Accessibility setting

De ogbè dopo

Yì hosọ flinflin lẹ ji

Yì todowhinnu hosọ lẹ tọn ji

Yì hosọ lẹ ji

Kunnudetọ Jehovah Tọn Lẹ

Gungbe

Biblu Intẹnẹt Ji Tọn

OWE WIWE LẸ—LẸDOGBEDEVOMẸ AIHỌN YỌYỌ TỌN

1 Kọlintinu lẹ 7:1-40

NUHE E BẸHẸN LẸ

  • Ayinamẹ lẹ na tlẹnnọ po alọwlemẹ po (1-16)

  • Nọ zinzọnlin dile Jiwheyẹwhe ko ylọ we do (17-24)

  • Tlẹnnọ po asuṣiọsi po (25-40)

    • Ale tlẹnmẹninọ tọn lẹ (32-35)

    • Wlealọ “to Oklunọ mẹ kẹdẹ” (39)

7  Todin, gando nuhe mì kanbiọ to wekanhlanmẹ mìtọn mẹ lẹ go, e pọnte dọ sunnu ni ma doalọ* yọnnu de go blo;  ṣigba na fẹnnuwiwa zanhẹmẹ tọn* he gbayipe wutu, mì gbọ sunnu dopodopo ni tindo asi etọn titi+ podọ yọnnu dopodopo ni tindo asu etọn titi.+  Mì gbọ asu ni na jlọjẹ asi etọn tọn ẹn, mì gbọ asi ga ni wà nudopolọ na asu etọn.+  Asi ma paṣẹ do agbasa edetiti tọn ji, ṣigba asu etọn wẹ wàmọ; mọdopolọ asu ma paṣẹ do agbasa edetiti tọn ji, ṣigba asi etọn wẹ wàmọ.  Mì nọ tẹ̀ ode awetọ mìtọn blo, adavo gbọn gbekọndopọ omẹ awe lẹ tọn dali na ojlẹ dide de, na mì nido sọgan de whenu dovo na odẹ̀ podọ to enẹgodo, mì sọgan gọjẹ opọ́ whladopo dogọ, na Satani ma nado to mì whlepọn, na nugomape nado duto mẹdetiti ji mìtọn wutu.  Ṣigba, yẹn dọ ehe nado nagbè mì wẹ, e ma yin gbedide de gba.  Ṣigba, yẹn jlo dọ mẹlẹpo ni nọ lehe yẹn te. Etomọṣo, mẹdopodopo wẹ tindo nunina etọn titi+ sọn Jiwheyẹwhe dè, mẹde to aliho ehe mẹ, mẹdevo to aliho enẹ mẹ.  Todin, yẹn dọna mẹhe ma wlealọ lẹ po asuṣiọsi lẹ po dọ, e pọnte dọ yé ni gbọṣi lehe yẹn te.+  Ṣigba, eyin yé ma sọgan duto yede ji, mì gbọ yé ni wlealọ, na e pọnte nado wlealọ hú dọ ojlo zogbe ni duto yé ji.+ 10  Anademẹ ehelẹ wẹ yẹn to nina mẹhe wlealọ lẹ, amọ́ e ma yin yẹn adavo Oklunọ, dọ asi klan sọn asu etọn go blo.+ 11  Ṣigba, eyin ewọ klan janwẹ, mì gbọ e wlealọ blo kavi eyin e ma yinmọ, ewọ ni gbọwhẹ hẹ asu etọn; podọ asu ni ma jo asi etọn do blo.