Yì hosọ lẹ ji

Yì hosọ flinflin lẹ ji

Yì todowhinnu hosọ lẹ tọn ji

Kunnudetọ Jehovah Tọn Lẹ

Gungbe

Biblu Intẹnẹt Ji Tọn | OWE WIWE LẸ—LẸDOGBEDEVOMẸ AIHỌN YỌYỌ TỌN

1 Kọlintinu lẹ 14:1-40

NUHE E BẸHẸN LẸ

  • Nunina dọdai didọ po ogbè voovo po tọn lẹ (1-25)

  • Opli Klistiani tọn nọ nọ̀ titoji (26-40)

    • Otẹn yọnnu lẹ tọn to agun mẹ (34, 35)

14  Mì doafọna owanyi, ṣogan mì to vivẹnudo zọnmii na* nunina gbigbọ tọn lẹ, ṣigba e na pọnte hú dọ mì ni nọ dọ dọdai.+  Na mẹhe nọ yí ogbè devo do dọho, nọ dọho, e ma yin na gbẹtọ, ṣigba na Jiwheyẹwhe, na mẹdepope ma nọ dotoai,+ ṣigba ewọ nọ dọho aṣli wiwe lẹ tọn+ gbọn gbigbọ dali.  Etomọṣo, mẹhe nọ dọ dọdai lẹ nọ hẹnmẹ lodo bo nọ na tulimẹ bosọ nọ miọnhomẹna gbẹtọ lẹ gbọn ohó etọn dali.  Mẹhe nọ yí ogbè devo do dọho nọ hẹn edetiti lodo, ṣigba mẹhe nọ dọ dọdai lẹ nọ hẹn agun lodo.  Todin, yẹn na ko jlo dọ mìmẹpo ni nọ yí ogbè devo lẹ do dọho,+ ṣigba nuhe jlo mi hugan wẹ yindọ mì ni nọ dọ dọdai.+ Na nugbo tọn, mẹhe nọ dọ dọdai lẹ klohu mẹhe nọ yí ogbè devo lẹ do dọho, adavo eyin ewọ nọ basi lẹdogbedevomẹ, na agun lọ nido sọgan yin hinhẹn lodo.  Ṣigba, mẹmẹsunnu lẹ emi, eyin yẹn wá mì dè to ojlẹ ehe mẹ bo yí ogbè devo lẹ do to hodọ, dagbe tẹwẹ yẹn na wà na mì, eyin yẹn ma yí osọhia+ kavi oyọnẹn+ kavi dọdai didọ kavi mẹpinplọn do dọhona mì?  Nudopolọ wẹ nọ jọ gando nuhe ma tindo gbọfufu ṣigba bo nọ dọnú lẹ go, vlavo ován kavi ajalẹn. Eyin vogbingbọn ma tin to nudidọ yetọn lẹ mẹ, nawẹ nuhe to yinyin hihò to ován kavi ajalẹn ji sọgan yin yinyọnẹn gbọn?  Na eyin nudidọ opẹ̀n tọn ma họnwun hezeheze, mẹnu wẹ na wleawudaina awhàn?  Mọdopolọ, eyin mìwlẹ ma yí odẹ́ mìtọn do dọho to aliho he na yin nukunnumọjẹemẹ po awubibọ po mẹ, nawẹ mẹde na yọ́n nuhe to yinyin didọ lọ gbọn? Mìwlẹ na to hodọ, na taun tọn, do jẹhọn mẹ. 10  E sọgan yindọ ogbè voovo lẹ wẹ to aihọn mẹ, ṣogan depope to yé mẹ ma nọma tindo zẹẹmẹ. 11  Na eyin yẹn ma mọnukunnujẹ nuhe dọ ogbè lọ te mẹ, be yẹn yin jonọ de na mẹhe to hodọ, bọ mẹhe to hodọ lọ yin jonọ de na mi. 12  Mọdopolọ, mìlọsu lẹ ga, to whenuena e yindọ mì to nunina gbigbọ tọn lẹ jlo vẹkuvẹku, mì nọ tẹnpọn nado sù to nunina he na hẹn agun lọ lodo lẹ mẹ.