Accessibility setting

De ogbè dopo

Yì hosọ flinflin lẹ ji

Yì todowhinnu hosọ lẹ tọn ji

Yì hosọ lẹ ji

Kunnudetọ Jehovah Tọn Lẹ

Gungbe

Biblu Intẹnẹt Ji Tọn

OWE WIWE LẸ—LẸDOGBEDEVOMẸ AIHỌN YỌYỌ TỌN

1 Ahọlu lẹ 11:1-43

NUHE E BẸHẸN LẸ

  • Asi Sọlomọni tọn lẹ lẹ́ ahun etọn (1-13)

  • Mẹhe diọnukunsọ Sọlomọni lẹ (14-25)

  • Yè dopà hẹnnu 10 tọn na Jeloboami (26-40)

  • Sọlomọni kú; Lehoboami duahọlu (41-43)

11  Ṣigba, Ahọlu Sọlomọni wá yiwanna yọnnu jonọ susu+ gbọnvona viyọnnu Falo tọn:+ yèdọ yọnnu Moabinu,+ Amọninu,+ Edominu, Sidoninu+ po Hetinu+ lẹ po.  Yọnnu ehelẹ wá sọn akọta he Jehovah ko dọho yetọn na Islaelivi lẹ mẹ dọmọ: “Mìwlẹ ma dona kọ̀n mìde dopọ hẹ yé,* mọ yewlẹ ma dona kọ̀n yede dopọ hẹ mì, na e họnwun dọ yé na lẹ́ ahun mìtọn nado hodo yẹwhe yetọn lẹ.”+ Ṣigba, Sọlomọni dọ̀n do yé go bo yiwanna yé.  E sọ tindo asi 700 he yin ahọvi-yọnnu lẹ gọna asimọwhlá 300, bọ asi etọn lẹ wá lẹ́ ahun etọn vudevude.*  To yọnhowhe Sọlomọni tọn mẹ,+ asi etọn lẹ lẹ́ ahun etọn nado hodo yẹwhe devo lẹ+ bọ ahun etọn masọ yin pipé hlan* Jehovah Jiwheyẹwhe etọn taidi ahun Davidi otọ́ etọn tọn ba.  Sọlomọni sọ hodo Aṣitolẹti,+ yẹwhe-yọnnu Sidoninu lẹ tọn, gọna Milkomi,+ yẹwhe hiọawu Amọninu lẹ tọn.  Sọlomọni sọ wà nuhe ylan to nukun Jehovah tọn mẹ, podọ e ma hodo Jehovah mlẹnmlẹn* dile Davidi otọ́ etọn ko wà do.+  Whenẹnu wẹ Sọlomọni gbá ofi yiaga+ de na Kemọṣi, yẹwhe hiọawu Moabi tọn do osó he pannukọn Jelusalẹm ji, podọ na Molẹki,+ yẹwhe hiọawu Amọninu lẹ tọn.+  Mọ wẹ e wà do na asi jonọ etọn lẹpo he nọ basi avọ́sinsan mimẹ̀ lẹ po avọ́sinsan devo lẹ po hlan yẹwhe yetọn lẹ.  Jehovah sọ gblehomẹ sinsinyẹn do Sọlomọni go, na ahun etọn ko lẹ́ sọn Jehovah Jiwheyẹwhe Islaeli tọn dè wutu,+ yèdọ mẹhe ko sọawuhia ẹ whla awe+ 10  bo ko sọ na ẹn avase gando onú ehe lọ go dọ ewọ ma dona hodo yẹwhe devo lẹ.+ Ṣigba, e ma setonuna nuhe Jehovah ko degbe etọn. 11  Todin, Jehovah dọna Sọlomọni dọmọ: “Na hiẹ ko wà ehe bo ma yìn alẹnu ṣie po osẹ́ndoai ṣie he yẹn ko na we lẹ po wutu, yẹn na tlẹ́n ahọluduta lọ sọn asi we dandan bo na yí i na dopo to devizọnwatọ towe lẹ mẹ.+ 12  Ṣigba, na otọ́ towe Davidi tọn wutu, yẹn ma na wà ehe to gbẹwhenu towe. Alọ visunnu towe tọn mẹ wẹ yẹn na tlẹ́n ẹn sọn,+ 13  amọ́ n’ma na tlẹ́n ahọluduta lọ pete.+ N’na jo hẹnnu dopo do na visunnu towe,+ na Davidi devizọnwatọ ṣie tọn wutu podọ na Jelusalẹm he yẹn ko de lọ tọn wutu.”+ 14  Whenẹnu, Jehovah fọ́n avùnnukundiọsọmẹtọ de do Sọlomọni ji,+ enẹ wẹ Hadadi Edominu lọ he wá sọn kúnkan ahọlu Edomi tọn mẹ.