Accessibility setting

De ogbè dopo

Yì hosọ flinflin lẹ ji

Yì todowhinnu hosọ lẹ tọn ji

Yì hosọ lẹ ji

Kunnudetọ Jehovah Tọn Lẹ

Gungbe

Biblu Intẹnẹt Ji Tọn

OWE WIWE LẸ—LẸDOGBEDEVOMẸ AIHỌN YỌYỌ TỌN

1 Ahọlu lẹ 8:1-66

NUHE E BẸHẸN LẸ

  • Apotin lọ yin hinhẹnwa tẹmpli mẹ (1-13)

  • Sọlomọni dọhona gbẹtọ lọ lẹ (14-21)

  • Odẹ̀ klandowiwe tẹmpli tọn he Sọlomọni hò (22-53)

  • Sọlomọni dona gbẹtọ lọ lẹ (54-61)

  • Avọ́sinsan lẹ po hùnwhẹ klandowiwe tọn po (62-66)

8  To ojlẹ enẹ mẹ, Sọlomọni bẹ+ mẹho Islaeli tọn lẹ, nukọntọ hẹnnu lẹ tọn lẹpo po ahọvi whédo otọ́ Islaeli tọn lẹ po pli.+ Yé wá Ahọlu Sọlomọni dè to Jelusalẹm nado hẹn apotin alẹnu tọn Jehovah tọn hẹji wá sọn Tòdaho Davidi tọn mẹ,+ enẹ wẹ Ziọni.+  Sunnu Islaeli tọn lẹpo pli do Ahọlu Sọlomọni nukọn to hùnwhẹ* lọ whenu to osun Etanimi* tọn mẹ, enẹ wẹ osun ṣinawetọ.+  Whenẹnu, mẹho Islaeli tọn lẹpo wá bọ yẹwhenọ lẹ ze Apotin lọ.+  Yé hẹn Apotin Jehovah tọn, gòhọ opli tọn lọ+ po nuyizan wiwe he to gòhọ lọ mẹ lẹpo po hẹji wá. Yẹwhenọ lẹ po Levinu lẹ po wẹ hẹn yé hẹji wá.  Ahọlu Sọlomọni gọna akọta Islaeli tọn pete he ko yin yiylọ wá nado pli hẹ ẹ nọte to Apotin lọ nukọn. Lẹngbọ po oyìn he yin yíyí do sanvọ́+ lẹ po sù sọmọ bọ yé ma sọgan yin hihia kavi yin sọhayina.  Whenẹnu wẹ yẹwhenọ lẹ hẹn apotin alẹnu tọn Jehovah tọn wá otẹn etọn mẹ+ to abò homẹ tọn ohọ̀ lọ tọn mẹ, yèdọ Fiwiwe Gbaugbau lọ, to awà kelubimi lẹ tọn glọ.+  Gbọnmọ dali, awà kelubimi lọ lẹ tọn dlẹn do aga na fihe Apotin lọ nọ nọ̀ sọmọ bọ kelubimi lọ lẹ ṣinyọnyẹ Apotin lọ po opò etọn lẹ po ji.+  Opò lọ lẹ+ dite sọmọ bọ bẹ́nu yetọn sọgan yin mimọ sọn Fiwiwe he tin to abò homẹ tọn lọ nukọn, ṣigba yé ma sọgan yin mimọ sọn gbonu. Yé gbẹ́ tin to finẹ kakajẹ egbé.  Nudepope ma tin to Apotin lọ mẹ adavo wekan-zannu awe lọ lẹ+ he Mose bẹ do e mẹ+ to Holẹbi, to whenue Jehovah basi alẹnu+ hẹ omẹ Islaeli tọn lẹ dile yé tọ́n ja sọn aigba Egipti tọn ji.+ 10  Whenue yẹwhenọ lọ lẹ tọ́njẹgbonu sọn ofi wiwe lọ, aslọ+ gọ́ ohọ̀ Jehovah tọn mẹ.+ 11  Na aslọ lọ wutu, yẹwhenọ lẹ ma penugo nado nọte bo wà lizọnyizọn yetọn, na gigo Jehovah tọn gọ́ ohọ̀ Jehovah tọn mẹ.+ 12  Whenẹnu wẹ Sọlomọni dọmọ: “Jehovah ko dọ dọ aslọ titli mẹ wẹ emi na nọ.+ 13  Yẹn ko penugo nado gbá ohọ̀ daho de na we, yèdọ nọtẹn tangan de na hiẹ nado nọ nọ̀ e mẹ kakadoi.”+ 14  Enẹgodo, ahọlu lilẹ́ bo jẹ didona agun Islaeli tọn pete ji, dile agun Islaeli tọn pete tin to ote.