Yì hosọ lẹ ji

Yì hosọ flinflin lẹ ji

Yì todowhinnu hosọ lẹ tọn ji

Kunnudetọ Jehovah Tọn Lẹ

Gungbe

Biblu Intẹnẹt Ji Tọn | OWE WIWE LẸ—LẸDOGBEDEVOMẸ AIHỌN YỌYỌ TỌN

1 Ahọlu lẹ 1:1-53

NUHE E BẸHẸN LẸ

  • Davidi po Abiṣagi po (1-4)

  • Adonija dín gánzinpo (5-10)

  • Natani po Bati-ṣeba po yinuwa (11-27)

  • Davidi degbe dọ yè ni yiamisisadode Sọlomọni (28-40)

  • Adonija họnyi agbà lọ kọ̀n (41-53)

1  Todin, Ahọlu Davidi ko poyọnho+ bọ owhe* etọn ko sẹyì, podọ eyin yé tlẹ bẹ avọ̀ lẹ ṣinyọnna ẹn, e ma nọ hlá yozò.  Enẹwutu, devizọnwatọ etọn lẹ dọmọ: “Na awhli de, yèdọ yọnnu he to alọji de, ni yin dindin na oklunọ ṣie ahọlu, bọ ewọ na nọ pọ́n ahọlu go taidi nukunpedomẹgotọ etọn. E na nọ mlọnai to awà towe lẹ mẹ, na oklunọ ṣie ahọlu nido sọgan hlá yozò.”  Yé sọ dín awhli whanpẹnọ de gbọn aigba Islaeli tọn pete ji bo wá mọ Abiṣagi+ Ṣunẹminu+ lọ bosọ hẹn ẹn wá ahọlu dè.  Viyọnnu lọ yọnwhanpẹ taun, e sọ lẹzun nukunpedomẹgotọ ahọlu tọn bo nọ pọ́n e go, ṣigba ahọlu ma tindo kọndopọ zanhẹmẹ tọn hẹ ẹ.  To ojlẹ enẹ mẹ, Adonija+ visunnu Hagiti tọn to ede zedaga dọmọ: “Yẹn wẹ na duahọlu!” E sọ wleawuna osọ́-kẹkẹ de po osọ́nọ lẹ po bọ sunnu 50 nọ to wezunhọ̀n to nukọnna ẹn.+  Ṣigba, otọ́ etọn ma ko gbẹnuna ẹn* pọ́n gbede dọmọ: “Naegbọn a do wà onú mọnkọtọn?” Visunnu lọ sọ yọ́ndẹpẹ taun, podọ ewọ wẹ onọ̀ etọn ji bọdo Absalọmi go.  Adonija sọ dewé hẹ Joabi visunnu Zeluia tọn po Abiatali+ yẹwhenọ lọ po, bọ yé gọalọna ẹn bosọ nọgodona ẹn.+  Ṣigba, Zadọki+ yẹwhenọ lọ, Bẹnaia+ visunnu Jehoiada tọn, Natani+ yẹwhegán lọ, Ṣimei,+ Lei po awhànfuntọ huhlọnnọ Davidi tọn lẹ+ po ma nọgodona Adonija.  To godo mẹ, Adonija yí lẹngbọ, oyìn po kanlin dojó lẹ po do sanvọ́+ to zannu Zohelẹti tọn kọ̀n, sẹpọ Ẹn-logẹli, e sọ basi oylọna nọvisunnu etọn lẹpo, yèdọ visunnu ahọlu tọn lẹ, gọna sunnu Juda tọn lẹpo, yèdọ devizọnwatọ ahọlu tọn lẹ. 10  Ṣigba, e ma basi oylọna Natani yẹwhegán lọ, Bẹnaia po awhànfuntọ huhlọnnọ lẹ po kavi Sọlomọni nọvisunnu etọn. 11  Whenẹnu wẹ Natani+ dọna Bati-ṣeba+ he yin onọ̀ Sọlomọni tọn+ dọmọ: “Be a ma sè dọ Adonija+ visunnu Hagiti tọn ko duahọlu, bọ oklunọ mítọn Davidi ma yọ́n nudepope gandego wẹ ya? 12  Enẹwutu, jaale wá bo gbọ ma na we ayinamẹ, na a nido whlẹn ogbẹ̀ towe titi po ogbẹ̀* visunnu towe Sọlomọni tọn po.