Yì hosọ lẹ ji

Yì hosọ flinflin lẹ ji

Yì todowhinnu hosọ lẹ tọn ji

Kunnudetọ Jehovah Tọn Lẹ

Gungbe

Biblu Intẹnẹt Ji Tọn | OWE WIWE LẸ—LẸDOGBEDEVOMẸ AIHỌN YỌYỌ TỌN

1 Samuẹli 18:1-30

NUHE E BẸHẸN LẸ

  • Davidi jihọntọn hẹ Jonatani (1-4)

  • Awhàngbigba Davidi tọn lẹ hẹn Sauli whànwu (5-9)

  • Sauli tẹnpọn nado hù Davidi (10-19)

  • Davidi dà Mikali, viyọnnu Sauli tọn (20-30)

18  Tlolo he Davidi ko dọho hẹ Sauli fó, Jonatani+ po Davidi po lẹzun họntọn vivẹ́ lẹ,* bọ Jonatani jẹ wanyina ẹn ji di edetiti.*+  Sọn gbenẹgbe, Sauli yí Davidi do ede dè bo ma dike ni lẹkọyi owhé otọ́ etọn tọn gbè.+  Jonatani po Davidi po sọ basi alẹnu de,+ na e yiwanna ẹn di ede* wutu.+  Jonatani de awù he ma tindo awà he e do bo yí i na Davidi, gọna tewu etọn, ohí etọn, ogá etọn po gbànnú etọn po.  Davidi sọ jẹ tintọ́n yì ji bo nọ tindo kọdetọn dagbe*+ to fidepope he Sauli do e hlan. Enẹwutu, Sauli de e nado nọ deanana sunnu awhànfuntọ lẹ,+ ehe sọ hùnhomẹ na gbẹtọ lẹpo po devizọnwatọ Sauli tọn lẹ po.  Eyin Davidi po mẹdevo lẹ po lẹkọja sọn Filistinu lẹ hùhù gbé, yọnnu lẹ nọ tọ́n wá sọn tòdaho Islaeli tọn lẹpo mẹ nado wá pé Ahọlu Sauli, bo nọ yí ohún,+ ayajẹ po hànjinu okànnọ lẹ po do to hànji+ bosọ nọ to wedu.  Yọnnu he to aglinjẹ lọ lẹ nọ to hànji dọmọ: “Sauli ko hù fọtọ́n etọn lẹ, Davidi ko sọ hù fọtọ́n donu ao etọn lẹ.”+  Adi sọ jẹ Sauli do ji sinsinyẹn+ bọ ohàn ehe hẹn homẹgble e, na e dọmọ: “Gigo omẹ fọtọ́n donu ao hùhù tọn wẹ yé na Davidi, ṣigba omẹ fọtọ́n tọn wẹ yé na mi. Onú dopo gee he pò nado yí na ẹn todin wẹ ahọlu-yinyin!”+  Sọn azán enẹ gbè sọyi, Sauli nọ to nuvẹdo Davidi. 10  To wunkẹngbe, Jiwheyẹwhe dike bọ gbigbọ ylankan de wá Sauli ji+ bọ e jẹ nuyiwa ji to aliho he paṣamẹ de mẹ* to họmẹ to whenue Davidi yí ajalẹn do to hànji+ dile e ko nọ wà do. Sauli tindo owhán de to alọmẹ,+ 11  ewọ sọ yìn owhán lọ+ bo dọna ede dọmọ: ‘N’na whè Davidi do adó go!’ Ṣigba, Davidi vì na ẹn whla awe. 12  Whenẹnu, Sauli dibuna Davidi, na Jehovah tin hẹ ẹ+ ṣigba bo ko jo Sauli do wutu.+ 13  Enẹwutu, Sauli de e sọn nukọn ede tọn bo de e taidi ogán omẹ fọtọ́n lẹ tọn, bọ Davidi nọ deanana awhànpa lọ yì awhàn.*+ 14  Davidi sọ zindonukọn nado to kọdetọn dagbe tindo*+ to nuhe wà e te lẹpo mẹ bọ Jehovah tin hẹ ẹ.+ 15  To whenue Sauli mọdọ e to kọdetọn dagbe tindo taun, e jẹ budina ẹn ji. 16  Ṣigba, omẹ Islaeli po Juda po tọn lẹpo wẹ yiwanna Davidi, na ewọ wẹ nọ nọ̀ nukọnna yé to awhànfunfun yetọn lẹ mẹ. 17  To godo mẹ, Sauli dọna Davidi dọmọ: “Viyọnnu ṣie mẹho Mẹlabi+ die. Yẹn jlo na yí i na we taidi asi.+ Ṣigba, a dona zindonukọn nado to adọgbigbo towe dohia do ota ṣie mẹ nado to awhàn Jehovah tọn lẹ fùn.”