+ 15  Whenue Davidi gbawhàn Edomi tọn,+ awhàngán Joabi hẹji yì nado diṣiọ mẹhe yin hùhù lẹ tọn, e sọ tẹnpọn nado hù sunnu he to Edomi lẹpo. 16  (Na Joabi po omẹ Islaeli tọn lẹpo po gbọṣi finẹ na osun ṣidopo kakajẹ whenue ewọ hù sunnu he to Edomi lẹpo.*) 17  Ṣigba, Hadadi họnyi po devizọnwatọ otọ́ etọn tọn he yin Edominu delẹ po, bọ yé yì Egipti; Hadadi gbẹ́ yin yọpọ sunnu de to whenẹnu. 18  Yé dedo sọn Midiani bo wá Palani. Yé sọ plan sunnu delẹ hẹn sọn Palani+ yì Egipti, yèdọ yì Falo ahọlu Egipti tọn dè, bọ ewọ na ẹn ohọ̀, núdùdù po aigba po. 19  Hadadi mọ nukundagbe Falo tọn sọmọ bọ ewọ na ẹn nọviyọnnu asi etọn titi, yèdọ Tapenẹsi ahọsi* lọ tọn taidi asi. 20  To nukọn mẹ, nọviyọnnu Tapenẹsi tọn lọ ji visunnu de he nọ yin Genubati, bọ Tapenẹsi pọ́n e go whẹ́n* to owhé Falo tọn gbè, Genubati sọ gbọṣi owhé Falo tọn gbè to visunnu Falo tọn lẹ ṣẹnṣẹn. 21  Hadadi sè to Egipti dọ Davidi ko yin hinhẹn nado mlọnai hẹ tọgbo etọn lẹ+ podọ awhàngán Joabi ko kú.+ Enẹwutu, Hadadi dọna Falo dọmọ: “Do mi hlan, na yẹn nido yì otò ṣie titi mẹ.” 22  Ṣigba, Falo dọna ẹn dọmọ: “Etẹwẹ whèdo we to dè e bọ a do to dindin nado yì otò towe titi mẹ todin?” Ewọ sọ gblọn dọmọ: “Nude ma whèdo mi, amọ́ jaale bo do mi hlan.” 23  Jiwheyẹwhe sọ fọ́n avùnnukundiọsọmẹtọ devo+ do Sọlomọni ji, enẹ wẹ Lezọni visunnu Eliada tọn, mẹhe ko họnyi sọn oklunọ etọn Hadadezẹli+ ahọlu Zoba tọn dè. 24  E bẹ sunnu lẹ pli bo lẹzun ogán jaguda-gbẹ́ de tọn to whenue Davidi gbawhàn yetọn.*+ Yé sọ yì Damasku+ bo sawhé do finẹ bosọ jẹ gandu ji do Damasku ji. 25  Ewọ sọ lẹzun avùnnukundiọsọmẹtọ Islaeli tọn to gbẹzan Sọlomọni tọn lẹpo mẹ bo yidogọna danú he Hadadi ko wà lẹ, podọ e tindo wangbẹna sinsinyẹn na Islaeli to whenue e to gandu do Silia ji. 26  Jeloboami+ visunnu Nebati tọn sọ tin to finẹ ga, yèdọ Eflaiminu de he wá sọn Zeleda bo yin devizọnwatọ Sọlomọni tọn+ bọ onọ̀ etọn he nọ yin Zelua yin asuṣiọsi de. Ewọ lọsu jẹ atẹṣi* sọta ahọlu ji.+ 27  Nuhewutu e do ṣiatẹ sọta ahọlu die: Sọlomọni ko do Pópló* lọ+ bo ko sọ sú fihe pò to adó Tòdaho Davidi otọ́ etọn tọn+ go lẹ. 28  Amọ́, Jeloboami ehe yin sunnu nugopetọ de. Whenue Sọlomọni mọdọ dẹpẹ lọ yin azọ́n sinsinyẹnwatọ, e yí i do basi nugopọntọ+ do mẹhe yin dide na azọ́n sinsinyẹn wiwà sọn whédo Josẹfu tọn mẹ lẹpo ji. 29  To ojlẹ enẹ mẹ, Jeloboami tọ́n sọn Jelusalẹm bọ yẹwhegán Ahija+ Ṣilonu lọ mọ ẹn to aliji. Ahija do awù yọyọ de bọ yé omẹ awe lẹ kẹdẹ wẹ tin to danji to finẹ. 30  Ahija sọ hẹn awù yọyọ he e do lọ go bo tlẹ́n ẹn do 12. 31  Enẹgodo, e dọna Jeloboami dọmọ: “Yí tintlẹ́n awù lọ tọn ao, na nuhe Jehovah Jiwheyẹwhe Islaeli tọn dọ die: ‘Yẹn na tlẹ́n ahọluduta lọ sọn alọ Sọlomọni tọn mẹ bo na na we hẹnnu ao.