Yì hosọ lẹ ji

Yì hosọ flinflin lẹ ji

Yì todowhinnu hosọ lẹ tọn ji

Kunnudetọ Jehovah Tọn Lẹ

Gungbe

Biblu Intẹnẹt Ji Tọn | OWE WIWE LẸ—LẸDOGBEDEVOMẸ AIHỌN YỌYỌ TỌN

1 Otànnugbo lẹ 17:1-27

NUHE E BẸHẸN LẸ

  • Davidi ma na gbá tẹmpli lọ (1-6)

  • Alẹnu hẹ Davidi na ahọluduta de (7-15)

  • Odẹ̀ pẹdido tọn Davidi tọn (16-27)

17  Tlolo he Davidi ko jẹ owhé* etọn titi gbè, e dọna Natani+ yẹwhegán lọ dọmọ: “Yẹn die nọ nọ̀ ohọ̀ he yè yí kedali+ do gbá de mẹ bọ apotin alẹnu tọn Jehovah tọn ka tin to gòhọ he yè yí avọ̀ do basi de mẹ.”+  Natani sọ gblọnna Davidi dọmọ: “Wà nudepope he tin to ahun towe mẹ, na Jiwheyẹwhe nugbo lọ tin hẹ we.”  To ozán enẹ mẹ, ohó Jiwheyẹwhe tọn wá Natani dè dọmọ:  “Yì bo dọna devizọnwatọ ṣie Davidi dọ, ‘Nuhe Jehovah dọ die: “E ma yin hiẹ wẹ na gbá ohọ̀ de na mi nado nọ nọ̀ e mẹ.+  Na sọn azán he gbè n’plan Islaeli jẹgbonu kakajẹ egbé, yẹn ma ko nọ ohọ̀ de mẹ pọ́n, ṣigba yìyì pé wẹ n’nọ te sọn gòhọ de mẹ jẹ gòhọ de mẹ podọ sọn gòhọtúntún de mẹ jẹ devo mẹ.*+  To ojlẹ he mẹ n’to yìyì pé hẹ omẹ Islaeli tọn lẹpo lọ pete gblamẹ, be n’ko dọna depope to whẹdatọ Islaeli tọn he n’de nado nọ yìn omẹ ṣie lẹ mẹ pọ́n dọ, ‘Naegbọn mìwlẹ ma do gbá ohọ̀ he yè yí kedali do basi de na mi?’”’  “Todin, dọna devizọnwatọ ṣie Davidi dọ, ‘Nuhe Jehovah awhànpa lẹ tọn dọ die: “Kanlindugbo mẹ wẹ n’plan we sọn, yèdọ sọn hihodo lẹngbọpa lọ mẹ, nado wá lẹzun nukọntọ na Islaeli omẹ ṣie lẹ.+  Yẹn na tin hẹ we to fidepope he hiẹ na yì,+ yẹn nasọ de* kẹntọ towe lẹpo sẹ̀ sọn nukọn towe;+ podọ yẹn na basi oyín de na we taidi oyín sunnu nukundeji he tin to aigba ji lẹ tọn.+  Yẹn na de nọtẹn de na Islaeli omẹ ṣie lẹ bo na hẹn yé nado nọ nọ̀ finẹ, yé nasọ nọ nọ̀ finẹ bọ mẹde ma na nọ dotukla yé ba; podọ mẹylankan lẹ ma na nọ gbidikọna* yé dile yé ko basi wayi do ba,+ 10  yèdọ sọn azán he gbè n’ko de whẹdatọ lẹ do Islaeli omẹ ṣie lẹ ji.+ Yẹn nasọ gbawhàn kẹntọ towe lẹpo tọn.+ Humọ, yẹn dọna we dọ, ‘Jehovah na gbá owhé* de na we.’ 11  “‘“Whenue azán towe lẹ na ko wá vivọnu bọ hiẹ na ko mlọnai hẹ tọgbo towe lẹ, yẹn na ze kúnkan* towe daga to godo towe, yèdọ dopo to visunnu towe lẹ mẹ,+ bọ yẹn na hẹn gandudu etọn lodo gligli.+ 12  Ewọ wẹ na gbá ohọ̀ de na mi,+ bọ yẹn na hẹn ofìn etọn lodo gligli kakadoi.+ 13  Yẹn na lẹzun otọ́ etọn bọ ewọ na lẹzun visunnu ṣie.+ Yẹn ma na yí owanyi nugbo ṣie sọn ewọ si+ dile yẹn yí i sọn mẹhe jẹnukọnna we lọ si do.+ 14  Yẹn na hẹn ẹn nado nọte to owhé ṣie gbè podọ to gánzinpo ṣie ji kakadoi,+ ofìn etọn nasọ gbọṣi aimẹ kakadoi.”’”