Yì hosọ lẹ ji

Yì hosọ flinflin lẹ ji

Yì todowhinnu hosọ lẹ tọn ji

Kunnudetọ Jehovah Tọn Lẹ

Gungbe

Biblu Intẹnẹt Ji Tọn | OWE WIWE LẸ—LẸDOGBEDEVOMẸ AIHỌN YỌYỌ TỌN

1 Ahọlu lẹ 6:1-38

NUHE E BẸHẸN LẸ

  • Sọlomọni gbá tẹmpli lọ (1-38)

    • Abò homẹ tọn (19-22)

    • Kelubimi lẹ (23-28)

    • Anazọ́n lẹ, ohọ̀n lẹ, awánu homẹ tọn (29-36)

    • Tẹmpli lọ yin tadona to nudi owhe 7 gblamẹ (37, 38)

6  Owhe 480 to whenue Islaelivi* lẹ ko tọ́njẹgbonu sọn aigba Egipti tọn ji godo,+ to owhe ẹnẹtọ gandudu Sọlomọni tọn do Islaeli ji mẹ, to osun Zivi*+ tọn mẹ (enẹ wẹ, osun awetọ), ewọ jẹ ohọ̀ Jehovah* tọn gbá ji.+  Ohọ̀ he Ahọlu Sọlomọni gbá na Jehovah dite na awagbà* 60 bo gblo na awagbà 20 bosọ yiji na awagbà 30.+  Atọ̀họ̀+ he to tẹmpli lọ* nukọn sọ dite* na awagbà 20, sọgbe hẹ gbigblo ohọ̀ lọ tọn. E gblo na awagbà ao bẹsọn ohọ̀ lọ nukọn.  E basi fleṣe he gblo to homẹ bo bó to gbonu lẹ+ na ohọ̀ lọ.  Humọ, e gbá ohọ̀ do adó ohọ̀ lọ tọn go; adó ohọ̀ lọ tọn lẹ, yèdọ tẹmpli* lọ po abò homẹ tọn+ lọ po tọn lẹ go wẹ e te lẹdo pé, e sọ gbá họ̀nù delẹ do adà mẹ na ẹn lẹdo pé.+  Họ̀nù he to adà mẹ bo to odò pete lọ lẹ gblo na awagbà atọ́n, dehe to ṣẹnṣẹn lẹ gblo na awagbà ṣidopo, podọ dehe to aga lẹ gblo na awagbà ṣinawe, e sọ ká owhlẹ lẹ do ohọ̀ lọ go lẹdo pé, na nudepope nikaa yin whiwhè do adó ohọ̀ lọ tọn lẹ mẹ.+  Zannu pipà he ko yin awuwlena lẹ wẹ yè yí do gbá ohọ̀ lọ,+ na nudidọ ṣówhènú, asiọvi kavi azọ́nwanu gànyuu tọn depope tọn nikaa yin sisè to ohọ̀ lọ mẹ to họ̀gbigbá lọ whenu.  Họntonu họ̀nù he to adà mẹ bo to odò pete lọ lẹ tọn tin to hùwaji* ohọ̀ lọ tọn,+ bọ pèkán sislo de tin he ji yè nọ gbọn yì petlezìn ṣẹnṣẹn tọn ji, podọ sọn petlezìn ṣẹnṣẹn tọn ji yì petlezìn atọ̀ntọ ji.  E zindonukọn to ohọ̀ lọ gbigbá mẹ bo dotana ẹn+ bosọ yí atin kedali tọn lẹ po owhlẹ kedali tọn he yin tito lẹ po do basi họta lọ.+ 10  E gbá họ̀nù lẹ do adà mẹ na ohọ̀ lọ lẹdo pé+ bọ dopodopo yetọn yiji na awagbà atọ́n, yè sọ yí owhlẹ kedali tọn lẹ do ṣá yé do ohọ̀ lọ go. 11  To ojlẹ enẹ mẹ, ohó Jehovah tọn wá Sọlomọni dè dọmọ: 12  “Na nuhe dù ohọ̀ he hiẹ to gbigbá ehe, eyin hiẹ nọ zinzọnlin to osẹ́ndoai ṣie lẹ mẹ bo nọ hẹn whẹdida ṣie lẹ ṣẹ bosọ nọ yìn gbedide ṣie lẹpo gbọn tonusisena yé dali,+ yẹn na hẹn opagbe he n’do na otọ́ towe Davidi gando gowe lọ di,+ 13  yẹn nasọ nọ nọ̀ Islaelivi lẹ ṣẹnṣẹn+ bo ma na gbẹkọ Islaeli omẹ ṣie lẹ go.”+ 14  Sọlomọni zindonukọn to họ̀gbigbá lọ mẹ nado sọgan dotana ẹn. 15  E yí owhlẹ kedali tọn plẹ́bẹ́ lẹ do dó adó he to ohọ̀ lọ homẹ. E sọ tùn owhlẹ lẹ dote to adó homẹ tọn lọ go, sọn kọmẹ yiaga jẹ ozà-tin lọ lẹ kọ̀n, bosọ tẹ́ owhlẹ junipeli+ tọn plẹ́bẹ́ lẹ do kọmẹ to ohọ̀ lọ mẹ. 16  E yí owhlẹ kedali tọn plẹ́bẹ́ he tọ́n sọn kọmẹ yì họta lẹ do basi họ̀nù awagbà 20 tọn de do ohọ̀ lọ mẹ to godo, e sọ gbá abò homẹ tọn lọ,+ yèdọ Fiwiwe Gbaugbau lọ+ do e* mẹ. 17  Tẹmpli*+ lọ lọsu—yèdọ adà ohọ̀ lọ tọn he to nukọn—dite na awagbà 40. 