Accessibility setting

De ogbè dopo

Yì hosọ flinflin lẹ ji

Yì todowhinnu hosọ lẹ tọn ji

Yì hosọ lẹ ji

Kunnudetọ Jehovah Tọn Lẹ

Gungbe

Biblu Intẹnẹt Ji Tọn

OWE WIWE LẸ—LẸDOGBEDEVOMẸ AIHỌN YỌYỌ TỌN

1 Samuẹli 19:1-24

NUHE E BẸHẸN LẸ

  • Sauli to wangbẹna Davidi zọnmii (1-13)

  • Davidi họ̀ngán sọn Sauli dè (14-24)

19  To godo mẹ, Sauli dọhona Jonatani visunnu etọn po devizọnwatọ etọn lẹpo po gando linlẹn etọn nado hù Davidi go.+  Na Jonatani visunnu Sauli tọn yiwanna Davidi taun+ wutu, Jonatani dọna Davidi dọmọ: “Sauli otọ́ ṣie to dindin nado hù we. Jaale, ṣọ́ dewe to afọnnu bo yì fiwhiwhlá de bosọ gbọṣi finẹ.  Yẹn na tọ́nyi bo nọte to otọ́ ṣie pá to danji fie hiẹ na te. Yẹn na dọho towe na otọ́ ṣie, podọ eyin n’sè nude janwẹ, ayihaawe ma tin dọ n’na dọ ẹ na we.”+  Enẹwutu, Jonatani dọho Davidi tọn dagbe+ na Sauli otọ́ etọn. E dọna ẹn dọmọ: “Ahọlu ni ma waylando do devizọnwatọ etọn Davidi blo, na ewọ ma ko waylando de do we podọ ale wẹ nuhe e wà na we lẹ hẹnwa na we.  E ze ogbẹ̀ ede tọn do owù mẹ* nado hù Filistinu lọ,+ bọ Jehovah gbọnmọ dali hẹn awhàngbigba* daho wá na Islaeli pete. Hiẹ lọsu mọ enẹ bo gọ́ na ayajẹ. Enẹwutu, naegbọn hiẹ nado waylando do ohùn homẹvọnọ tọn go gbọn Davidi hùhù matin whẹwhinwhẹ́n de dali?”+  Sauli sọ dotoaina Jonatani, bọ Sauli whlé dọmọ: “Dile Jehovah togbẹ̀, ewọ ma na yin hùhù.”  Enẹgodo, Jonatani ylọ Davidi bo dọ onú ehe lẹpo na ẹn. Enẹwutu, Jonatani plan Davidi wá Sauli dè, bọ e zindonukọn nado to devizọnwana ẹn di dai tọn.+  To nukọn mẹ, awhàn sọ fọ́n whladopo dogọ, bọ Davidi tọ́nyi bo hoavùn sọta Filistinu lẹ bosọ hù yé badabada, yé sọ họ̀n to nukọn etọn.  Jehovah sọ dike bọ gbigbọ ylankan de wá Sauli ji+ dile e to aisinsin to ohọ̀ etọn mẹ bọ owhán etọn to alọmẹ na ẹn, to whenue Davidi yí ajalẹn do to hànji.+ 10  Sauli tẹnpọn nado yí owhán lọ do whè Davidi do adó go, ṣigba e vì na Sauli, mẹhe dlan owhán lọ bọ e biọ adó mẹ. Davidi doge-wezun mẹ bo họnyi to ozán enẹ mẹ. 11  To godo mẹ, Sauli do wẹnsagun lẹ hlan owhé Davidi tọn gbè nado ṣọ́ owhé lọ bo hù Davidi to afọnnu,+ ṣigba Mikali asi Davidi tọn dọna ẹn dọmọ: “Eyin a ma họnyi* to ozán ehe mẹ, oṣiọ towe wẹ yè na ze to osọ.” 12  To afọdopolọji, Mikali hẹn Davidi jẹte gbọn fleṣenu, na e nido họnyi bo họ̀ngán. 13  Mikali sọ ze boṣiọ tẹlafimi tọn* bo tẹ́ ẹ do adọzan lọ ji bosọ ze avọ̀ gbọgbọẹ-fún tọn he taidi odọ̀ de do taligbé etọn bo ṣinyọ́n avọ̀ de na ẹn. 14  Todin, Sauli do wẹnsagun lẹ hlan nado yì wle Davidi, ṣigba yọnnu lọ dọmọ: “E to awutujẹ.” 