Accessibility setting

De ogbè dopo

Yì hosọ flinflin lẹ ji

Yì todowhinnu hosọ lẹ tọn ji

Yì hosọ lẹ ji

Kunnudetọ Jehovah Tọn Lẹ

Gungbe

Biblu Intẹnẹt Ji Tọn

OWE WIWE LẸ—LẸDOGBEDEVOMẸ AIHỌN YỌYỌ TỌN

1 Samuẹli 1:1-28

NUHE E BẸHẸN LẸ

  • Ẹlkana po asi etọn lẹ po (1-8)

  • Hanna hodẹ̀ bo biọ visunnu de (9-18)

  • Samuẹli yin jiji bo yin nina Jehovah (19-28)

1  Todin, dawe de tin to Lamataimi-zofimi*+ to lẹdo osó tọn Eflaimi tọn mẹ,+ he yinkọ etọn nọ yin Ẹlkana,+ visunnu Jelohami tọn, visunnu Elihu tọn, visunnu Tohu tọn, visunnu Zufi tọn, yèdọ Eflaiminu de.  E tindo asi awe; dopo nọ yin Hanna, bọ awetọ nọ yin Pẹnina. Pẹnina ji ovi lẹ, ṣigba Hanna ma ji ovi depope.  Dawe lọ nọ hẹji sọn tòdaho etọn mẹ yì Ṣilo to whemẹwhemẹ nado basi sinsẹ̀n* bosọ sanvọ́ hlan Jehovah awhànpa lẹ tọn.+ Finẹ wẹ visunnu Eli tọn awe lẹ, yèdọ Họfini po Finehasi po,+ nọ wà sinsẹ̀nzọn te taidi yẹwhenọ lẹ na Jehovah.+  To gbèdopo, whenue Ẹlkana ko sanvọ́, e na adà delẹ asi ẹ Pẹnina gọna visunnu po viyọnnu he ewọ ji na ẹn lẹpo po,+  ṣigba e na adà vonọtaun de Hanna, na Hanna wẹ e yiwanna; amọ́ Jehovah ma ko na ovi de yọnnu ehe.*  Humọ, asisi etọn nọ to vivlẹ ẹ kò mapote nado doadihomẹna ẹn, na Jehovah ma ko na ẹn ovi de wutu.  Mọ wẹ e nọ basi do to whemẹwhemẹ; whedepopenu he Hanna hẹji yì ohọ̀ Jehovah tọn mẹ,+ asisi etọn nọ vlẹ ẹ kò sọmọ bọ e nọ to avivi bo ma nọ dùnú.  Ṣigba, Ẹlkana asu etọn dọna ẹn dọmọ: “Hanna, naegbọn a do to avivi, podọ naegbọn a do gbẹ́ núdù, podọ naegbọn a do to awubla sọmọ?* Be n’ma pọnte hú visunnu ao na we ya?”  Whenẹnu, Hanna fọnṣite to whenue yé ko dù bo nù to Ṣilo fó godo. To ojlẹ lọ mẹ, Eli yẹwhenọ lọ sinai do azinpo he to dòtin ohọ̀n tẹmpli*+ Jehovah tọn lọ tọn kọ̀n ji. 10  Hanna gọ́ na awubla sinsinyẹn,* bosọ jẹ dẹ̀ho hlan Jehovah ji+ bo to avivi mapote. 11  E sọ dopà dọmọ: “Jehovah awhànpa lẹ tọn E, eyin hiẹ pọ́n yajiji devizọnwatọ towe tọn hlan bo flin mi bọ a ma wọn devizọnwatọ towe bo na visunnu de devizọnwatọ towe,+ yẹn na yí i na Jehovah to gbẹzan etọn lẹpo mẹ, bọ oda etọn ma na yin pipà gbede.”+ 12  Dile e to dẹ̀ho na ojlẹ dindẹn to Jehovah nukọn, Eli to onù etọn pọ́n. 13  Hanna to hodọ to ahun edetiti tọn mẹ, bọ nùflo etọn lẹ kẹdẹ wẹ to whinwhàn, ṣigba ogbè etọn ma to yinyin sisè. Enẹwutu, Eli lẹndọ ahàn wẹ e nùmú. 14  Eli sọ dọna ẹn dọmọ: “Nawẹ ahàn he a nùmú na nọ ji we dẹnsọ? Doalọtena ovẹn nùnù.” 15  Enẹwutu, Hanna gblọnna ẹn dọmọ: “Lala, oklunọ ṣie! Ayimajai sinsinyẹn mẹ wẹ n’te;* n’ma nù ovẹn kavi ahàn sinsinyẹn depope, ṣigba nuhe to alindọn* ṣie mẹ lẹpo kọ̀n jẹgbonu wẹ n’te to Jehovah nukọn.