie Sauli po Abneli+ visunnu Neli tọn po, yèdọ ogán awhànpa etọn tọn mlọnai bo to amlọndọ te; Sauli to amlọndọ to osla lọ mẹ bọ awhànfuntọ etọn lẹ dosla lẹdo e pé.  To whenẹnu, Davidi dọna Ahimelẹki Hetinu+ lọ po Abiṣai+ visunnu Zeluia tọn+ he yin nọvisunnu Joabi tọn po dọmọ: “Mẹnu wẹ na jẹte yì osla Sauli tọn mẹ hẹ mi?” Abiṣai sọ gblọnna ẹn dọmọ: “Yẹn na jẹte yì hẹ we.”  Enẹwutu, Davidi po Abiṣai po wá fie awhànfuntọ lọ lẹ te to zánmẹ, yé sọ mọ Sauli to aimimlọn bo to amlọndọ to osla lọ mẹ bọ owhán etọn yin tùntùnte do kọmẹ to ota etọn pá; Abneli po awhànfuntọ lọ lẹ po sọ to aimimlọn lẹdo e pé.  Abiṣai sọ dọna Davidi dọmọ: “Jiwheyẹwhe ko jo kẹntọ towe do alọ towe mẹ to egbé.+ Todin, jaale gbọ ma yí owhán lọ do whè e do kọmẹ whladopo gee, e ma na biọ dọ ma wàmọ whla awe.”  Ṣigba, Davidi dọna Abiṣai dọmọ: “A wà danú do e blo, na mẹnu wẹ gán ze alọ etọn daga do mẹyiamisisadode Jehovah tọn ji+ bo yin homẹvọnọ?”+ 10  Davidi yidogọ dọmọ: “Dile Jehovah togbẹ̀, Jehovah lọsu wẹ na hù i,+ kavi azán etọn na wá+ bọ e na kú, kavi e na jẹte yì awhàngbenu bo na dọ̀n.+ 11  To pọndohlan Jehovah tọn mẹ, e ma sọgan wá linlẹn mẹ na mi gbede nado ze alọ ṣie daga do mẹyiamisisadode Jehovah tọn ji!+ Enẹwutu todin, jaale, ze owhán he to ota etọn pá lọ po osingo lọ po, bo gbọ mí ni dedo.” 12  Gbọnmọ dali, Davidi ze owhán lọ po osingo lọ po he to ota Sauli tọn pá, bọ yé dedo. Mẹdepope ma mọ+ kavi doayi yé go kavi fọ́n sọn amlọn mẹ, na yemẹpo wẹ to amlọndọ, na Jehovah ko hẹn yé nado damlọn yìkànmẹ. 13  Enẹgodo, Davidi dasá jẹ awà awetọ ji bo nọte to olá to osó ji aga, bọ yé dẹn do yedelẹ taun. 14  Davidi sọ dawhá hlan awhànfuntọ lọ lẹ po Abneli+ visunnu Neli tọn po bo dọmọ: “Abneli E, a ma na siọ wẹ?” Abneli gblọn dọmọ: “Mẹnu niyẹn he to awhádo ylọ ahọlu?” 15  Davidi dọna Abneli dọmọ: “Be e ma yin sunnu de wẹ hiẹ ya? Podọ mẹnu wẹ taidi hiẹ to Islaeli? Enẹwutu, naegbọn a ma do basi hihọ́na oklunọ towe ahọlu? Na dopo to awhànfuntọ lẹ mẹ ko biọ osla lọ mẹ nado hù oklunọ towe ahọlu.+ 16  Nuhe a wà ma yọ́n. Dile Jehovah togbẹ̀, okú wẹ a jẹna, na a ma basi hihọ́na oklunọ towe, yèdọ mẹyiamisisadode Jehovah tọn wutu.+ Todin, pọ́n lẹdo towe mẹ pé! Fie wẹ owhán ahọlu tọn po osingo+ he to ota etọn pá lọ po te?” 17  To whenẹnu, Sauli yọ́n ogbè Davidi tọn bo dọmọ: “Visunnu ṣie Davidi, ogbè towe sè n’te ya?”+ Davidi gblọn dọmọ: “Oklunọ ṣie ahọlu E, ogbè ṣie wẹ.” 18  E yidogọ dọmọ: “Naegbọn oklunọ ṣie do to ogbé devizọnwatọ etọn tọn yàn,+ na etẹwẹ n’wà yindo, podọ owhẹ̀ tẹwẹ n’hù?+ 19  Oklunọ ṣie ahọlu E, jaale bo dotoaina ohó devizọnwatọ towe tọn: Eyin Jehovah wẹ fọ́n we do ji e, gbọ e ni kẹalọyi* avọ́nunina jinukun-lili tọn ṣie. Ṣigba, eyin gbẹtọ lẹ wẹ,+ be mẹhodẹ̀do wẹ yewlẹ yin to Jehovah nukọn, na yé ko yàn mi dogbé to egbé ma nado kọnawudopọ hẹ ogú Jehovah tọn,+ gbọn didọ dali dọ, ‘Yì sẹ̀n yẹwhe devo lẹ!’ 20  Todin, a dike ohùn ṣie kùn jẹ kọmẹ sọn Jehovah nukọn blo, na ahọlu Islaeli tọn ko tọ́njẹgbonu bo to pahọ́ dopo tata de dín,+ taidi dọ ogbé asọkle de tọn yàn wẹ e te to osó lẹ ji nkọ.” 21  To whenẹnu, Sauli gblọn dọmọ: “N’ko waylando.+ Davidi visunnu ṣie, lẹkọwa, na yẹn ma na wà danú de do we ba, na hiẹ ko pọ́n ogbẹ̀* ṣie di nuhọakuẹ+ to egbé. Mọwẹ, n’ko yinuwa po nulú po bo ko ṣinuwa sinsinyẹn.” 22  Davidi sọ gblọn dọmọ: “Owhán ahọlu tọn die. Gbọ dopo to dẹpẹ lọ lẹ mẹ ni wá yí i. 23  Jehovah wẹ na suahọ mẹdopodopo sọgbe hẹ dodowiwa etọn titi+ po nugbonọ-yinyin etọn titi po, na Jehovah ko jo we do alọ ṣie mẹ to egbé, ṣigba n’ma jlo na ze alọ ṣie daga do mẹyiamisisadode Jehovah tọn ji.+ 24  Pọ́n! Kẹdẹdile ogbẹ̀* towe họakuẹ na mi to egbé do, mọ wẹ ogbẹ̀* ṣie ni họakuẹ to nukun Jehovah tọn mẹ do, podọ ewọ ni whlẹn mi sọn ayimajai lẹpo mẹ.”+ 25  Sauli gblọnna Davidi dọmọ: “Na Jiwheyẹwhe ni dona we, visunnu ṣie Davidi. Ayihaawe ma tin dọ a na wà onú daho lẹ, podọ a na tindo kọdetọn dagbe dandan.”+ Davidi sọ wleali dedo, bọ Sauli lẹkọyi nọtẹn etọn.+

Nudọnamẹ Odò Tọn

Kavi vlavo, “danfafa lọ.”
To paa mẹ, “sewán.”
Kavi “alindọn.”
Kavi “alindọn.”
Kavi “alindọn.”