Accessibility setting

De ogbè dopo

Yì hosọ flinflin lẹ ji

Yì todowhinnu hosọ lẹ tọn ji

Yì hosọ lẹ ji

Kunnudetọ Jehovah Tọn Lẹ

Gungbe

Biblu Intẹnẹt Ji Tọn

OWE WIWE LẸ—LẸDOGBEDEVOMẸ AIHỌN YỌYỌ TỌN

1 Samuẹli 23:1-29

NUHE E BẸHẸN LẸ

  • Davidi whlẹn tòdaho Keila tọn (1-12)

  • Sauli dómọna Davidi (13-15)

  • Jonatani hẹn Davidi lodo (16-18)

  • Alọ Sauli tọn dibla jẹ Davidi go (19-29)

23  To nukọn mẹ, e yin didọna Davidi dọmọ: “Filistinu lẹ to avùnho sọta Keila+ bosọ nọ doawhàn wá bẹ jinukun to likun-flétẹn lẹ.”  Enẹwutu, Davidi kanhose Jehovah+ dọmọ: “Ma yì hù Filistinu ehelẹ ya?” Jehovah dọna Davidi dọmọ: “Yì hù Filistinu lọ lẹ bo whlẹn Keila.”  Ṣigba, sunnu Davidi tọn lẹ dọna ẹn dọmọ: “Pọ́n! Míwlẹ to Juda fi bo to budi;+ nẹmunẹmu wẹ to whenue mí na yì tọ́navùn awhànpa Filistinu lẹ tọn to Keila!”+  Enẹwutu, Davidi sọ vọ́ kanhose Jehovah.+ Jehovah gblọnna ẹn todin dọmọ: “Fọ́n; jẹte yì Keila, na yẹn na jo Filistinu lẹ do alọ towe mẹ.”+  Whenẹnu, Davidi plan sunnu etọn lẹ yì Keila bo hoavùn sọta Filistinu lẹ; e bẹ kanlin-yìnyìn yetọn lẹ bo hù sọn yé mẹ badabada, Davidi sọ whlẹn mẹhe nọ nọ̀ Keila lẹ.+  Todin, to whenue Abiatali+ visunnu Ahimelẹki tọn họnyi Davidi dè to Keila, e hẹn efọdi* de yì.  E yin didọna Sauli dọmọ: “Davidi ko wá Keila.” Whenẹnu Sauli dọmọ: “Jiwheyẹwhe ko jo e* do alọ ṣie mẹ,+ na e ko glọn ede gbọn tòdaho he tindo họngbo he nọ yin gigla lẹ de mẹ bibiọ dali.”  Enẹwutu, Sauli ylọ gbẹtọ lẹpo pli na awhàn, nado jẹte yì Keila bo dosla lẹdo Davidi po sunnu etọn lẹ po.  Whenue Davidi sè dọ Sauli to sébla do e go, e dọna Abiatali yẹwhenọ lọ dọmọ: “Hẹn efọdi lọ wáfi.”+ 10  Davidi sọ dọmọ: “Jehovah Jiwheyẹwhe Islaeli tọn E, na nugbo tọn devizọnwatọ towe ko sè dọ Sauli to linlẹn nado wá Keila nado và tòdaho lọ sudo na yẹn tọn wutu.+ 11  Be nukọntọ* Keila tọn lẹ na de mi jo do alọ etọn mẹ wẹ ya? Be Sauli na jẹte wá dile devizọnwatọ towe ko sè do wẹ ya? Jehovah Jiwheyẹwhe Islaeli tọn E, jaale dọna devizọnwatọ towe.” Jehovah sọ gblọnna ẹn dọmọ: “E na jẹte wá.” 12  Davidi sọ kanse dọmọ: “Be nukọntọ Keila tọn lẹ na de yẹn po sunnu ṣie lẹ po jo do alọ Sauli tọn mẹ wẹ ya?” Jehovah sọ gblọn dọmọ: “Yé na de mì jo.” 13  To afọdopolọji, Davidi fọ́n po sunnu etọn lẹ po, yèdọ nudi sunnu 600+ bọ yé tọ́n sọn Keila bo jẹ yìyì pé ji gbọn fidepope he yé sọgan yì. To whenue e yin didọna Sauli dọ Davidi ko họnyi sọn Keila, e masọ dómọna ẹn ba. 14  Davidi gbọṣi danfafa ji to fihe vẹawu nado yì lẹ, to lẹdo osó tọn mẹ to danfafa Zifi tọn ji.