18  Yẹdide atin-sinsẹ́n loboto+ po vounvoun he gbàsẹ́ lẹ+ po tọn yin dide do owhlẹ kedali tọn lẹ go to ohọ̀ lọ mẹ. Popolẹpo wẹ yin atin kedali tọn; zannu depope ma yin mimọ. 19  E sọ wleawuna abò homẹ tọn lọ+ to ohọ̀ lọ mẹ nado ze apotin alẹnu tọn Jehovah tọn do e mẹ.+ 20  Abò lọ dite na awagbà 20 bo gblo na awagbà 20 bosọ yiji na awagbà 20;+ e và sika akú na ẹn; e sọ tẹ́ atin kedali tọn do agbà+ lọ ji. 21  Sọlomọni sọ và sika akú na ohọ̀ lọ to homẹ+ bo dlẹn gẹdẹ sika tọn lẹ do abò homẹ tọn he sika yin viva na lọ nukọn.+ 22  E và sika na ohọ̀ lọ pete kakajẹ whenue ohọ̀ lọ pete yin tadona; e sọ và sika na agbà he to abò homẹ tọn lọ pá pete.+ 23  E yí atin amìnọ do basi kelubimi+ awe do abò lọ mẹ, bọ dopodopo yetọn yiji na awagbà ao.+ 24  Awà kelubimi lọ lẹ tọn dopo yin awagbà atọ́n, bọ awà awetọ lọsu yin awagbà atọ́n. Sọn tónu awà de tọn jẹ tónu awà awetọ tọn sọ yin awagbà ao. 25  Kelubimi awetọ lọsu yiji na awagbà ao. Kelubimi awe lọ lẹ tindo awusọhia dopolọ. 26  Jiyiyi kelubimi dopo tọn yin awagbà ao kẹdẹdi jiyiyi kelubimi awetọ tọn. 27  Enẹgodo, e ze kelubimi lọ lẹ+ do abò* lọ mẹ. Awà kelubimi lọ lẹ tọn kẹ̀ sọmọ bọ awà kelubimi dopo tọn sọ́ adó he to awà ehe ji bọ awà kelubimi awetọ tọn sọ́ adó he to awà awetọ ji, awà yetọn lẹ sọ kẹ̀ wá ṣẹnṣẹn ohọ̀ lọ tọn, sọmọ bọ yé sọ́ yede. 28  E sọ và sika na kelubimi lọ lẹ. 29  E sọ de yẹdide kelubimi lẹ,+ odétin lẹ+ po vounvoun lẹ tọn po+ do adó ohọ̀ lọ tọn lẹpo go lẹdo pé, yèdọ to abò homẹ tọn lọ po abò he to gbonu lọ po mẹ.* 30  Humọ, e và sika do kọmẹ to ohọ̀ lọ mẹ, yèdọ to abò homẹ tọn lọ po abò he to gbonu lọ po mẹ. 31  E sọ yí atin amìnọ, dòtin adà mẹ tọn lẹ po dòtin ohọ̀n tọn lẹ po do basi ohọ̀n lẹ do họntonu abò homẹ tọn lọ tọn, taidi adà atọ́ntọ de.* 32  Atin amìnọ wẹ yè yí do basi ohọ̀n awe lọ lẹ, e sọ de yẹdide kelubimi lẹ, odétin lẹ po vounvoun lẹ tọn po do yé go bosọ và sika na yé; e sọ tùn sika do kelubimi lọ lẹ po odétin lọ lẹ po go. 33  Na nuhe dù họntonu tẹmpli* lọ tọn, lehe e yí atin amìnọ do basi dòtin ohọ̀n tọn he tin to adà ẹnẹtọ* lọ mẹ lẹ do niyẹn. 34  E sọ yí atin junipeli tọn do basi ohọ̀n awe. Ohọ̀n dopo tindo ohọ̀n-vi awe he nọ lilẹ́ to aṣígbè etọn lẹ kọ̀, ohọ̀n awetọ lọ lọsu tindo ohọ̀n-vi awe he nọ lilẹ́ to aṣígbè etọn lẹ kọ̀.+ 35  E de yẹdide kelubimi lẹ, odétin lẹ po vounvoun lẹ tọn po bo và sika flẹ́lẹ́ na yẹdide lọ lẹ. 36  E sọ yí zannu pipà he yin tito do ogbẹ́ atọ̀n ji lẹ po atin kedali tọn he yin tito lẹ po+ do basi awánu homẹ tọn+ lọ. 37  To owhe ẹnẹtọ mẹ, to osun Zivi* tọn mẹ, dodonu ohọ̀ Jehovah tọn ko yin didoai;+ 38  podọ to owhe 11tọ mẹ, to osun Buli* tọn mẹ (enẹ wẹ osun ṣinatọ̀ntọ), ohọ̀ lọ yin tadona mlẹnmlẹn sọgbe hẹ yẹdide họ̀gbigbá tọn etọn.+ Owhe ṣinawe wẹ e yí do gbá ẹ.

