Yì hosọ lẹ ji

Yì hosọ flinflin lẹ ji

Yì todowhinnu hosọ lẹ tọn ji

Kunnudetọ Jehovah Tọn Lẹ

Gungbe

Biblu Intẹnẹt Ji Tọn | OWE WIWE LẸ—LẸDOGBEDEVOMẸ AIHỌN YỌYỌ TỌN

1 Samuẹli 13:1-23

NUHE E BẸHẸN LẸ

  • Sauli ṣinyan awhànfuntọ lẹ (1-4)

  • Sauli yinuwa po sakla po (5-9)

  • Samuẹli wọhẹ Sauli (10-14)

  • Islaeli ma tindo awhànfunnu (15-23)

13  Sauli tindo owhe . . .* to whenue e lẹzun ahọlu,+ e sọ dugán do Islaeli ji na owhe awe.  Sauli ṣinyan sunnu 3 000 sọn Islaeli; sunnu 2 000 to ehelẹ mẹ tin topọ hẹ Sauli to Mikmaṣi podọ to lẹdo osó tọn Bẹtẹli tọn mẹ, bọ 1 000 tin topọ hẹ Jonatani+ to Gibea+ Bẹnjamini tọn. Ewọ sọ do mẹhe pò lẹ hlan whé, yèdọ dopodopo yetọn hlan gòhọ etọn mẹ.  Enẹgodo, Jonatani hù awhànfun-gbẹ́ Filistinu+ lẹ tọn he to Geba,+ bọ Filistinu lẹ sè ehe. Sauli sọ biọ dọ azò ni yin kúnkún+ lẹdo aigba lọ pete bo dọmọ: “Mì gbọ Heblu lẹ ni sè!”  Islaeli pete sọ sè linlin lọ dọmọ: “Sauli ko hù awhànfun-gbẹ́ Filistinu lẹ tọn, enẹwutu Islaeli ko lẹzun awuhiọnu de to Filistinu lẹ ṣẹnṣẹn.” Gbẹtọ lọ lẹ sọ yin yiylọ pli nado hodo Sauli to Gilgali.+  Filistinu lẹ lọsu pli dopọ nado hoavùn hẹ Islaeli, bo bẹ osọ́-kẹkẹ awhàn tọn 30 000, osọ́nọ 6 000 po awhànfuntọ he sù di tọkẹ́n huto tọn lẹ po pli;+ yé sọ hẹji yì bo dosla do Mikmaṣi hlan whèzẹtẹn-waji Bẹti-aveni tọn.+  Omẹ Islaeli tọn lẹ sọ mọdọ emilẹ ko biọ nuhahun mẹ, na yé tin to ninọmẹ sinsinyẹn mẹ wutu; enẹwutu gbẹtọ lẹ nọ yì whlá yede do oslò+ lẹ, odò lẹ, osé lẹ, agbànhọ dòglọ tọn* lẹ po dotọ̀ lẹ po mẹ.  Delẹ to Heblu lẹ mẹ tlẹ dasá Jọdani yì aigba Gad po Giliadi po tọn ji.+ Ṣigba, Sauli gbẹ́ to Gilgali bọ mẹhe hodo e lẹpo to sijọsijọ ji.  E zindonukọn nado to tenọ kaka na azán ṣinawe kẹdẹdile Samuẹli ko dọ do, ṣigba Samuẹli ma ko wá Gilgali, podọ gbẹtọ lọ lẹ jẹ gbigbàdo sọn e dè ji.  To godo mẹ, Sauli dọmọ: “Mì hẹn avọ́sinsan mimẹ̀ lọ po avọ́sinsan jijọho tọn lẹ po wá na mi.” Ewọ sọ basi avọ́sinsan mimẹ̀ lọ.+ 10  Ṣigba, tlolo he e dotana avọ́sinsan mimẹ̀ lọ bibasi wẹ Samuẹli wá. Sauli sọ tọ́njẹgbonu yì pé e bo dona ẹn. 11  Whenẹnu, Samuẹli dọmọ: “Etẹ die he hiẹ ko wà?” Sauli gblọn dọmọ: “N’mọdọ gbẹtọ lẹ jẹ gbigbàdo sọn dè e ji,+ bọ hiẹ masọ wá to ojlẹ he a dọ lọ mẹ, podọ Filistinu lẹ ko to yede bẹpli do Mikmaṣi.