Accessibility setting

De ogbè dopo

Yì hosọ flinflin lẹ ji

Yì todowhinnu hosọ lẹ tọn ji

Yì hosọ lẹ ji

Kunnudetọ Jehovah Tọn Lẹ

Gungbe

Biblu Intẹnẹt Ji Tọn

OWE WIWE LẸ—LẸDOGBEDEVOMẸ AIHỌN YỌYỌ TỌN

1 Samuẹli 2:1-36

NUHE E BẸHẸN LẸ

  • Odẹ̀ Hanna tọn (1-11)

  • Ylando visunnu Eli tọn 2 lẹ tọn (12-26)

  • Jehovah dawhẹna whédo Eli tọn (27-36)

2  To whenẹnu, Hanna hodẹ̀ dọmọ: “Ahun ṣie nọ jaya to Jehovah mẹ;+ Jehovah ko ze azò* ṣie daga. Onù ṣie ko yin kikẹ̀ sọta kẹntọ ṣie lẹ, Na yẹn nọ jaya to azọ́n whlẹngán tọn towe lẹ mẹ.   Mẹdepope ma tin he yin wiwe di Jehovah, Mẹdepope ma tin taidi hiẹ,+ Podọ osé depope ma tin taidi Jiwheyẹwhe mítọn.+   Mì sọ dọho po sakla po ba blo; Mì dike ohó goyiyi tọn depope tọ́n sọn onù mìtọn mẹ blo, Na Jehovah wẹ Jiwheyẹwhe oyọnẹn tọn,+ Podọ ewọ wẹ nọ gbeje azọ́n lẹ pọ́n po gbesisọ po.   Ogá sunnu huhlọnnọ lẹ tọn lẹ yin gbigbà hányán, Ṣigba, huhlọn yin nina mẹhe to ahlida lẹ.+   Mẹhe ko dù gọ́ho dai lẹ dona hò paka whẹpo do mọ núdù, Ṣigba mẹhe to huvẹ dai lẹ masọ to huvẹ ba.+ Wẹnsinọ ko jivi ṣinawe,+ Ṣigba yọnnu he ji visunnu susu ko jẹvọ́.*   Jehovah nọ hù, bosọ nọ hẹnmẹ dogbẹ̀;* E nọ hẹnmẹ biọ Yọdò* mẹ, bosọ nọ fọ́n omẹ.+   Jehovah nọ hẹnmẹ jẹhẹ́n, bosọ nọ hẹnmẹ jẹ adọkun;+ E nọ zín omẹ do odò, bosọ nọ ze omẹ daga.+   E nọ ze agbátọnọ lẹ ṣite sọn kọ́gudu mẹ; E nọ fọ́n wamọnọ lẹ ṣite sọn afín mẹ,*+ Nado hẹn yé sinai hẹ ahọvi lẹ, Bo na yé otẹn gigonọ de. Jehovah tọn wẹ dodonu aigba tọn lẹ,+ E sọ do aigba ai do yé ji.   E nọ basi hihọ́na afọdide nugbonọ etọn lẹ tọn,+ Ṣigba, yè na bọnùdo na mẹylankan lẹ to zinvlu mẹ,+ Na gbẹtọ ma nọ gbawhàn gbọn huhlọn edetiti tọn dali gba.+ 10  Jehovah na gbà mẹhe to avùnho sọta ẹ lẹ hányán;*+ E na yẹnwan do yé ji sọn olọn mẹ di hẹviosò.+ Jehovah na dawhẹ kakajẹ opodo aigba tọn lẹ,+ E na na huhlọn ahọlu etọn+ Bo na ze azò* mẹyiamisisadode etọn+ tọn daga.” 11  Enẹgodo, Ẹlkana lẹkọyi owhé etọn gbè to Lama, ṣigba visunnu lọ lẹzun lizọnyizọnwatọ* Jehovah tọn+ to Eli yẹwhenọ lọ nukọn. 12  Todin, mẹylankan lẹ wẹ visunnu Eli tọn lẹ yin;+ yé ma tindo sisi depope na Jehovah. 13  Nuhe yé nọ wà gando jlọjẹ yẹwhenọ lẹ tọn he gbẹtọ lẹ nọ hẹnwa go die:+ Whedepopenu he mẹde to avọ́sinsan de basi, devizọnwatọ yẹwhenọ tọn de nọ wá po ṣivi ofẹ̀n atọ̀nnọ de po to alọmẹ to whenue yè gbẹ́ to olàn lọ sọakusìn, 14  ewọ sọ nọ ylọn ẹn do basia lọ, kavi nudàzẹ́n he tindo alọhẹnnu awe, nudàzẹ́n daho, kavi nudàzẹ́n he tindo alọhẹnnu dopo lọ mẹ. Nudepope he ṣivi-fẹ̀nnọ lọ ze wá aga, yẹwhenọ lọ nọ yí na ede. Mọ wẹ yé nọ wà do to Ṣilo na Islaelivi he wá finẹ lẹpo. 15  Humọ, etlẹ yin whẹpo mẹhe to avọ́sinsan basi lọ nido mẹ̀ ojó lọ,+ devizọnwatọ yẹwhenọ tọn de nọ wá bo nọ dọna ẹn dọmọ: “Na olàn yẹwhenọ lọ nado hì. Ewọ ma na yí olàn he yè sọakusìn sọn asi we, adavo olàn omú.” 16  Eyin mẹlọ dọna ẹn dọ: “Gbọ yé ni hẹn ẹn diun dọ ojó lọ yin mimẹ̀ whẹ́,+ enẹgodo a sọgan yí nudepope he jlo we,”* e nọ dọmọ: “Lala, ze e na mi hadopo; e ma yinmọ, n’na yí i gánnugánnu!” 17  Gbọnmọ dali, ylando devizọnwatọ lọ lẹ tọn lẹzun nuhe sinyẹn taun to Jehovah nukọn,+ na sunnu lọ lẹ nọ yinuwa hẹ avọ́nunina Jehovah tọn po sisi matindo po. 18  Todin, Samuẹli to lizọnyi+ to Jehovah nukọn, bo nọ do* efọdi* alavọ tọn+ de, dile etlẹ yindọ yọpọ sunnu de poun wẹ ewọ. 19  Humọ, onọ̀ etọn nọ basi awù pẹvi he ma tindo awà de na ẹn, bo nọ hẹn ẹn wá na ẹn to whemẹwhemẹ eyin ewọ hẹji wá po asu etọn po nado basi avọ́sinsan whemẹwhemẹ tọn.