+ Na Sauli dọna ede dọmọ: ‘Na yẹn ni ma ze alọ ṣie daga do e ji blo. Gbọ alọ Filistinu lẹ tọn wẹ ni hù i.’+ 18  Davidi sọ dọna Sauli dọmọ: “Mẹnu wẹ yẹn podọ mẹnu wẹ hẹnnumẹ ṣie lẹ, yèdọ whẹndo otọ́ ṣie tọn to Islaeli, bọ yẹn nado lẹzun ovisu ahọlu tọn?”+ 19  Ṣigba, to whenue ojlẹ lọ wá nado yí viyọnnu Sauli tọn Mẹlabi na Davidi, viyọnnu lọ ko yin yíyí na Adliẹli+ Mẹholatinu lọ taidi asi. 20  Todin, viyọnnu Sauli tọn Mikali+ yiwanna Davidi, ehe sọ yin didọna Sauli bọ e hùnhomẹ na ẹn. 21  Enẹwutu, Sauli dọmọ: “N’na yí viyọnnu lọ na ẹn nado yí i zan di omọ̀ de na ẹn, na alọ Filistinu lẹ tọn nido jẹ e go.”+ To whenẹnu, Sauli dọna Davidi whla awetọ dọmọ: “Hiẹ na biọ kanṣiṣa alọwle tọn de mẹ hẹ mi* to egbé.” 22  Humọ, Sauli degbena devizọnwatọ etọn lẹ dọmọ: “Mì dọhona Davidi to nuglọ dọ, ‘Pọ́n! Homẹ ahọlu tọn hùn do gowe, podọ devizọnwatọ etọn lẹpo wẹ yiwanna we. Enẹwutu, biọ kanṣiṣa alọwle tọn mẹ hẹ ahọlu.’” 23  To whenue devizọnwatọ Sauli tọn lẹ dọ onú ehelẹ na Davidi, Davidi dọmọ: “Be onú vlẹkẹsẹ de wẹ e yin to nukun mìwlẹ tọn mẹ nado biọ kanṣiṣa alọwle tọn mẹ hẹ ahọlu, to whenuena e yindọ wamọnọ de wẹ yẹn bo ma yin mẹjọmẹ de ya?”+ 24  Devizọnwatọ Sauli tọn lẹ sọ yì na ẹn linlin dọmọ: “Nuhe Davidi dọ die.” 25  Whenẹnu, Sauli dọmọ: “Nuhe mì dona dọna Davidi die, ‘Ahọlu ma to asigbàn+ de biọ to asi we hú ayú tintan+ vijinu sunnu Filistinu 100 tọn, nado yiahọsu to kẹntọ ahọlu tọn lẹ go.’” Na Sauli to ayiha kàn nado mọdọ alọ Filistinu lẹ tọn jẹ Davidi go. 26  Enẹwutu, devizọnwatọ etọn lẹ yì dowẹn Davidi, homẹ Davidi tọn sọ hùn nado biọ kanṣiṣa alọwle tọn mẹ hẹ ahọlu.+ Whẹpo ojlẹ dide lọ nido pé, 27  Davidi tọ́nyi po sunnu etọn lẹ po bo hù sunnu Filistinu 200, Davidi sọ hẹn sọha pipé ayú tintan vijinu yetọn tọn wá ahọlu dè, nado biọ kanṣiṣa alọwle tọn mẹ hẹ ahọlu. Enẹwutu, Sauli yí viyọnnu etọn Mikali na ẹn taidi asi.+ 28  Sauli mọdọ Jehovah tin hẹ Davidi+ podọ viyọnnu etọn Mikali yiwanna ẹn.+ 29  Ehe tlẹ sọ vọ́ zọ́n bọ Sauli dibuna Davidi dogọ, Sauli sọ yí Davidi do dó kẹntọ to pipotọ gbẹzan etọn tọn lẹpo mẹ.+ 30  Ahọvi Filistinu lẹ tọn lẹ nọ tọ́nyi nado funawhàn, ṣigba whedepopenu he yé tọ́nyi, Davidi nọ tindo kọdetọn dagbe* hú devizọnwatọ Sauli tọn lẹpo;+ ewọ sọ wá diyin dogọ taun.+

Nudọnamẹ Odò Tọn

Kavi “alindọn Jonatani tọn dọ̀n do alindọn Davidi tọn go pẹkipẹki.”
Kavi “di alindọn etọn titi.”
Kavi “di alindọn etọn titi.”
Kavi “nọ yinuwa po nuyọnẹn po.”
Kavi “jẹ nuyiwa ji di yẹwhegán.”
To paa mẹ, “bọ ewọ nọ tọ́nyi bo nọ lẹkọwa to gbẹtọ lẹ nukọn.”
Kavi “to nuyiwa po nuyọnẹn po.”
Kavi “na lẹzun ovisu ṣie.”
Kavi “nọ yinuwa po nuyọnẹn po.”