+ 12  Enẹwutu, n’dọna dee dọ, ‘Todin, n’ma ko biọ nukundagbe Jehovah tọn,* bọ Filistinu lẹ na jẹte wá ji e to Gilgali.’ Enẹ wẹ zọ́n bọ n’do mọ dee to dandannu glọ nado basi avọ́sinsan mimẹ̀ lọ.” 13  Samuẹli sọ dọna Sauli dọmọ: “A ko yinuwa po nulú po. Hiẹ ma setonuna gbedide he Jehovah Jiwheyẹwhe towe na we.+ Eyin hiẹ ko wàmọ wẹ, Jehovah na ko hẹn ahọluduta towe lodo do Islaeli ji kakadoi. 14  Ṣigba todin, ahọluduta towe ma na dẹn-to-aimẹ.+ Jehovah na dín sunnu de he ahun etọn kẹalọyi,+ Jehovah nasọ deazọ́nna ẹn taidi nukọntọ de do omẹ etọn lẹ ji,+ na hiẹ ma setonuna nuhe Jehovah degbe etọn na we wutu.”+ 15  Enẹgodo, Samuẹli fọ́n bo hẹji sọn Gilgali yì Gibea Bẹnjamini tọn, Sauli sọ hia gbẹtọ lọ lẹ; mẹhe pò to e dè lẹ yin nudi sunnu 600.+ 16  Geba+ Bẹnjamini tọn wẹ Sauli, visunnu etọn Jonatani po mẹhe gbẹ́ pò to yé dè lẹ po tin te, bọ Filistinu lẹ dosla do Mikmaṣi.+ 17  Awhànfun-gbẹ́ lọ lẹ nọ tọ́nyi sọn osla Filistinu lẹ tọn mẹ do ogbẹ́ atọ̀n ji. Ogbẹ́ dopo nọ lẹhlan aliho he yì Ofla, to aigba Ṣuali tọn waji; 18  ogbẹ́ awetọ nọ lẹhlan aliho Bẹti-holọni+ tọn; podọ ogbẹ́ atọ̀ntọ nọ lẹhlan aliho he yì dogbó he pannukọn agbàdo Zeboimi tọn, to danfafa lọ waji. 19  Todin, ayáwatọ depope ma tin to aigba Islaeli tọn pete ji, na Filistinu lẹ dọmọ: “Na Heblu lẹ nikaa tùn ohí kavi owhán.” 20  Filistinu lẹ dè wẹ Islaelivi lẹpo nọ jẹte yì nado gàn glepọnu, dòkunnú, asiọvi kavi agbogọdọẹ yetọn lẹ. 21  Pimu* dopo wẹ yé nọ yí nado gàn glepọnu, dòkunnú, azọ́nwanu onù atọ̀nnọ kavi asiọvi lẹ, podọ nado blá opò tlọ́ntlọ́n he yè nọ yí do deanana oyìn. 22  To awhànfunfun zangbe, depope to mẹhe tin to Sauli po Jonatani po dè lẹ mẹ ma hẹn ohí kavi owhán depope to alọmẹ;+ Sauli po visunnu etọn Jonatani po kẹdẹ wẹ hẹn awhànfunnu lẹ. 23  Todin, awhànfun-gbẹ́ Filistinu lẹ tọn de ko tọ́nyi agbàdo he gbọn Mikmaṣi lọ mẹ.+

Nudọnamẹ Odò Tọn

Sọha lọ ma sọawuhia to kandai Heblugbe tọn lọ mẹ.
Kavi “fiwhiwhlá.”
Kavi “ko hẹn nukunmẹ Jehovah tọn bọ̀.”
Ojlẹnu hohowhenu tọn de, he zínpinpẹn etọn sọzẹn hẹ nudi mado-awe daa ṣekẹli dopo tọn.