Nudọnamẹ Odò Tọn

To paa mẹ, “visunnu Islaeli tọn.”
Pọ́n Nud. B15.
Pọ́n Nud. B8.
Awagbà dopo sọzẹn hẹ cm 44,5. Pọ́n Nud. B14.
To paa mẹ, “tẹmpli ohọ̀ lọ tọn.”
Kavi “gblo.”
Tofi e to alọdlẹndo Fiwiwe lọ.
To paa mẹ, “adusiwhé.”
Enẹ wẹ, do ohọ̀ lọ mẹ.
Enẹ wẹ, Fiwiwe lọ, he tin to Fiwiwe Gbaugbau lọ nukọn.
Enẹ wẹ, Fiwiwe Gbaugbau lọ.
To paa mẹ, “to homẹ po gbonu po.”
Vlavo ehe to alọdlẹndo aliho he mẹ owhlẹ ohọ̀n lọ tọn lẹ yin gigla te kavi gbigblo po tedidi ohọ̀n lọ lẹ tọn po.
Tofi e to alọdlẹndo Fiwiwe lọ.
Vlavo ehe to alọdlẹndo aliho he mẹ owhlẹ ohọ̀n lọ tọn lẹ yin gigla te kavi gbigblo po tedidi ohọ̀n lọ lẹ tọn po.
Pọ́n Nud. B15.
Pọ́n Nud. B15.