Accessibility setting

De ogbè dopo

Yì hosọ flinflin lẹ ji

Yì todowhinnu hosọ lẹ tọn ji

Yì hosọ lẹ ji

Kunnudetọ Jehovah Tọn Lẹ

Gungbe

Biblu Intẹnẹt Ji Tọn

OWE WIWE LẸ—LẸDOGBEDEVOMẸ AIHỌN YỌYỌ TỌN

1 Ahọlu lẹ 17:1-24

NUHE E BẸHẸN LẸ

  • Yẹwhegán Elija dọ dọdai akúdido tọn (1)

  • Ohọ́n lẹ na núdùdù Elija (2-7)

  • Elija dla asuṣiọsi de pọ́n to Zalefati (8-16)

  • Visunnu asuṣiọsi lọ tọn kú bo yin finfọn (17-24)

17  Todin, Elija*+ Tiṣbinu lọ he nọ nọ̀ Giliadi+ dọna Ahabi dọmọ: “Dile Jehovah Jiwheyẹwhe Islaeli tọn he n’nọ sẹ̀n* lọ togbẹ̀, ahun kavi jikun depope ma na ja to owhe ehelẹ gblamẹ, adavo to gbedide ṣie glọ!”+  Ohó Jehovah tọn sọ wá e dè dọmọ:  “Tọ́n sọn fi bo yì whèzẹtẹn-waji bosọ whlá dewe do Agbàdo* Keliti tọn mẹ to whèzẹtẹn Jọdani tọn.  Hiẹ ni nù sọn asisa lọ mẹ, yẹn nasọ degbena ohọ́n lẹ nado nọ hẹn núdùdù wá na we to finẹ.”+  E sọ dedo to afọdopolọji bo wà kẹdẹdile Jehovah ko dọ do; e yì bo gbọṣi Agbàdo* Keliti tọn pá to whèzẹtẹn Jọdani tọn.  Ohọ́n lẹ sọ nọ hẹn akla po olàn po wá na ẹn to afọnnu podọ akla po olàn po to whèjai, ewọ sọ nọ nù sọn asisa lọ mẹ.+  Ṣigba to azán delẹ godo, asisa lọ hú,+ na jikun depope ma ja to aigba lọ ji wutu.  Ohó Jehovah tọn sọ wá e dè dọmọ:  “Fọ́n bo yì Zalefati he yin Sidoni tọn bosọ gbọṣi finẹ. Pọ́n! Yẹn na degbena asuṣiọsi de to finẹ nado na we núdùdù.”+ 10  Ewọ sọ fọ́n bo yì Zalefati. Whenue e jẹ họntonu tòdaho lọ tọn, asuṣiọsi de tin to finẹ bo to nake ṣinyan. E sọ ylọ nawe lọ bo dọna ẹn dọmọ: “Jaale, hẹn osin vude wá na mi to kọfo de mẹ nado nù.”+ 11  Dile nawe lọ dedo osin lọ ba gbé, e dọhlan ẹn dọmọ: “Jaale, hẹn akla vude do alọmẹ wá na mi.” 12  Nawe lọ sọ dọmọ: “Dile Jehovah Jiwheyẹwhe towe togbẹ̀, akla depope ma to asi e, adavo linfin alọgogo dopo to ozẹ́n daho lọ mẹ gọna amì vude to ozẹ́n pẹvi+ lọ mẹ. Nake vude ṣinyan wẹ n’te, enẹgodo n’na yì whégbè bo na wleawu onú kleun de tọn na yẹn po visunnu ṣie po. Eyin mí dù i fó janwẹ, be okú wẹ pò na mí.” 13  Whenẹnu wẹ Elija dọna ẹn dọmọ: “A dibu blo. Yì bo wà kẹdẹdile a ko