+ 13  Enẹwutu, mì gbọ mẹhe nọ yí ogbè devo do dọho ni hodẹ̀ na ewọ nido sọgan basi lẹdogbedevomẹ.+ 14  Na eyin yẹn nọ yí ogbè devo do hodẹ̀, nunina gbigbọ tọn he yin nina mi lọ wẹ to dẹ̀ho, ṣigba ayiha ṣie ma tindo sinsẹ́n. 15  To whelọnu lo, etẹwẹ dona yin wiwà? Yẹn na yí nunina gbigbọ tọn lọ do hodẹ̀, ṣigba yẹn nasọ yí ayiha ṣie do hodẹ̀ ga. Yẹn na yí nunina gbigbọ tọn lọ do jihàn pipà tọn, ṣigba yẹn nasọ yí ayiha ṣie do jihàn pipà tọn ga. 16  Eyin e ma yinmọ, eyin hiẹ yí nunina gbigbọ tọn de do na pipà, nawẹ omẹ paa he tin to ṣẹnṣẹn mìtọn lọ na dọ “Niṣẹ”* na pẹdido towe lẹ gbọn, to whenue ewọ ma yọ́n nuhe dọ a te? 17  Nugbo wẹ dọ hiẹ to pẹdo to aliho dagbe de mẹ, ṣigba omẹ diẹ ma yin hinhẹn lodo. 18  Yẹn dopẹna Jiwheyẹwhe dọ yẹn nọ yí ogbè susu do dọho hú mìmẹpo. 19  Etomọṣo, e na pọnte na mi nado yí ayiha* ṣie do dọ hogbe atọ́n to agun de mẹ, na yẹn nido sọgan plọn* mẹdevo lẹ ga, hú hogbe degba-awe-foo lẹ to ogbè devo mẹ.+ 20  Mẹmẹsunnu lẹ emi, mì lẹzun yọpọvu to nukunnumọjẹnumẹ mìtọn mẹ blo,+ ṣigba mì yin yọpọvu to ylanwiwa mẹ;+ mì nisọ lẹzun mẹhe whẹ́n ganji to nukunnumọjẹnumẹ mìtọn mẹ.+ 21  E yin kinkandai to Osẹ́n lọ mẹ dọmọ: “‘Odẹ́ jonọ lẹ tọn po nùflo jonọ lẹ tọn po wẹ yẹn na yí do dọhona omẹ ehelẹ, podọ etlẹ yin to whenẹnu yé na gbẹ́ nado dotoaina mi,’ wẹ Jehovah* dọ.”+ 22  Enẹwutu, ogbè devo lẹ ma yin ohia de na yisenọ lẹ gba, ṣigba na mayisenọ lẹ,+ to whenuena e yindọ dọdai didọ ma yin na mayisenọ lẹ, ṣigba na yisenọ lẹ. 23  Enẹwutu, eyin agun lọ pete pli dopọ do fidopo bọ yemẹpo yí ogbè devo lẹ do to hodọ, ṣigba bọ omẹ paa lẹ kavi mayisenọ lẹ biọ họmẹ, be yé ma na dọ dọ alẹ̀ wẹ mì hùn ya? 24  Ṣigba, eyin mìmẹpo to dọdai dọ bọ mayisenọ de kavi omẹ paa de biọ họmẹ, ewọ na mọtolanmẹ dọ emi yin wiwọhẹ bo nasọ yin whinwhàn nado dindona ede kitokito gbọn ohó yemẹpo tọn dali. 25  To whenẹnu, aṣli ahun etọn mẹ tọn lẹ na sọawuhia, bọ ewọ na ṣinyọ́n nukunmẹ etọn ai bo sẹ̀n Jiwheyẹwhe bosọ lá dọmọ: “Na nugbo tọn, Jiwheyẹwhe tin to ṣẹnṣẹn mìtọn.”