Yì hosọ lẹ ji

Yì hosọ flinflin lẹ ji

Yì todowhinnu hosọ lẹ tọn ji

Kunnudetọ Jehovah Tọn Lẹ

Gungbe

Biblu Intẹnẹt Ji Tọn | OWE WIWE LẸ—LẸDOGBEDEVOMẸ AIHỌN YỌYỌ TỌN

1 Otànnugbo lẹ 21:1-30

NUHE E BẸHẸN LẸ

  • Mẹhihia Davidi tọn he ma sọgbe (1-6)

  • Yasanamẹ sọn Jehovah dè (7-17)

  • Davidi do agbà de (18-30)

21  To whenẹnu, Satani* fọ́n do Islaeli ji bo hẹn Davidi nado hia omẹ Islaeli tọn lẹ.+  Enẹwutu, Davidi dọna Joabi+ po awhàngán gbẹtọ lọ lẹ tọn lẹ po dọmọ: “Mì yì, bo hia omẹ Islaeli tọn lẹ, sọn Beẹli-ṣeba kaka yì Dani;+ enẹgodo mì hẹn linlin wá na mi, na yẹn nido yọ́n sọha yetọn.”  Ṣigba, Joabi dọmọ: “Na Jehovah ni hẹn omẹ etọn lẹ jideji whla 100! Oklunọ ṣie ahọlu E, be yemẹpo ma ko yin devizọnwatọ oklunọ ṣie tọn lẹ ya? Naegbọn oklunọ ṣie do jlo na wà ehe? Naegbọn ewọ nado hẹn whẹhuhu wá Islaeli ji?”  Ṣigba, ohó ahọlu tọn duto Joabi ji. Enẹwutu, Joabi tọ́nyi bo zingbejizọnlin gbọn Islaeli pete, enẹgodo e lẹkọwa Jelusalẹm.+  Joabi sọ dọ sọha gbẹtọ he yin linlẹn dopọ lọ lẹ tọn na Davidi. Sọha sunnu Islaeli tọn lẹpo he nọ hẹn ohí lẹ tọn yin 1 100 000 bọ sunnu Juda tọn he nọ hẹn ohí lẹ tọn yin 470 000.+  Ṣigba, yinkọ Levi po Bẹnjamini po tọn ma yin titodohukanji,+ na ohó ahọlu tọn ylan to nukun Joabi tọn mẹ wutu.+  Todin, ehe vẹna Jiwheyẹwhe nugbo lọ taun bọ e sayana Islaeli.  Whenẹnu, Davidi dọna Jiwheyẹwhe nugbo lọ dọmọ: “N’ko waylando+ sinsinyẹn gbọn ehe wiwà dali. Podọ todin, jaale bo jo nuṣiwa devizọnwatọ towe tọn na ẹn,+ na yẹn ko yinuwa po nulú po tlala.”+  Jehovah sọ dọhona Gad,+ yèdọ numọtọ Davidi tọn dọmọ: 10  “Yì, bo dọna Davidi dọ, ‘Nuhe Jehovah dọ die: “N’to onú atọ̀n zedonukọnna we. Hiẹ lọsu ni de dehe n’na hẹnwa ji we.”’” 11  Enẹwutu, Gad biọ họmẹ yì Davidi dè bo dọna ẹn dọmọ: “Nuhe Jehovah dọ die, ‘De dehe a jlo, 12  vlavo huvẹ ni tọ́n to aigba lọ ji na owhe atọ̀n,+ kavi mẹgbeyantọ towe lẹ ni to duduto ji we na osun atọ̀n dile ohí kẹntọ towe lẹ tọn na plá we,+ kavi ohí Jehovah tọn—yèdọ azọ̀nylankan ni tin to aigba lọ ji+—bọ angẹli Jehovah tọn na hẹn nugbajẹmẹji wá+ aigba Islaeli tọn lẹpo ji na azán atọ̀n.’ Todin, lẹnnupọndo nuhe n’na gblọnna Mẹhe do mi hlan lọ ji.” 13  Enẹwutu, Davidi dọna Gad dọmọ: “Yẹn jẹflumẹ taun. Jaale, gbọ ma jai jẹ alọ Jehovah tọn mẹ, na lẹblanu etọn klo taun;+ amọ́ a dike n’jai jẹ alọ gbẹtọ tọn mẹ blo.”+ 14  Whenẹnu, Jehovah hẹn azọ̀nylankan de wá+ Islaeli ji sọmọ bọ gbẹtọ 70 000 kú sọn omẹ Islaeli tọn lẹ mẹ.+ 15  Humọ, Jiwheyẹwhe nugbo lọ do angẹli de hlan Jelusalẹm nado và ẹ sudo; ṣigba whẹpo e nido wàmọ, Jehovah mọ bo diọlinlẹn* gando nugbajẹmẹji lọ go+ bosọ dọna angẹli he to husudo hẹnwa lọ dọmọ: “E pé!+ Todin, alọ towe ni yìdo.” Angẹli Jehovah tọn to ote sẹpọ likun-flétẹn Olnani+ Jẹbusinu+ lọ tọn to whenẹnu. 