dọ do. Ṣigba, yí nuhe to asi we lọ do wleawu akla plẹ́bẹ́ nùdo dopo tọn na mi whẹ́, bo hẹn ẹn wá na mi. Enẹgodo, a sọgan wleawu onú kleun de tọn na hiẹ po visunnu towe po. 14  Na nuhe Jehovah Jiwheyẹwhe Islaeli tọn dọ die: ‘Ozẹ́n daho linfin tọn lọ ma na jẹvọ́, mọ ozẹ́n pẹvi amì tọn lọ ma na jẹvọ́ kakajẹ gbeegbe Jehovah na hẹn jikun ja do aigba nukunmẹ.’”+ 15  Enẹwutu, nawe lọ yì bo wà kẹdẹdile Elija ko dọ do, ewọ po e po gọna whédo etọn sọ mọ núdù na azán susu.+ 16  Ozẹ́n daho linfin tọn lọ ma jẹvọ́, mọ ozẹ́n pẹvi amì tọn lọ ma jẹvọ́, sọgbe hẹ ohó he Jehovah ko dọ gbọn Elija gblamẹ. 17  To onú ehelẹ godo, visunnu nawe whénọ lọ tọn bẹ azọ̀n, azọ̀n lọ sọ sinyẹn sọmọ bọ gbigbọ etọn nọte.+ 18  Whenẹnu, nawe lọ dọna Elija dọmọ: “Etẹ a ka tindo sọta mi,* hiẹ omẹ Jiwheyẹwhe nugbo lọ tọn E? Kavi nado hẹn mi flin whẹhuhu ṣie bo hù visunnu ṣie wutu wẹ hiẹ do wáfi ya?”+ 19  Ṣigba, ewọ dọna ẹn dọmọ: “Ze visunnu towe na mi.” E sọ yí visunnu lọ sọn awà nawe lọ tọn mẹ bo ze e hẹji yì abò aga tọn lọ mẹ, fie ewọ lọsu nọ nọ̀, bosọ tẹ́ ẹ do adọzan etọn titi ji.+ 20  E sọ dawhá ylọ Jehovah dọmọ: “Jehovah Jiwheyẹwhe ṣie E,+ be hiẹ ka na hẹn oylan wá asuṣiọsi he yí mi do whégbè lọ ji gbọn visunnu etọn hùhù dali wẹ ya?” 21  Enẹgodo, e dlẹn ede do ovi lọ ji whla atọ̀n bo dawhá ylọ Jehovah dọmọ: “Jehovah Jiwheyẹwhe ṣie E, jaale, gbọ ogbẹ̀* ovi ehe tọn ni gọwá.” 22  Jehovah sọ sè obiọ Elija tọn+ bọ ogbẹ̀* ovi lọ tọn gọwá, ewọ sọ yín fọ́n.*+ 23  Elija sọ ze ovi lọ bo hẹn ẹn jẹte sọn abò aga tọn lọ mẹ wá ohọ̀ lọ mẹ bosọ ze e jo na onọ̀ etọn; Elija sọ dọmọ: “Pọ́n, visunnu towe togbẹ̀.”+ 24  Whenẹnu wẹ nawe lọ dọna Elija dọmọ: “Din wẹ n’yọnẹn dọ omẹ Jiwheyẹwhe nugbo lọ tọn+ wẹ hiẹ yin nugbonugbo podọ nugbo wẹ ohó Jehovah tọn he nọ tọ́n sọn onù towe mẹ.”

Nudọnamẹ Odò Tọn

Zẹẹmẹdo “Jehovah Wẹ Jiwheyẹwhe Ṣie.”
To paa mẹ, “mẹhe nukọn yẹn ṣite te.”
Kavi “Agbàdo Tọ̀sisa tọn.” Pọ́n Zẹm.
Kavi “Agbàdo Tọ̀sisa tọn.” Pọ́n Zẹm.
Kavi “Etẹwẹ yẹn tindo nado wà hẹ we, . . .?”
Kavi “alindọn.”
Kavi “alindọn.”
Kavi “sọ gọwá ogbẹ̀.”