+ 15  Natani sọ dọ onú ehe lẹpo po numimọ ehe pete po na Davidi. 16  Whenẹnu, Ahọlu Davidi wá bo sinai to Jehovah nukọn bosọ dọmọ: “Jehovah Jiwheyẹwhe E, mẹnu wẹ yẹn? Podọ etẹwẹ whédo ṣie yin bọ hiẹ do hẹn mi kaka wáfi?+ 17  Podọ taidi dọ enẹ ma ko pé wẹ nkọ, Jiwheyẹwhe E, hiẹ sọ dọho gando whédo devizọnwatọ towe tọn go hlan sọgodo dindẹn de,+ podọ Jehovah Jiwheyẹwhe E, hiẹ ko sọ pọ́n mi hlan taidi dọ mẹhe dona yin zizedaga humọ* de wẹ yẹn yin nkọ. 18  Etẹwẹ devizọnwatọ towe Davidi sọgan sọ dọna we din gando gbégbò he ko yin nina mi go, to whenuena e yindọ hiẹ ko yọ́n devizọnwatọ towe sọmọ?+ 19  Jehovah E, hiẹ ko wà onú daho ehe lẹpo gbọn kiklo-yinyin towe didohia dali, na devizọnwatọ towe tọn wutu podọ to gbesisọ mẹ hẹ ahun towe.*+ 20  Jehovah E, mẹde ma tin di hiẹ+ podọ Jiwheyẹwhe devo de ma tin adavo hiẹ;+ nuhe otó mítọn ko sè lẹpo wẹ do ehe hia. 21  Podọ akọta devo tẹwẹ to aigba ji he taidi Islaeli omẹ towe lẹ?+ Jiwheyẹwhe nugbo lọ yì bo fli yé gọ̀ taidi omẹ etọn lẹ.+ Hiẹ basi oyín de na dewe gbọn onú daho po nujiawu lẹ po wiwà dali,+ bo yàn akọta lẹ sẹ̀ sọn omẹ towe+ he hiẹ fligọ sọn Egipti lẹ nukọn. 22  Hiẹ yí Islaeli omẹ towe lẹ do basi akọta towe titi kakadoi;+ podọ hiẹ Jehovah E, hiẹ ko lẹzun Jiwheyẹwhe yetọn.+ 23  Todin, Jehovah E, na opagbe he a ko do gando devizọnwatọ towe po whédo etọn po go lọ ni mọ hẹndi kakadoi, na hiẹ nisọ basi kẹdẹdile a ko dopagbe etọn do.+ 24  Na oyín towe ni gbọṣi aimẹ* bo yin zizedaga+ kakadoi, na gbẹtọ lẹ nido nọ dọ dọ, ‘Jehovah awhànpa lẹ tọn, yèdọ Jiwheyẹwhe Islaeli tọn, wẹ Jiwheyẹwhe do Islaeli ji,’ podọ na whédo devizọnwatọ towe Davidi tọn ni yin hinhẹn lodo gligli to nukọn towe.+ 25  Na hiẹ, Jiwheyẹwhe ṣie E, a ko de lẹndai towe hia devizọnwatọ towe nado gbá owhé* de na ẹn. Enẹ wẹ zọ́n bọ devizọnwatọ towe do tindo jidide nado hò odẹ̀ ehe hlan we. 26  Todin, Jehovah E, hiẹ wẹ Jiwheyẹwhe nugbo lọ, podọ hiẹ ko dopagbe nudagbe ehelẹ tọn gando devizọnwatọ towe go. 27  Enẹwutu, na e ni yin homẹhunnu de na we nado dona whédo devizọnwatọ towe tọn, podọ e ni zindonukọn kakadoi to nukọn towe, na hiẹ Jehovah E, a ko dona bọ e nasọ yin didona kakadoi.”

Nudọnamẹ Odò Tọn

Kavi “họ̀nmẹ.”
Vlavo zẹẹmẹdo “sọn otẹn gòhọ tọn de mẹ jẹ devo mẹ podọ sọn fininọ de jẹ devo.”
To paa mẹ, “sán.”
To paa mẹ, “hẹn nuṣikọna.”
Kavi “hukan gandudu tọn.”
To paa mẹ, “okún.”
Kavi “taidi dọ mẹhe tin to otẹn he yiaga mẹ.”
Kavi “sọgbe hẹ ojlo towe.”
Kavi “ni yin nugbonọ.”
Kavi “hukan gandudu tọn.”