+ 32  Ṣigba, hẹnnu dopo na gbẹ́ pò na ewọ,+ na devizọnwatọ ṣie Davidi tọn wutu+ podọ na Jelusalẹm, tòdaho he yẹn ko de to hẹnnu Islaeli tọn lẹpo mẹ lọ tọn wutu.+ 33  Yẹn na wà ehe, na yewlẹ ko jo mi do+ bo nọ dẹ́ do odò na Aṣitolẹti yẹwhe-yọnnu Sidoninu lẹ tọn, na Kemọṣi yẹwhe Moabi tọn podọ na Milkomi yẹwhe Amọninu lẹ tọn, yé masọ zinzọnlin to aliho ṣie lẹ ji gbọn nuhe sọgbe to nukun ṣie mẹ wiwà dali podọ gbọn tonusisena osẹ́ndoai ṣie lẹ po whẹdida ṣie lẹ po dali, dile otọ́ etọn Davidi wà do. 34  Ṣigba, yẹn ma na yí ahọluduta lọ pete sọn alọ etọn mẹ, yẹn nasọ hẹn ẹn do otẹn ahọvi tọn mẹ to gbẹzan etọn lẹpo mẹ, na Davidi devizọnwatọ ṣie he yẹn ko de lọ tọn wutu,+ na ewọ setonuna gbedide ṣie lẹ po osẹ́ndoai ṣie lẹ po wutu. 35  Ṣigba, n’na yí gánzinpo lọ sọn alọ visunnu etọn tọn mẹ bo na yí i na we, enẹ wẹ hẹnnu ao.+ 36  Yẹn na jo hẹnnu dopo do na visunnu etọn, na Davidi devizọnwatọ ṣie nido sọgan tindo miyọ́ngbán de to nukọn ṣie kakadoi to Jelusalẹm,+ yèdọ tòdaho he yẹn ko de na dee nado ze oyín ṣie do e ji lọ. 37  Yẹn na de hiẹ bọ a na dugán do mẹhe jlo we lẹpo ji,* a nasọ lẹzun ahọlu do Islaeli ji. 38  Podọ eyin hiẹ setonuna nuhe yẹn degbe etọn na we lẹpo bo nọ zinzọnlin gbọn aliho ṣie lẹ ji bosọ nọ wà nuhe sọgbe to nukun ṣie mẹ gbọn tonusisena osẹ́ndoai ṣie lẹ po gbedide ṣie lẹ po dali, kẹdẹdile Davidi devizọnwatọ ṣie ko wà do,+ yẹn nasọ tin hẹ we. Yẹn na gbá owhé he na dẹn-to-aimẹ de na we, kẹdẹdile n’ko gbá na Davidi do,+ n’nasọ yí Islaeli na we. 39  Yẹn nasọ dowinyan kúnkan Davidi tọn na ehe wutu,+ amọ́ e ma na yin kakadoi.’”+ 40  Enẹwutu, Sọlomọni tẹnpọn nado hù Jeloboami, ṣigba Jeloboami họnyi Egipti, yèdọ yì Ṣiṣaki+ ahọlu Egipti tọn dè,+ e sọ gbọṣi Egipti kakajẹ whenue Sọlomọni kú. 41  Na nuhe dù otàn Sọlomọni tọn he pò, yèdọ nuhe e wà lẹpo po nuyọnẹn etọn po, be e ma yin kinkan do owe otàn Sọlomọni tọn mẹ ya?+ 42  Sọlomọni dugán do Islaeli pete ji to Jelusalẹm na owhe 40. 43  Enẹgodo, Sọlomọni yin hinhẹn nado mlọnai hẹ tọgbo etọn lẹ bo yin dìdì do Tòdaho Davidi otọ́ etọn tọn mẹ; visunnu etọn Lehoboami+ sọ lẹzun ahọlu do otẹn etọn mẹ.

Nudọnamẹ Odò Tọn

Kavi “Mìwlẹ ma dona biọ kanṣiṣa alọwle tọn mẹ hẹ yé.”
Kavi “asi etọn lẹ yinuwado e ji sinsinyẹn.”
Kavi “bọ e ma ze ahun etọn lẹpo jo na.”
To paa mẹ, “to gigọ́ mẹ.”
To paa mẹ, “ewọ sán sunnu he to Edomi lẹpo sẹ̀.”
E ma yin ahọsi he to gandu.
Kavi vlavo, “deanọ́na ẹn.”
To paa mẹ, “hù yé.”
To paa mẹ, “alọ etọn zedaga.”
Kavi “Milo.” Hogbe Heblugbe tọn de he zẹẹmẹdo “gọ́.”
Kavi “do nudepope he alindọn towe jlo ji.”