+ 12  Ṣigba, mẹhe pò lẹ wẹ yẹn to didọna, mọwẹ, yèdọ yẹn, e ma yin Oklunọ gba,+ dọmọ: Eyin mẹmẹsunnu de tindo asi mayisenọ de, bọ yọnnu lọ kẹalọyi nado nọ nọhẹ ẹ, mì gbọ e jo e do blo; 13  podọ eyin yọnnu de tindo asu mayisenọ, bọ sunnu lọ kẹalọyi nado nọ nọhẹ ẹ, mì gbọ e jo asu etọn do blo. 14  Na asu mayisenọ lọ yin hinhẹn zun wiwe na asi etọn tọn wutu, podọ asi mayisenọ lọ yin hinhẹn zun wiwe na asu yisenọ lọ tọn wutu; eyin e ma yinmọ, ovi mìtọn lẹ na yin mawé, ṣigba todin, yé ko yin wiwe. 15  Etomọṣo, eyin mayisenọ lọ de nado klan, mì gbọ e ni klan; mẹmẹsunnu kavi mẹmẹyọnnu de ma to dandannu glọ to ninọmẹ mọnkọtọn lẹ mẹ gba, ṣigba Jiwheyẹwhe ko ylọ mì do jijọho kọ̀n.+ 16  Na hiẹ asi, nawẹ hiẹ wagbọn do yọnẹn eyin hiẹ ma na whlẹn asu towe gán?+ Kavi hiẹ asu, nawẹ hiẹ wagbọn do yọnẹn eyin hiẹ ma na whlẹn asi towe gán? 17  Etomọṣo, kẹdẹdi ninọmẹ he Jehovah* ko na mẹdopodopo, mì gbọ mẹdopodopo ni nọ zinzọnlin dile Jiwheyẹwhe ko ylọ ẹ do.+ Podọ enẹwutu wẹ yẹn nọ na anademẹ ehe to agun lẹpo mẹ. 18  Be mẹdepope yin yiylọ to whenue e ko gboadà wẹ ya?+ Mì gbọ ewọ lẹzun mẹhe ma gboadà blo. Be mẹdepope yin yiylọ to whenue e ma ko gboadà wẹ ya? Mì gbọ ewọ gboadà blo.+ 19  Adàgbigbo ma yin nude, podọ adàmagbo ma yin nude;+ tonusisena gbedide Jiwheyẹwhe tọn lẹ wẹ yin nujọnu.+ 20  Ninọmẹ depope he mẹ mẹdopodopo yin yiylọ te, mì gbọ ewọ ni gbọṣi e mẹ.+ 21  Be hiẹ yin yiylọ to whenue a yin afanumẹ de wẹ ya? A dike e dotukla we blo;+ ṣigba eyin hiẹ sọgan jẹ mẹdekannu, gbọ bo yí dotẹnmẹ hundote lọ zan. 22  Na mẹdepope he yin yiylọ to Oklunọ mẹ to whenue ewọ yin afanumẹ de yin mẹtundote Oklunọ tọn;+ mọdopolọ mẹdepope he yin yiylọ to whenue e to edekannu yin afanumẹ Klisti tọn. 23  Ahọ́ daho de ko yin súsú nado họ̀ mì;+ mì sọ yin afanumẹ gbẹtọ tọn lẹ ba blo. 24  Mẹmẹsunnu lẹ emi, ninọmẹ depope he mẹ mẹdopodopo yin yiylọ te, mì gbọ ewọ ni gbọṣi e mẹ to Jiwheyẹwhe nukọn. 25  Todin, yẹn ma tindo gbedide de sọn Oklunọ dè na tlẹnnọ* lẹ gba, ṣigba linlẹn ṣie dọ wẹ yẹn te+ taidi mẹhe Oklunọ do lẹblanu hia nado yin nugbonọ. 26  Enẹwutu, yẹn lẹndọ e na yọ́n hugan na sunnu de nado gbọṣi lehe ewọ te na ninọmẹ sinsinyẹn he to aimẹ din lọ wutu. 27  Be hiẹ yin sìnsìn do asi de go wẹ? A dín tundote ba blo.+ Be hiẹ ko yin túntún sọn asi de go wẹ? A sọ dín asi de ba blo. 28  Ṣigba, eyin hiẹ tlẹ wlealọ, hiẹ ma waylando. Podọ eyin tlẹnnọ de wlealọ, omẹ mọnkọtọn ma waylando. Etomọṣo, mẹhe wàmọ lẹ na tindo nukunbibia to agbasalan yetọn mẹ. Ṣigba, yẹn to tintẹnpọn nado de mì sọn e mẹ. 29  Humọ, mẹmẹsunnu lẹ emi, yẹn dọ ehe, dọ gli wẹ ojlẹ he pò lọ.