Accessibility setting

De ogbè dopo

Yì hosọ flinflin lẹ ji

Yì todowhinnu hosọ lẹ tọn ji

Yì hosọ lẹ ji

Kunnudetọ Jehovah Tọn Lẹ

Gungbe

Biblu Intẹnẹt Ji Tọn

OWE WIWE LẸ—LẸDOGBEDEVOMẸ AIHỌN YỌYỌ TỌN

1 Kọlintinu lẹ 9:1-27

NUHE E BẸHẸN LẸ

  • Apajlẹ Paulu tọn taidi apọsteli de (1-27)

    • “Hiẹ ma dona doajànuna oyìnsú de” (9)

    • ‘Dindọn wẹ eyin yẹn ma dọyẹwheho!’ (16)

    • Nado lẹzun nulẹpo na gbẹtọ wunmẹ lẹpo (19-23)

    • Mawazẹjlẹgo to alewezun ogbẹ̀ tọn mẹ (24-27)

9  Be yẹn ma vò nado wà nuhe jlo mi wẹ ya? Be e ma yin apọsteli de wẹ yẹn yin ya? Be yẹn ma ko mọ Jesu Oklunọ mítọn wẹ ya?+ Be e ma yin kọdetọn azọ́n ṣie to Oklunọ mẹ tọn wẹ mìwlẹ yin ya?  Eyin yẹn ma tlẹ yin apọsteli de na mẹdevo lẹ, e họnwun hezeheze dọ yẹn yinmọ na mìwlẹ! Na mìwlẹ wẹ hiadonu he do apọsteli-yinyin ṣie hia to Oklunọ mẹ.  Avùnlọyiyi ṣie hlan mẹhe to dodinna mi lẹ die:  Mí tindo jlọjẹ* nado dù bo nù, kavi e ma yin mọ wẹ?  Mí tindo jlọjẹ nado wlealọ hẹ mẹmẹyọnnu de bo nọ plan ẹn hẹn taidi asi,+ yèdọ kẹdẹdi apọsteli he pò lẹ podọ nọvisunnu Oklunọ tọn lẹ+ po Kefa*+ po, kavi e ma yin mọ wẹ?  Kavi be Balnaba+ po yẹn po kẹdẹ wẹ ma tindo jlọjẹ nado gọ̀n agbasazọ́n ma wà ya?  Awhànfuntọ tẹwẹ tin he nọ penukundo ede go po akuẹ edetiti tọn po? Mẹnu wẹ nọ do vẹngle bo ma nọ dù sinsẹ́n etọn?+ Kavi mẹnu wẹ nọ yìn lẹngbọpa bo ma nọ nù sọn anọ́sin etọn mẹ?  Be pọndohlan gbẹtọ tọn mẹ wẹ yẹn to ehe dọ sọn ya? Kavi be Osẹ́n lọ lọsu ma dọ onú ehelẹ ya?  Na e yin kinkandai to Osẹ́n Mose tọn mẹ dọmọ: “Hiẹ ma dona doajànuna oyìnsú de to whenue e to likun tùn.”+ Be oyìnsú lẹ tọn hòpọn wẹ Jiwheyẹwhe te ya? 10  Kavi na taun tọn, be na míwlẹ tọn wutu wẹ e do dọ ehe ya? Na nugbo tọn, na mítọn wutu wẹ e yin kinkandai, na mẹhe to aigba-jlo po mẹhe to likun tùn po dona wàmọ po todido lọ po nado dù sọn likun lọ lẹ mẹ. 11  Eyin mí ko do onú gbigbọ tọn lẹ to ṣẹnṣẹn mìtọn, be onú daho de wẹ e yin dọ mí ni gbẹ̀n onú agbasa tọn lẹ sọn mì dè ya?+ 12  Eyin mẹdevo lẹ tindo jlọjẹ ehe do mì ji, be míwlẹ ma dona tindo humọ ya? Etomọṣo, míwlẹ ma ko yí jlọjẹ* ehe zan,+ ṣigba mí to akọndona nulẹpo, na mí nikaa glọnalina wẹndagbe he gando Klisti go lọ to aliho depope mẹ.+ 13  Be mì ma yọnẹn dọ mẹhe to azọngban wiwe hẹndi lẹ nọ dù sọn nuhe to tẹmpli mẹ lẹ mẹ wẹ, podọ mẹhe nọ wadevizọn to whepoponu to agbà lọ kọ̀n lẹ nọ mọ mimá de yí sọn agbà lọ ji ya?+ 14  Mọdopolọ ga, Oklunọ degbena mẹhe to wẹndagbe lọ lá lẹ nado nọ nọgbẹ̀ gbọn wẹndagbe lọ gblamẹ.