Accessibility setting

De ogbè dopo

Yì hosọ flinflin lẹ ji

Yì todowhinnu hosọ lẹ tọn ji

Yì hosọ lẹ ji

Kunnudetọ Jehovah Tọn Lẹ

Gungbe

Biblu Intẹnẹt Ji Tọn

OWE WIWE LẸ—LẸDOGBEDEVOMẸ AIHỌN YỌYỌ TỌN

1 Ahọlu lẹ 10:1-29

NUHE E BẸHẸN LẸ

  • Ahọsi Ṣeba tọn wá Sọlomọni dè (1-13)

  • Adọkun susugege Sọlomọni tọn (14-29)

10  Todin, ahọsi Ṣeba tọn ko sè linlin gando Sọlomọni go na nuhe dù oyín Jehovah tọn,+ enẹwutu e wá nado yí kanbiọ gigẹdẹ* lẹ do tẹ́n ẹn pọ́n.+  E plan omẹ susugege hodo ede+ wá Jelusalẹm po kanklosọ́ lẹ po he bẹ amì balsami* tọn+ gọna sika po zannu akuẹgegenu tọn susugege po. E yì Sọlomọni dè bo dọ nuhe to ahun etọn mẹ lẹpo na ẹn.  Sọlomọni sọ na gblọndo kanbiọ etọn lẹpo tọn. Nudepope ma vẹawu gbau na* ahọlu nado basi zẹẹmẹ etọn na ẹn.  Whenue ahọsi Ṣeba tọn ko mọ nuyọnẹn Sọlomọni tọn lẹpo,+ owhé he e gbá,+  núdùdù he nọ wá tafo etọn ji,+ lehe devizọnwatọ etọn lẹ nọ sinai do, lehe núdùdù-mátọ etọn lẹ nọ wazọ́n do podọ nusisọ́ yetọn, ahànjinọtọ etọn lẹ gọna avọ́sinsan mimẹ̀ he ewọ nọ basi whẹwhẹ to ohọ̀ Jehovah tọn mẹ lẹ, awuji i tlala.*  Enẹwutu, e dọna ahọlu dọmọ: “Nugbo wẹ linlin he n’sè to otò ṣie titi mẹ gando nuwadotana* towe lẹ po nuyọnẹn towe po go.  Amọ́, n’ma yí linlin lọ lẹ sè kakajẹ whenue n’wá bo yí nukun ṣie titi do mọ. Podọ pọ́n! N’ma tlẹ ko sè odaa etọn dai. Nuyọnẹn towe po adọkun towe po yiaga zẹ̀ nuhe n’ko sè lẹ go taun.  Ayajẹnọ wẹ omẹ towe lẹ, podọ ayajẹnọ wẹ devizọnwatọ he nọ nọte to nukọn towe to whepoponu bo nọ to nuyọnẹn towe dotó lẹ!+  Na Jehovah Jiwheyẹwhe towe ni yin pipà,+ ewọ he hùnhomẹ do gowe bo ze we do ofìn Islaeli tọn ji. Na owanyi madopodo Jehovah tọn na Islaeli wutu, e ko de we taidi ahọlu nado hẹn whẹdida po dodowiwa po ṣẹ.” 10  Whenẹnu, e na ahọlu lọ talẹnti* sika tọn 120 po amì balsami* tọn+ susugege po gọna zannu akuẹgegenu tọn lẹ.+ Mẹde ma ko sọ hẹn amì balsami* tọn wá pọ́n bọ e sù sọ dehe ahọsi Ṣeba tọn hẹnwa na Ahọlu Sọlomọni. 11  Tọjihun daho Hilami tọn he hẹn sika wá sọn Ofili+ lẹ sọ hẹn atin algọmi tọn+ susugege po zannu akuẹgegenu tọn lẹ po wá sọn Ofili ga.+ 12  Ahọlu yí atin algọmi tọn lọ lẹ do basi họ̀glatin lẹ na ohọ̀ Jehovah tọn podọ na owhé* ahọlu tọn, e sọ yí do basi ajalẹn po hànjinu okànnọ lẹ po na hànsinọ lẹ.+ Atin algọmi tọn enẹ nkọ lẹ ma ko sọ yin hinhẹnwa kavi sọ yin mimọ gbede kakajẹ egbé. 13  Ahọlu Sọlomọni sọ na ahọsi Ṣeba tọn nuhe ahọsi lọ jlo bo biọ lẹpo, gbọnvona nuhe ewọ lọsu gbọn alọtútlú dali na ẹn lẹ.* Enẹgodo, ahọsi lọ dedo bo lẹkọyi aigba etọn titi ji to pọmẹ hẹ devizọnwatọ etọn lẹ.+ 14  Zínpinpẹn sika he nọ biọ whégbè na Sọlomọni to whemẹwhemẹ tọn yì talẹnti sika tọn 666,+ 15  mahia dehe ajọwatọ lẹ nọ hẹnwa gọna ale he ajọtọ lẹ, ahọlu Alabianu lẹ tọn lẹpo po ayimatẹn-gán aigba lọ tọn lẹ po nọ hẹnwa. 16  Ahọlu Sọlomọni sọ yí sika flusọ́ do basi awọ̀yinu daho 200+ (sika ṣekẹli* 600 wẹ yin yiyizan na awọ̀yinu dopodopo)+ 17  gọna gaglo* 300 he yè yí sika flusọ́ do basi (sika mina* atọ̀n wẹ yin yiyizan na gaglo dopodopo). Enẹgodo, ahọlu bẹ yé do Ohọ̀ Zungbo Lẹbanọni tọn lọ mẹ.+ 18  Ahọlu sọ yí ajinnakú-dú do basi ofìn daho de+ bo và sika kinkọ̀n na ẹn.+ 19  Pèkán debọdo-dego ṣidopo wẹ yì ofìn lọ kọ̀n, họta loboto de sọ to ofìn lọ godo, bọ aisintẹn lọ tindo awà awe, kinnikinni+ awe sọ to ote to awà lọ lẹ pá. 20  Humọ, kinnikinni 12 to ote to pèkán ṣidopo lọ lẹ ji, yèdọ dopo to tónu dopodopo pèkán ṣidopo lọ lẹ tọn. Ahọluduta devo depope ma ko basi ehe nkọ pọ́n. 21  Sinnu-gbán Ahọlu Sọlomọni tọn lẹpo wẹ yè yí sika do basi, podọ núzinzan Ohọ̀ Zungbo Lẹbanọni tọn+ lọ tọn lẹpo wẹ yè yí sika akú do basi. Yè ma yí fataka do basi nudepope, na fataka ma nọ yin pinpọnhlan di nujọnu to azán Sọlomọni tọn lẹ gbè.+ 22  Na ahọlu tindo tọjihun daho Talṣiṣi+ tọn lẹ to hùji gọna tọjihun daho Hilami tọn lẹ. Whladopo to owhe atọ̀n mẹ, tọjihun daho Talṣiṣi tọn lẹ nọ doagban sika, fataka po ajinnakú-dú+ po tọn wá, gọna ozín lẹ po ahlínhán lẹ po. 23  Gbọnmọ dali, Ahọlu Sọlomọni hugan ahọlu he to aigba ji lẹpo to adọkun+ po nuyọnẹn po mẹ taun.+ 24  Mẹhe to aigba ji lẹpo wẹ nọ dín nado wá Sọlomọni nukọn* nado dotó nuyọnẹn he Jiwheyẹwhe zedo ahun etọn mẹ.+ 25  Dopodopo yetọn nọ hẹn nunina de wá—yèdọ núzinzan fataka tọn lẹ, núzinzan sika tọn lẹ, awù lẹ, gbaja, amì balsami* tọn, osọ́ lẹ po otlò* lẹ po—podọ mọ wẹ e nọ yindo to whemẹwhemẹ. 26  Sọlomọni sọ to osọ́-kẹkẹ lẹ po osọ́* lẹ po bẹpli mapote; e tindo osọ́-kẹkẹ 1 400 po osọ́* 12 000 po,+ e sọ bẹ yé do tòdaho osọ́-kẹkẹ lẹ tọn mẹ sẹpọ fie ahọlu te to Jelusalẹm.+ 27  Ahọlu hẹn fataka sù tlala to Jelusalẹm taidi zannu, bọ atin kedali tọn sù tlala taidi atin sikomoli tọn to Ṣefela.+ 28  Osọ́ Sọlomọni tọn lẹ nọ yin hinhẹnwa sọn Egipti, podọ ogbẹ́ ajọwatọ ahọlu tọn lẹ tọn nọ họ̀ osọ́ susu dopọ ji* yin akuẹ tangan de.+ 29  Dopodopo osọ́-kẹkẹ he yin hinhẹnwa sọn Egipti lẹ tọn nọ họ̀ fataka-kuẹ 600, bọ osọ́ dopo nọ họ̀ fataka-kuẹ 150; yelọsu nọ sà yé na ahọlu Hetinu+ lẹ tọn lẹpo po ahọlu Silia tọn lẹ po.