+ Sauli to dindin in klinkán-klinkán,+ amọ́ Jehovah ma jo e do alọ etọn mẹ. 15  Dile Davidi tin to danfafa Zifi tọn ji to Holẹṣi, Davidi yọnẹn dọ* Sauli ko tọ́nyi nado dín okú* emitọn. 16  Todin, Jonatani visunnu Sauli tọn tọ́nyi Davidi dè to Holẹṣi bo gọalọna ẹn nado mọ huhlọn yí* to Jehovah mẹ.+ 17  E dọna ẹn dọmọ: “A dibu blo, na alọ otọ́ ṣie, Sauli tọn ma na jẹ gowe; hiẹ na lẹzun ahọlu do Islaeli ji+ bọ yẹn na hopódona we; podọ otọ́ ṣie, Sauli lọsu yọ́n enẹ.”+ 18  Whenẹnu, yé omẹ awe lẹ basi alẹnu de+ to Jehovah nukọn, Davidi sọ gbọṣi Holẹṣi bọ Jonatani lẹkọyi whé. 19  To godo mẹ, sunnu Zifi tọn lẹ hẹji yì Sauli dè to Gibea+ bo dọna ẹn dọmọ: “Be Davidi ma whlá ede sẹpọ mí+ do fihe vẹawu nado yì lẹ to Holẹṣi,+ yèdọ to okọ́ta Hakila tọn ji+ to hùwaji* Jeṣimọni* tọn+ ya? 20  Eyin e jlo we* nado jẹte wá to whedepopenu, ahọlu E, bo wá na míwlẹ ni de e jo do alọ ahọlu tọn mẹ.”+ 21  Whenẹnu, Sauli dọmọ: “Na Jehovah ni dona mì, na mìwlẹ ko do awuvẹmẹ hia mi. 22  Mì jaale bo yì bosọ dindona fihe ewọ te taun po mẹhe mọ ẹn to finẹ po, na e ko yin didọna mi dọ ayiha gigẹdẹnọ taun de wẹ ewọ. 23  Mì yí sọwhiwhe do dindona fihe e nọ whlá ede do lẹpo bo hẹn kunnudenu lẹ wá na mi. Whenẹnu, yẹn na hodo mì yì, bọ eyin ewọ to aigba lọ ji janwẹ, yẹn na dín in mọ to omẹ fọtọ́n* Juda tọn lẹpo ṣẹnṣẹn.” 24  Enẹwutu, yé tọ́n sọn finẹ bo jẹnukọnna Sauli dedo Zifi,+ bọ Davidi po sunnu etọn lẹ po tin to danfafa Maoni+ tọn ji, to Alaba+ hlan hùwaji Jeṣimọni tọn. 25  Enẹgodo, Sauli po sunnu etọn lẹ po wá nado dín in mọ.+ To whenue e yin didọna Davidi, e jẹte to afọdopolọji yì osé+ lọ mẹ bo gbọṣi danfafa Maoni tọn ji. Whenue Sauli sè ehe, e dómọna Davidi yì danfafa Maoni tọn ji. 26  To whenue Sauli wá adà osó lọ tọn dopo ji, Davidi po sunnu etọn lẹ po tin to adà osó lọ tọn awetọ ji. Davidi to whinwhlẹndo nado họnyi+ sọn Sauli nukọn, ṣigba Sauli po sunnu etọn lẹ po to dindọnsẹpọ Davidi po sunnu etọn lẹ po nado wle yé.+ 27  Ṣigba, wẹnsagun de wá Sauli dè bo dọmọ: “Yawu wá, na Filistinu lẹ ko doawhàn wá aigba lọ ji!” 28  Whenẹnu, Sauli lẹkọ sọn Davidi godo+ bo yì nado hoavùn hẹ Filistinu lẹ. Enẹwutu wẹ filọ do nọ yin yiylọdọ Osé Kinklan tọn. 29  Enẹgodo, Davidi hẹji yì sọn finẹ bo nọ nọ̀ fihe vẹawu nado yì lẹ to Ẹn-gẹdi.+

Nudọnamẹ Odò Tọn

Pọ́n Zẹm.
To paa mẹ, “ko sà ẹ.”
Kavi vlavo, “aigbanọ.”
Kavi vlavo, “to budi, na.”
Kavi “alindọn.”
To paa mẹ, “bo na huhlọn alọ etọn.”
To paa mẹ, “adusiwhé.”
Kavi vlavo, “danfafa lọ.”
Kavi “alindọn towe.”
Kavi “akọ̀.”