+ 13  Biọ họmẹ yì Ahọlu Davidi dè bo dọna ẹn dọ, ‘Be e ma yin hiẹ lọsu, oklunọ ṣie ahọlu, wẹ whlé na devizọnwatọ towe dọ: “Visunnu towe Sọlomọni wẹ na duahọlu bọdo go e, podọ ewọ wẹ na sinai to ofìn ṣie ji” ya?+ Bọ naegbọn e do yindọ Adonija wẹ wá duahọlu?’ 14  Dile hiẹ na gbẹ́ to finẹ bo to hodọ hẹ ahọlu, yẹn na biọ họmẹ hodo we bo na dohia dọ nugbo wẹ a dọ.” 15  Enẹwutu, Bati-ṣeba biọ họmẹ yì ahọlu dè, to abò ahọlu tọn mẹ. Ahọlu ko poyọnho taun, Abiṣagi+ Ṣunẹminu lọ sọ to nukunpedo ahọlu go. 16  Whenẹnu, Bati-ṣeba dẹ́ yìdo bo ṣinyọ́n nukunmẹ ai to ahọlu nukọn bọ ahọlu dọmọ: “Etẹwẹ yin obiọ towe?” 17  E sọ gblọn dọmọ: “Oklunọ ṣie, hiẹ lọsu wẹ yí Jehovah Jiwheyẹwhe towe do whlé na devizọnwatọ towe dọ, ‘Visunnu towe Sọlomọni wẹ na duahọlu bọdo go e, podọ ewọ wẹ na sinai to ofìn ṣie ji.’+ 18  Ṣigba, pọ́n! Adonija ko duahọlu, bọ oklunọ ṣie ahọlu ma yọ́n nudepope gandego.+ 19  E basi avọ́sinsan oyìnsú, kanlin dojó po lẹngbọ susugege po tọn bo basi oylọna visunnu ahọlu tọn lẹpo gọna Abiatali yẹwhenọ lọ po awhàngán Joabi po;+ ṣigba e ma basi oylọna devizọnwatọ towe Sọlomọni.+ 20  Podọ todin, oklunọ ṣie ahọlu E, nukun Islaelivi lẹpo tọn wẹ to ji we nado dọ mẹhe na sinai to ofìn oklunọ ṣie ahọlu tọn ji bọdo gowe na yé. 21  Eyin e ma yinmọ, tlolo he oklunọ ṣie ahọlu na ko yin hinhẹn nado mlọnai hẹ tọgbo etọn lẹ wẹ yẹn po visunnu ṣie Sọlomọni po na jẹ yinyin pinpọnhlan ji di pàdutọ.” 22  Dile ewọ gbẹ́ to hodọna ahọlu, Natani yẹwhegán lọ biọ họmẹ.+ 23  To afọdopolọji, e yin didọna ahọlu dọmọ: “Natani yẹwhegán lọ wá!” Ewọ sọ biọ họmẹ yì ahọlu dè bo dẹ́ do odò na ahọlu bosọ ṣinyọ́n nukunmẹ ai. 24  Enẹgodo, Natani dọmọ: “Oklunọ ṣie ahọlu E, be hiẹ wẹ dọ dọ, ‘Adonija wẹ na duahọlu bọdo go e, podọ ewọ wẹ na sinai to ofìn ṣie ji’ ya?+ 25  Na ewọ ko jẹte yì to egbehe nado basi avọ́sinsan+ oyìnsú, kanlin dojó po lẹngbọ susugege po tọn, e sọ basi oylọna visunnu ahọlu tọn lẹpo gọna awhàngán lẹ po Abiatali yẹwhenọ lọ po.+ Yé to dọ́n bo to dùdù bosọ to nùnù hẹ ẹ bo to didọ mapote dọmọ, ‘Gbẹ̀gaa na Ahọlu Adonija!’ 26  Ṣigba, e ma basi oylọna yẹn devizọnwatọ towe, kavi na Zadọki yẹwhenọ lọ po Bẹnaia+ visunnu Jehoiada tọn po gọna devizọnwatọ towe Sọlomọni. 