Accessibility setting

De ogbè dopo

Yì hosọ flinflin lẹ ji

Yì todowhinnu hosọ lẹ tọn ji

Yì hosọ lẹ ji

Kunnudetọ Jehovah Tọn Lẹ

Gungbe

Biblu Intẹnẹt Ji Tọn

OWE WIWE LẸ—LẸDOGBEDEVOMẸ AIHỌN YỌYỌ TỌN

1 Otànnugbo lẹ 12:1-40

NUHE E BẸHẸN LẸ

  • Mẹhe nọgodona gandudu Davidi tọn lẹ (1-40)

12  Ehelẹ wẹ sunnu he wá Davidi dè to Ziklagi+ lẹ, to whenue ewọ ma sọgan sẹtẹn po awuvivo po, na Sauli+ visunnu Kiṣi tọn wutu, yewlẹ sọ tin to awhànfuntọ huhlọnnọ he nọgodona ẹn to awhàn whenu lẹ mẹ.+  Yé nọ hẹn ogá bo penugo nado yí alọ adusi kavi amiyọn+ do dlan zannu po akòtopẹ́ po+ kavi do de ogá. Nọvisunnu Sauli tọn lẹ, yèdọ Bẹnjamininu+ lẹ mẹ wẹ yé wá sọn.  Nukọntọ lọ wẹ Ahiezeli, gọna Joaṣi, yèdọ visunnu Ṣemaa Gibeanu+ lọ tọn lẹ; Jeziẹli po Peleti po he yin visunnu Azmavẹti+ tọn lẹ, Belaka, Jehu Anatọtinu lọ,  Iṣmaia Gibeọninu lọ,+ yèdọ awhànfuntọ huhlọnnọ de he tin to omẹ 30+ lọ lẹ mẹ bosọ yin ogán omẹ 30 lọ lẹ tọn; podọ Jelemia, Jahaziẹli, Johanani, Jozabadi Gedelanu lọ,  Eluzai, Jelimọti, Bealia, Ṣemalia, Ṣefatia Halifinu lọ,  Ẹlkana, Iṣia, Azalẹli, Joẹzeli, podọ Jaṣobeami, Kolanu lẹ;+  Joẹla po Zebadia po he yin visunnu Jelohami he wá sọn Gedọli tọn lẹ.  Delẹ to Gadinu lẹ mẹ hopódona Davidi to figángán he to danfafa ji lọ;+ awhànfuntọ huhlọnnọ he plọn awhàn lẹ wẹ yé bo nọ wleawuna awọ̀yinu po owhán yetọn po dote, nukunmẹ yetọn lẹ sọ taidi kinnikinni lẹ tọn, podọ yé bí-ge di otẹgbọẹ osó ji tọn lẹ.  Ezeli wẹ nukọntọ lọ, Obadia yin omẹ awetọ, Eliabi omẹ atọ̀ntọ, 10  Miṣmana omẹ ẹnẹtọ, Jelemia omẹ atọ́ntọ, 11  Atai omẹ ṣidopotọ, Eliẹli omẹ ṣinawetọ, 12  Johanani omẹ ṣinatọ̀ntọ, Ẹlzabadi omẹ ṣinẹnẹtọ, 13  Jelemia omẹ aotọ, podọ Makbanai omẹ widopotọ. 14  Gadinu+ lẹ wẹ omẹ ehelẹ, yèdọ nukọntọ awhànpa tọn lẹ. Mẹhe ma dohuhlọn to yé mẹ sọgan pehẹ omẹ 100, bọ mẹhe dohuhlọn hugan to yé mẹ sọgan pehẹ omẹ 1 000.+ 15  Sunnu ehelẹ wẹ dasá Jọdani to osun tintan lọ mẹ to whenue e gọfla wá agé, yé sọ yàn mẹhe nọ nọ̀ agbàdo lọ lẹ mẹ lẹpo sẹ̀, yèdọ hlan whèzẹtẹn podọ hlan whèyihọ. 16  Delẹ to sunnu Bẹnjamini tọn lẹ po Juda tọn lẹ po mẹ sọ wá Davidi dè to figángán etọn.