+ 15  E dọmọ: “Na Jehovah Jiwheyẹwhe Islaeli tọn ni yin pipà, yèdọ ewọ he yí onù etọn titi do dopagbe na otọ́ ṣie Davidi bo ko sọ yí alọ etọn titi do hẹn ẹn di dọmọ, 16  ‘Sọn gbeegbe yẹn ko plan Islaeli omẹ ṣie lẹ tọ́njẹgbonu sọn Egipti, n’ma ko de tòdaho de to hẹnnu Islaeli tọn lẹpo mẹ, fie ohọ̀ de na yin gbigbá do na oyín ṣie nado gbọṣi finẹ,+ ṣigba n’ko de Davidi nado dugán do Islaeli omẹ ṣie lẹ ji.’ 17  Otọ́ ṣie Davidi sọ jlo sọn ahun mẹ wá nado gbá ohọ̀ de na oyín Jehovah Jiwheyẹwhe Islaeli tọn.+ 18  Ṣigba, Jehovah dọna otọ́ ṣie Davidi dọmọ, ‘Ojlo ahun towe mẹ tọn wẹ nado gbá ohọ̀ de na oyín ṣie, podọ ojlo dagbe de wẹ enẹ yin he a tindo to ahun towe mẹ. 19  Etomọṣo, e ma yin hiẹ wẹ na gbá ohọ̀ lọ, amọ́ visunnu towe he na yin jiji na we* wẹ na gbá ohọ̀ lọ na oyín ṣie.’+ 20  Jehovah ko hẹn opagbe he e do lọ di, na yẹn ko jẹ otẹn otọ́ ṣie Davidi tọn mẹ bo ko sinai to ofìn Islaeli tọn ji, kẹdẹdile Jehovah ko dopagbe etọn do. Yẹn ko sọ gbá ohọ̀ lọ na oyín Jehovah Jiwheyẹwhe Islaeli tọn+ 21  bo ko sọ wleawuna nọtẹn de do finẹ na Apotin he mẹ alẹnu+ lọ tin te, yèdọ alẹnu he Jehovah basi hẹ tọgbo mítọn lẹ dile e to yé plan jẹgbonu sọn aigba Egipti tọn ji.” 22  Sọlomọni sọ ṣite to agbà Jehovah tọn kọ̀n to agun Islaeli tọn pete nukọn bo dlẹnalọ etọn lẹ hlan olọn,+ 23  bosọ dọmọ: “Jehovah Jiwheyẹwhe Islaeli tọn E, Jiwheyẹwhe depope ma tin taidi hiẹ+ to olọn mẹ aga kavi to aigba ji to odò, yèdọ hiẹ he nọ yin nugbonọ na alẹnu towe bo nọ do owanyi nugbo+ hia devizọnwatọ towe he yí ahun lẹpo do to zọnlinzin to nukọn towe lẹ.+ 24  Hiẹ ko hẹn opagbe he a do na devizọnwatọ towe Davidi otọ́ ṣie di. Onù towe titi wẹ hiẹ yí do dopagbe lọ, podọ alọ towe titi wẹ a ko yí do hẹn ẹn di to egbé.+ 25  Todin, Jehovah Jiwheyẹwhe Islaeli tọn E, hẹn opagbe lọ di, ehe a do na devizọnwatọ towe Davidi otọ́ ṣie to whenue a dọmọ: ‘Sunnu he na wá sọn kúnkan towe mẹ nado sinai to ofìn Islaeli tọn ji ma na hán gbede to nukọn ṣie, eyin visunnu towe lẹ ko gbẹ́ payi aliho yetọn go gbọn zọnlinzinzin to nukọn ṣie dali, kẹdẹdile hiẹ ko zinzọnlin to nukọn ṣie do.’+ 26  Podọ todin, Jiwheyẹwhe Islaeli tọn E, jaale gbọ opagbe he a do na devizọnwatọ towe Davidi otọ́ ṣie ni sọawuhia nado yin nugbo. 27  “Ṣigba, be Jiwheyẹwhe na nọ aigba ji nugbonugbo wẹ ya?+ Pọ́n! Olọn lẹ, yèdọ olọn olọn lẹ tọn ma tlẹ sọgan hẹn we;+ nẹmunẹmu wẹ wá yin ohọ̀ he yẹn gbá ehe tọn!+ 28  Todin, Jehovah Jiwheyẹwhe ṣie E, na ayidonugo odẹ̀ devizọnwatọ towe tọn po obiọ etọn na nukundagbe po, bo dotoaina awhágbe ṣie na alọgọ podọ odẹ̀ he devizọnwatọ towe to hihò to nukọn towe to egbehe. 