Yì hosọ lẹ ji

Yì hosọ flinflin lẹ ji

Yì todowhinnu hosọ lẹ tọn ji

Kunnudetọ Jehovah Tọn Lẹ

Gungbe

Biblu Intẹnẹt Ji Tọn | OWE WIWE LẸ—LẸDOGBEDEVOMẸ AIHỌN YỌYỌ TỌN

1 Samuẹli 10:1-27

NUHE E BẸHẸN LẸ

  • Sauli yin amisisayidode di ahọlu (1-16)

  • Sauli yin didohia gbẹtọ lọ lẹ (17-27)

10  Enẹgodo, Samuẹli ze ogo amì tọn lọ bo kọ̀n ẹn do ota na Sauli.+ E sọ donùnùgo na ẹn bo dọmọ: “Be Jehovah ma ko yiamisisadode we taidi nukọntọ+ do ogú etọn ji ya?+  Whenue hiẹ na tọ́n sọn dè e to egbehe, a na mọ sunnu awe delẹ sẹpọ yọdò Laheli tọn+ to aigba Bẹnjamini tọn ji to Zelza, bọ yé na dọna we dọ, ‘Kẹtẹkẹtẹ he dín gbé a yì lọ lẹ ko yin mimọ, ṣigba todin otọ́ towe ko wọnji kẹtẹkẹtẹ lọ lẹ go+ bo to nuhà na hiẹ tọn wutu. Ewọ sọ to didọ dọ: “Etẹ n’na wà din gando visunnu ṣie go?”’  Hẹji yì sọn finẹ kaka a nado jẹ atin daho Taboli tọn kọ̀n, fie a na pé sunnu atọ̀n delẹ te he hẹji jei Jiwheyẹwhe nugbo lọ dè to Bẹtẹli,+ bọ mẹdopo hẹn gbọgbọẹvu atọ̀n, omẹ awetọ hẹn akla atọ̀n podọ omẹ atọ̀ntọ hẹn ozẹ́n daho ovẹn tọn de.  Yé na kàn dagbemẹninọ towe biọ bo na na we akla awe, hiẹ sọ dona kẹalọyi akla lọ lẹ sọn yé si.  Enẹgodo, hiẹ na wá okọ́ta Jiwheyẹwhe nugbo lọ tọn ji, yèdọ fie awhànfun-gbẹ́ Filistinu lẹ tọn de tin te. Eyin a jẹ tòdaho lọ mẹ, a na pé pipli yẹwhegán lẹ tọn de he to tejẹ sọn ofi yiaga lọ, bọ hànjinu okànnọ de, ohún, ován po ajalẹn po to yinyin hihò to nukọn yetọn dile yé to dọdai dọ.  Gbigbọ Jehovah tọn nasọ na we huhlọn+ bọ a na dọ dọdai to pọmẹ hẹ yé bo na yin didiọ zun mẹdevo.+  Whenue ohia ehelẹ na ko wá aimẹ, wà nudepope he a mọdọ e yọnbasi, na Jiwheyẹwhe nugbo lọ tin hẹ we.  Enẹgodo, jẹte yì Gilgali+ jẹnukọnna mi, yẹn nasọ jẹte wá dè we to finẹ nado basi avọ́sinsan mimẹ̀ lẹ po avọ́sinsan jijọho tọn lẹ po. Hiẹ dona nọte na azán ṣinawe kaka yẹn nado wá dè we. Whenẹnu wẹ n’na hẹn nuhe a dona wà zun yinyọnẹn na we.”  Tlolo he Sauli lilẹ́ nado yì sọn Samuẹli dè, Jiwheyẹwhe jẹ ahun etọn diọ ji nado taidi mẹdevo tọn, bọ ohia lọ lẹpo mọ hẹndi to gbenẹgbe. 10  Yé sọ tọ́n sọn finẹ yì okọ́ta lọ ji bọ pipli yẹwhegán lẹ tọn de pé e. To afọdopolọji, gbigbọ Jiwheyẹwhe tọn na ẹn huhlọn+ bọ e jẹ dọdai dọ ji+ to ṣẹnṣẹn yetọn. 11  Whenue mẹhe ko yọ́n ẹn dai lẹpo mọdọ ewọ to dọdai dọ hẹ yẹwhegán lẹ, yé jẹ didọna ode awetọ ji dọmọ: “Etẹwẹ wà visunnu Kiṣi tọn? Sauli lọsu tin to yẹwhegán lẹ mẹ wẹ ya?” 12  To whenẹnu, dawe he yin finẹnu de dọmọ: “Mẹnu wẹ ka yin otọ́ yetọn?” Gbọnmọ dali, e lẹzun aṣagbe* de dọmọ: “Sauli lọsu tin to yẹwhegán lẹ mẹ wẹ ya?”