+ 17  To whenẹnu, Davidi tọ́nyi yé dè bo dọna yé dọmọ: “Eyin jijọho mẹ wẹ mìwlẹ wá dè e te nado gọalọna mi, ahun ṣie na nọpọ́ hẹ mì. Ṣigba, eyin dide mi hia kẹntọ ṣie lẹ gbé wẹ mì tọ́n, to whenuena e yindọ yẹn ma doalọ to oylan depope mẹ, na Jiwheyẹwhe tọgbo mítọn lẹ tọn ni mọ bo dawhẹ.”+ 18  To whenẹnu, gbigbọ Jiwheyẹwhe tọn wá* Amasai+ he yin nukọntọ omẹ 30 lọ lẹ tọn ji bọ e dọmọ: “Towe wẹ míwlẹ, Davidi E, míwlẹ sọ tin hẹ we, hiẹ visunnu Jẹsse tọn E.+ Jijọho, jijọho ni tin hẹ we, podọ jijọho ni tin hẹ mẹhe to alọgọna we, Na Jiwheyẹwhe towe wẹ to alọgọna we.”+ Enẹwutu, Davidi yí yé bo deazọ́nna yé to nukọntọ awhànfuntọ lọ lẹ tọn lẹ mẹ. 19  Omẹ Manasse tọn delẹ sọ họ̀n wá Davidi dè to whenue e zọnhẹ Filistinu lẹ nado yì funawhàn sọta Sauli; amọ́ e ma gọalọna Filistinu lẹ, na to wedide dopọ godo, ogán Filistinu lẹ tọn lẹ+ lẹkọna ẹn dọmọ: “E na họnyi oklunọ etọn Sauli dè, bọ mí na hẹn ogbẹ̀ mítọn bu.”+ 20  Whenue e yì Ziklagi,+ omẹ ehelẹ wẹ họ̀n wá e dè sọn Manasse: Adnahi, Jozabadi, Jediaẹli, Mikaẹli, Jozabadi, Elihu po Zilẹtai po, yèdọ nukọntọ lẹ na omẹ fọtọ́n Manasse tọn lẹ.+ 21  Yé gọalọna Davidi sọta jaguda-gbẹ́ lọ, na sunnu huhlọnnọ podọ adọgbotọ wẹ yemẹpo,+ yé sọ lẹzun ogán awhànpa lọ tọn lẹ. 22  Egbesọegbesọ wẹ gbẹtọ lẹ to Davidi dè+ wá mapote nado gọalọna ẹn, kaka bọ awhànpa etọn sù taidi awhànpa Jiwheyẹwhe tọn.+ 23  Ehe wẹ sọha nukọntọ mẹhe blagbajana awhàn lẹ tọn, yèdọ mẹhe wá Davidi dè to Heblọni+ nado ze gandudu Sauli tọn jo na ẹn dile Jehovah ko degbe etọn do lẹ.+ 24  Sọha omẹ Juda tọn he nọ hẹn awọ̀yinu daho po owhán po lẹ tọn wẹ omẹ 6 800 he blagbajana awhàn. 25  Mẹhe wá sọn Simeoninu lẹ mẹ wẹ sunnu huhlọnnọ podọ adọgbotọ awhànpa lọ tọn 7 100. 26  Mẹhe wá sọn Levinu lẹ mẹ wẹ omẹ 4 600. 