29  Na nukun towe ni nọ to ohọ̀ ehe ji to ozán po okle po, yèdọ hlan nọtẹn lọ he hiẹ ko dọ gandego dọ, ‘Oyín ṣie na tin to finẹ,’+ nado dotoaina odẹ̀ he devizọnwatọ towe nọ pànta nọtẹn ehe do nọ hò.+ 30  Sọ dotoaina obiọ devizọnwatọ towe tọn na nukundagbe gọna obiọ he Islaeli omẹ towe lẹ nọ pànta nọtẹn ehe do nọ basi to odẹ̀ mẹ, podọ hiẹ ni nọ sè sọn fininọ towe to olọn mẹ;+ mọwẹ, hiẹ ni nọ sè bo nọ jona.+ 31  “Eyin mẹde waylando do hatọ etọn bo yin hinhẹn nado whlé* bosọ to dandannu glọ nado hẹn agbàn whiwhle* lọ tọn, bọ ewọ wá agbà towe nukọn to ohọ̀ ehe mẹ to whenue e tin to whiwhle* lọ glọ,+ 32  hiẹ ni sè sọn olọn mẹ bo yinuwa bosọ dawhẹna devizọnwatọ towe lẹ gbọn mẹylankan didohia taidi whẹhutọ* bo hẹn nuhe e wà lẹkọwa ota etọn titi ji dali, podọ gbọn dodonọ didohia taidi homẹvọnọ* bo suahọ ẹ sọgbe hẹ dodowiwa etọn titi dali.+ 33  “Eyin Islaeli omẹ towe lẹ ṣíawhàn to kẹntọ nukọn, na yé to ylando wà sọta we mapote wutu,+ bọ yé lẹkọwa dè we bo pagigona oyín towe+ bo hodẹ̀ bosọ biọ nukundagbe towe to ohọ̀ ehe mẹ,+ 34  hiẹ ni sè sọn olọn mẹ bo jo ylando Islaeli omẹ towe lẹ tọn na yé bosọ hẹn yé gọwá aigba lọ he hiẹ ko na tọgbo yetọn lẹ ji.+ 35  “Eyin ovẹ́sẹ olọn tọn lẹ sú bọ jikun ma ja,+ na yé to ylando wà sọta we mapote wutu,+ bọ yé pànta nọtẹn ehe do hodẹ̀ bo pagigona oyín towe bosọ lẹkọ sọn ylando yetọn mẹ, na hiẹ ko whiwhẹ* yé wutu,+ 36  hiẹ ni sè sọn olọn mẹ bo jo ylando devizọnwatọ towe lẹ, yèdọ Islaeli omẹ towe lẹ tọn na yé, na hiẹ na plọn yé+ aliho dagbe he ji yé dona zinzọnlin gbọn; hiẹ nisọ hẹn jikun ja do aigba towe+ he a ko na omẹ towe lẹ taidi ogú lọ ji. 37  “Eyin huvẹ tọ́n to aigba lọ ji,+ kavi azọ̀nylankan, akúdido, azọ̀n jinukun lẹ tọn,+ awhàn owẹ̀n lẹ tọn kavi owẹ̀n* nuhẹngbletọ lẹ; kavi eyin kẹntọ yetọn dosla lẹdo yé to tòdaho aigba lọ tọn* depope mẹ kavi eyin azọ̀nylankan kavi awutu wunmẹ devo depope fọ́n,+ 38  odẹ̀ depope, obiọ nukundagbe tọn depope+ he sọgan yin bibasi gbọn mẹdepope kavi Islaeli omẹ towe lẹpo dali (na mẹdopodopo wẹ yọ́n awufiẹsa he to ahun etọn titi mẹ)+ to whenue yé na dlẹnalọ yetọn lẹ hlan ohọ̀ ehe waji, 39  hiẹ ni sè sọn olọn mẹ, yèdọ fininọ towe,+ hiẹ nisọ jona yé+ bo yinuwa; podọ hiẹ ni suahọ mẹdopodopo sọgbe hẹ aliho etọn lẹpo,+ na hiẹ yọ́n nuhe to ahun mẹdopodopo tọn mẹ (hiẹ dopo kẹdẹ wẹ yọ́n nuhe to ahun gbẹtọvi lẹpo tọn mẹ nugbonugbo),+ 40  na yewlẹ nido