+ 13  To whenue ewọ ko dọ dọdai fó, e wá ofi yiaga lọ. 14  To godo mẹ, tavẹ Sauli tọn dọna ewọ po devizọnwatọ etọn po dọmọ: “Fitẹ mì yì?” Ewọ sọ gblọn dọmọ: “Kẹtẹkẹtẹ lọ lẹ dín gbé wẹ mí yì,+ ṣigba mí mọdọ yé ma to dọ́n, enẹwutu mí yì Samuẹli dè.” 15  Tavẹ Sauli tọn sọ kanse e dọmọ: “Jaale dọna mi, etẹwẹ Samuẹli dọna mì?” 16  Sauli gblọnna tavẹ etọn dọmọ: “E dọna mí dọ kẹtẹkẹtẹ lọ lẹ ko yin mimọ.” Ṣigba, Sauli ma hẹn nuhe Samuẹli dọna ẹn gando ahọlu-yinyin go zun yinyọnẹn na ẹn. 17  Enẹgodo, Samuẹli ylọ gbẹtọ lọ lẹ pli do Jehovah dè to Mizpa+ 18  bo dọna Islaelivi lẹ dọmọ: “Nuhe Jehovah Jiwheyẹwhe Islaeli tọn dọ die: ‘Yẹn wẹ plan Islaeli tọ́njẹgbonu sọn Egipti bo whlẹn mì sọn alọ Egipti tọn mẹ+ podọ sọn alọ ahọluduta he to kọgbidina mì lẹpo tọn mẹ. 19  Ṣigba to egbehe, mìwlẹ ko gbẹ́ Jiwheyẹwhe mìtọn+ he yin Whlẹngántọ mìtọn he de mì sọn oylan po ayimajai mìtọn lẹpo po mẹ dai bo dọmọ: “Lala, hiẹ dona de ahọlu de he na dugán do mí ji.” Todin, mì ṣite to Jehovah nukọn sọgbe hẹ hẹnnu mìtọn lẹ podọ sọgbe hẹ pipli omẹ fọtọ́n tọn* mìtọn lẹ.’” 20  To whenẹnu, Samuẹli hẹn hẹnnu Islaeli tọn lẹpo tọ́n wá debọdo-dego,+ bọ hẹnnu Bẹnjamini tọn yin dide.+ 21  Enẹgodo, e hẹn whẹndo lẹ tọ́n wá debọdo-dego sọn hẹnnu Bẹnjamini tọn mẹ, bọ whẹndo Matlinu lẹ tọn yin dide. To godo mẹ, Sauli visunnu Kiṣi tọn yin dide.+ Ṣigba, whenue yé yì dindin in gbé, yé ma mọ ẹn. 22  Enẹwutu, yé kanhose Jehovah+ dọmọ: “Be dawe lọ ko wá file ya?” Jehovah sọ gblọn dọmọ: “Ewọ niyẹn to finẹ bo to ede whlá do agbàn lẹ ṣẹnṣẹn.” 23  Yé sọ họ̀nwezun yì bo plan ẹn wá sọn finẹ. To whenue e ṣite to gbẹtọ lọ lẹ ṣẹnṣẹn, e dite hú mẹhe pò lẹpo sọn abọ́ ji yiaga.+ 24  Samuẹli dọna gbẹtọ lọ lẹpo dọmọ: “Be mì mọ mẹhe Jehovah ko de lọ,+ dọ ewọ nkọ ma pé awe to akọta lọ pete mẹ ya?” Gbẹtọ lọ lẹpo sọ jẹ awhádo ji dọmọ: “Gbẹ̀gaa na ahọlu!” 25  Samuẹli sọ dọhona gbẹtọ lọ lẹ gando jlọjẹ ahọlu lẹ tọn go+ bo kàn ẹn do owe de mẹ bosọ ze e dai to Jehovah nukọn. Enẹgodo, Samuẹli do gbẹtọ lọ lẹpo hlan, yèdọ mẹdopodopo yì owhé etọn gbè. 26  Sauli lọsu yì owhé etọn gbè to Gibea bọ awhànfuntọ he ahun yetọn yin whinwhàn gbọn Jehovah dali lẹ hodo e. 27  Ṣigba, sunnu nuvọ́nọ delẹ dọmọ: “Nawẹ omẹ enẹ uwọ na whlẹn mí gbọn?”+ Enẹwutu, yé vlẹ ẹ kò bo masọ hẹn nunina depope yì na ẹn.+ Amọ́, ewọ ma kẹnù.*

Nudọnamẹ Odò Tọn

Kavi “howhinwhẹn.”
Kavi “akọ̀.”
To paa mẹ, “Ewọ sọ taidi unbọpẹnnọ.”