+ 20  Eli sọ dona Ẹlkana po asi etọn po dọmọ: “Na Jehovah ni na we ovi de gbọn asi ehe gblamẹ do dehe yin whiwhé na Jehovah lọ tẹnmẹ.”+ Enẹgodo, yé lẹkọyi whé. 21  Jehovah sọ lẹ́ ayidonugo etọn hlan Hanna, bọ ewọ penugo nado mọhò;+ e sọ ji visunnu atọ̀n devo lẹ po viyọnnu awe po. Yọpọ sunnu lọ, Samuẹli sọ to whinwhẹ́n deji to Jehovah nukọn.+ 22  Todin, Eli ko poyọnho taun, ṣigba e ko sè gando nuhe visunnu etọn lẹ to wiwà+ na Islaeli lẹpo go, gọna lehe yé nọ zanhẹ yọnnu he nọ wadevizọn to họntonu gòhọ opli tọn+ lọ tọn lẹ do. 23  Ewọ nọ dọna yé dọmọ: “Naegbọn mìwlẹ do nọ to onú ehe nkọ lẹ wà? Na nuhe n’to sisè gando mì go sọn gbẹtọ lọ lẹpo dè ylan taun. 24  Lala, visunnu ṣie lẹ emi, linlin he n’to sisè gbayipe to omẹ Jehovah tọn lẹ ṣẹnṣẹn lọ ma yọ́n. 25  Eyin mẹde waylando do awetọ etọn, mẹdevo sọgan vẹvẹna Jehovah do ota etọn mẹ;* amọ́ eyin mẹde waylando do Jehovah,+ mẹnu wẹ sọgan hodẹ̀ do ota etọn mẹ?” Ṣigba, yé gbẹ́ nado setonuna otọ́ yetọn, na Jehovah ko magbe nado hù yé.+ 26  To ojlẹ enẹ mẹ, yọpọ sunnu lọ Samuẹli to whinwhẹ́n deji to agbasa mẹ podọ to nukundagbe Jehovah tọn po gbẹtọ lẹ tọn po mẹ.+ 27  Omẹ Jiwheyẹwhe tọn de wá Eli dè bo dọna ẹn dọmọ: “Nuhe Jehovah dọ die: ‘Be yẹn ma de dee hia owhé otọ́ towe tọn hezeheze to whenue yé tin to Egipti taidi afanumẹ lẹ to owhé Falo tọn gbè ya?+ 28  Podọ ewọ yin dide to hẹnnu Islaeli tọn lẹpo+ mẹ nado nọ wadevizọn taidi yẹwhenọ na mi podọ nado nọ hẹji yì agbà ṣie+ kọ̀n nado basi avọ́sinsan lẹ bo mẹ̀ nuyọnwan,* podọ nado nọ do efọdi de to nukọn ṣie; yẹn sọ na owhé tọgbo towe tọn jlọjẹ lọ nado nọ yí apadewhe avọ́nunina Islaelivi* lẹ tọn he yin bibasi gbọn miyọ́n dali lẹpo tọn.+ 29  Naegbọn mìwlẹ do nọ vlẹ* avọ́sinsan po avọ́nunina ṣie he yẹn ko degbe etọn to fininọ ṣie po?+ Naegbọn hiẹ do to gbégbòna visunnu towe lẹ hugan mi gbọn adà dagbe hugan avọ́nunina omẹ ṣie Islaelivi lẹ tọn lẹpo yíyí do hẹn mìde klo dali?+ 30  “‘Enẹ wẹ zọ́n bọ ohó he Jehovah Jiwheyẹwhe Islaeli tọn dọ die: “Nugbo wẹ dọ yẹn ko dọ dọ owhé towe po owhé tọgbo towe tọn po na nọ zinzọnlin to nukọn ṣie tẹgbẹ.”+ Amọ́ todin, Jehovah dọmọ: “Na yẹn tọn, enẹ glo, na mẹhe nọ gbògbéna mi wẹ yẹn nọ gbògbéna,+ ṣigba mẹhe nọ vlẹ mi kò lẹ wẹ na yin nuyiwa hẹ po vlẹko po.” 31  Pọ́n! Azán lẹ ja whenue yẹn na sán huhlọn* towe po owhé otọ́ towe tọn po sẹ̀, bọ mẹdepope ma nasọ nọgbẹ̀ bo poyọnho to owhé towe gbè ba.+ 32  Kẹntọ de wẹ hiẹ na to mimọ to fininọ ṣie to nudagbe he yin wiwà na Islaeli lẹpo ṣẹnṣẹn,+ bọ yọnhonọ depope ma nasọ tin to owhé towe gbè pọ́n gbede ba. 33  Omẹ towe he yẹn ma sán sẹ̀ sọn sinsẹ̀nzọnwiwa to agbà lọ kọ̀n mẹ na hẹn nukun towe lẹ nado súzín bo na hẹn awubla wá na we,* ṣigba suhugan mẹhe to owhé towe gbè lẹ tọn wẹ na kú gbọn ohí gbẹtọ tọn dali.+ 34  Podọ nuhe na jọ do visunnu towe awe lẹ, yèdọ Họfini po Finehasi po go, na yin ohia de na we: Gbèdopo lọ wẹ yé omẹ awe lẹ na kú.+ 35  Enẹgodo, yẹn na ze yẹwhenọ nugbonọ de daga na dee.+ Ewọ na nọ yinuwa sọgbe hẹ ojlo ahun ṣie mẹ tọn;* yẹn nasọ do owhé de na ẹn he na dẹn-to-aimẹ, bọ ewọ na nọ zinzọnlin to mẹyiamisisadode ṣie nukọn to whepoponu. 36  Mẹdepope he pò ai to owhé towe gbè na nọ wá bo na nọ dẹ́ do odò na ẹn nado mọ akuẹ po akla nùdo dopo po yí, bo nasọ nọ dọmọ: “Jaale bo deazọ́nna mi do dopo to otẹn yẹwhenọ tọn lẹ mẹ nado mọ akla nùdo dopo dù.”’”+