27  Be oklunọ ṣie ahọlu ko nagbè ehe tọn bo ma dọ mẹhe na sinai to ofìn oklunọ ṣie ahọlu tọn ji bọdo ewọ go na yẹn devizọnwatọ towe wẹ ya?” 28  Todin, Ahọlu Davidi gblọn dọmọ: “Mì ylọ Bati-ṣeba na mi.” Ewọ sọ biọ họmẹ bo ṣite to ahọlu nukọn. 29  Ahọlu sọ whlé dọmọ: “Dile Jehovah, mẹhe whlẹn mi* sọn ayimajai lẹpo mẹ lọ togbẹ̀,+ 30  kẹdẹdile yẹn ko yí Jehovah Jiwheyẹwhe Islaeli tọn do whlé na we do dọ, ‘Visunnu towe Sọlomọni wẹ na duahọlu bọdo go e, podọ ewọ wẹ na sinai to ofìn ṣie ji do otẹn ṣie mẹ!’ mọ wẹ yẹn na hẹn ẹn di do to egbé.” 31  Enẹwutu, Bati-ṣeba dẹ́ yìdo bo ṣinyọ́n nukunmẹ ai to ahọlu nukọn bosọ dọmọ: “Oklunọ ṣie Ahọlu Davidi ni nọgbẹ̀ kakadoi!” 32  To afọdopolọji, Ahọlu Davidi dọmọ: “Mì ylọ Zadọki yẹwhenọ lọ, Natani yẹwhegán lọ po Bẹnaia+ visunnu Jehoiada tọn po na mi.”+ Yé sọ biọ họmẹ yì ahọlu dè. 33  Ahọlu dọna yé dọmọ: “Mì plan devizọnwatọ oklunọ mìtọn tọn lẹ bo dike visunnu ṣie Sọlomọni ni hẹ otlò* ṣie titi ji,+ na mì ni hẹn ẹn jẹte yì Gihọni.+ 34  Zadọki yẹwhenọ lọ po Natani yẹwhegán lọ po na yiamisisadode e+ to finẹ taidi ahọlu do Islaeli ji; whenẹnu, mì ni kún azò bo dọmọ, ‘Gbẹ̀gaa na Ahọlu Sọlomọni!’+ 35  Enẹgodo, mì hodo e lẹkọ, bọ ewọ na wá bo na sinai to ofìn ṣie ji; ewọ nasọ lẹzun ahọlu to otẹn ṣie mẹ, bọ yẹn na deazọ́nna ẹn taidi nukọntọ Islaeli po Juda po tọn.” 36  To afọdopolọji, Bẹnaia visunnu Jehoiada tọn dọna ahọlu dọmọ: “Niṣẹ! Na Jehovah Jiwheyẹwhe oklunọ ṣie ahọlu tọn ni hẹn ẹn di. 37  Kẹdẹdile Jehovah ko tin hẹ oklunọ ṣie ahọlu do, mọ wẹ e ni tin hẹ Sọlomọni do,+ podọ Ewọ ni hẹn ofìn etọn klohu ofìn oklunọ ṣie Ahọlu Davidi tọn.”+ 38  To whenẹnu, Zadọki yẹwhenọ lọ, Natani yẹwhegán lọ, Bẹnaia+ visunnu Jehoiada tọn gọna Kelẹtinu lẹ po Pelẹtinu lẹ po+ jẹte yì, yé sọ hẹn Sọlomọni hẹ otlò* Ahọlu Davidi tọn ji+ bosọ plan ẹn wá Gihọni.+ 39  Todin, Zadọki yẹwhenọ lọ ze azò amì tọn+ sọn gòhọ lọ mẹ+ bo yiamisisadode Sọlomọni,+ yé sọ jẹ azò kún ji bọ gbẹtọ lọ lẹpo jẹ abobo do ji dọmọ: “Gbẹ̀gaa na Ahọlu Sọlomọni!” 40  Enẹgodo, gbẹtọ lọ lẹpo hẹji hodo e bo to ován kún bosọ to aglinjẹ tlala, sọmọ bọ aigba kẹ̀ na awhágbe yetọn wutu.+ 41  Adonija po mẹhe e basi oylọna lẹpo po sè awhágbe lọ to whenue yé ko dùnú fó godo.