nọ dibusi we dile yé na togbẹ̀ dẹnsọ to aigba lọ he hiẹ ko na tọgbo mítọn lẹ ji. 41  “Humọ, na nuhe dù jonọ lọ he ma yin apadewhe Islaeli omẹ towe lẹ tọn bo wá sọn otò dindẹn de mẹ na oyín* towe wutu+ 42  (na yé na sè dogbọn oyín daho towe,+ alọ huhlọnnọ towe po awà dindlẹn towe po dali), bọ ewọ wá bo pànta ohọ̀ ehe do hodẹ̀, 43  hiẹ ni dotoai sọn olọn mẹ, yèdọ fininọ towe,+ bo wà nuhe jonọ lọ biọ we lẹpo na ẹn, na mẹhe to aigba ji lẹpo nido yọ́n oyín towe bo nọ dibusi we,+ dile Islaeli omẹ towe lẹ nọ wà do, podọ na yé nido yọnẹn dọ oyín towe ko yin yiylọ do ohọ̀ he yẹn ko gbá ehe ji. 44  “Eyin omẹ towe lẹ yì nado funawhàn hẹ kẹntọ yetọn dile hiẹ do yé hlan do,+ bọ yé hodẹ̀+ hlan Jehovah pànta tòdaho he hiẹ ko de lọ,+ podọ pànta ohọ̀ he yẹn ko gbá na oyín towe lọ,+ 45  hiẹ ni sè odẹ̀ yetọn po obiọ yetọn na nukundagbe po sọn olọn mẹ bo hẹn whẹdida ṣẹ do ota yetọn mẹ. 46  “Eyin yé waylando do we (na mẹdepope ma tin he ma nọ waylando),+ bọ hiẹ gblehomẹ sinsinyẹn do yé go bo jo yé do alọ kẹntọ de tọn mẹ, podọ mẹhe wle yé lẹ bẹ yé yì kanlinmọgbenu yì aigba kẹntọ lọ tọn ji, vlavo to fidindẹn kavi to yakẹ;+ 47  bọ yé wá gọ̀ biọ yede mẹ to aigba he ji yé yin bibẹ yì kanlinmọgbenu te lọ+ bo lẹkọwa dè we+ bosọ biọ nukundagbe towe to aigba mẹhe wle yé yì lẹ tọn lọ ji+ dọmọ, ‘Míwlẹ ko waylando bo ko sọ ṣinuwa; mí ko yinuwa po kanyinylan po,’+ 48  bọ yé yí ahun yetọn lẹpo+ po alindọn* yetọn lẹpo po do lẹkọwa dè we to aigba kẹntọ yetọn he bẹ yé yì kanlinmọgbenu lẹ tọn ji, bosọ hodẹ̀ hlan we pànta aigba yetọn he hiẹ ko na tọgbo yetọn lẹ podọ pànta tòdaho he hiẹ ko de lọ po ohọ̀ he yẹn ko gbá na oyín towe lọ po,+ 49  whenẹnu hiẹ ni sè odẹ̀ yetọn po obiọ yetọn na nukundagbe po sọn olọn mẹ, yèdọ fininọ towe+ bo hẹn whẹdida ṣẹ do ota yetọn mẹ 50  bosọ jona omẹ towe he ko waylando do we lẹ gbọn nuhe yé ko ṣiwà do we lẹpo jijona yé dali. Hiẹ na hẹn mẹhe wle yé yì lẹ nado wàlẹblanuna yé bọ yé na do lẹblanu hia yé+ 51  (na omẹ towe lẹ wẹ yé podọ ogú towe,+ he hiẹ plan jẹgbonu sọn Egipti,+ yèdọ sọn zòhọ gànkọ̀ntọ tọn mẹ).+ 52  Gbọ nukun towe lẹ ni nọ to ote gando obiọ nukundagbe tọn+ devizọnwatọ towe tọn po obiọ nukundagbe tọn Islaeli omẹ towe lẹ tọn po go gbọn todidoai to whedepopenu he yé dawhá ylọ we dali.*+ 53  Na hiẹ ko de yé dovo sọn akọta aigba ji tọn lẹpo mẹ taidi ogú towe,+ kẹdẹdile hiẹ dọ gbọn Mose devizọnwatọ towe gblamẹ do to whenue hiẹ to tọgbo mítọn lẹ plan jẹgbonu sọn Egipti, hiẹ Oklunọ Nupojipetọ Jehovah E.” 54  Tlolo he Sọlomọni ko hodẹ̀ bo biọ nukundagbe ehe lẹpo sọn Jehovah dè godo, e fọ́n sọn agbà Jehovah tọn nukọn, yèdọ fihe e ko jẹklo bo dlẹnalọ etọn lẹ hlan olọn te dai.