Yì hosọ lẹ ji

Yì hosọ flinflin lẹ ji

Yì todowhinnu hosọ lẹ tọn ji

Kunnudetọ Jehovah Tọn Lẹ

Gungbe

Biblu Intẹnẹt Ji Tọn | OWE WIWE LẸ—LẸDOGBEDEVOMẸ AIHỌN YỌYỌ TỌN

1 Samuẹli 11:1-15

NUHE E BẸHẸN LẸ

  • Sauli gbawhàn Amọninu lẹ tọn (1-11)

  • Gandudu Sauli tọn yin hinhẹn lodo (12-15)

11  Enẹgodo, Nahaṣi Amọninu+ lọ hẹji yì bo dosla nado tọ́nawhàn Jabẹṣi+ to Giliadi. Sunnu Jabẹṣi tọn lẹpo sọ dọna Nahaṣi dọmọ: “Basi alẹnu* de hẹ mí, míwlẹ nasọ wadevizọn na we.”  Nahaṣi Amọninu lọ dọna yé dọmọ: “Yẹn na basi alẹnu hẹ mì eyin mì yigbe na ehe: dọ nukun adusiwhé tọn mìmẹpo tọn ni yin súnsúnsẹ̀. Yẹn na wàmọ nado dowinyan omẹ Islaeli tọn lẹpo.”  Mẹho Jabẹṣi tọn lẹ gblọnna ẹn dọmọ: “Na mí azán ṣinawe, na mí nido do wẹnsagun lẹ hlan aigba Islaeli tọn lẹpo ji. To whenẹnu, eyin mẹdepope ma tin nado whlẹn mí, míwlẹ na gbọ bo jo míde do alọ towe mẹ.”  Enẹgodo, wẹnsagun lẹ wá Gibea+ Sauli tọn bo dọ ohó ehelẹ na gbẹtọ lẹ, gbẹtọ lọ lẹpo sọ yí ogbè lélé do viavi.  Ṣigba, Sauli ja sọn danji po kanlinpa po, Sauli sọ dọmọ: “Etẹwẹ to gbẹtọ lẹ wà? Naegbọn yé do to avivi?” Whenẹnu, yé dọ nuhe sunnu Jabẹṣi tọn lọ lẹ ko dọ lẹ na ẹn.  Gbigbọ Jiwheyẹwhe tọn sọ na huhlọn Sauli+ to whenue e sè ohó ehelẹ, bọ homẹgble e sinsinyẹn.  Enẹwutu, e yí oyìnsú awe bo já yé do flinflin bosọ do yé hlan aigba Islaeli tọn lẹpo ji gbọn alọ wẹnsagun lẹ tọn gblamẹ, bo dọmọ: “Eyin mẹde ma hodo Sauli po Samuẹli po, nuhe na yin wiwà na oyìn etọn lẹ niyẹn!” Obu Jehovah tọn sọ jẹ gbẹtọ lọ lẹ ji, sọmọ bọ yé tọ́njẹgbonu to kọndopọ mẹ.*  To whenẹnu, e hia sọha yetọn to Bezẹki, bo mọ Islaelivi 300 000 gọna omẹ Juda tọn 30 000.  Todin, yé dọna wẹnsagun he wá dai lọ lẹ dọmọ: “Nuhe mì na dọna sunnu Jabẹṣi tọn lẹ to Giliadi die, ‘To owhè ṣadada mẹ to osọ, mìwlẹ na yin whinwhlẹngán.’” To whenẹnu, wẹnsagun lọ lẹ wá sunnu Jabẹṣi tọn lẹ dè bo dowẹn lọ na yé, yé sọ jaya taun. 10  Enẹwutu, sunnu Jabẹṣi tọn lẹ dọmọ: “Míwlẹ na jo míde do alọ mìtọn mẹ to osọ, bọ mìwlẹ na wà nudepope he yọ́n to nukun mìtọn mẹ na mí.”+ 11  To wunkẹngbe, Sauli má gbẹtọ lọ lẹ do awhànfun-gbẹ́ atọ̀n ji, bọ yé biọ osla lọ ṣẹnṣẹn to zánmẹ jei afọnnu gblamẹ* bo to Amọninu+ lẹ hù kakajẹ owhè ṣádada mẹ. Mẹhe họ̀ngán lẹ yin gbigbàdo, sọmọ bọ omẹ awe ma yin jijodo dopọ. 12  To whenẹnu, gbẹtọ lọ lẹ dọna Samuẹli dọmọ: “Mẹnu lẹ wẹ to didọ dọ, ‘Be Sauli wẹ na duahọlu do mí ji ya?’+ De omẹ enẹlẹ hia, na mí ni hù yé.” 13  Ṣigba, Sauli dọmọ: “Mẹdepope ma na yin hùhù to egbé,+ na Jehovah ko whlẹn Islaeli gán to egbehe.” 14  To godo mẹ, Samuẹli dọna gbẹtọ lọ lẹ dọmọ: “Mì wá mí ni yì Gilgali+ nado vọ́ ahọlu-yinyin lọ hẹn lodo.”+ 15  Enẹwutu, gbẹtọ lọ lẹpo yì Gilgali bo yí Sauli do doahọlu to Jehovah nukọn to Gilgali. Enẹgodo, yé basi avọ́sinsan jijọho tọn lẹ to finẹ to Jehovah nukọn,+ bọ Sauli po omẹ Islaeli tọn lẹpo po yí ayajẹ daho do basi hùnwhẹ.+

Nudọnamẹ Odò Tọn

Kavi “gbekọndopọ.”
To paa mẹ, “taidi mẹdopo.”
Enẹ wẹ, sọn nudi ogàn 2 zánmẹ tọn jẹ ogàn 6 afọnnu tọn mẹ.