Nudọnamẹ Odò Tọn

Kavi “huhlọn.” Pọ́n Zẹm.
To paa mẹ, “hú.”
Kavi “hẹnmẹ wá ogbẹ̀.”
Kavi “Ṣeol,” enẹ wẹ, yọdò paa gbẹtọvi lẹ tọn. Pọ́n Zẹm.
Kavi vlavo, “sọn ogbóji.”
Kavi vlavo, “Obu na jẹ mẹhe to ahidi hẹ Jehovah lẹ ji.”
Kavi “huhlọn.” Pọ́n Zẹm.
Kavi “visunnu lọ to devizọnwa na.”
Kavi “he alindọn towe to jijlo vẹkuvẹku.”
To paa mẹ, “nọ blagbajana ede po.”
Pọ́n Zẹm.
Kavi vlavo, “Jiwheyẹwhe na yí owhẹ̀ dọ na ẹn.”
Kavi vlavo, “bo hẹn azọ̀ avọ́sinsan tọn tì yiaga.”
To paa mẹ, “visunnu Islaeli tọn.”
To paa mẹ, “sẹwhẹ́.”
To paa mẹ, “awà.”
Kavi “hẹn alindọn towe vọgán.”
Kavi “hẹ nuhe to ahun ṣie mẹ podọ to alindọn ṣie mẹ.”