+ 26  To whelọnu lo, mẹmẹsunnu lẹ emi, etẹwẹ dona yin wiwà? To whenuena mì pli dopọ, bọ mẹde tindo salmu, mẹdevo tindo mẹpinplọn, mẹdevo tindo osọhia, mẹdevo tindo ogbè devo, bọ mẹdevo tindo tadena.+ Mì gbọ nulẹpo ni yin wiwà na mẹhẹnlodo. 27  Podọ eyin mẹde to ogbè devo yí do dọho, mì gbọ ni ma zẹ̀ omẹ awe kavi e sù gbau atọ̀n go blo, podọ ni yin debọdo-dego, mẹde sọ dona yin gbesetọ.*+ 28  Ṣigba, eyin gbesetọ* ma tin, ewọ ni nabọẹ to agun mẹ bo dọhona ede podọ na Jiwheyẹwhe. 29  Mì gbọ yẹwhegán awe kavi atọ̀n+ ni dọho, podọ mì gbọ mẹhe pò lẹ ni tunwun zẹẹmẹ lọ go. 30  Ṣigba, eyin mẹdevo he to aisinsin to finẹ mọ osọhia de, mì gbọ hodọtọ tintan lọ ni nabọẹ whẹ́. 31  Na mìmẹpo nido sọgan dọ dọdai debọdo-dego, na mẹlẹpo nido sọgan plọnnu bọ mẹlẹpo na yin tulina.+ 32  Podọ nunina gbigbọ tọn lẹ na dọdai didọ na yin anadena gbọn yẹwhegán lẹ dali. 33  Na Jiwheyẹwhe ma yin Jiwheyẹwhe bẹwlu tọn de gba, ṣigba jijọho tọn.+ Dile e te do to agun omẹ wiwe lẹ tọn lẹpo mẹ, 34  mì gbọ yọnnu lẹ ni nọ nabọẹ to agun lẹ mẹ, na e ma yin alọkẹyi dọ yé ni dọho.+ Kakatimọ, mì gbọ yé ni yin mẹmẹglọ,+ dile Osẹ́n lọ lọsu dọ do. 35  Eyin yé jlo na plọn nude, yé ni kàn ẹn biọ asu yetọn lẹ to whégbè, na winyannu wẹ e yin na yọnnu de nado dọho to agun mẹ. 36  Be mìwlẹ dè wẹ ohó Jiwheyẹwhe tọn wá sọn, kavi be mìwlẹ kẹdẹ dè wẹ e jẹ ya? 37  Eyin mẹde lẹndọ emi yin yẹwhegán de kavi tindo nunina gbigbọ tọn, ewọ dona kẹalọyi dọ gbedide Oklunọ tọn wẹ yin nuhe yẹn to kinkan hlan mì lẹ. 38  Ṣigba, eyin mẹdepope gbẹkọ ehe go, ewọ na yin kọgbẹ́ e go.* 39  Enẹwutu, mẹmẹsunnu ṣie lẹ emi, mì to vivẹnudo zọnmii na nunina dọdai didọ tọn,+ ṣogan mì gbẹ́ ogbè devo lẹ yíyí do dọho namẹ blo.+ 40  Ṣigba, mì gbọ nulẹpo ni nọ yin wiwà dile e jẹ do podọ to titoji.*+

Nudọnamẹ Odò Tọn

Kavi “mì nọ yí zohunhun do dín.”
Kavi “Amẹn” to Glẹkigbe mẹ.
Kavi “nukunnumọjẹnumẹ.”
Kavi “yí onù do plọn.”
Pọ́n Nud. A5.
Kavi “dona basi lẹdogbedevomẹ.”
Kavi “lẹdogbedevomẹtọ.”
Kavi vlavo, “eyin mẹdepope yin wunvinọ, ewọ na zindonukọn to wunvi etọn mẹ.”
Kavi “to kannukannu.”