+ Tlolo he Joabi sè nudidọ azò tọn lọ, e dọmọ: “Naegbọn zingidi po awhá po do to tòdaho lọ mẹ sọmọ?” 42  Dile ewọ gbẹ́ to hodọ, Jonatani+ visunnu Abiatali yẹwhenọ lọ tọn wá. Adonija sọ dọmọ: “Biọ họmẹ, na mẹdagbe* de wẹ hiẹ, podọ wẹndagbe de wẹ a na ko hẹnwa.” 43  Ṣigba, Jonatani gblọnna Adonija dọmọ: “Lala! Oklunọ mítọn Ahọlu Davidi ko yí Sọlomọni do doahọlu. 44  Ahọlu do Zadọki yẹwhenọ lọ, Natani yẹwhegán lọ, Bẹnaia visunnu Jehoiada tọn gọna Kelẹtinu lẹ po Pelẹtinu lẹ po hlan nado zọnhẹ ẹ, bọ yé hẹn ẹn nado hẹ otlò* ahọlu tọn ji.+ 45  Zadọki yẹwhenọ lọ po Natani yẹwhegán lọ po sọ yiamisisadode e taidi ahọlu to Gihọni. Enẹgodo, yé hẹji wá sọn dọ́n bo to aglinjẹ, bọ zingidi hò to tòdaho lọ mẹ. Awhágbe he mì sè lọ niyẹn. 46  Humọ, Sọlomọni ko sinai do ofìn ahọlu tọn ji. 47  Podọ dogọ, devizọnwatọ ahọlu tọn lẹ ko wá nado dọnudo oklunọ mítọn Ahọlu Davidi dọmọ, ‘Na Jiwheyẹwhe towe ni hẹn oyín Sọlomọni tọn tindo gigo hú oyín towe, podọ Ewọ ni hẹn ofìn etọn klohu ofìn towe!’ Whenẹnu, ahọlu dẹ́ do odò to adọzan etọn ji. 48  Ahọlu lọsu sọ dọmọ, ‘Pipà hlan Jehovah Jiwheyẹwhe Islaeli tọn, mẹhe ko de mẹde to egbé nado sinai to ofìn ṣie ji bo ko sọ dike bọ n’yí nukun ṣie titi do mọ!’” 49  Obu sọ jẹ mẹhe Adonija ko basi oylọna lọ lẹpo ji bọ dopodopo yetọn fọ́n bo wleali dedo. 50  Adonija lọsu jẹ budina Sọlomọni ji, enẹwutu e fọ́n bo yì tẹdo azò agbà lọ tọn lẹ go.+ 51  E sọ yin didọna Sọlomọni dọmọ: “Pọ́n, Adonija to budina Ahọlu Sọlomọni; e sọ yì tẹdo azò agbà lọ tọn lẹ go bo to didọ dọ, ‘Ahọlu Sọlomọni ni whlé na mi whẹ́ dọ ewọ ma na yí ohí do hù devizọnwatọ etọn.’” 52  Whenẹnu, Sọlomọni dọmọ: “Eyin ewọ yinuwa to aliho he jẹ mẹ, dopo tata to oda etọn lẹ mẹ ma na flẹ jai; ṣigba eyin oylan de yin mimọ to ewọ mẹ,+ be e dona yin hùhù.” 53  Enẹwutu, Ahọlu Sọlomọni domẹhlan nado yì plan ẹn jẹte sọn agbà lọ kọ̀n. Enẹgodo, e wá bo dẹ́ do odò na Ahọlu Sọlomọni, bọ Sọlomọni dọna ẹn dọmọ: “Yì owhé towe gbè.”

Nudọnamẹ Odò Tọn

To paa mẹ, “azán.”
Kavi “hẹn homẹgble e; kọhona ẹn.”
Kavi “alindọn towe titi po alindọn.”
Kavi “fli alindọn ṣie gọ̀.”
Kavi “otlò asi.” Kanlin de he taidi kẹtẹkẹtẹ bo nọ yin jiji eyin kẹtẹkẹtẹ asu hẹ osọ́ asi.
Kanlin de he taidi kẹtẹkẹtẹ bo nọ yin jiji eyin kẹtẹkẹtẹ asu hẹ osọ́ asi.
Kavi “mẹjọmẹ.”
Kanlin de he taidi kẹtẹkẹtẹ bo nọ yin jiji eyin kẹtẹkẹtẹ asu hẹ osọ́ asi.