+ 55  E sọ ṣite bo yí ogbè lélé do dona agun Islaeli tọn pete dọmọ: 56  “Pipà hlan Jehovah, mẹhe ko na gbọjẹtẹn de Islaeli omẹ etọn lẹ, kẹdẹdile ewọ ko dopagbe etọn do.+ Dopo ma gboawupo to opagbe dagbe he e ko do gbọn Mose devizọnwatọ etọn gblamẹ lẹpo mẹ.+ 57  Na Jehovah Jiwheyẹwhe mítọn ni tin hẹ mí kẹdẹdile e ko tin hẹ tọgbo mítọn lẹ do.+ Ewọ ni ma jo mí do kavi gbẹ́ mí dai gbede blo.+ 58  Na ewọ ni lẹ́ ahun mítọn hlan ede dè+ nado nọ zinzọnlin gbọn aliho etọn lẹpo ji podọ nado nọ setonuna gbedide, aṣẹdai po whẹdida etọn lẹ po, he e ko degbena tọgbo mítọn lẹ nado nọ payi yé go. 59  Podọ ohó ṣie ehelẹ he yẹn ko yí do biọ nukundagbe Jehovah tọn ni nọ yin finflin gbọn Jehovah Jiwheyẹwhe mítọn dali to okle po ozán po, na ewọ nido nọ hẹn whẹdida ṣẹ do devizọnwatọ etọn po Islaeli omẹ etọn lẹ po tamẹ dile azán dopodopo biọ do, 60  na mẹhe tin to aigba ji lẹpo nido yọnẹn dọ Jehovah wẹ Jiwheyẹwhe nugbo lọ.+ Devo de masọ tin!+ 61  Enẹwutu, mì yí ahun pipé+ de do sẹ̀n* Jehovah Jiwheyẹwhe mítọn gbọn zọnlinzinzin to aṣẹdai etọn lẹ mẹ po gbedide etọn lẹ yìnyìn po dali, dile e yin do to egbehe.” 62  Todin, ahọlu po omẹ Islaeli tọn lẹpo po basi avọ́sinsan daho de to Jehovah nukọn.+ 63  Sọlomọni basi avọ́sinsan jijọho tọn+ lẹ hlan Jehovah: Oyìn 22 000 po lẹngbọ 120 000 po wẹ e yí do sanvọ́. Mọ wẹ ahọlu po Islaelivi lẹpo po klan ohọ̀ Jehovah tọn do wiwe do.+ 64  To gbenẹgbe, ahọlu to dandannu glọ nado klan ṣẹnṣẹn awánu he tin to ohọ̀ Jehovah tọn nukọn lọ tọn do wiwe, na ewọ dona basi avọ́sinsan mimẹ̀ lẹ po avọ́nunina jinukun-lili tọn lẹ po bo mẹ̀ adà dojó avọ́sinsan jijọho tọn lẹ tọn to finẹ, na agbà gànvẹẹ tọn+ he tin to Jehovah nukọn lọ whè gbau nado hẹn avọ́sinsan mimẹ̀, avọ́nunina jinukun-lili tọn po adà dojó+ avọ́sinsan jijọho tọn lẹ tọn lọ po wutu. 65  To ojlẹ enẹ mẹ, Sọlomọni basi hùnwhẹ lọ+ to pọmẹ hẹ omẹ Islaeli tọn lẹpo, yèdọ agun daho de sọn Lebo-hamati* kaka yì Agbàdo Tọ̀sisa tọn* Egipti tọn mẹ,+ to Jehovah Jiwheyẹwhe mítọn nukọn na azán 7 gọna azán 7 devo, yèdọ azán 14 to lẹndopọ mẹ. 66  To wunkẹngbe,* e do gbẹtọ lọ lẹ hlan, yé sọ dona ahọlu bo yì owhé yetọn lẹ gbè po homẹhunhun po bosọ to ayajẹ to ahun yetọn mẹ, na dagbewà+ lọ lẹpo he Jehovah ko dohia Davidi devizọnwatọ etọn po Islaeli omẹ etọn lẹ po wutu.