+ 16  A pọ́n devizọnwatọ towe hlan di yọnnu nuvọ́nọ de blo, na awufiẹsa sinsinyẹn po flumẹjijẹ ṣie po mẹ wẹ n’to hodọ sọn kakajẹ din.” 17  Whenẹnu, Eli gblọn dọmọ: “Yì to jijọho mẹ, podọ na Jiwheyẹwhe Islaeli tọn ni na we nuhe a to bibiọ ẹ.”+ 18  Yọnnu lọ sọ gblọn dọmọ: “Gbọ nukundagbe towe ni tin to devizọnwatọ towe ji.” E sọ dedo bo dùnú bọ nukunmẹ etọn masọ kúṣiọ ba. 19  Enẹgodo, yé fọ́n to afọnnu fuu bo dẹ́ do odò to Jehovah nukọn bosọ lẹkọyi owhé yetọn gbè to Lama.+ Ẹlkana sọ tindo kọndopọ zanhẹmẹ tọn hẹ asi etọn Hanna, bọ Jehovah na ayidonugo* yọnnu lọ.+ 20  To owhe dopo gblamẹ,* Hanna mọhò bo ji visunnu de bosọ ylọ oyín etọn+ dọ Samuẹli,* na e dọ dọ, “Jehovah dè wẹ n’biọ ẹ sọn.” 21  To nukọn mẹ, Ẹlkana hẹji yì po whédo etọn lẹpo po nado yì basi avọ́sinsan whemẹwhemẹ tọn hlan Jehovah+ podọ nado basi avọ́nunina pàdido tọn etọn. 22  Ṣigba, Hanna ma hẹji yì,+ na e dọna asu etọn dọmọ: “Tlolo he visunnu lọ na deanọ́, n’na ze e yì; whenẹnu e na sọawuhia to Jehovah nukọn bo nasọ gbọṣi finẹ tẹgbẹ.”+ 23  Ẹlkana asu etọn sọ dọna ẹn dọmọ: “Wà nuhe a mọdọ e sọgbe.* Nọ ai kakajẹ whenue a na deanọ́na ẹn. Na Jehovah ni hẹn nuhe a ko dọ lẹ ṣẹ.” Gbọnmọ dali, yọnnu lọ nọ ai bo penukundo visunnu etọn go kakajẹ whenue e deanọ́na ẹn. 24  Tlolo he e deanọ́na ẹn, e ze e yì Ṣilo, bo hẹn oyìnsú owhe atọ̀n mẹ tọn dopo, linfin ojlẹnu efa tọn dopo,* ovẹn ozẹ́n daho dopo+ wá ohọ̀ Jehovah tọn mẹ to Ṣilo,+ bosọ hẹn visunnu pẹvi lọ lọsu yì. 25  Whenẹnu, yé hù oyìnsú lọ bo hẹn visunnu lọ wá Eli dè. 26  Yọnnu lọ sọ dọna ẹn dọmọ: “Jaale, oklunọ ṣie! Dile e họnwun dọ hiẹ togbẹ̀,* oklunọ ṣie, yẹn wẹ yin yọnnu lọ he ṣite hẹ we tofi nado hodẹ̀ hlan Jehovah.+ 27  Visunnu ehe wẹ n’biọ to odẹ̀ lọ mẹ, Jehovah ko sọ na mi nuhe n’biọ ẹ.+ 28  Todin, yẹnlọsu to whiwhé e na Jehovah. E ko yin whiwhé na Jehovah to gbẹzan etọn lẹpo mẹ.” Dawe lọ* sọ dẹ́ do odò na Jehovah to finẹ.

Nudọnamẹ Odò Tọn

Kavi “to Lama, yèdọ Zufinu de.”
Kavi “dẹ́ do odò.”
To paa mẹ, “Jehovah ko sú vidọ̀ yọnnu ehe tọn.”
Kavi “naegbọn ahun towe do to awufiẹsa mẹ?”
Enẹ wẹ, gòhọtúntún.
Kavi “Alindọn Hanna tọn to awufiẹsa mẹ.”
Kavi “Yọnnu he gbigbọ etọn to awusinyẹn mẹ de wẹ yẹn.”
Pọ́n Zẹm.
To paa mẹ, “flin.”
Kavi vlavo, “To ojlẹ sisọ mẹ.”
Zẹẹmẹdo “Oyín Jiwheyẹwhe Tọn.”
To paa mẹ, “nuhe yọ́n to nukun towe mẹ.”
Nudi L 22. Pọ́n Nud. B14.
Kavi “Gbọn ogbẹ̀ alindọn towe tọn dali.”
E họnwun dọ ehe to alọdlẹndo Ẹlkana.