27  Jehoiada+ wẹ yin nukọntọ visunnu Aalọn tọn lẹ+ tọn, omẹ 3 700 sọ tin po e po, 28  gọna Zadọki,+ yèdọ dẹpẹ huhlọnnọ podọ adọgbotọ de, to pọmẹ hẹ ogán 22 sọn whédo otọ́ etọn tọn mẹ. 29  Mẹhe wá sọn Bẹnjamininu lẹ mẹ, yèdọ sọn nọvisunnu Sauli tọn lẹ mẹ+ wẹ omẹ 3 000, bọ suhugan omẹ ehelẹ tọn wẹ ko nọ basi hihọ́na nutindo he to owhé Sauli tọn gbè lẹ dai. 30  Mẹhe wá sọn Eflaiminu lẹ mẹ wẹ sunnu huhlọnnọ podọ adọgbotọ 20 800 he diyin to whédo otọ́ yetọn lẹ tọn mẹ. 31  Mẹhe wá sọn mado-awe hẹnnu Manasse tọn mẹ lẹ wẹ omẹ 18 000 he yin dide sọgbe hẹ yinkọ yetọn nado wá yí Davidi do doahọlu. 32  Mẹhe wá sọn hẹnnu Isakali tọn mẹ lẹ, yèdọ mẹhe tindo wuntuntun nado yọ́n nuhe Islaeli dona nọ wà to ojlẹ dopodopo mẹ lẹ wẹ omẹ 200 sọn nukọntọ yetọn lẹ mẹ, nọvisunnu yetọn he pò lẹpo sọ to anademẹ yetọn glọ. 33  Mẹhe wá sọn hẹnnu Zebuluni tọn mẹ lẹ wẹ omẹ 50 000 he sọgan yì awhàn bo yin tito kannukannu di awhànfuntọ po awhànfunnu yetọn lẹpo po, yemẹpo wẹ kọnawudopọ hẹ Davidi po ahun lẹpo po.* 34  Mẹhe wá sọn hẹnnu Naftali tọn mẹ lẹ wẹ ogán 1 000, omẹ 37 000 sọ tin hẹ yé he nọ hẹn awọ̀yinu daho po owhán po. 35  Mẹhe wá sọn Daninu lẹ mẹ bo yin tito kannukannu di awhànfuntọ lẹ wẹ omẹ 28 600. 36  Podọ mẹhe wá sọn hẹnnu Aṣeli tọn mẹ bo sọgan yì awhàn bo yin tito kannukannu di awhànfuntọ lẹ wẹ omẹ 40 000. 37  Mẹhe wá sọn Jọdani godo,+ yèdọ sọn Leubẹninu lẹ, Gadinu lẹ po mado-awe hẹnnu Manasse tọn po mẹ lẹ wẹ awhànfuntọ 120 000 he nọ hẹn awhànfunnu wunmẹ lẹpo. 38  Omẹ ehe lẹpo wẹ yin sunnu awhànfuntọ lẹ he wleawufo nado yì awhàn; yé wá Heblọni po ahun pipé de po nado yí Davidi do doahọlu do Islaeli pete ji, omẹ Islaeli tọn he pò lẹpo to pọmẹ sọ jlo* nado yí Davidi do doahọlu.+ 39  Yé sọ gbọṣi Davidi dè finẹ na azán atọ̀n, bo to dùdù bosọ to nùnù, na nọvisunnu yetọn lẹ ko wleawudaina yé. 40  Mọdopolọ, mẹhe sẹpọ yé lẹ, podọ etlẹ yin mẹhe dẹn do yé lẹ taidi omẹ Isakali, Zebuluni po Naftali po tọn lẹ nọ hẹn núdùdù wá to kẹtẹkẹtẹ lẹ, kanklosọ́ lẹ, otlò* lẹ po oyìn lẹ po ji—yèdọ núdùdù susugege, enẹ wẹ linfin, akla hìhì ovò sinsẹ́n tọn lẹ, ovẹn po amì po gọna oyìn po lẹngbọ po, na omẹ Islaeli tọn lẹ to ayajẹ mẹ.

Nudọnamẹ Odò Tọn

To paa mẹ, “ṣinyọ́n.”
Kavi “mẹhe kọnawudopọ hẹ Davidi lẹ depope ma yin ayihaawenọ.”
To paa mẹ, “wẹ tindo ahundopo.”
Kanlin de he taidi kẹtẹkẹtẹ bo nọ yin jiji eyin kẹtẹkẹtẹ asu hẹ osọ́ asi.