Accessibility setting

De ogbè dopo

Yì hosọ flinflin lẹ ji

Yì todowhinnu hosọ lẹ tọn ji

Yì hosọ lẹ ji

Kunnudetọ Jehovah Tọn Lẹ

Gungbe

Biblu Intẹnẹt Ji Tọn

OWE WIWE LẸ—LẸDOGBEDEVOMẸ AIHỌN YỌYỌ TỌN

1 Otànnugbo lẹ 28:1-21

NUHE E BẸHẸN LẸ

  • Anademẹ Davidi tọn lẹ na tẹmpli lọ gbigbá (1-8)

  • Anademẹ lẹ na Sọlomọni; yẹdide ohọ̀ lọ tọn (9-21)

28  Davidi sọ bẹ ahọvi Islaeli tọn lẹpo pli do Jelusalẹm: yèdọ ahọvi hẹnnu lẹ tọn lẹ, ogán pipli voovo+ he nọ yilizọn na ahọlu tọn lẹ, ogán omẹ fọtọ́n lẹ tọn lẹ po ogán omẹ kanweko lẹ tọn lẹ po,+ ogán he nọ penukundo nutindo gọna kanlin-yinyin ahọlu+ po visunnu etọn lẹ+ po tọn go lẹ, to pọmẹ hẹ ahọluzọnwatọ họ̀nmẹ tọn lẹ po sunnu huhlọnnọ podọ nugopetọ lẹpo po.+  Ahọlu Davidi sọ fọnṣite bo dọmọ: “Mì dotó mi, mì nọvisunnu ṣie lẹ po omẹ ṣie lẹ po emi. Yẹn jlo sọn ahun mẹ wá nado gbá ohọ̀ de taidi gbọjẹtẹn de na apotin alẹnu tọn Jehovah tọn podọ taidi tokloafọligbe Jiwheyẹwhe mítọn tọn,+ n’ko sọ wleawudai nado gbá ohọ̀ lọ.+  Ṣigba, Jiwheyẹwhe nugbo lọ dọna mi dọ, ‘Hiẹ ma na gbá ohọ̀ de na oyín ṣie,+ na sunnu awhànfuntọ de wẹ hiẹ, bọ a ko sọ̀n ohùn dai.’+  Amọ́, Jehovah Jiwheyẹwhe Islaeli tọn de mi to whédo otọ́ ṣie tọn pete mẹ nado lẹzun ahọlu do Islaeli ji kakadoi,+ na Juda wẹ ewọ de taidi nukọntọ,+ podọ sọn whédo Juda tọn mẹ, whédo otọ́ ṣie tọn,+ podọ sọn visunnu otọ́ ṣie tọn lẹ mẹ, yẹn wẹ ewọ kẹalọyi nado yí mi do doahọlu do Islaeli pete ji.+  Podọ to visunnu ṣie lẹpo mẹ—na Jehovah ko na mi visunnu susu+—visunnu ṣie Sọlomọni wẹ ewọ de+ nado sinai do ofìn gandudu tọn Jehovah tọn ji bo deanana Islaeli.+  “E sọ dọna mi dọ, ‘Visunnu towe Sọlomọni wẹ na gbá ohọ̀ ṣie po awánu ṣie lẹ po, na yẹn ko de ewọ taidi visunnu ṣie, yẹn nasọ lẹzun otọ́ etọn.+  Yẹn na hẹn gandudu etọn lodo gligli kakadoi+ eyin ewọ nọ yí nujikudo do payi gbedide po nudide whẹdida tọn ṣie lẹ po go,+ dile e to wiwà do todin.’  Enẹwutu wẹ yẹn do dọ to nukun omẹ Islaeli tọn lẹ, yèdọ agun Jehovah tọn pete tọn mẹ podọ to Jiwheyẹwhe mítọn nukọn dọmọ: Mì yí sọwhiwhe do dín gbedide Jehovah Jiwheyẹwhe mìtọn tọn lẹpo bo nọ setonuna yé, na aigba dagbe lọ nido yin mìtọn+ bọ mì na wá jo e na ovi mìtọn lẹ taidi ogú tẹgbẹ tọn de.  “Podọ hiẹ, Sọlomọni visunnu ṣie, hiẹ ni yọ́n Jiwheyẹwhe otọ́ towe tọn bo nọ yí ahun pipé*+ po alindọn* he gọ́ na awuvivi* de po do sẹ̀n ẹn, na Jehovah nọ dindona ahun lẹpo+ bo nọ mọnú jẹ ayilinlẹn ayiha mẹ tọn lẹpo mẹ.+ Eyin hiẹ dín in, ewọ na dike bọ hiẹ na mọ ẹn,+ ṣigba eyin a jo e do, ewọ na gbẹ́ we dai kakadoi.