Nudọnamẹ Odò Tọn

Enẹ wẹ, Hùnwhẹ Gòhọtúntún lẹ tọn.
Pọ́n Nud. B15.
To paa mẹ, “visunnu towe, yèdọ mẹlọ he na wá sọn alinkàn towe.”
Kavi “bọ omẹ awetọ lọ hodẹ̀do e.” Enẹ wẹ, whiwhle de he nọ hẹn dẹ̀hodo wá mẹji eyin yè yí lalo do whlé kavi eyin yè tùnafọ e ji.
To paa mẹ, “dẹ̀hodo.”
To paa mẹ, “dẹ̀hodo.”
To paa mẹ, “mẹylankan.”
To paa mẹ, “dodonọ.”
Kavi “sayana.”
Kavi “obọ̀.”
To paa mẹ, “to aigba họngbo etọn lẹ tọn.”
Kavi “oyín dagbe.”
Pọ́n Zẹm.
Kavi “gbọn todidoai na yé to nudepope he yé biọ we mẹ dali.”
Kavi “mì ze ahun mìtọn lẹpo jo na.”
Kavi “họntonu Hamati tọn.”
Pọ́n Zẹm.
To paa mẹ, “azán ṣinatọ̀ntọ gbè,” enẹ wẹ, azán he bọdo azán ṣinawe awetọ lọ go.