15  Sauli sọ do wẹnsagun lẹ hlan nado yì pọ́n Davidi bosọ dọna yé dọmọ: “Mì plan ẹn wá na mi to adọzan etọn ji, na e nido yin hùhù.”+ 16  Whenue wẹnsagun lọ lẹ biọ họmẹ, boṣiọ tẹlafimi tọn* de wẹ yé mọ to adọzan lọ ji bọ avọ̀ gbọgbọẹ-fún tọn he taidi odọ̀ de wẹ to taligbé etọn. 17  Sauli dọna Mikali dọmọ: “Naegbọn hiẹ do klọ mi dole bo do kẹntọ ṣie+ hlan bọ ewọ họ̀ngán?” Mikali gblọnna Sauli dọmọ: “E dọna mi dọ, ‘Do mi hlan, e ma yinmọ n’na hù we!’” 18  Todin, Davidi ko họnyi bo họ̀ngán bosọ wá Samuẹli dè to Lama.+ E sọ dọ nuhe Sauli wà na ẹn lẹpo na Samuẹli. Enẹgodo, ewọ po Samuẹli po tọ́nyi bosọ gbọṣi Naiọti.+ 19  To godo mẹ, linlin yin nina Sauli dọmọ: “Pọ́n! Davidi tin to Naiọti to Lama.” 20  To afọdopolọji, Sauli do wẹnsagun lẹ hlan nado yì wle Davidi. Whenue yé mọ mẹhe yin mẹho to yẹwhegán lẹ mẹ lẹ to dọdai dọ bọ Samuẹli to ote bo to anadena yé, gbigbọ Jiwheyẹwhe tọn jẹ wẹnsagun Sauli tọn lẹ ji bọ yelọsu jẹ nuyiwa ji di yẹwhegán lẹ. 21  Whenue yé dọ ehe na Sauli, e do wẹnsagun devo lẹ hlan to afọdopolọji, yelọsu sọ jẹ nuyiwa ji di yẹwhegán lẹ. Sauli sọ vọ́ do wẹnsagun devo lẹ hlan, yèdọ pipli atọ̀ntọ, bọ yelọsu sọ jẹ nuyiwa ji di yẹwhegán lẹ. 22  To godo mẹ, ewọ lọsu yì Lama. Whenue e jẹ osindò daho he to Seku lọ kọ̀n, e kanse dọmọ: “Fie wẹ Samuẹli po Davidi po te?” Yé gblọnna ẹn dọmọ: “Naiọti+ finẹ wẹ yé te to Lama.” 23  Dile Sauli dedo sọn finẹ jei Naiọti to Lama, gbigbọ Jiwheyẹwhe tọn wá ewọ lọsu ji, bọ e to zọnlinzin bo to nuyiwa di yẹwhegán de kaka e do biọ Naiọti to Lama. 24  E sọ de awù etọn lẹ bọ ewọ lọsu yinuwa di yẹwhegán de to Samuẹli nukọn, bo mlọn omẹ́* to finẹ to okle po ozán enẹ blebu po gblamẹ. Enẹwutu wẹ yé do nọ dọ dọ: “Sauli lọsu tin to yẹwhegán lẹ mẹ wẹ ya?”+

Nudọnamẹ Odò Tọn

Kavi “ze alindọn etọn do alọ ede tọn mẹ.”
Kavi “whlẹngán.”
Kavi “Eyin a ma dike alindọn towe họnyi.”
Kavi “yẹwhe whédo tọn.”
Kavi “yẹwhe whédo tọn.”
Kavi “awù kleun de mẹ.”