16  Whenue Davidi ze nukun daga, e mọ angẹli Jehovah tọn lọ to ote to aigba po olọn po ṣẹnṣẹn bọ ohí he yin dindọn sún+ de to alọ etọn mẹ bo yin dindlẹn do Jelusalẹm ji. Davidi po mẹho lẹ po ṣinyọ́n nukunmẹ ai to afọdopolọji to odẹ́vọ̀+ mẹ.+ 17  Davidi sọ dọna Jiwheyẹwhe nugbo lọ dọmọ: “Be e ma yin yẹn wẹ biọ dọ gbẹtọ lọ lẹ ni yin hihia ya? Yẹn wẹ waylando, yẹn wẹ sọ ṣinuwa;+ amọ́ lẹngbọ ehelẹ—etẹwẹ yewlẹ wà? Jehovah Jiwheyẹwhe ṣie E, jaale, gbọ alọ towe ni yinuwa sọta yẹn po whédo otọ́ ṣie tọn po; amọ́ a hẹn azọ̀nylankan ehe wá omẹ towe lẹ ji blo.”+ 18  Angẹli Jehovah tọn sọ dowẹn Gad+ nado yì dọna Davidi dọ ewọ ni hẹji yì bo do agbà de na Jehovah to likun-flétẹn Olnani Jẹbusinu lọ tọn.+ 19  Davidi sọ hẹji dedo sọgbe hẹ ohó Gad tọn, ehe e ko dọ to oyín Jehovah tọn mẹ. 20  To ojlẹ enẹ mẹ, Olnani lilẹ́ bo mọ angẹli lọ, visunnu etọn ẹnẹ he to e dè lẹ sọ ze yede whlá. Likun tùn wẹ Olnani te to whenẹnu. 21  Whenue Davidi hẹji ja e dè, Olnani dekọ bo mọ Davidi, e sọ tọ́njẹgbonu sọn likun-flétẹn lọ to afọdopolọji bo dẹ́ do odò pete na Davidi. 22  Davidi dọna Olnani dọmọ: “Sà* fie likun-flétẹn towe te na mi, na yẹn nido do agbà de na Jehovah do finẹ. Akuẹ pipé wẹ hiẹ nido sà ẹ na mi, na azọ̀nylankan he wá gbẹtọ lẹ ji lọ nido doalọte.”+ 23  Ṣigba, Olnani dọna Davidi dọmọ: “Yí i di towe titi bo gbọ oklunọ ṣie ahọlu ni wà nuhe yọ́n to nukun etọn mẹ. Oyìn lẹ die na avọ́nunina mimẹ̀ lọ lẹ, nuyizan jinukun fiflé tọn+ lọ die taidi nake, podọ likun lẹ die taidi avọ́nunina jinukun-lili tọn. N’na ehe lẹpo.” 24  Ṣigba, Ahọlu Davidi dọna Olnani dọmọ: “Lala, n’dona yí akuẹ pipé do họ̀ ẹ, na yẹn ma na yí nuhe yin towe bo na Jehovah kavi basi avọ́sinsan mimẹ̀ lẹ vọnu gba.”+ 25  Enẹwutu, Davidi jlẹ ṣekẹli* sika tọn 600 na Olnani nado họ̀ filọ. 26  Davidi sọ do agbà de+ do finẹ na Jehovah bo basi avọ́sinsan mimẹ̀ lẹ po avọ́sinsan jijọho tọn lẹ po, bosọ dawhá ylọ Jehovah, bọ ewọ siọ todin gbọn miyọ́n didohlan+ agbà avọ́nunina mimẹ̀ tọn lọ ji sọn olọn mẹ dali. 27  Whenẹnu, Jehovah degbena angẹli+ lọ nado gọ̀ ohí etọn do apà mẹ. 28  To ojlẹ enẹ mẹ, whenue Davidi mọdọ Jehovah ko sè ovẹ̀ etọn to likun-flétẹn Olnani Jẹbusinu lọ tọn, e zindonukọn nado nọ basi avọ́sinsan to finẹ. 29  Etomọṣo, gòhọtúntún Jehovah tọn he Mose ko basi to danfafa ji lọ po agbà avọ́nunina mimẹ̀ tọn lọ po tin to ofi yiaga he to Gibeọni+ lọ to whenẹnu. 30  Ṣigba, Davidi ma ko penugo nado yì nukọn etọn nado kanhose Jiwheyẹwhe, na ohí angẹli Jehovah tọn lọ tọn dobuna ẹn tlala wutu.

Nudọnamẹ Odò Tọn

Kavi vlavo, “avùnnukundiọsọmẹtọ de.”
Kavi “bọ e vẹna ẹn.”
To paa mẹ, “Na.”
Ṣekẹli dopo sọzẹn hẹ g 11,4. Pọ́n Nud. B14.