+ 15  Ṣigba, yẹn ma ko yí dopo tata to onú ehelẹ mẹ zan gba.+ Na nugbo tọn, yẹn ma to onú ehelẹ kàn na ehe nido yin wiwà na mi gba, na e na pọnte hugan nado kú—mẹdepope ma na yí whẹwhinwhẹ́n ṣie nado doawagun sọn asi e!+ 16  Todin, eyin yẹn to wẹndagbe lọ lá, e ma yin whẹwhinwhẹ́n de na mi nado doawagun gba, na dandannu wẹ e yin na mi. Na taun tọn, dindọn wẹ e na yin na mi eyin yẹn ma lá wẹndagbe lọ!+ 17  Eyin yẹn wà ehe sọn ojlo mẹ wá, yẹn tindo ale de; ṣigba eyin yẹn tlẹ wà ẹ jẹagọdo ojlo ṣie, yẹn gbẹsọ tindo họ̀nkọnsi-zọ́n de he ko yin zizedo alọmẹ na mi.+ 18  To whelọnu lo, etẹwẹ yin ale ṣie? Dọ dile yẹn to wẹndagbe lọ lá, yẹn nido sọgan ze wẹndagbe lọ donukọnnamẹ ma yí akuẹ, na yẹn nikaa ṣì aṣẹpipa* ṣie zan to wẹndagbe lọ mẹ. 19  Na dile etlẹ yindọ yẹn tin to mẹdekannu sọn mẹlẹpo dè, yẹn yí dee do basi afanumẹ na mẹlẹpo, na yẹn nido sọgan duale mẹsusu tọn dile e yọnbasi do. 20  Na Ju lẹ, yẹn taidi Ju de, na yẹn nido duale Ju lẹ tọn;+ na mẹhe to osẹ́n glọ lẹ, yẹn taidi mẹhe to osẹ́n glọ, dile etlẹ yindọ yẹnlọsu ma to osẹ́n glọ, na yẹn nido duale mẹhe to osẹ́n glọ lẹ tọn.+ 21  Na mẹhe ma tindo osẹ́n lẹ, yẹn taidi mẹhe ma tindo osẹ́n, dile etlẹ yindọ yẹn ma nọma tindo osẹ́n Jiwheyẹwhe tọn ṣigba yẹn to osẹ́n Klisti tọn glọ,+ na yẹn nido duale mẹhe ma tindo osẹ́n lẹ tọn. 22  Na madogánnọ lẹ, yẹn lẹzun madogánnọ, na yẹn nido duale madogánnọ lẹ tọn.+ Yẹn ko lẹzun nulẹpo na gbẹtọ wunmẹ lẹpo, na yẹn nido gbọn aliho he yọnbasi lẹpo mẹ whlẹn mẹdelẹ gán. 23  Ṣigba, yẹn nọ wà nulẹpo na wẹndagbe lọ tọn wutu, na yẹn nido má ẹn hẹ mẹdevo lẹ.+ 24  Be mì ma yọnẹn dọ wezundotọ lẹpo wẹ nọ dowezun to alewezun de mẹ, ṣigba mẹdopo poun wẹ nọ mọ ale lọ yí ya? Mì dowezun to aliho he mẹ mì sọgan mọ ẹn yí te.+ 25  Todin, mẹhe to mahẹ tindo to agbàwhinwhlẹn de mẹ lẹpo* wẹ nọ yí mawazẹjlẹgo zan to nulẹpo mẹ. Na nugbo tọn, yewlẹ nọ wà ẹ nado mọ jẹgbakun he nọ gble de yí,+ ṣigba míwlẹ, dehe ma nọ gble de.+ 26  Enẹwutu, aliho he mẹ yẹn to wezundo te ma yin po lẹndai matindo po gba;+ aliho he mẹ yẹn to akotokún ṣie lẹ yìn te ma yin nado to nuli jẹhọn gba; 27  ṣigba yẹn nọ to nutun* agbasa ṣie+ bo nọ hẹn ẹn di afanumẹ de, na to whenue yẹn ko dọyẹwheho na mẹdevo lẹ godo, yẹnlọsu ni ma yin gbigbẹdai* to aliho de mẹ blo.

Nudọnamẹ Odò Tọn

To paa mẹ, “aṣẹpipa.”
Sọ nọ yin yiylọdọ Pita.
To paa mẹ, “aṣẹpipa.”
Kavi “jlọjẹ.”
Kavi “aihundatọ lanmẹyiya tọn lẹpo.”
Kavi “to yasana; to mẹplọnlọ sinsinyẹn do.”
Kavi “mimọ di mẹhe ma pegan.”