Nudọnamẹ Odò Tọn

Kavi “yí oló.”
Pọ́n Zẹm.
To paa mẹ, “ma whlá do.”
To paa mẹ, “gbigbọ de masọ pò to ewọ mẹ ba.”
Kavi “ohó.”
Talẹnti dopo sọzẹn hẹ kg 34,2. Pọ́n Nud. B14.
Pọ́n Zẹm.
Pọ́n Zẹm.
Kavi “họ̀nmẹ.”
To paa mẹ, “nuhe e na ẹn sọgbe hẹ alọ Ahọlu Sọlomọni tọn.”
Ṣekẹli dopo sọzẹn hẹ g 11,4. Pọ́n Nud. B14.
Awọ̀yinu pẹvi de he ogádetọ lẹ nọ saba hẹn.
To Owe-Wiwe Heblu tọn lẹ mẹ, mina dopo sọzẹn hẹ g 570. Pọ́n Nud. B14.
To paa mẹ, “dín nukunmẹ Sọlomọni tọn.”
Pọ́n Zẹm.
Kanlin de he taidi kẹtẹkẹtẹ bo nọ yin jiji eyin kẹtẹkẹtẹ asu hẹ osọ́ asi.
Kavi “osọ́nọ.”
Kavi “osọ́nọ.”
Kavi vlavo, “sọn Egipti podọ sọn Kue; ajọwatọ ahọlu tọn lẹ nọ họ̀ yé sọn Kue,” ehe sọgan ko to alọdlẹndo Silisia.