+ 10  Todin, payi, na Jehovah ko de we nado gbá ohọ̀ de taidi fiwiwe. Gboadọ bo jẹ azọ́n ji.” 11  Enẹgodo, Davidi ze yẹdide+ atọ̀họ̀+ lọ po họ̀nù voovo lẹ po tọn na visunnu etọn Sọlomọni, gọna yẹdide agbànhọ lẹ, abò aga tọn lẹ, abò homẹ tọn lẹ po ohọ̀ he mẹ nùsu oyẹsu tọn+ lọ nọ nọ̀* po tọn. 12  E ze yẹdide nuhe ko yin didohia ẹ to gbọdo glọ* lẹpo tọn na ẹn na nuhe dù awánu+ ohọ̀ Jehovah tọn lọ tọn lẹ, abò núdùdù tọn he lẹdo e pé lẹpo, adọkunnu sẹdotẹn ohọ̀ Jiwheyẹwhe nugbo lọ tọn tọn lẹ, gọna adọkunnu sẹdotẹn nuhe yin hinhẹn zun wiwe* lẹ tọn lẹ;+ 13  podọ na nuhe dù pipli yẹwhenọ+ lẹ po Levinu lẹ po tọn lẹ, azọngban he sinsẹ̀nzọnwiwa to ohọ̀ Jehovah tọn mẹ bẹhẹn lẹpo po nuyizan he yè do nọ wadevizọn to ohọ̀ Jehovah tọn mẹ lẹpo po; 14  gọna zínpinpẹn sika lọ tọn, nuyizan sika tọn he yè do nọ wadevizọn voovo lẹpo tọn, zínpinpẹn nuyizan fataka tọn lẹpo tọn po nuyizan he yè do nọ wadevizọn voovo lẹpo po; 15  podọ zínpinpẹn miyọ́ngbán-tin sika tọn+ lẹ po miyọ́ngbán sika tọn yetọn lẹ po tọn, zínpinpẹn miyọ́ngbán-tin voovo lẹ po miyọ́ngbán yetọn lẹ po tọn, gọna zínpinpẹn miyọ́ngbán-tin fataka tọn lẹ tọn, yèdọ na miyọ́ngbán-tin dopodopo po miyọ́ngbán etọn lẹ po sọgbe hẹ yizan etọn; 16  podọ zínpinpẹn sika lọ tọn na tafo he ji akla nọ yin tito do gọnu-gọnu* lẹ,+ yèdọ na tafo dopodopo, gọna fataka lọ na tafo fataka tọn lẹ, 17  na ṣivi-fẹ̀nnọ lẹ, agbán lẹ, tọ̀zẹ́n sika akú tọn lẹ, podọ zínpinpẹn agbán sika tọn+ pẹvi lọ lẹ tọn, yèdọ na agbán pẹvi dopodopo, gọna zínpinpẹn agbán fataka tọn pẹvi lọ lẹ tọn, yèdọ na agbán pẹvi dopodopo. 18  E sọ na zínpinpẹn sika kinkọ̀n lọ tọn na agbà nuyọnwan tọn+ lọ podọ na apajlẹ osọ́-kẹkẹ tọn lọ,+ enẹ wẹ kelubimi+ sika tọn lọ lẹ he dlẹn awà yetọn ṣinyọ́n apotin alẹnu tọn Jehovah tọn ji. 19  Davidi dọmọ: “Alọ Jehovah tọn tin to ji e, bọ e na mi zinzin nado kàn nudọnamẹ gigọ́ dai gando yẹdide+ lọ go.”+ 20  Whenẹnu wẹ Davidi dọna visunnu etọn Sọlomọni dọmọ: “Yin adọgbotọ bo yin huhlọnnọ bosọ jẹ azọ́n ji. A dibu kavi dike ahun towe gbàdo blo, na Jehovah Jiwheyẹwhe, yèdọ Jiwheyẹwhe ṣie tin hẹ we.+ Ewọ ma na gbẹ́ we dai kavi jo we do,+ ṣigba e na tin hẹ we kaka azọ́n he gando ohọ̀ Jehovah tọn go lọ lẹpo nado yin wiwà fó. 21  Podọ pipli yẹwhenọ+ lẹ po Levinu+ lẹ po tọn lẹ die na sinsẹ̀nzọn he dona yin wiwà to ohọ̀ Jiwheyẹwhe nugbo lọ tọn mẹ lẹpo. Azọ́nyọnẹntọ ojlo dagbenọ lẹ tin-to-aimẹ na we nado wazọ́n wunmẹ lẹpo,+ podọ ahọvi+ lẹ po gbẹtọ lọ lẹpo po tin to finẹ nado wà nudepope he a na degbe etọn.”

Nudọnamẹ Odò Tọn

Kavi “bo nọ yí mẹdezejo mlẹnmlẹn.”
Pọ́n Zẹm.
Kavi “ojlo.”
Kavi “ohọ̀ ovẹsè tọn lọ.”
To paa mẹ, “gbọn gbigbọ dali.”
Kavi “nuhe yin kinklandowiwe.”
Enẹ wẹ, akla sọhia tọn.