+ Bẹsọn din, mì gbọ yé he tindo asi lẹ ni taidi mẹhe ma tindo, 30  podọ mẹhe to avivi lẹ ni taidi mẹhe ma to avivi, podọ mẹhe to ayajẹ lẹ taidi mẹhe ma to ayajẹ, podọ mẹhe to hihọ̀ lẹ taidi mẹhe ma tindo, 31  podọ mẹhe to aihọn lọ zan lẹ taidi mẹhe ma to zinzan ẹn to gigọ́ mẹ; na ninọmẹ aihọn ehe tọn to didiọ. 32  Na nugbo tọn, yẹn jlo dọ mì ni vò sọn tuklajijẹ mẹ. Sunnu he ma wlealọ nọ jẹtukla na onú Oklunọ tọn lẹ, yèdọ lehe ewọ sọgan tindo alọkẹyi Oklunọ tọn do. 33  Ṣigba, sunnu he wlealọ nọ jẹtukla na onú aihọn tọn lẹ,+ yèdọ lehe ewọ sọgan tindo alọkẹyi asi etọn tọn do, 34  podọ ewọ nọ yin ayihafẹsẹna. Humọ, yọnnu he ma wlealọ podọ mẹhe yin awhli nọ jẹtukla na onú Oklunọ tọn lẹ,+ na e nido sọgan yin wiwe to agbasa etọn mẹ podọ to gbigbọ etọn mẹ. Ṣigba, yọnnu he wlealọ nọ jẹtukla na onú aihọn tọn lẹ, yèdọ lehe e sọgan tindo alọkẹyi asu etọn tọn do. 35  Ṣigba, yẹn to ehe dọ na ale mìtọn wutu, e ma yin nado glọnalina* mì wẹ gba, ṣigba nado whàn mì nado wà nuhe sọgbe podọ hlan mẹdezejo na Oklunọ to whepoponu matin ayihafẹsẹnamẹ kọ̀n. 36  Ṣigba, eyin mẹdepope lẹndọ emi to nuyiwa to aliho he ma sọgbe mẹ gbọn gbigbọṣi tlẹnmẹ dali,* podọ eyin e ko zẹ̀ owhe aflanmẹ tọn etọn go, nuhe dona yin wiwà die: Mì gbọ ni wà nuhe jlo e; e ma waylando. Mì gbọ yé ni wlealọ.+ 37  Ṣigba, eyin mẹdepope magbe to ahun etọn mẹ bo mọdọ emi ma tin to dandannu glọ, ṣigba bo tindo huhlọn do ojlo etọn titi ji bo ko basi nudide to ahun etọn titi mẹ nado gbọṣi tlẹnmẹ,* ewọ na wà dagbe.+ 38  Enẹwutu, mẹdepope he wlealọ* wà dagbe, ṣigba mẹdepope he ma wlealọ na wà dagbe hugan.+ 39  Asi de yin sìnsìn dile asu etọn na to ogbẹ̀ dẹnsọ.+ Ṣigba, eyin asu etọn damlọn to okú mẹ, ewọ vò nado wlealọ hẹ mẹdepope he jlo e, to Oklunọ mẹ kẹdẹ.+ 40  Ṣigba, to linlẹn ṣie mẹ, ewọ na yin ayajẹnọ hugan eyin e gbọṣi lehe e te; podọ na taun tọn, yẹn sọ lẹndọ yẹn tindo gbigbọ Jiwheyẹwhe tọn ga.

Nudọnamẹ Odò Tọn

Enẹ wẹ, ma tindo kọndopọ zanhẹmẹ tọn hẹ.
Glẹki, pọlnẹia. Pọ́n Zẹm.
Pọ́n Nud. A5.
Kavi “mẹhe ma ko wlealọ pọ́n.”
To paa mẹ, “nado do omọ̀ na.”
Kavi “gando alọji-ninọ etọn go.”
Kavi “nado hẹn alọji-ninọ etọn go.”
Kavi “he ze alọji-ninọ etọn jo to alọwle mẹ.”