Accessibility setting

De ogbè dopo

Yì hosọ flinflin lẹ ji

Yì todowhinnu hosọ lẹ tọn ji

Yì hosọ lẹ ji

Kunnudetọ Jehovah Tọn Lẹ

Gungbe

Biblu Intẹnẹt Ji Tọn

OWE WIWE LẸ—LẸDOGBEDEVOMẸ AIHỌN YỌYỌ TỌN

1 Samuẹli 24:1-22

NUHE E BẸHẸN LẸ

  • Davidi jo Sauli dogbẹ̀ (1-22)

    • Davidi na sisi mẹyiamisisadode Jehovah tọn (6)

24  Tlolo he Sauli ko dómọna Filistinu lẹ bo lẹkọ godo, yé dọna ẹn dọmọ: “Pọ́n! Davidi to danfafa Ẹn-gẹdi+ tọn ji.”  Enẹwutu, Sauli ṣinyan sunnu 3 000 sọn omẹ Islaeli tọn lẹpo mẹ bo dedo nado yì dín Davidi po sunnu etọn lẹ po to bẹbẹnu osókla lẹ tọn, fie gbọgbọẹ osó ji tọn lẹ nọ nọ̀.  Dile Sauli jẹ lẹngbọpo he yè yí zannu do basi lọ kọ̀n to aliho lọ tó, fie oslò de te, e biọ oslò lọ mẹ nado doafọai,* to whenuena Davidi po sunnu etọn lẹ po to aisinsin to nuglọ to oslò lọ homẹ.+  Sunnu Davidi tọn lẹ dọna ẹn dọmọ: “Azán ehe gbè wẹ Jehovah to didọna we dọ, ‘Pọ́n! Yẹn jo kẹntọ towe do alọ towe mẹ,+ bọ hiẹ sọgan wà nudepope he jlo we na ẹn.’” Enẹwutu, Davidi fọnṣite bo wà dẹẹdẹ do yì sán tónu na awù Sauli tọn he ma tindo awà.  Ṣigba to enẹgodo, ahun* Davidi tọn jẹ avùnho hẹ ẹ ji,+ na e ko sán tónu na awù Sauli tọn he ma tindo awà wutu.  E sọ dọna sunnu etọn lẹ dọmọ: “To pọndohlan Jehovah tọn mẹ, e ma sọgan wá linlẹn mẹ na mi gbede nado wà onú mọnkọ na oklunọ ṣie, yèdọ mẹyiamisisadode Jehovah tọn gbọn alọ ṣie zize daga do ewọ ji dali, na mẹyiamisisadode Jehovah tọn wẹ ewọ.”+  Gbọnmọ dali, Davidi yí hogbe ehelẹ do hẹnalọdotena* sunnu etọn lẹ, bo ma dike yé ni tọ́navùn Sauli. Amọ́, Sauli uwọ fọnṣite sọn oslò lọ mẹ bo dedo.  Enẹgodo, Davidi fọnṣite bo tọ́njẹgbonu sọn oslò lọ mẹ bosọ dawhá hlan Sauli dọmọ: “Oklunọ ṣie ahọlu E!”+ Whenue Sauli pọ́n godo, Davidi dẹ́ do odò pete bo ṣinyọ́n nukunmẹ ai.  Davidi sọ dọna Sauli dọmọ: “Naegbọn hiẹ do dotoaina ohó gbẹtọ lẹ tọn dọ, ‘Pọ́n! Davidi to dindin nado wà nuylankan sọta we’?+ 10  To egbehe, nukun towe titi ko mọ lehe Jehovah jo we do alọ ṣie mẹ to oslò lọ mẹ do. Ṣigba, whenue mẹde dọna mi dọ ma hù we,+ onú towe wàlẹblanuna mi bọ n’dọ dọ, ‘N’ma na ze alọ ṣie daga do oklunọ ṣie ji, na mẹyiamisisadode Jehovah tọn wẹ ewọ.’+ 11  Todin otọ́ ṣie, pọ́n, mọwẹ, pọ́n tónu awù towe he ma tindo awà tọn to alọ ṣie mẹ; na whenue n’sán tónu awù towe he ma tindo awà tọn, n’ma hù we. Todin, a sọgan mọ bosọ mọnukunnujẹemẹ dọ n’ma tindo linlẹn nado wà nuylankan sọta we kavi ṣiatẹ, podọ n’ma ko waylando de do we,+ dile etlẹ yindọ a to ogbé ṣie yàn nado hù mi.*+ 12  Na Jehovah ni dawhẹ to yẹn po hiẹ po ṣẹnṣẹn,+ podọ na Jehovah ni yiahọsu to gowe do ota ṣie mẹ,+ amọ́ yẹn ma na ze alọ ṣie daga do ji we.+ 13  Kẹdẹdile howhinwhẹn hohowhenu tọn lọ dọ do, ‘Mẹylankan dè wẹ nuylankan nọ wá sọn,’ amọ́ yẹn ma na ze alọ ṣie daga do ji we. 14  Mẹnu ka wẹ ahọlu Islaeli tọn tọ́njẹgbonu nado dómọna? Ogbé mẹnu tọn yàn wẹ a te? Avún kúkú de wẹ a? Kavi pahọ́ dopo tata de?+ 15  Na Jehovah ni yin whẹdatọ, podọ ewọ na dawhẹ to yẹn po hiẹ po ṣẹnṣẹn, ewọ na mọ, yiavùnlọna mi+ bo dawhẹna mi bosọ whlẹn mi sọn alọ towe mẹ.” 16  Tlolo he Davidi ko dọ ohó ehelẹ na ẹn fó godo, Sauli dọmọ: “Davidi visunnu ṣie, ogbè towe sè n’te ya?”+ Sauli sọ jẹ avivi ji po ogbè lélé po. 17  E sọ dọna Davidi dọmọ: “A yin dodonọ hú mi, na a ko yinuwa hẹ mi ganji, amọ́ yẹn ko yí oylan do suahọ we.+ 18  Mọwẹ, hiẹ ko dọna mi to egbehe lehe a wà dagbe na mi do bo ma hù mi to whenue Jehovah jo mi do alọ towe mẹ.+ 19  Na mẹnu wẹ nọ mọ kẹntọ etọn bo nọ jo e do bọ e nọ dedo to fẹẹ mẹ? Jehovah na yí dagbe do suahọ we,+ na nuhe a ko wà na mi to egbé wutu. 20  Podọ todin, pọ́n! n’yọnẹn dọ a na duahọlu janwẹ,+ bọ ahọluduta Islaeli tọn na nọ alọ towe mẹ dẹn. 21  Todin, yí Jehovah do whlé na mi+ dọ a ma na sukúndona kúnkan* ṣie to godo ṣie, podọ a ma na súnsún oyín ṣie sẹ̀ mlẹnmlẹn sọn owhé otọ́ ṣie tọn gbè.”+ 22  Enẹwutu, Davidi whlé na Sauli, enẹgodo Sauli lẹkọyi whé.+ Ṣigba, Davidi po sunnu etọn lẹ po hẹji yì figángán lọ.+

Nudọnamẹ Odò Tọn

To paa mẹ, “nado ṣinyọnnudo afọ etọn lẹ.”
Kavi “ayihadawhẹnamẹnu.”
Kavi vlavo, “kata.”
Kavi “alindọn ṣie.”
To paa mẹ, “okún.”